Ipinaliwanag an Librong Daniel!

AN MGA kombensionista galagang kumua kan saindang kopya kan bagong iluwas na 320-pahinas na librong Pay Attention to Daniel’s Prophecy! Ano an nagin saboot ninda manongod sa libro? Konsiderara an sinabi nin nagkapira.

“Arog nin kadaklan na tinedyer, nasasakitan ako sa pag-adal nin suanoy na kasaysayan. Kaya kan maresibi ko an sakong personal na kopya kan bagong libro, na Pay Attention to Daniel’s Prophecy! mayo talaga ako nin gana na basahon iyan, alagad prinobaran ko iyan. Sala nanggad an aktitud ko! Saro ini sa pinakamarahay na mga libro na nabasa ko kasuarin pa man. Iyan talagang nakaaatraer! Dai ko na namamatean na ako nagbabasa manongod sa sarong pangyayari kaidtong rinibong taon na an nakaagi. Sa kaenot-enote, an pagmate ko puede kong ibugtak an sakong sadiri sa kamugtakan ni Daniel. Talagang naiimahinar ko kun ano an magigin kamugtakan kun irayo ka sa saimong pamilya, ipadara sa ibang nasyon, asin baloon nin paorootro an saimong integridad. Salamat na marhay sa librong ini.”​​—Anya.

“An nakatabang na marhay sako iyo an dai mamamaluan na mensahe na lubos na kontrolado ni Jehova an mga bagay na nakakaapektar sa saiyang banwaan. Paagi sa mga bisyon asin pangatorogan ni Daniel saka kan sa iba na ininterpretar nia, malinaw na nungkang totogotan kan satong Dios an mga pangyayari na dai maotob sono sa saiyang katuyohan. Pinakokosog kaini an paglaom niato sa makahulang mga ladawan na yaon sa Biblia mapadapit sa bagong kinaban na gigibohon nia.”​—Chester.

“Nagustohan ko an buhay na pagkaladawan nindo ki Daniel. Orog ko siang namidbid paagi sa pagkatampok nindo kan saiyang mga kahaditan asin kapurisawan. Mas nasasabotan ko na kun taano ta nawilihan na marhay sia ni Jehova. Durante kan gabos na pagbalo asin paglamag sa saiya, an inisip nia bako an saiyang sadiri. An pangenot na inisip nia para ki Jehova asin sa Saiyang magayon na ngaran. Salamat sa pagpalataw kan mga puntong ini.”​—Joy.

“Ini an pinakahahalat niamo! Nungka kaidto na ipinaheling kun gurano kadakol na kabtang kan librong Daniel an aktuwal na aplikado sa balang saro sa sato. Pakatapos na mabasa an kadaklan na kabtang kan bagong libro kan banggi pagkaresibi ko kaiyan, kinaipuhan ko talagang pumondo asin pasalamatan si Jehova sa pamibi.”​​—Mark.

“Dai niamo linaoman an magigin epekto kaiyan sa samong mga aki. Sinda singko asin tres anyos. . . . Minsan ngani an mga estorya dapit ki Daniel, Hananias, Misael, asin Azarias kabilang na kaidto pa sa mga paborito ninda sa My Book of Bible Stories, an ipinaheling sa librong Daniel’s Prophecy nagkaigwa nin epekto sa sainda sa paagi na dai mi inantisipar. Maski ngani sinda aki pa, garo baga nakamate sinda na an matanos na hoben na mga lalaking ini may kahulogan sa sainda. Kanigoan karahay na mga arogan para sa samong mga aki! Abaa kamakangangalas na kasangkapan an itinao nindo sa samo! Salamat, salamat na marhay!”​—Bethel.

“An pagmate ko kaiba mismo ako kan hoben na mga lalaking Hebreo mantang sinda nag-aagi nin mga pagbalo sa saindang pagtubod; asin pinarigon kaiyan an sakong boot na siyasaton an sako mismong pagtubod. An kahon sa repaso na may titulong ‘What Did You Discern?’ itinutudok sa puso an laog kan kapitulo. Salamat giraray sa saro na naman na obra maestra.”​​—Lydia.