Himateon an Patanid!

BOOM! Kan Hunyo 3, 1991, paagi sa nag-aaningal na ragubdob, an Bukid nin Fugen sa Hapon makosog na nagtuga nin mga gas asin abo. An grabe kainit na meskla nagdalihig sa bakilid. An pagtuga guminadan nin 43 katawo. An dakol na dikit pang magadan nasolo nin grabe. “Tubig, tubig, tabi,” an agrangay nin nagkapira. An mga bombero asin pulis natatarantang nahiridali tanganing tabangan sinda.

MAY nariparo nang tambok nin lava sa alitoktok kan Bukid nin Fugen mga duwang semana bago kaini, kaya alisto na an mga autoridad asin mga nag-eerok duman. Labi nanggad sa sarong semana bago kan kalamidad, may itinao nang abiso na mag-ebakwit. Sarong aldaw sana bago kan pagtuga, sinabihan kan mga pulis an mga miembro kan prensa na dai magduman sa prohibidong lugar. Pero, kan kapahapahamak na hapon na idto an 43 na biktima yaon sa lugar nin peligro.

Taano ta kadakol kan nangahas na magduman o nagdanay duman? An nagkapirang paraoma na nag-ebakwit sa saindang harong nagpuruli tanganing helingon an saindang mga rogaring asin oma. Tolong bulkanologo an naghihingoang makaduman sa pinakaharani sa bulkan tanganing panigoan an saindang akademikong interes. Dakol na reporter asin retratista an nangahas na bumalyo sa dai dapat laogan na mga lugar ta gusto nindang kumua nin interesanteng bareta dapit sa aktibidad kan bulkan. Tolong tsuper nin taksi na tinangdanan kan prensa an yaon duman. An mga pulis asin boluntaryong bombero nasa oras nin trabaho kaidto. An kada saro igwa nin sadiring rason sa pagduman sa lugar nin peligro—asin an resulta iyo na sia nagadan.

Kamo daw Yaon sa Sarong Lugar nin Peligro?

Kita tibaad dai man gabos nag-eerok harani sa sarong aktibong bulkan. Pero, paano kun kita napapaatubang sa sarong grabeng kapahamakan na lakop sa globo, na ibinubugtak kita gabos sa sarong lugar nin peligro na nakasasakop sa enterong globo? An sarong libro na napatunayan na masasarigan na gikanan nin makahulang impormasyon nagpapatanid sa sato dapit sa sarong nagdadangadang na pambilog na kinaban na kalamidad asin ilinaladawan iyan nin arog kaini: “An aldaw madiklom, asin an bulan dai matao kan liwanag kaiyan, asin an mga bitoon mahoholog hale sa langit, patin an mga kapangyarihan kan kalangitan magkakataranyog. . . .  An gabos na tribo kan daga hahampakon an saindang sadiri sa pananangis.” (Mateo 24:29, 30) Digdi an mga pangyayari sa langit na lakop sa uniberso sinasabing apektado “an gabos na tribo kan daga.” Sa ibang pagtaram, an hulang ini may koneksion sa sarong grabeng kapahamakan na makakaapektar sa lambang saro sa sato.

An librong ini na masasarigan an hula iyo an Biblia. Interesante nanggad, an konteksto kan sinambit sa enotan na teksto nagtatao nin detalyadong paglaladawan kan mga bagay na masagkod sa kalamidad na lakop sa globo. Kun paanong an tambok nin lava asin an iba pang senyales kan bulkan nagtao sa mga opisyal kan siudad nin Shimabara nin mga rason sa pagdesignar nin sarong lugar nin peligro, an Biblia nagtatao sa sato nin mga rason na magin alisto asin magin andam para sa pakaligtas. May manonodan kitang leksion sa trahedya sa Bukid nin Fugen asin mamamansayan ta an pagigin seryoso kan natatagama sa ngapit.

 [Picture Credit Line sa pahina 2]

COVER: Yomiuri/Orion Press/Sipa Press

[Picture Credit Line sa pahina 3]

Yomiuri/Orion Press/Sipa Press