Ano an Liabe sa Kapangganahan?

AN DUWANG mahilig magdiskobreng hoben na lalaki sistematikong inaandam an sarong pambihirang aparato para sa importanteng pagprobar. Bigla na sana, an sarong makosog na huyop nin doros hinakbot an madaling maraot na aparato, pinaitok iyan sa aire, asin makosog an lagabong na biyong ibinagsak iyan. Desganado, an mga lalaki dai nakagirong. An saindang maingat na pinagpagalan kirimi na namumugtak sa sarong raraot na tambak nin kahoy asin metal.

Para ki Orville asin Wilbur Wright, an nangyari kan aldaw na iyan nin Oktubre kan 1900 bakong an enot na nakadedesganar na pagkasudya sa saindang pagprobar na gumibo nin sarong naglalayog na aparatong mas magabat kisa aire. Nagkapirang taon na an ginamit ninda asin guminasto na nin dakulang kantidad nin kuarta sa pag-eksperimento.

Pero sa katapustapusi, nagbunga an saindang pagkadesidido. Kan Disyembre 17, 1903, sa Kitty Hawk, North Carolina, E.U.A., an magtugang na Wright nakapaglansar nin sarong modelong de-motor na luminupad sa laog nin 12 segundo​—halipot kun ikokomparar sa mga biahe nin eroplano ngonyan, alagad igo an lawig tanganing liwaton an kinaban sagkod lamang!

An kapangganahan sa kadaklan na paghihingoa sa pangenot nakadepende sa mapasensiang pagmamaigot. Baga man iyan pag-adal na magin eksperto sa sarong bagong lenguahe, pakanood nin sarong hanap-buhay, o pagpatalubo pa ngani nin sarong relasyon, an kadaklan na bagay na may halaga nagigibo sana paagi sa padagos na paghihingoa. “Siyam na beses sa sampulo,” sabi kan autor na si Charles Templeton, “an kapangganahan direktang ikaaatribwir sa sarong bagay: kahigosan.” An kolumnistang si Leonard Pitts, Jr., nagsasabi: “Pinag-oolayan ta an talento, rinerekonoser ta an kapaladan, alagad parateng gayo, iniignoro ta an pinakaimportanteng mga bagay. An kahigosan asin dakol na pagkasudya. An pag-abot nin amay asin halawig na oras nin pagtrabaho.”

Pinatutunayan kaini an sinabi kan Biblia kaidtong haloy na an nakaagi: “An kamot kan mga mahigos iyo an mamamahala.” (Talinhaga 12:24) An kahigosan nangangahulogan na kita magmaigot sa satong mga paghihingoa. Kaipuhan ini kun boot niatong mahaman an pinonan tang gibohon. Ano an pagmamaigot? Paano kita makapagmamaigot sa paghihingoang makamtan an satong mga pasohan, asin sa ano kita maninigong magmaigot? An mga hapot na ini sisimbagon sa minasunod na artikulo.

[Picture Credit Line sa pahina 3]

Rinetrato kan U.S. National Archives