Naggagayagaya sa Dios nin Satong Kaligtasan
Naggagayagaya sa Dios nin Satong Kaligtasan
“Ako magpapakagayagaya dian ki Jehova; maggagayagaya ako sa Dios nin sakong kaligtasan.”—HABACUC 3:18.
1. May labot sa ano na si Daniel nagkaigwa nin bisyon bago bumagsak an Babilonya kan 539 B.C.E.?
LABING sarong dekada bago bumagsak an Babilonya kan 539 B.C.E., an gurang nang si propeta Daniel nakaheling nin nakapupukaw sa boot na bisyon. Ihinula kaiyan an mga pangyayari sa kinaban na mapasiring sa mismong pankulminasyon na guerra sa pag-oltanan kan mga enemigo ni Jehova asin kan nombrado niang Hade, si Jesu-Cristo. Ano an reaksion ni Daniel? Sabi nia: “Pagal-pagal ako asin . . . namumungnan huli sa bagay na naheling.”—Daniel 8:27.
2. Anong ralaban an naheling ni Daniel sa bisyon, asin ano an saboot nindo manongod sa kaharanihan kaiyan?
2 Kumusta man kita? Mas harayo nang marhay sa sulog nin panahon an nabubuhayan niato! Ano an reaksion niato kun narerealisar niato na an ralaban na naheling ni Daniel sa bisyon—an ralaban nin Dios na Armagedon—haranihon na? Ano an reaksion niato kun namamansayan niato na an karatan na ibinuyagyag sa hula ni Habacuc lakop nang marhay kaya dai malilikayan an paglaglag sa mga enemigo nin Dios? Posibleng marhay, an saboot niato kapareho kan ki Habacuc mismo, arog kan ilinaladawan sa ikatolong kapitulo kan saiyang makahulang libro.
Inarang ni Habacuc an Pagkaherak nin Dios
3. Para kiisay namibi si Habacuc, asin paano kita puedeng maapektaran kan saiyang mga tataramon?
3 An Habacuc kapitulo 3 sarong pamibi. Segun sa bersikulo 1, iyan ipinahahayag sa mga panambitan, mga awit nin kamondoan o pananangis. An pamibi kan propeta ipinahahayag na garo baga iyan para sa saiya man sana. Pero, an totoo, si Habacuc nagtataram para sa piniling nasyon nin Dios. Ngonyan, an saiyang pamibi dakula an kahulogan para sa banwaan nin Dios, na naghuhulit kan Kahadean. Kun binabasa niato an Habacuc kapitulo 3 na nasa isip ini, pinapano kita kan mga tataramon kaiyan nin agam-agam alagad nin kagayagayahan man. An pamibi ni Habacuc, o panambitan, nagtatao sa sato nin makosog na dahelan na maggayagaya dian ki Jehova, an Dios kan satong kaligtasan.
4. Taano ta natakot si Habacuc, asin sa anong paggamit kan kapangyarihan nin Dios na kita makaseseguro?
4 Arog kan naobserbaran niato sa duwang sinusundan na artikulo, maraot na marhay an mga kamugtakan sa daga nin Juda kan kaaldawan ni Habacuc. Alagad dai itotogot nin Dios na magpadagos an situwasyon na ini. Si Jehova magibo nin aksion, arog kan ginibo nia kan mga nakaagi. Bakong makangangalas na kuminurahaw an propeta: “O Jehova, nadangog ko an bareta manongod sa saimo. Natakot ako, O Jehova, sa saimong aktibidad”! Ano an boot niang sabihon? ‘An bareta manongod ki Jehova’ iyo an nasusurat na kasaysayan kan makapangyarihan na mga gibo nin Dios, arog baga kan sa Dagat na Pula, sa kaawagan, asin sa Jerico. An mga gibong ini aram na marhay ni Habacuc, asin huli kaiyan sia natakot huli ta aram nia na gagamiton giraray ni Jehova an saiyang dakulang kapangyarihan tumang sa saiyang mga enemigo. Kun naheheling niato an karatan nin katawohan ngonyan, aram man niato na si Jehova mahiro arog kan ginibo nia kan suanoy na mga panahon. Nahahandal daw kita huli kaiyan? Siempre! Minsan siring, kita namimibi kapareho ni Habacuc: “Sa tahaw kan mga taon O buhaya iyan! Sa tahaw kan mga taon ipaaram mo logod iyan. Sa panahon kan kariribokan, magirumdoman mo logod na magpaheling nin pagkaherak.” (Habacuc 3:2) Sa itinalaan na panahon nin Dios, “sa tahaw kan mga taon,” pahiroon logod nia an saiyang milagrosong kapangyarihan. Asin sa panahon na iyan, magirumdoman logod nia na magpaheling nin pagkaherak sa mga namomoot sa saiya!
Si Jehova Nagmamartsa!
5. Paano ‘an Dios naghale sa Teman,’ asin ano an ipinaririsa kaini mapadapit sa Armagedon?
5 Ano an mangyayari kun madangog ni Jehova an satong pag-arang nin pagkaherak? Maheheling niato an simbag sa Habacuc 3:3, 4. Enot, sinasabi kan propeta: “An Dios mismo naghale sa Teman, an Banal na Saro hale sa Bukid nin Paran.” Kaidtong kaaldawan ni propeta Moises, an Teman asin Paran nasa agihan nin Israel sa kaawagan pasiring sa Canaan. Mantang nagbabaklay an dakulang nasyon nin Israel, si Jehova mismo garo baga naghihiro, asin mayo nin makapapopondo sa saiya. Dai nahaloy bago nagadan si Moises, sinabi nia: “Si Jehova—hale sa Sinai sia nagdatong, asin sia nagliwanag hale sa Seir sa sainda. Sia suminilyab hale sa mabukid na rehion nin Paran, asin kairiba nia an banal na mga hukbo [nin mga anghel].” (Deuteronomio 33:2) Kun si Jehova humiro na tumang sa saiyang mga enemigo sa Armagedon, magkakaigwa nin kaagid na pagpaheling kan saiyang dai malalabanan na kosog.
6. Apuera sa kamurawayan nin Dios, ano an naheheling nin mapagmansay na mga Kristiano?
6 Sinasabi man ni Habacuc: “An [ki Jehovang] dignidad nakatahob sa kalangitan; asin an daga napano kan saiyang kaomawan. Kun manongod man sa saiyang kaliwanagan, iyan nagin garo an ilaw.” Abaa kakahangahangang eksibisyon! Totoo, an mga tawo dai puedeng humeling ki Jehova Dios asin mabuhay. (Exodo 33:20) Minsan siring, kun manongod sa fiel na mga lingkod nin Dios, an mga mata kan saindang puso nasusula kun hinohorophorop ninda an saiyang pagigin kahangahanga. (Efeso 1:18) Asin may naheheling pa an mapagmansay na mga Kristiano apuera sa kamurawayan ni Jehova. Nagkonklusyon an Habacuc 3:4: “Igwa sia nin duwang sinag na nagluluwas sa saiyang kamot, asin yaon duman natatago an saiyang kakosogan.” Iyo, naheheling niato na si Jehova andam na humiro, na ginagamit an saiyang toong kamot na may kosog saka kapangyarihan.
7. An mapangganang pagmartsa nin Dios nangangahulogan nin ano para sa mga nagrerebelde tumang sa saiya?
7 An mapangganang pagmartsa nin Dios nangangahulogan nin grabeng kapahamakan para sa mga nagrerebelde tumang sa saiya. Sinasabi kan Habacuc 3:5: “Sa enotan nia padagos an peste, asin an halangkawon na kalintura nagluluwas sa saiyang mga bitis.” Kan an mga Israelita harani na sa mga linderos kan Dagang Panuga kan 1473 B.C.E., an dakol sa sainda nagrebelde, na guminibo nin inmoralidad asin idolatriya. Bilang resulta, labing 20,000 an nagadan sa peste na itinao nin Dios. (Bilang 25:1-9) Sa harani nang ngapit, kun si Jehova magmartsa na pasiring sa “ralaban kan dakulang aldaw nin Dios na Makakamhan sa gabos,” an mga nagrerebelde tumang sa saiya magdudusa man huli sa saindang mga kasalan. An nagkapira tibaad magadan pa ngani sa literal na peste.—Kapahayagan 16:14, 16.
8. Segun sa Habacuc 3:6, ano an natatagama sa mga enemigo nin Dios?
8 Dangoga ngonyan an klarong paglaladawan kan propeta sa paghiro ni Jehova nin mga hukbo. Sa Habacuc 3:6, nababasa niato: “Sia [si Jehova Dios] uminontok, tanganing mayugyog nia an daga. Sia nagheling, dangan pinalukso nia an mga nasyon. Asin an daing sagkod na kabukidan naronot; an mga bolod na nagdadanay nin daing talaan naghuruhod. Saiya an mga lakaw kan suanoy.” Enot, si Jehova ‘minaontok,’ garo sarong heneral na iniinspeksion an kampo de batalya. An saiyang mga enemigo nagtatakig sa takot. Naheheling ninda kun siisay an saindang kalaban asin nasusustohan sinda, napapalukso sa pagkahadit. Ihinula ni Jesus an panahon na “an gabos na tribo kan daga hahampakon an saindang sadiri sa pananangis.” (Mateo 24:30) Huri na na marerealisar ninda na mayo nin makatitindog tumang ki Jehova. An mga organisasyon nin tawo—dawa an mga garo arog kapermanente kan “daing sagkod na kabukidan” asin “mga bolod na nagdadanay nin daing talaan”—matutumpag. Iyan magigin kapareho kan “mga lakaw [nin Dios] kan suanoy,” kapareho kan saiyang ginibo kan suanoy na mga panahon.
9, 10. Ano an ipinagigirumdom sa sato kan Habacuc 3:7-11?
9 ‘Naglaad an kaanggotan’ ni Jehova tumang sa saiyang mga kalaban. Alagad anong mga armas an gagamiton nia sa saiyang dakulang ralaban? Hinanyoga mantang ilinaladawan iyan kan propeta, na sinasabi: “Sa pagkahayag kaiyan an saimong arko nahalean nin takop. An mga panumpa kan mga tribo iyo an bagay na isinabi. Binaraak mo an daga paagi sa mga salog. Naheling ka nin mga bukid; sinda nakamate nin grabeng kolog. Sarong nagkikikilat na bagyo nin tubig an nag-agi. Kinosogan kan kararoman an hagubuhob kaiyan. Ibinikyaw kaiyan an mga kamot kaiyan paitaas. An saldang—an bulan—uminontok, sa halangkawon na namumugtakan kaiyan. Arog kan liwanag an saimong mga pana nagraralayog. An kikilat kan saimong budyak nagseserbing liwanag.”—Habacuc 3:7-11.
10 Kan kaaldawan ni Josue, pinapangyari ni Jehova na umontok an saldang asin an bulan sa makangangalas na pagpaheling nin kapangyarihan. (Josue 10:12-14) Ipinagigirumdom sa sato kan hula ni Habacuc na an iyo man sanang kapangyarihan na ini gagamiton ni Jehova sa Armagedon. Kan 1513 B.C.E., ipinaheling ni Jehova an autoridad nia sa kararoman kan daga kan gamiton nia an Dagat na Pula tanganing laglagon an mga hukbo ni Faraon. Pakalihis nin apat na polong taon, an salog nin Jordan na bahang-baha dai nakaolang sa mapangganang pagmartsa nin Israel palaog sa Dagang Panuga. (Josue 3:15-17) Kan kaaldawan ni Debora na propetisa, iinanod nin makosog an sulog na oran an mga karuwahe kan enemigo nin Israel na si Sisara. (Hokom 5:21) An mga puersa man sanang ini nin baha, makosog an sulog na oran, asin kararoman magagamit ni Jehova ano man na oras sa Armagedon. An dagoldol asin kikilat nasa kamot man nia, na garo budyak o suksukan na pano nin pana.
11. Ano an mangyayari kun butasan na ni Jehova an saiyang dakulang kapangyarihan?
11 Totoo nanggad na makapupukaw nin hararom na paggalang kun butasan na ni Jehova an saiyang dakulang kapangyarihan. Isinusuherir kan mga tataramon ni Habacuc na an banggi magigin aldaw asin an aldaw magigin mas maliwanag kisa liwanag na ikatatao dian kan saldang kasuarin man. Baga man literal o simboliko an ipinasabong na makahulang paglaladawan na ini sa Armagedon, sarong bagay an segurado—manggagana si Jehova, na mayo nin enemigo na totogotan na makadulag.
Segurado an Kaligtasan Para sa Banwaan nin Dios!
12. Ano an gigibohon nin Dios sa saiyang mga enemigo, alagad sairisay an maliligtas?
12 Ipinagpapadagos kan propeta na iladawan an mga gigibohon ni Jehova sa paglaglag sa Saiyang mga enemigo. Sa Habacuc 3:12, mababasa niato: “Ika nagmartsa na may pagdenunsiar sa bilog na daga. Huli sa kaanggotan saimong gininikan an mga nasyon.” Pero, bakong daing pili an panlaglag ni Jehova. May mga tawo na maliligtas. “Luminuwas ka sa pagliligtas sa saimong banwaan, tanganing iligtas an saimong linahidan,” sabi kan Habacuc 3:13. Iyo, ililigtas ni Jehova an saiyang fiel na linahidan na mga lingkod. Sa panahon na iyan magigin kompleto an paglaglag sa Dakulang Babilonya, an pambilog na kinaban na imperyo nin falsong relihion. Minsan siring, hinihingoa ngonyan kan mga nasyon na paraon an dalisay na pagsamba. Dai na mahahaloy, an mga lingkod ni Jehova sasalakayon kan mga hukbo ni Gog nin Magog. (Ezequiel 38:1–39:13; Kapahayagan 17:1-5, 16-18) Magigin mapanggana daw an satanikong pananalakay na iyan? Dai! Sa panahon na iyan anggot na giginikon ni Jehova an saiyang mga enemigo, na tinutungtongan sinda na garo tipasi sa ginikan. Alagad ililigtas nia an mga nagsasamba sa saiya sa espiritu asin katotoohan.—Juan 4:24.
13. Paano maootob an Habacuc 3:13?
13 An lubos na pagkapara kan mga maraot ihinula sa mga tataramon na ini: “Rinonot mo [Jehova] an poon hale sa harong kan maraot. Winakasan mo an patongtongan, sagkod sa liog.” (Habacuc 3:13) An “harong” na ini iyo an maraot na sistema na namukna sa impluwensia ni Satanas na Diablo. Iyan lalaglagon. An “poon,” o mga namomoon na kontra sa Dios, roronoton. An bilog na estruktura rarapakon, sagkod sa patongtongan kaiyan. Iyan dai na maeksister. Abaa kamakangangalas na pakaginhawa kaiyan!
14-16. Segun sa Habacuc 3:14, 15, ano an mangyayari sa banwaan ni Jehova asin sa saindang mga enemigo?
14 Sa Armagedon, an mga naghihingoang laglagon an “linahidan” ni Jehova riribarawon. Segun sa Habacuc 3:14, 15, an propeta nakikipag-olay sa Dios, na sinasabi: “Paagi sa saiyang sadiring mga sogkod pinalagbasan mo an payo kan saiyang mga parapakilaban kan sinda maghirong garo bagyo tanganing iwarak ako. An saindang dakulang kaogmahan kapareho kan mga desididong halonon an sarong nagsasakit nin makuri sa lugar na tinatagoan. Sa dagat ika minalakaw kaibanan kan saimong mga kabayo, sa tambak nin mahiwas na katubigan.”
15 Sa pagsabi ni Habacuc na ‘mga parapakilaban na naghirong garo bagyo tanganing iwarak ako,’ an propeta nagtataram para sa linahidan na mga lingkod ni Jehova. Kapareho nin mga parahipa na nagpapahipli, luluksohon kan mga nasyon an mga nagsasamba ki Jehova tanganing laglagon sinda. An mga enemigong ini nin Dios saka kan saiyang banwaan may “dakulang kaogmahan,” na kompiado sa kapangganahan. An fiel na mga Kristiano garo baga maluya, garo “sarong nagsasakit nin makuri.” Alagad kun ilansar na kan mga hukbong kontra sa Dios an saindang pananalakay, papangyayarihon ni Jehova na gamiton ninda an saindang mga armas tumang sa sainda man sana. Gagamiton ninda an saindang mga armas, o “mga sogkod,” tumang sa sadiri nindang mga parapakilaban.
16 Alagad dakol pa an nagdadangadang. Gagamiton ni Jehova an nakalalabi sa tawo na hukbo nin mga espiritu tanganing taposon an paglaglag sa saiyang mga kalaban. Paagi sa “mga kabayo” kan saiyang langitnon na mga hukbo sa pangengenot ni Jesu-Cristo, sia mapangganang maabante sa “dagat” asin “sa tambak nin mahiwas na katubigan,” an boot sabihon, an nagdadagsang enemigong katawohan. (Kapahayagan 19:11-21) Dangan hahaleon sa daga an mga maraot. Abaa kamapuersang pagpaheling nin kapangyarihan asin hustisya nin Dios!
Nagdadangadang Na an Aldaw ni Jehova!
17. (a) Taano ta makakapagkompiar kita sa kaotoban kan mga tataramon ni Habacuc? (b) Paano kita magigin kapareho ni Habacuc mantang hinahalat niato an dakulang aldaw ni Jehova?
17 Masisierto niato na dai na mahahaloy maootob na an mga tataramon ni Habacuc. Iyan dai mag-aatraso. Ano an reaksion nindo sa pakaaram na ini antes pa? Girumdoma na si Habacuc nagsusurat kaidto sa irarom kan pasabong nin Dios. Mahiro si Jehova, asin magkakaigwa nin dakulang karibokan digdi sa daga kun iyan mangyari na. Bakong makangangalas na an propeta nagsurat: “Nakadangog ako, asin pinagtakigan an sakong tulak; sa tingog an sakong mga ngabil nagkibigkibig; an pagkalapa nagpoon na lumaog sa sakong mga tolang; asin sa sakong namumugtakan pinagtakigan ako, tanganing ako daing girong na maghalat sa aldaw nin kasakitan, sa saiyang pagsakat sa banwaan, tanganing masakyada nia sinda.” (Habacuc 3:16) Pinagtakigan na marhay si Habacuc—natural sana. Alagad nanluya daw an saiyang pagtubod? Dai nanggad! Andam siang daing girong na maghalat sa dakulang aldaw ni Jehova. (2 Pedro 3:11, 12) Bako daw na iyan man an satong aktitud? Daing duwa-duwa na iyo! Bilog an pagtubod niato na maootob an hula ni Habacuc. Minsan siring, sagkod na iyan maotob, kita pasensiosong maghahalat.
18. Minsan ngani inantisipar ni Habacuc an mga kasakitan, ano an saiyang aktitud?
18 An guerra pirmeng nagbubunga nin kasakitan, dawa sa mga manggagana. Tibaad magkulang an kakanon. Tibaad mawara an mga rogaring. Tibaad bumaba an klase nin pamumuhay. Kun iyan mangyari sa sato, ano an magigin reaksion niato? Maninigong arogon an aktitud ni Habacuc, ta sia nagsabi: “Minsan an higuerra tibaad dai magburak, asin tibaad mayo nin ani sa mga poon nin ubas; an gibo kan olibo tibaad magkaprakaso, asin an hagdan-hagdan na daga mismo tibaad dai magtao nin kakanon; an mga karnero tibaad mapasuhay sa mga langoban, asin tibaad mayo nin mga baka sa mga toril; pero, kun para sa sako, ako magpapakagayagaya dian ki Jehova; maggagayagaya ako sa Dios nin sakong kaligtasan.” (Habacuc 3:17, 18) Realistikong inantisipar ni Habacuc an mga kasakitan, tibaad makuring kakulangan nin kakanon. Pero, nungka na nawara an kagayagayahan nia ki Jehova, na pinaghalean kan saiyang kaligtasan.
19. Ano an mga kasakitan para sa dakol na Kristiano, alagad sa ano kita makasisierto kun eenoton niato si Jehova sa satong buhay?
19 Ngonyan, dawa bago pa kan pakikilaban ni Jehova tumang sa mga maraot, dakol an nag-aagi nin grabeng kasakitan. Ihinula ni Jesus na an mga guerra, gutom, linog, asin peste magigin kabtang kan ‘tanda kan saiyang presensia’ na may sa hadeng kapangyarihan. (Mateo 24:3-14; Lucas 21:10, 11) Dakol sa satong mga kapagtubod an nabubuhay sa kadagaan na nagsasakit nin makuri huli sa kaotoban kan mga tataramon ni Jesus, asin bilang resulta grabeng mga kasakitan an inaagihan ninda. An ibang Kristiano tibaad maapektaran man nin siring kaiyan sa ngapit. Para sa dakol pa sa sato, posible nanggad na ‘an higuerra dai magburak’ bago dumatong an katapusan. Minsan siring, aram niato kun taano ta nangyayari an mga bagay na ini, asin iyan nagtatao sa sato nin kosog. Dugang pa, may suporta sa sato. Nanuga si Jesus: “Kun siring, padagos na hanapon nguna an kahadean asin an saiyang [nin Dios] katanosan, asin ini gabos na ibang bagay idadagdag na sana sa saindo.” (Mateo 6:33) Iyan bakong garantiya nin komportableng buhay, alagad inaasegurar kita kaiyan na kun eenoton niato si Jehova sa satong buhay, babantayan nia kita.—Salmo 37:25.
20. Sa ibong nin temporaryong mga kasakitan, kita maninigo na magin determinadong gibohon an ano?
20 Ano man na temporaryong mga kasakitan an kaipuhan na atubangon niato, dai kita mawawaran nin pagtubod sa kapangyarihan ni Jehova na magligtas. An dakol niatong tugang na lalaki saka babae sa Aprika, Sirangan na Europa, asin iba pang lugar kaipuhan na atubangon an labi-labing mga kasakitan, alagad sinda padagos na ‘nagpapakagayagaya dian ki Jehova.’ Logod na kita, arog ninda, nungka na pumondo sa paggibo man nin siring. Girumdoma na an Soberanong Kagurangnan na Jehova iyo an satong Burabod nin “kakosogan.” (Habacuc 3:19) Nungka na sia magkukulang sa sato. An Armagedon siertong maabot, asin an ipinanugang bagong kinaban nin Dios seguradong masunod. (2 Pedro 3:13) Dangan “an daga mapapano kan pakaaram sa kamurawayan ni Jehova kun paanong an katubigan mismo nakatatahob sa dagat.” (Habacuc 2:14) Sagkod sa makangangalas na panahon na iyan, arogon niato an marahay na halimbawa ni Habacuc. Pirme kitang ‘magpakagayagaya dian ki Jehova asin maggagayagaya sa Dios nin satong kaligtasan.’
Nagigirumdoman daw Nindo?
• Paano kita puedeng maapektaran kan pamibi ni Habacuc?
• Taano ta nagmamartsa si Jehova?
• Ano an sinasabi kan hula ni Habacuc manongod sa kaligtasan?
• May anong aktitud na maninigo niatong halaton an dakulang aldaw ni Jehova?
[Mga Hapot Para sa Pag-adal]
[Ritrato sa pahina 23]
Aram daw nindo kun anong mga puersa an gagamiton nin Dios tumang sa mga maraot sa Armagedon?