Igwa daw Kamo kan “Isip ni Cristo”?
Igwa daw Kamo kan “Isip ni Cristo”?
“Itogot logod sa saindo kan Dios na nagtatao nin pakatagal asin karangahan na magkaigwa . . . kan kaparehong nasa isip na aktitud na yaon ki Cristo Jesus.”—ROMA 15:5.
1. Paano ilinaladawan si Jesus sa dakol na ipininta nin Kakristianohan, asin taano ini ta bakong imparsial na paglaladawan ki Jesus?
“NUNGKA na sia naheling na nagngisi minsan sarong beses.” Iyan an pagkaladawan ki Jesus sa sarong dokumento na putik na naghihingako na isinurat nin sarong suanoy na opisyal nin Roma. An dokumentong ini, na namidbid sa presenteng porma kaiyan poon kaidtong mga ika-11 siglo, sinasabing nakaimpluwensia sa dakol na pintor. * Sa dakol na ipininta, si Jesus minalataw na sarong tawong seryoso an itsura na bihira, kun nangyari man, na naghuyom. Alagad iyan bako nanggad na imparsial na pagkaladawan ki Jesus, na ilinaladawan kan mga Ebanghelyo bilang mamomoton, maboot na tawo na may hararom na saboot.
2. Paano niato makukultibar an “kaparehong nasa isip na aktitud na yaon ki Cristo Jesus,” asin aandamon kita kaini na magibo an ano?
2 Malinaw nanggad, tangani na mamidbid an tunay na Jesus, dapat na panoon niato an satong isip asin puso nin tamang pakasabot sa tunay na pagkatawo ni Jesus kan yaon sia digdi sa daga. Kun siring, siyasaton niato an nagkapirang pagkasaysay sa mga Ebanghelyo na nagtatao sa sato nin pakarorop sa “isip ni Cristo”—an boot sabihon, an saiyang saboot, an saiyang mga naririsa, an saiyang kaisipan, asin an saiyang mga pangangatanosan. (1 Corinto 2:16) Mantang ginigibo niato iyan, estudyaran niato kun paano niato makukultibar an “kaparehong nasa isip na aktitud na yaon ki Cristo Jesus.” (Roma 15:5) Sa siring, kita mas magigin andam sa satong buhay asin sa satong relasyon sa iba na sundan an arogan na itinao nia sa sato.—Juan 13:15.
Madaling Dolokon
3, 4. (a) Ano an eksena kan pagkasaysay na nasusurat sa Marcos 10:13-16? (b) Ano an reaksion ni Jesus kan hingoahon kan saiyang mga disipulo na pogolan an saradit na aki sa pagdolok sa saiya?
3 An mga tawo naakit na dumolok ki Jesus. Sa manlaenlaen na okasyon, an mga tawo na laen-laen an edad saka pinaghalean suelto na nagdolok sa saiya. Estudyare an pangyayari na nasusurat sa Marcos 10:13-16. Nangyari iyan sa paghinanapos na kan saiyang ministeryo kan sia paduman sa Jerusalem sa kahurihurihi, tanganing atubangon an makologon na kagadanan.—Marcos 10:32-34.
4 Imahinara an pangyayari. Nagpoon na darahon nin mga tawo an mga aki, pati mga omboy, tangani na mabendisyonan ni Jesus an mga ini. * Minsan siring, hiningoa kan mga disipulo na pogolan an mga aki sa pagdolok ki Jesus. Tibaad sa paghona kan mga disipulo segurado na habo ni Jesus na maistorbo nin mga aki sa kritikal na mga semanang ini. Alagad sala sinda. Kan marealisar ni Jesus an ginigibo kan mga disipulo, dai nia iyan nagustohan. Inapod ni Jesus an mga aki na rumani sa saiya, na sinasabi: “Pabayae nindo na dumolok sa sako an saradit na aki; dai nindo sinda pagpogolan.” (Marcos 10:14) Dangan ginibo nia an sarong bagay na naghahayag nin totoong mapagpadangat asin mamomoton na ugale. Sinasabi kan pagkasaysay: “Kinugos nia an mga aki asin pinonan na bendisyonan sinda.” (Marcos 10:16) Malinaw na pamugtak an boot kan mga aki mantang kinukugos sinda ni Jesus.
5. Ano an sinasabi kan pagkasaysay sa Marcos 10:13-16 manongod sa pagkatawo ni Jesus?
5 An halipot na pagkasaysay na iyan dakol an sinasabi sa sato manongod sa pagkatawo ni Jesus. Mangnoha na sia madaling dolokon. Minsan halangkawon an katongdan nia sa kalangitan, sia dai nakatatakot ni mapagmenos sa mga tawong bakong sangkap. (Juan 17:5) Bako daw makahulogan man na dawa mga aki pamugtak an boot sa saiya? Segurado na dai kutana sinda naakit na dumolok sa sarong indiperente, daing kagayagayahan na tawo na nungka na naghuyom o nagngisi! An mga tawo, ano man an edad, nagdolok ki Jesus huli ta namatean ninda na sia mamomoton, may pagmakolog na tawo, asin kompiado sinda na dai nia sinda pahahaleon.
6. Paano magigibo nin kamagurangan na sinda magin mas madaling dolokon?
6 Hinohorophorop an pagkasaysay na ini, puede niatong ihapot sa satong sadiri, ‘Igwa daw ako kan isip ni Cristo? Ako daw madaling dolokon?’ Sa delikadong mga panahon na ini, an mga karnero nin Dios nagkakaipo nin mga pastor na madaling dolokon, mga lalaki na siring sa “pailihan sa doros.” (Isaias 32:1, 2; 2 Timoteo 3:1) Kamagurangan, kun kukultibaron nindo an sinsero, odok sa pusong interes sa saindong mga tugang asin andam kamong itao an saindong panahon asin kosog para sa sainda, mamamatean ninda an saindong pagmakolog. Maheheling ninda iyan sa saindong panlauog, madadangog iyan sa tono kan saindong boses, asin maoobserbaran iyan sa saindong maboot na gawe-gawe. An siring na tunay na mainit na pakikiiba asin pagmakolog magpapangyari nin may pagtitiwalang kamugtakan sa palibot na dian mas pasil para sa iba, pati mga aki, na dumolok sa saindo. Ipinaliliwanag nin sarong Kristiana kun taano ta nakapagsabi sia sa sarong magurang sa kongregasyon kan nasa boot nia: “Kinaolay nia ako sa mapagpadangat saka madinamayon na paagi. Ta kun dai, mayo gayod akong sasabihon ni sarong tataramon. Ipinamate nia sa sako na ako harayo sa peligro.”
Makonsiderasyon sa Iba
7. (a) Paano ipinaheling ni Jesus na sia makonsiderasyon sa iba? (b) Ano an tibaad dahelan na luway-luway na ibinalik ni Jesus an pagheling nin sarong buta?
7 Si Jesus makonsiderasyon. Mapagrisa sia sa saboot nin iba. An pakaheling sana sa mga nagsasakit nin makuri nakapahirong marhay sa saiyang boot kaya namotibar siang paginhawahon sinda sa saindang pagdusa. (Mateo 14:14) Makonsiderasyon man sia sa mga limitasyon saka pangangaipo nin iba. (Juan 16:12) Sarong beses, dinara sa saiya nin mga tawo an sarong buta asin pinakimaherakan si Jesus na paomayan sia. Ibinalik ni Jesus an pagheling kan tawo, alagad ginibo nia iyan nin luway-luway. Primero, malibog an pagheling kan tawo sa mga indibiduwal—“garo mga kahoy, alagad sinda nagraralakaw.” Dangan, biyo nang ibinalik ni Jesus an saiyang pagheling. Taano ta luway-luway an pagpaomay nia sa tawo? Tibaad ini tangani na an saro na tuod na marhay na nasa kadikloman makaadaptar sa biglang pakaheling nin maliwanag saka komplikadong kinaban.—Marcos 8:22-26.
8, 9. (a) Ano an nangyari dai nahaloy pagkalaog ni Jesus saka kan saiyang mga disipulo sa rehion nin Decapolis? (b) Isaysay an pagpaomay ni Jesus sa tawong bungog.
8 Estudyare man an sarong pangyayari pakalihis kan Paskua nin 32 C.E. Si Jesus asin an saiyang mga disipulo naglaog sa rehion kan Decapolis, sa sirangan kan Dagat nin Galilea. Duman, madali sindang nakua nin darakulang kadaklan asin dinara ki Jesus an dakol na may helang saka biadi, asin pinaomayan nia sinda gabos. (Mateo 15:29, 30) Interesante nanggad, pinili ni Jesus an sarong tawo na tawan nin espesyal na konsiderasyon. An kagsurat nin Ebanghelyo na si Marcos, an solamenteng nagsurat kan pangyayaring ini, nagbabareta kan nangyari.—Marcos 7:31-35.
9 An tawo bungog asin haros dai nakakataram. Tibaad narisa ni Jesus an partikular na pagkanerbios o pagkasupog kan tawong ini. Kun siring, ginibo ni Jesus an sarong bagay na medyo pambihira. Sinekreto nia an tawo, harayo sa kadaklan, sa sarong pribadong lugar. Dangan guminamit si Jesus nin nagkapirang senyas tangani na ikapasabot sa tawo an saiyang gigibohon. Saiyang “ibinugtak an saiyang mga moro sa talinga kan tawo asin, pakalutab, dinutaan nia an saiyang dila.” (Marcos 7:33) Sunod, tuminingkalag si Jesus sa langit asin gumininhawa na may pagngayongayo. Sasabihon sa tawo kan mga aksion na ini, ‘An gigibohon ko para sa saimo huli sa kapangyarihan na gikan sa Dios.’ Ultimo, sinabi ni Jesus, “Mabuksan ka.” (Marcos 7:34) Sa puntong iyan, nakabalik an pagdangog kan tawo, asin nakataram sia nin normal.
10, 11. Paano kita makapaheheling nin konsiderasyon sa saboot nin iba sa kongregasyon? sa pamilya?
10 Kanigoan na konsiderasyon an ipinaheling ni Jesus sa iba! Mapagrisa sia sa saboot ninda, asin ini man na madinamayon na pagpahalagang ini nagpahiro sa saiya na gumawe sa mga paagi na nagtao nin konsiderasyon sa saboot ninda. Bilang mga Kristiano, marahay na kultibaron asin ipaheling niato an isip ni Cristo sa bagay na ini. Sinasadol kita kan Biblia: “Kamo gabos magin parareho an isip, nagpapaheling nin pakikipagkapwa, may kapadangatan sa tugang, madinamayon sa mapagpadangat na paagi, mapakumbaba sa isip.” (1 Pedro 3:8) Tunay na hinahagad kaini sa sato na magtaram saka gumawe sa mga paagi na kinokonsiderar an saboot nin iba.
11 Sa kongregasyon, ikapaheheling niato an konsiderasyon sa saboot nin iba paagi sa pagtao sa sainda nin dignidad, na tinatratar sinda nin siring sa gusto niatong pagtratar sa sato. (Mateo 7:12) Kaiba dian an pagigin maingat sa satong sinasabi saka sa pagsabi niato kaiyan. (Colosas 4:6) Girumdoma na ‘an mga tataramon na dai iniisip puedeng mambono na siring sa espada.’ (Talinhaga 12:18) Kumusta man sa pamilya? An mag-agom na talagang nagkakaminootan mapagrisa sa saboot kan lambang saro. (Efeso 5:33) Linilikayan ninda an makolog sa talingang mga tataramon, daing herak na pagtatsar, asin malanit na pagtuyatuya—na gabos puedeng makakolog sa boot na bakong madaling maomayan. An mga aki may saboot man, asin kinokonsiderar ini nin mamomoton na mga magurang. Kun kaipuhan an pagtatanos, itinatao iyan nin siring na mga magurang sa mga paagi na iginagalang an dignidad kan saindang mga aki asin dai sinda pinaaagi sa dai kaipuhan na kasusupgan. * (Colosas 3:21) Kun kita nagpapaheling nin konsiderasyon sa iba sa siring na paagi, ipinaheheling niato na kita igwa kan isip ni Cristo.
Andam na Magtiwala sa Iba
12. Ano an timbang, realistikong punto de vista ni Jesus sa saiyang mga disipulo?
12 Si Jesus timbang, realistiko an punto de vista sa saiyang mga disipulo. Aram niang marhay na sinda bakong sangkap. Total, nababasa nia an puso nin tawo. (Juan 2:24, 25) Dawa siring, hineling nia sinda bako sanang kun manongod sa saindang mga pagkabakong sangkap kundi kun manongod sa saindang marahay na mga kualidad. Naheling man nia an potensial sa mga tawong ini na dinagka ni Jehova. (Juan 6:44) An positibong punto de vista ni Jesus sa saiyang mga disipulo risang-risa sa saiyang pakiiba saka pagtratar sa sainda. Sarong bagay, nagpaheling sia nin pagigin andam na magtiwala sa sainda.
13. Paano ipinaheling ni Jesus na may tiwala sia sa saiyang mga disipulo?
13 Paano ipinaheling ni Jesus an tiwalang iyan? Kan humale sia sa daga, ipinaniwala nia an magabat na paninimbagan sa saiyang linahidan na mga disipulo. Ibinugtak nia sa kamot ninda an paninimbagan na pag-asikaso sa pambilog na kinaban na intereses kan saiyang Kahadean. (Mateo 25:14, 15; Lucas 12:42-44) Durante kan saiyang ministeryo, ipinaheling nia dawa sa saradit, bakong diretsong paagi na sia may tiwala sa sainda. Kan saiyang milagrosong padakolon an kakanon tanganing pakakanon an mga kadaklan, ipinaniwala nia sa saiyang mga disipulo an paninimbagan na magwaras kan kakanon.—Mateo 14:15-21; 15:32-37.
14. Paano nindo susumaryohon an pagkasaysay na nasusurat sa Marcos 4:35-41?
14 Estudyare man an pagkasaysay na nasusurat sa Marcos 4:35-41. Sa okasyon na ini si Jesus saka an saiyang mga disipulo nagsakay sa sarong baroto asin naglayag pasirangan sa Dagat nin Galilea. Dai nahaloy pagkatulak ninda, si Jesus huminigda sa likod kan baroto asin napatorog nin nanok. Minsan siring, dai nahaloy “nag-abot an makosogon na bagyo nin doros.” Bakong pambihira an siring na mga bagyo sa Dagat nin Galilea. Huling iyan hababa (mga 200 metros na mas hababa sa kapatagan kan dagat), an aire duman mas mainit nanggad kisa sa mga nasa palibot, asin ini nagbubunga nin mga pagkaliwat kan atmospera. Apuera pa digdi, an makokosog na doros minaibaba pasiring sa Kababan nin Jordan hale sa Bukid nin Hermon, na yaon sa amihanan. An kalmadong panahon puedeng bigla na sanang magin makosog na bagyo. Isip-isipa ini: Daing duda na aram ni Jesus an ordinaryo na sanang mga bagyo, ta sia nagdakula sa Galilea. Pero, trangkilo siang nagtorog, na nagtitiwala sa abilidad kan saiyang mga disipulo, na an nagkapira parasira.—Mateo 4:18, 19.
15. Paano niato maaarog an pagigin andam ni Jesus na magtiwala sa saiyang mga disipulo?
15 Maaarog daw niato an pagigin andam ni Jesus na magtiwala sa saiyang mga disipulo? An nagkapira nadedepisilan na ipaniwala sa iba an mga paninimbagan. Kaipuhan na pirmeng sinda an nagpapadalagan. Tibaad iniisip ninda, ‘Kun gusto ko na an sarong bagay magibo nin tama, dapat ako mismo an gumibo kaiyan!’ Alagad kun kita mismo an magibo kan gabos, namemeligro kitang masobrahan sa kapagalan asin tibaad makua nin dai man kaipuhan an oras para sa satong pamilya. Apuera kaiyan, kun dai niato ipaniniwala sa iba an tamang mga trabaho asin paninimbagan, tibaad hinahalean niato sinda kan kinakaipuhan na eksperyensia asin pagpatood. Madonong na manodan an pagtitiwala sa iba, na ipinaniniwala sa sainda an mga bagay. Marahay na sadiosan niatong ihapot sa satong sadiri, ‘Igwa daw ako kan isip ni Cristo manongod sa bagay na ini? Boluntad ko daw na ipinaniniwala sa iba an nagkapirang trabaho, na nagtitiwala na gigibohon ninda an pinakamakakaya ninda?’
Sia Nagpahayag nin Pagtubod sa Saiyang mga Disipulo
16, 17. Kan ultimong banggi kan saiyang buhay digdi sa daga, anong pagparigon giraray sa kompiansa an itinao ni Jesus sa saiyang mga apostol, dawa aram nia na sia babayaan ninda?
16 Ipinaheling ni Jesus an positibong punto de vista sa saiyang mga disipulo sa saro pang mahalagang paagi. Ipinaaram nia sa sainda na sia may kompiansa sa sainda. Ini malinaw na risang-risa sa nakaparirigon giraray sa kompiansa na mga tataramon nia sa saiyang mga apostol kaidtong ultimong banggi kan saiyang buhay digdi sa daga. Mangnoha an nangyari.
17 Idto bangging pano nin aktibidad para ki Jesus. Tinawan nia an saiyang mga apostol nin praktikal na halimbawa sa kapakumbabaan paagi sa paghanaw sa saindang mga bitis. Pagkatapos, iinintrodusir nia an pamanggihan na magigin girumdoman kan saiyang kagadanan. Dangan, napalabot na naman an mga apostol sa mainit na diriskutiran sa kun siisay sa sainda an garo baga pinakadakula. Pirmeng pasensioso, dai sinda inanggotan ni Jesus kundi nakipangatanosan sia sa sainda. Sinabi nia sa sainda kun ano an mangyayari: “Kamo gabos masisingkog may labot sa sako sa bangging ini, huling nasusurat, ‘Lulugadon ko an pastor, asin an mga karnero kan aripompon magkakawararak.’” (Mateo 26:31; Zacarias 13:7) Aram nia na babayaan sia kan saiyang pinakadayupot na kairibaiba sa oras kan saiyang pangangaipo. Pero, dai nia sinda kinondenar. Al kontraryo ngani, sinabi nia sa sainda: “Alagad pakatapos na ako buhayon liwat, maeenot ako sa saindo sa Galilea.” (Mateo 26:32) Iyo, inasegurar nia sinda na dawa sia babayaan ninda, sinda dai nia babayaan. Pagkatapos kan teribleng sakit na ini, tatagboon nia giraray sinda.
18. Sa Galilea, pinagkatiwalaan ni Jesus an saiyang mga disipulo nin anong magabat na sugo, asin paano iyan hinaman kan mga apostol?
18 Inotob ni Jesus an saiyang sinabi. Pagkatapos kaidto, sa Galilea, an binuhay liwat na si Jesus nagpaheling sa 11 fiel na apostol, na minalataw na nakitipon sa dakol pang iba. (Mateo 28:16, 17; 1 Corinto 15:6) Duman, itinao sa sainda ni Jesus an sarong magabat na sugo: “Kun siring paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu, na tokdoan nindo sinda na otobon an gabos na bagay na ipinagboot ko sa saindo.” (Mateo 28:19, 20) An librong Mga Gibo nagtatao sa sato nin malinaw na ebidensia na hinaman kan mga apostol an sugong iyan. Fiel na pinangenotan ninda an gibong paghuhulit kan maogmang bareta kan enot na siglo.—Gibo 2:41, 42; 4:33; 5:27-32.
19. Ano an itinotokdo sa sato kan mga gawe-gawe ni Jesus pagkabuhay nia liwat manongod sa isip ni Cristo?
19 Ano an itinotokdo sa sato kan may ihinahayag na pagkasaysay na ini manongod sa isip ni Cristo? Naheling ni Jesus an pinakamaraot na mga ugale kan saiyang mga apostol, pero sia “namoot sa sainda sagkod sa katapusan.” (Juan 13:1) Sa ibong kan saindang mga pagkukulang, ipinaaram nia sa sainda na sia may pagtubod sa sainda. Mangnoha na dai napasala an kompiansa ni Jesus. An kompiansa asin pagtubod na ipinahayag nia sa sainda daing duwa-duwa na nagpakosog sa sainda na magdesisyon sa saindang puso na gibohon an ipinagboot nia sa sainda.
20, 21. Paano niato ikapaheheling an positibong punto de vista manongod sa satong mga kapagtubod?
20 Paano niato ikapaheheling an isip ni Cristo sa bagay na ini? Dai magin pesimista manongod sa mga kapagtubod. Kun an iniisip nindo an pinakamaraot, posibleng marhay na ihahayag iyan kan saindong mga tataramon saka hiro-hiro. (Lucas 6:45) Minsan siring, sinasabi sa sato kan Biblia na an pagkamoot “nagtutubod kan gabos na bagay.” (1 Corinto 13:7) An pagkamoot positibo, bakong negatibo. Iyan nagpapakosog imbes na nanlalaglag. An mga tawo mas madaling maghimate sa pagkamoot saka pagparigon sa boot kisa sa pananakot. Mapakokosog saka maparirigon niato an boot nin iba paagi sa pagpahayag nin kompiansa sa sainda. (1 Tesalonica 5:11) Kun, kapareho ni Cristo, kita may positibong punto de vista manongod sa satong mga tugang, tatrataron niato sinda sa mga paagi na mapakosog sa sainda asin mapaluwas kan pinakamarahay nindang mga kualidad.
21 An pagkultibar asin pagpaheling kan isip ni Cristo bako sanang pag-arog sa nagkapirang bagay na ginibo ni Jesus. Arog kan nasambitan sa sinusundan na artikulo, tangani na kita talagang makagawe nin arog ki Jesus, dapat na kita makanood nguna na magkaigwa nin punto de vista sa mga bagay na kapareho kan sa saiya. Pinapangyayari kan mga Ebanghelyo na maheling niato an saro pang aspekto kan saiyang personalidad, kaisipan saka saboot manongod sa gibohon na itinao sa saiya, siring sa ipaliliwanag kan kasunod na artikulo.
[Mga Nota sa Ibaba]
^ par. 1 Sa dokumento, ilinaladawan kan palsipikador an pisikal na itsura daa ni Jesus, pati an kolor kan saiyang buhok, barabas, asin mata. Ipinaliliwanag kan paratradusir kan Biblia na si Edgar J. Goodspeed na an pagpalsipikar na ini “sa intension na mapauso an pagkaladawan na yaon sa mga libro kan mga pintor manongod sa personal na itsura ni Jesus.”
^ par. 4 Minalataw na laen-laen an edad kan mga aki. An termino na trinadusir digdi na “saradit na aki” ginagamit man para sa 12 anyos na aking babae ni Jairo. (Marcos 5:39, 42; 10:13) Minsan siring, sa kaagid na pagkasaysay, ginagamit ni Lucas an sarong termino na ginagamit man para sa mga omboy.—Lucas 1:41; 2:12; 18:15.
^ par. 11 Helingon an artikulong “Iginagalang daw Nindo an Saindang Dignidad?” sa Abril 1, 1998 luwas kan An Torrengbantayan.
Ikapaliliwanag daw Nindo?
• Ano an reaksion ni Jesus kan hingoahon kan saiyang mga disipulo na olangon an mga aki sa pagdolok sa saiya?
• Sa anong mga paagi na si Jesus nagpaheling nin konsiderasyon sa iba?
• Paano niato maaarog an pagigin andam ni Jesus na magtiwala sa saiyang mga disipulo?
• Paano niato maaarog an kompiansa na ipinahayag ni Jesus sa saiyang mga apostol?
[Mga Hapot Para sa Pag-adal]
[Ritrato sa pahina 16]
An mga aki pamugtak an boot ki Jesus
[Ritrato sa pahina 17]
Trinatar ni Jesus an iba nin madinamayon
[Ritrato sa pahina 18]
An kamagurangan na madaling dolokon sarong bendisyon