Kita an Klase na May Pagtubod

Pag-alok nin Mensahe nin Karangahan sa Italia

SI Jehova “an Dios nin gabos na karangahan.” Paagi sa pakanood na arogon sia, nahihimo kan saiyang mga lingkod na ‘maranga an mga nasa ano man na klase nin kahorasaan.’ (2 Corinto 1:​3, 4; Efeso 5:1) Saro ini sa pangenot na mga obheto kan paghuhulit na ginigibo kan Mga Saksi ni Jehova.

Pagtabang sa Sarong Babae na Nangangaipo

Partikularmente kan nakaagi pa sanang mga taon na an kadukhaan, guerra, asin pagmawot na makanompong nin mas marahay na buhay nagin dahelan na dakol an mag-imigrar sa mas mayaman na mga nasyon. Alagad bakong madali na magin tuod sa bagong mga kamugtakan. Si Manjola nakiistar sa mga kapwa Albaniano sa Borgomanero. Mantang bakong legal an pag-istar nia sa Italia, sia nag-alangan na makipag-olay ki Wanda, na saro sa Mga Saksi ni Jehova. Minsan siring, sa katapustapusi ikinaareglo ni Wanda na makaolay si Manjola, na tolos-tolos na nagpaheling nin dakulang interes sa pag-adal sa Tataramon nin Dios, minsan ngani masakit ini huli kan lenguahe. Minsan siring, pakalihis nin pirang pagsongko si Wanda mayo nang naabotan sa harong. Ano an nangyari? Naaraman ni Wanda na an gabos na nag-ookupar sa harong na iyan nagdurulag huli ta an saro sa sainda​—an kailusyon ni Manjola​—hinahanap huli sa paggadan!

Pakalihis nin apat na bulan nanuparan giraray ni Wanda si Manjola. “Malungsi asin maniwang, maririsa sa saiyang itsura na sia talagang nasasakitan,” an natatandaan ni Wanda. Ipinaliwanag ni Manjola na an saiyang dating kailusyon nabibilanggo asin nasudya nanggad sia sa mga katood na rinanihan nia tanganing humagad nin tabang. Sa pagkadesesperar, namibi sia sa Dios para sa tabang. Dangan nagirumdoman nia si Wanda, na nakipag-olay manongod sa Biblia. Abaang ogma ni Manjola na maheling sia liwat!

Naponan liwat an pag-adal sa Biblia, asin dai nahaloy si Manjola nagpoon nang umatender sa Kristianong mga pagtiripon. Nakakua sia nin legal na permiso na magdanay sa Italia. Pakalihis nin sarong taon, si Manjola nagin bautisadong Saksi. Naranga kan mga panuga nin Dios, nagbalik sia sa Albania tanganing ihiras an nakararangang mensahe kan Biblia sa saiyang mga kahimanwa.

Pagpatotoo sa Sarong Kampo nin mga Dayo

Dakol na Italianong kongregasyon an naggibo nin mga areglo na magpatotoo sa mga dayo na arog ki Manjola. Halimbawa, an sarong kongregasyon sa Florence nag-areglo na songkoon nin regular an sarong kampo nin mga dayo. An mga residente sa kampo​—na  kadaklan hale sa Sirangan na Europa, Macedonia, asin Kosovo​​—nag-aagi nin laen-laen na kasakitan. An nagkapira nagdodroga o alkoholiko. Dakol an nabubuhay paagi sa paghabon nin kadikit.

An paghuhulit sa komunidad na ini sarong angat. Minsan siring, an sarong bilog na panahon na paraebanghelyo na an ngaran Paola sa kahurihurihi nakaolay si Jaklina, sarong babaeng taga Macedonia. Pakalihis nin pirang pag-oolay, inenkaminar ni Jaklina an saiyang amiga na si Susanna na siyasaton an Biblia. Si Susanna nakipag-olay man sa iba pang mga paryente. Dai nahaloy, lima sa pamilya an regular nang nag-aadal sa Biblia, nag-aatender sa Kristianong mga pagtiripon, asin isinasagibo an saindang nanonodan. Sa ibong kan mga problema na dapat nindang atubangon, sinda nagkukua nin karangahan hale ki Jehova asin sa saiyang Tataramon.

Inako nin Sarong Madre an Karangahan Hale ki Jehova

Sa banwaan nin Formia, an bilog na panahon na paraebanghelyo na an ngaran Assunta kinaolay an sarong babae na medyo nasasakitan sa paglakaw. An babae sarong madre na kabilang sa sarong orden nin relihion na nagtatabang sa mga naghehelang asin maluya an hawak kapwa sa mga ospital asin sa pribadong mga harong.

Si Assunta nagsabi sa madre: “May pigmamate man po kamo, bako? Makamomondo, kita gabos igwa nin mga problema na dapat tioson.” Sa puntong iyan an madre napaluha asin nagpaliwanag na sia igwa nin seryosong mga problema sa salud. Pinarigon ni Assunta an saiyang boot, na sinasabi na puede siang rangahon kan Dios kan Biblia. Inako kan madre an mga magasin na basado sa Biblia na iinalok saiya ni Assunta.

Durante kan sunod nindang pag-oolay, an madre, na an ngaran Palmira, nag-admitir na grabe an pigmamate nia. Haloy siang nag-istar sa sarong institusyon na an nagpapadalagan mga madre. Kan kinaipuhan niang magbakasyon nin temporaryo dahel sa salud, dai sia tinogotan na bumalik. Minsan siring, si Palmira nakamateng may obligasyon sa Dios huli kan promesa nia bilang madre. Nagdolok sia sa mga parabolong tanganing “mabolong” alagad nagkatrauma sa naeksperyensiahan kaini. Uminoyon si Palmira na mag-adal sa Biblia, asin nag-atender sia sa Kristianong mga pagtiripon sa laog nin sangtaon. Dangan buminalyo sia nin lugar, asin an Saksi nawaran na nin komunikasyon sa saiya. Duwang taon an nag-agi bago sia nanuparan giraray ni Assunta. Si Palmira makosog na kinontra kan saiyang pamilya asin kan klero. Minsan siring, ipinadagos nia an saiyang pag-adal sa Biblia, nag-oswag sa espirituwal, asin nagpabautismo bilang saro sa Mga Saksi ni Jehova.

Iyo, dakol an napaparigon an boot kan mensahe nin ‘Dios na nagtatao nin karangahan.’ (Roma 15:​4, 5) Huli kaini, an Italianong mga Saksi ni Jehova determinado na padagos na arogon an Dios paagi sa pag-alok sa iba kan saiyang makangangalas na mensahe nin karangahan.