Bagong mga Miembro kan Namamahalang Grupo

KAN Sabado, Oktubre 2, 1999, an Taonan na Miting kan Watch Tower Bible and Tract Society of Pennsylvania tinapos paagi sa sarong sorpresang paisi. An 10,594 nag-atender o nakakonektar paagi sa linya nin telepono naogmang marhay na madangog na may apat na bagong miembro na idinagdag sa Namamahalang Grupo kan Mga Saksi ni Jehova. An bagong mga miembro, na gabos linahidan na Kristiano, iyo si Samuel F. Herd; M. Stephen Lett; Guy H. Pierce; asin David H. Splane.

• Si Samuel Herd nagpoon na magpayunir kan 1958, asin poon 1965 sagkod 1997, sia nasa gibohon sa sirkito asin distrito. Pakatapos kaiyan, sia asin an saiyang agom, si Gloria, nagin kabtang kan pamilyang Bethel sa Estados Unidos, kun saen si Tugang na Herd nagtatrabaho sa Departamento sa Paglilingkod. Sia naglilingkod man bilang katabang sa Komite sa Paglilingkod.

• Si Stephen Lett nagpoon na magpayunir kan Disyembre 1966, asin poon 1967 sagkod 1971, sia naglingkod sa Bethel sa Estados Unidos. Kan Oktubre 1971, kinasal sinda kan saiyang agom, si Susan, asin naglingkod bilang espesyal payunir. Poon 1979 sagkod 1998, sia naglingkod bilang paraataman sa sirkito. Poon Abril 1998, sinda ni Susan nagin kabtang kan pamilyang Bethel sa Estados Unidos. Duman naglingkod sia sa Departamento sa Paglilingkod asin nagin katabang sa Komite sa Pagtotokdo.

• Si Guy Pierce nagpamilya dangan nagpoon na magpayunir kaibanan an saiyang agom kan Abril 1982. Sia naglingkod bilang paraataman sa sirkito poon 1986 sagkod 1997, kan sia asin an saiyang agom, si Penny, nagin kabtang kan pamilyang Bethel sa Estados Unidos. Si Tugang na Pierce naglilingkod bilang katabang sa Komite sa Tawohan.

• Si David Splane nagpoon na magpayunir kan Setyembre 1963. Naggradwar sa ika-42 na klase nin Gilead, sia naglingkod bilang misyonero sa Senegal, Aprika, dangan sa laog nin 19 taon sa gibohon sa sirkito sa Canada. Sia asin an saiyang agom, si Linda, nasa Bethel sa Estados Unidos poon kan 1990, kun saen si Tugang na Splane nagtrabaho sa mga departamento sa Paglilingkod asin Pagsurat. Poon 1998, sia nagin katabang sa Komite sa Pagsurat.

Dugang pa sa apat na bagong miembro, an Namamahalang Grupo ngonyan kompuesto ni C. W. Barber, J. E. Barr, M. G. Henschel, G. Lösch, T. Jaracz, K. F. Klein, A. D. Schroeder, L. A. Swingle, asin D. Sydlik. Ipinamimibi kan gabos na logod padagos na bendisyonan asin pakosogon ni Jehova an Namamahalang Grupo, na ngonyan pinadakula, mantang padagos kaiyan na pinangangatamanan an mga aktibidad kan banwaan nin Dios sa bilog na kinaban asin pinaglilingkodan an saindang espirituwal na intereses.