Puede Nindong Maaraman an Ngapit!

An kadaklan na tawo nag-iisip nin seryoso manongod sa ngapit. Gusto nindang magplano, mangapital sa madonong na paagi, asin makamateng may seguridad. Alagad igwa daw nin ano man na paagi na masegurado an natatagama sa ngapit?

SA PAGHIHINGOANG maaraman an natatagama sa ngapit, an mga tawo nag-eksperimento sa gabos na klase nin mga bagay. An mga sientista sosyal na inaapod na futurologo inaanalisar an presenteng dalagan nin mga bagay asin naggigibo kan saindang mga prediksion basado sa mga ini. Iyan man an ginigibo kan mga ekonomista sa saindang sadiring langtad. An mga astrologo asin paratoodtood nag-aasa sa mga horoskopo, bolang kristal, asin sa okulto, asin kadakol kan nagsusunod sa sainda. Halimbawa, an Pranses na astrologong si Nostradamus nagpapadagos na popular, minsan ngani sia dakol nang siglo na gadan.

An gabos na ini na naghihingakong propeta napatunayan na dai nanggad masasarigan asin nakadedesganar. Taano? Huli ta iniignoro ninda si Jehova Dios asin an saiyang Tataramon, an Biblia. Sa rason na ini dai ninda nasisimbag an pundamental na mga hapot na arog baga kaini: ‘Taano ako ta nakaseseguro na an mga ihinula sa Biblia mangyayari? Paano an mga iyan nagkakaigwa nin kabtang sa katuyohan nin Dios para sa mga tawo? Paano kami kan sakong pamilya makikinabang sa mga hulang ini?’ Sinisimbag kan Biblia an mga hapot na ini.

An hula sa Biblia nakalalabi man sa dakol na iba pang paagi. Bakong arog kan mga prediksion nin mga astrologo, iyan nagtotogot para sa personal na libreng kabotan. Huli kaini, dai nin siisay man na biktima nin kapaladan. (Deuteronomio 30:19) An mga isinurat na arog kan ki Nostradamus daing sinasabi dapit sa moral na paggawe, asin an kadaihan na ini hinihipnoan ninda nin misteryo asin pagpukaw sa emosyon. Alagad an hula sa Biblia masarig na nakabasar sa moral. Ipinaliliwanag kaiyan kun taano ta gigibohon nin Dios an sono sa saiyang katuyohan. (2 Cronica 36:15) Asin an mga hula ni Jehova nungkang nasusudya, ta an “Dios . . . dai makakapagputik.” (Tito 1:2) Sa siring, an mga indibiduwal na ginigiyahan kan Tataramon nin Dios namumuhay na naliwanagan, may katuyohan, asin maogma na dai nagsasayang kan saindang mahalagang marhay na panahon asin kuarta sa daing kamanungdanan na mga okupasyon.​—Salmo 25:​12, 13.

An mga ini asin an dakol na iba pang punto ipinaliwanag sa 1999/2000 na “Makahulang Tataramon nin Dios” na Pandistritong mga Kombension kan Mga Saksi ni Jehova sa bilog na kinaban. An mga pahayag, interbio, demonstrasyon, asin sarong drama sa Biblia dinara an atension kan mga nagdadangog sa makangangalas na espirituwal na mana na yaon sa mga nag-aadal asin nag-aaplikar kan makahulang tataramon nin Dios. Rerepasohon kan minasunod na artikulo an nagkapirang nakaoogmang tampok na kabtang kan kombension.