Kapangganahan Paagi sa Pagmamaigot

AN PAGMAMAIGOT nagin nang sarong bihirang kualidad sa presenteng mga panahon. Dakol na tawo an naniniwala na an kapangganahan mas depende sa pagigin nasa tamang lugar sa tamang panahon kisa pagmamaigot. Siisay an makababasol sa sainda? An media sagom nin mga sarabihon sa pag-anunsio na dai naririsang idinodoon an mensahe na an haros ano man na gusto nindo puedeng makamtan paagi sa pinakakadikit na paghihingoa asin kadikit sanang kuarta. An mga peryodiko dayaday na nagpupublikar nin kadakol na estorya manongod sa mga biglang kapangganahan asin matitibay na negosyante na minilyon an ginaganansia pagkagradwar mismo.

Nanambitan an kolumnistang si Leonard Pitts: “Sa sarong sosyedad na pirmeng mapagrisa, iyan garo pasil na marhay. . . . Garo baga sarong bagay na kayang gibohon nin siisay man kun nasabotan sana nia an pamamaagi, kun sia may abilidad, o kun nakua nia an tabang nin Dios.”

Ano an Pagmamaigot?

An pagmamaigot nangangahulogan nin ‘pangangapot nin marigon asin daing ontok sa sarong katuyohan, kamugtakan, o gibohon sa ibong nin mga kaolangan o pagkasudya.’ Iyan nagpaparisa nin pagpapadagos nin desidido sa atubangan nin kasakitan, pagigin pusog, dai minasuko. Idinodoon kan Biblia an kahalagahan kan kualidad na ini. Halimbawa, sinasadol kita kan Tataramon nin Dios: “Kun siring, padagos na hanapon nguna an kahadean,” “padagos kamong magtoktok, asin iyan bubukasan para sa saindo,” “magmaigot kamo sa pamimibi,” asin “pangaptan nin higot an marahay.”​—Mateo 6:​33; Lucas 11:​9; Roma 12:​12; 1 Tesalonica 5:21.

An sarong mahalagang kabtang nin pagmamaigot  iyo an pakaatubang sa dai malilikayan na mga pagkasudya. An Talinhaga 24:​16 nagsasabi: “An matanos puedeng mapukan sagkod sa makapito, asin sia siertong matindog.” Imbes na ‘sumuko’ kun napapaatubang sa problema o pagkasudya, an tawong nagmamaigot ‘minatindog,’ ‘nagpapadagos,’ asin nagpoprobar giraray.

Pero dakol an bakong andam para sa mga problema asin pagkasudya na tibaad mapaatubang sa sainda. Huli ta nungkang nakapatalubo kan determinasyon na magmaigot, sinda madaling sumuko. “Kadakol kan tawo na kun nasusudya minahiro sa paaging dinadanyaran an sadiri,” an obserbasyon ni Morley Callaghan. “Napadadara sinda sa pagkaherak sa sadiri, binabasol ninda an gabos, sinda naghihinanakit asin . . . minasuko.”

Makamomondo ini. “Nalilingawan ta,” sabi ni Pitts, “na igwa nin dahelan na umagi nin sakit, may mahalagang bagay na makukua sa kasakitan.” Anong mahalagang bagay iyan? Sia nagkonklusyon: “Nanonodan [nin saro] na an pagkasudya dai nakagagadan, ni na an pagkadaog sagkod lamang. An saro nalulubos. An saro nagigin preparado.” Simple an pagkasabi kaiyan kan Biblia: “Paagi sa gabos na klase nin gibo nagkakaigwa nin pakinabang.”​—Talinhaga 14:23.

Siempre, an pagpoon liwat pakatapos nin pagkasudya bakong pirmeng pasil. Kun beses napapaatubang kita sa mga angat na garo baga minakontra sa gabos niatong paghihingoa na pangganahan iyan. Imbes na rumani, an satong mga pasohan tibaad garo baga parayo nang parayo. Tibaad kita makamateng nagagabatan, daing kakayahan, asin tibaad madesganar, magmondo pa ngani nin makuri. (Talinhaga 24:10) Pero, pinaririgon kan Biblia an boot niato: “Dai kita mag-ontok sa paggibo nin karahayan, huli ta sa talaan na kapanahonan kita mag-aani kun kita dai mapagal.”​—Galacia 6:9.

Ano an Makatatabang sa Sato na Makapagmaigot?

An enot na lakdang tanganing makapagmaigot sa sarong piniling gigibohon iyo an pagbugtak nin kapakipakinabang asin kayang aboton na mga pasohan. Siertong nasabotan ini ni apostol Pablo. Sinabihan nia an mga taga Corinto: “An paagi kan sakong pagdalagan bakong daing kasiertohan; an paagi kan sakong mga pagsuntok bakong tanganing sumuntok sa doros.” Aram kaidto ni Pablo na tanganing magin mapanggana an saiyang mga paghihingoa, kaipuhan nia an malinaw na mga pasohan, arog nin sarong paradalagan na ikinokonsentrar an saiyang isip na makaabot sa sagkodan nin sarong paorumbasan. “Dai kamo nakakaaram na an mga paradalagan sa paorumbasan gabos nagdadalagan, alagad ta saro sana an nag-aako kan premyo? Dumalagan kamo sa paagi na kamtan nindo iyan,” an sadol nia sa sainda. (1 Corinto 9:​24, 26) Paano ta ini magigibo?

“An alisto an isip naghohorophorop sa saiyang mga lakad,” an sabi kan Talinhaga 14:15. Madonong na sa panapanahon pag-adalan giraray niato an satong mga estratehiya sa buhay, na ihinahapot sa satong sadiri kun saen kita pasiring asin kun baga kaipuhan na gumibo nin mga pagliliwat. Mahalagang marhay na magin malinaw sa isip kun ano an gusto niatong gibohon asin kun taano. Mas harayo an tendensia na kita sumuko kun marigon na pinapagdadanay niato na nakatudok sa satong isip an pagtanaw sa satong pinakapadudumanan. “Kun manongod sa saimong mga mata, iyan maninigong magheling sa enotan,” an sadol kan ipinasabong na talinhaga, tanganing “magin logod marigon an gabos mong dalan.”​—Talinhaga 4:​25, 26.

Mantang aram na nindo kun ano an saindong mga pasohan, an sunod na lakdang iyo na analisaron kun ano an gigibohon nindo tanganing aboton iyan. Si Jesus naghapot: “Siisay sa saindo na boot na magtogdok nin torre an dai nguna minatukaw asin kinukuenta an gastos?” (Lucas 14:28) Kaoyon kan prinsipyong ini, an sarong eksperto sa kamugtakan kan isip nagkomento: “An saro sa mga nariparo ko manongod sa mapangganang mga tawo iyo na malinaw an pakasabot ninda sa relasyon kan causa asin epekto sa saindang buhay. Nasasabotan kan mapangganang mga tawo na kun may gusto sinda, dapat na gibohon ninda an gabos na kinakaipuhan tanganing makamit iyan.” An pagkaigwa nin malinaw na pakasabot sa gabos na kinakaipuhan na lakdang na dapat niatong gibohon tanganing magibo an gusto niato makatatabang sa sato na magdanay na nakakonsentrar. Pangyayarihon man kaiyan na magin mas pasil para sa sato na pumoon liwat kun kita nasudya. An siring na pag-analisar an pinasikadan kan kapangganahan ni Orville asin Wilbur Wright.

Huli kaini, kun masudya, gibohon an saindong pinakamakakaya na mansayon iyan sa positibong paagi asin bilang leksion. Analisaron an situwasyon, mansayon kun saen kamo nasala, dangan ikorehir an sala o remedyohan an kaluyahan. Nakatatabang an makipag-olay sa iba, huling “paagi sa hatol an mga plano mismo marigon na naeestablisar.” (Talinhaga 20:18) Naturalmente, sa lambang paghihingoa, napatatalubo nindo an dugang pang abilidad asin kakayahan, na sa katapustapusi nakakokontribwir sa saindong kapangganahan.

 An ikatolong mahalagang marhay na aspekto nin pagmamaigot iyo an daing liwat-liwat na paghiro. Sinasadol kita ni apostol Pablo: “Sagkod sa inabot na kan satong pag-oswag, magpadagos kitang maglakaw na husay sa iyo man sanang pinagkatodan na ini.” (Filipos 3:16) Siring sa pagkasabi kaiyan nin sarong edukador, “an pagigin tama sana asin daing pagliwatliwat sa laog nin sarong peryodo nin panahon nagbubunga nin mahalagang mga resulta.” Magayon an pagkailustrar kaini sa midbid na marhay na pabula ni Aesop manongod sa pawikan asin kuneho. An pawikan an nanggana sa pareha, minsan ngani sia mas maluway na marhay kisa kuneho. Taano? Huli ta an pawikan igwa nin dagos-dagos, disiplinadong pamamaagi. Dai sia nagpondo kundi pinili nia an rikas na realistikong masusunod nia, dangan nagdanay sia dian sagkod na linampasan nia an sagkodan. Huling an organisado, dayaday na tawo daing liwat-liwat an pag-oswag, sia nagdadanay na motibado asin sa siring mas harayo an posibilidad na pumondo o mahale sa paorumbasan. Iyo, “dumalagan kamo sa paagi” na maaabot nindo an saindong pasohan.

Pagpili nin Kapakipakinabang na mga Pasohan

Siempre, tanganing magkaigwa nin halaga an pagmamaigot, kaipuhan na magkaigwa kita nin kapakipakinabang na mga pasohan. Dakol na tawo an naglalapag sa mga bagay na dai nagtatao nin kaogmahan. Alagad sinasabi kan Biblia: “An nagtotorohok sa sangkap na ley para sa katalingkasan asin nagdadanay dian . . . maoogma sa paggibo nia kaiyan.” (Santiago 1:25) Iyo, an pag-adal tanganing masabotan an ley nin Dios na yaon sa Biblia sarong kapakipakinabang na marhay na pasohan. Taano? Sa pundamental, iyan huli ta an ley nin Dios basado sa saiyang sangkap, matanos na mga pamantayan. Bilang Kaglalang, aram nia kun ano an pinakamarahay para sa saiyang mga linalang. Kaya kun nagdadanay kita sa pag-adal kan mga instruksion nin Dios asin pag-aplikar kaiyan sa satong buhay, an siring na pagkadesidido siertong matao sa sato nin kaogmahan. “Magtiwala ka ki Jehova sa bilog mong puso . . . Sa gabos mong dalan girumdomon mo sia, asin itatanos nia mismo an saimong mga dana,” an panuga kan Talinhaga 3:​5, 6.

Saro pa, an paglaog sa isip nin kaaraman dapit sa Dios asin ki Jesus “nangangahulogan nin buhay na daing katapusan,” an sabi ni Jesus. (Juan 17:3) Ipinaheheling kan hula sa Biblia na kita nabubuhay na sa “huring mga aldaw” kan sistemang ini. (2 Timoteo 3:​1-5; Mateo 24:​3-​13) Sa dai na mahahaloy idedeklarar kan Kahadean nin Dios, an saiyang matanos na gobyerno, an pamamahala kaiyan sa mga nag-eerok sa daga. (Daniel 2:​44; Mateo 6:10) Poponan kan gobyernong ini an dai pa nangyari kaidto na panahon nin katoninongan, prosperidad, asin ikararahay para sa gabos na makinuyog na katawohan. (Salmo 37:​10, 11; Kapahayagan 21:4) “An Dios daing ipinaoorog,” sabi kan Gibo 10:34. Iyo, an gabos inaagda na kamtan an mga pakinabang!

An Biblia suanoy na libro na pano nin kadonongan asin kahulogan. Kaipuhan an panahon asin paghihingoa tanganing masabotan iyan. Alagad sa tabang nin Dios​—asin kun kita magpapadagos sa pagkua kan kaaraman dian​—iyan magigin bukas na libro para sa sato. (Talinhaga 2:​4, 5; Santiago 1:5) Totoo, an pag-aplikar kan satong nanonodan puedeng magin angat. Tibaad kaipuhan tang gumibo nin mga pagliliwat sa satong kaisipan o ugale. Tibaad kontrahon pa ngani nin may marahay na intension na mga katood o miembro nin pamilya an satong pag-adal sa Biblia. Kaya mahalagang marhay an pagkadesidido. Ipinagigirumdom sa sato ni apostol Pablo na an Dios matao nin buhay na daing katapusan sa mga nagpapaheling nin “pagtagal sa gibong marahay.” (Roma 2:7) Maoogma an Mga Saksi ni Jehova na tabangan kamong aboton an pasohan na ini.

Makasisierto kamo na makanonompong kamo nin kapangganahan kun kamo magmamaigot sa pag-adal manongod sa Dios asin sa saiyang kabotan saka desidido sa pag-aplikar kan saindong nanonodan.​—Salmo 1:​1-3.

[Ritrato sa pahina 6]

Makanonompong kamo nin kapangganahan kun kamo magmamaigot sa pag-adal manongod sa Dios asin sa saiyang kabotan

[Picture Credit Line sa pahina 4]

Culver Pictures