Kamo daw Napahihirong Gumawe Arog ni Jesus?

“Naheling nia an sarong dakulang kadaklan, alagad ta sia napahiro nin pagkaherak sa sainda, ta garo sinda mga karnero na mayo nin pastor. Asin sia nagpoon na magtokdo sa sainda.”—MARCOS 6:34.

1. Taano ta natural sana na an mga indibiduwal nagpapaheling nin kahangahangang mga kualidad?

SA KASAYSAYAN dakol na indibiduwal an nagpaheling nin kahangahangang mga kualidad. Masasabotan nindo kun taano. Si Jehova Dios igwa asin nagpapaheling nin pagkamoot, kabootan, pagigin buka an palad, asin iba pang mga kualidad na estimado niato. An mga tawo linalang sa ladawan nin Dios. Kaya masasabotan niato kun taano an dakol ta nagpapaheling nin pagkamoot, kabootan, pakikidamay, asin iba pang kualidad nin Dios, kun paanong an kadaklan nagpapabanaag nin konsensia. (Genesis 1:26; Roma 2:14, 15) Pero, tibaad marealisar nindo na an nagkapira mas magian sa boot na magpaheling kan mga kualidad na ini kisa iba.

2. Ano an nagkapirang marahay na gibo na tibaad ginigibo nin mga tawo, na tibaad hinohona na inaarog ninda si Cristo?

² May midbid gayod kamong mga lalaki asin babae na parateng nagsosongko o nagtatabang sa mga may helang, nagpapaheling nin pakikidamay sa mga may diperensia, o buka an palad na nagtatao sa mga dukha. Isipa man an mga indibiduwal na an pakikidamay nagpapahiro sa sainda na gamiton an saindang buhay sa pagtrabaho sa mga kolonya nin mga leproso o sa mga amponan, an mga nagboboluntaryo sa mga ospital o hospisyo, o an mga tawo na naghihingoang tabangan an mga daing maistaran o an mga dulag. Tibaad hinohona kan nagkapira sa sainda na inaarog ninda si Jesus, na nagtao kan arogan para sa mga Kristiano. Nababasa  niato sa mga Ebanghelyo na pinaomayan ni Cristo an mga may helang asin pinakakan an mga nagugutom. (Marcos 1:34; 8:1-9; Lucas 4:40) An mga pagpaheling ni Jesus nin pagkamoot, pagpadangat, asin pakikidamay mga paghayag kan “isip ni Cristo,” na nag-aarog man sa saiyang langitnon na Ama.—1 Corinto 2:16.

3. Tangani na magkaigwa nin timbang na punto de vista sa marahay na mga gibo ni Jesus, ano an kaipuhan niatong estudyaran?

³ Pero, naobserbaran daw nindo na ngonyan an dakol na napahihiro kan pagkamoot saka pakikidamay ni Jesus nalilipasan an sarong importanteng marhay na kabtang kan isip ni Cristo? Magkakaigwa kita nin pakarorop digdi paagi sa maingat na pag-estudyar sa Marcos kapitulo 6. Mababasa niato dian na an mga may helang dinara nin mga tawo ki Jesus tanganing maomayan. Sa konteksto, nanonodan man niato na kan maheling na gutom na an rinibong nagduman sa saiya, pinakakan sinda ni Jesus sa milagrosong paagi. (Marcos 6:35-44, 54-56) An pagpaomay sa mga may helang asin pagpakakan sa mga nagugutom pambihirang mga pagpaheling nin mamomoton na pakikidamay, alagad an mga iyan daw an pangenot na paagi na si Jesus nagtabang sa iba? Asin paano daw an pinakamarahay na paagi na maarog niato an sangkap niang halimbawa sa pagkamoot, kabootan, asin pakikidamay, kun paanong inarog nia si Jehova?

Napahirong Asikasohon an Espirituwal na mga Pangangaipo

4. Ano an eksena kan pagkasaysay sa Marcos 6:30-34?

⁴ Naherak si Jesus sa mga nasa palibot nia sa pangenot huli sa saindang espirituwal na mga pangangaipo. An mga pangangaipong iyan may pangenot na halaga, orog pa kisa pisikal na mga pangangaipo. Estudyare an pagkasaysay sa Marcos 6:30-34. An pangyayari na nasusurat dian nangyari sa mga baybayon kan Dagat nin Galilea, kan madali na an Paskua kan 32 C.E. Ogmahon an mga apostol, asin tama man an dahelan. Natatapos pa sana an mahiwas an naabot na paghuhulit, sinda nagduman ki Jesus, daing duwa-duwa na galagang iestorya sa saiya an saindang mga eksperyensia. Minsan siring, may kadaklan na nagkatiripon. Idto dakulaon kaya si Jesus saka an saiyang mga apostol dai makakakan ni makapahingalo. Sinabihan ni Jesus an mga apostol: “Madia, kamo mismo, na pribado, sa sarong puerang lugar asin magpahingalo kamo nin kadikit.” (Marcos 6:31) Nagsakay sa sarong baroto, harani gayod sa Capernaum, naglayag sinda sa ibong kan Dagat nin Galilea pasiring sa sarong trangkilong lugar. Alagad ta nagdalagan an kadaklan sa may baybayon asin naenotan pa an baroto. Ano daw an magigin reaksion ni Jesus? Naaburido daw sia na naistorbo an saiyang pagsosolo? Dai nanggad!

5. Ano an nagin saboot ni Jesus manongod sa mga kadaklan na nagduman sa saiya, asin ano an ginibo nia bilang reaksion?

⁵ Napahiro an puso ni Jesus kan pakaheling sa kadaklan na ini nin rinibo, pati mga may helang, na galagang naghahalat sa saiya. (Mateo 14:14; Marcos 6:44) Sa pagkonsentrar sa nakapukaw sa pakikidamay ni Jesus asin sa nagin reaksion Nia, isinurat ni Marcos: “Naheling nia an sarong dakulang kadaklan, alagad ta sia napahiro nin pagkaherak sa sainda, ta garo sinda mga karnero na mayo nin pastor. Asin sia nagpoon na magtokdo sa sainda nin balakid na bagay.” (Marcos 6:34) An naheling ni Jesus bako sanang sarong tambak na tawo. An naheling nia mga indibiduwal na may espirituwal na mga pangangaipo. Garo sinda mga karnero na daing maginibo sa pagkalagalag, na mayo nin pastor na magiya sa sainda pasiring sa berdeng mga sabsaban o maprotehir sa sainda. Aram ni Jesus na an daing simpatiyang mga namomoon sa relihion, na dapat kutana may pagmakolog na mga pastor, sa katunayan dinuduhagi an ordinaryong mga tawo asin pinababayaan an saindang espirituwal na mga pangangaipo. (Ezequiel 34:2-4; Juan 7:47-49) Laen an magigin pagtratar sa sainda ni Jesus, na ginigibo an pinakadakulang karahayan na posible para sa sainda. Pinonan niang tokdoan sinda manongod sa Kahadean nin Dios.

6, 7. (a) Ihinahayag kan mga Ebanghelyo an anong ipinaoorog sa pag-asikaso ni Jesus sa mga pangangaipo kan mga tawo? (b) May anong motibasyon na si Jesus naghulit saka nagtokdo?

⁶ Mangnoha an pagkasunodsunod asin an iiniinsinwar na ipinaorog na risang-risa sa sarong kaagid na pagkasaysay. Isinurat ini ni Lucas, na sarong doktor asin interesadong marhay sa pisikal na ikararahay nin iba. “An mga kadaklan . . . nagsurunod [ki Jesus]. Asin sia maboot na nag-ako sa sainda asin nagpoon na magtaram sa sainda dapit sa kahadean nin Dios, asin pinaomayan nia an mga nangangaipo nin pagpaomay.” (Lucas 9:11; Colosas 4:14) Minsan ngani bako man na arog kaiyan sa lambang pagkasaysay nin milagro, sa pangyayaring ini, ano an enot na sinabi kan ipinasabong na pagkasaysay ni Lucas? An bagay na tinokdoan ni Jesus an mga tawo.

 ⁷ Ini sa katunayan kaoyon kan pagdodoon na maheheling niato sa Marcos 6:34. Malinaw na ipinaheheling kan bersikulong iyan kun paano si Jesus orog kisa sa ano pa man napahiro na magpahayag kan saiyang pagkaherak. Tinokdoan nia an mga tawo, na inaasikaso an saindang espirituwal na mga pangangaipo. Sa kapinonan kan saiyang ministeryo, sinabi ni Jesus: “Kaipuhan na ipahayag ko sa iba pang mga siudad an maogmang bareta kan kahadean nin Dios, huli ta dahelan kaini na ako isinugo.” (Lucas 4:43) Pero, masasala kita kun iniisip niato na ibinalangibog ni Jesus an mensahe kan Kahadean huli sana ta iyan obligasyon nia, na garo baga mekanikal an paghuhulit na kaipuhan niang gibohon. Dai, an saiyang mamomoton na pakikidamay sa mga tawo mayor na motibasyon sa pagpaabot nia sa sainda kan maogmang bareta. An pinakamarahay na magigibo ni Jesus—dawa sa mga may helang, pinasasakitan nin demonyo, dukha, o nagugutom—tabangan sinda na mamidbid, akoon, asin kamotan an katotoohan manongod sa Kahadean nin Dios. An katotoohan na iyan mahalagang marhay huli sa papel kan Kahadean sa pagbindikar sa soberaniya ni Jehova asin pagtao nin permanenteng mga bendisyon sa mga tawo.

8. Ano an saboot ni Jesus manongod sa saiyang paghuhulit asin pagtotokdo?

⁸ An aktibong paghuhulit ni Jesus manongod sa Kahadean pundamental na dahelan kun taano sia ta nagdigdi sa daga. Sa paghinanapos kan saiyang ministeryo digdi sa daga, sinabihan ni Jesus si Pilato: “Ako namundag dahel kaini, asin dahel kaini ako napadigdi sa kinaban, na ako magpatotoo sa katotoohan. An lambang tawo na nasa lado kan katotoohan naghihinanyog sa sakong tingog.” (Juan 18:37) Naobserbaran niato sa duwang sinusundan na artikulo na si Jesus tawong may mapagpadangat na saboot—may pagmakolog, madaling dolokon, makonsiderasyon, mapagtiwala, asin orog sa gabos, mamomoton. Kaipuhan na masabotan niato an mga aspektong iyan kan saiyang personalidad kun talagang gusto niatong masabotan an isip ni Cristo. Mahalaga man na marealisar na kaiba sa isip ni Cristo an pagpaorog nia sa saiyang paghuhulit asin pagtotokdo.

Sinadol Nia an Iba na Magpatotoo

9. Siisay an dapat na ipaorog an paghuhulit asin pagtotokdo?

⁹ An pagpaorog sa paghuhulit asin pagtotokdo—bilang kapahayagan nin pagkamoot asin pakikidamay—bakong para ki Jesus sana. Sinadol nia an saiyang mga parasunod na arogon an saiyang mga motibo, ipinaoorog, asin gawe-gawe. Halimbawa, pakapilia ni Jesus kan saiyang 12 apostol, ano an gigibohon ninda? Sinasabi sa sato kan Marcos 3:14, 15: “Binilog nia an sarong grupo nin kagduwa, na inapod man niang ‘mga apostol,’ tangani na sinda makapagpadagos na kaiba nia asin tangani na ikasugo nia sinda na maghulit asin magkaigwa kan autoridad na magpaluwas nin mga demonyo.” Naheheling daw nindo kun ano an ipaoorog kan mga apostol?

10, 11. (a) Kan isinusugo an mga apostol, ano an sinabi ni Jesus na gibohon ninda? (b) Sa pagsugo sa mga apostol, ano an idinoon?

¹⁰ Pag-abot nin panahon, pinangyari nanggad ni Jesus na an 12 makapagpaomay sa iba asin makapaluwas nin mga demonyo. (Mateo 10:1; Lucas 9:1) Dangan isinugo nia sinda na liboton an “lagalag na mga karnero kan harong ni Israel.” Tanganing gibohon an ano? Pinagbotan sinda ni Jesus: “Sa pagduman nindo, maghulit kamo, na nagsasabi, ‘An kahadean kan kalangitan naghaharani na.’ Paomayan nindo an mga naghehelang, buhayon nindo an mga gadan, linigan an mga daoton, paluwason an mga demonyo.” (Mateo 10:5-8; Lucas 9:2) Ano man nanggad an ginibo ninda? “Kaya sinda nagluwas asin [1] naghulit tanganing an mga tawo makapagsolsol; asin [2] nagpapaluwas sinda nin dakol na demonyo asin linalahidan nin lana an dakol na herelangon saka pinaoomayan sinda.”—Marcos 6:12, 13.

¹¹ Mantang an pagtotokdo dai man nasasambitan nin enot sa lambang pangyayari, an pagtao daw nin atension sa nasambitan na pagkasunodsunod pagtao nin sobrang kahulogan sa kalabot na mga ipinaoorog o motibo? (Lucas 10:1-8) Bueno, dai niato maninigong pasaditon an halaga kan pagkaparate kan pagkasambit sa pagtotokdo na enot sa pagpaomay. Estudyare an konteksto sa pangyayaring ini. Bago isugo an 12 apostol, napahiro an boot ni Jesus kan kamugtakan kan mga kadaklan. Mababasa niato: “Si Jesus naglibot sa gabos na siudad asin baryo, na nagtotokdo sa saindang mga sinagoga asin naghuhulit kan maogmang bareta kan kahadean asin nagpapaomay sa gabos na klase nin kahelangan asin gabos na klase nin kamatean. Kan maheling nia an mga kadaklan naherak sia sa sainda, huli ta sinda naanitan asin nagkakaralagalag siring sa mga karnero na mayong pastor. Dangan nagsabi sia sa saiyang mga disipulo: ‘Iyo, an anihon mahiwas, alagad an mga paraani kakadikit. Kun siring, makimaherak kamo sa  Kagurangnan kan anihon na magsobol nin mga paraani sa saiyang anihon.’”—Mateo 9:35-38.

12. An milagrosong mga gibo ni Jesus asin kan mga apostol puedeng magserbi sa anong dugang pang katuyohan?

¹² Huli sa pagigin kaibaiba nia, ikalalaog sa isip kan mga apostol an isip ni Cristo. Masasabotan ninda na kaiba sa saindang pagigin talagang mamomoton asin madinamayon sa mga tawo an paghuhulit asin pagtotokdo manongod sa Kahadean—iyan magigin mayor na aspekto kan saindang marahay na mga gibo. Kaoyon kaiyan, an marahay na mga gibo na pisikal, arog baga kan pagpaomay sa mga may helang, dai sana nakatabang sa mga nangangaipo. Siring sa maiimahinar nindo, an nagkapira tibaad maakit nin mga pagpaomay asin kakanon na milagrosong itinao. (Mateo 4:24, 25; 8:16; 9:32, 33; 14:35, 36; Juan 6:26) Minsan siring, labi pa sa pagtao nin pisikal na tabang, an mga gibong idto aktuwal na nakapahiro sa mga nagmamasid na midbidon na si Jesus iyo an Aki nin Dios asin “an propeta” na ihinula ni Moises.—Juan 6:14; Deuteronomio 18:15.

13. An hula sa Deuteronomio 18:18 nagdoon nin anong katongdan para sa “propetang” madatong?

¹³ Taano ta makahulogan na si Jesus iyo “an propeta”? Bueno, ano an mayor na katongdan na ihinula para sa sarong iyan? Mababantog daw “an propeta” sa paggibo nin milagrosong mga pagpaomay o madinamayon na pagpaluwas nin kakanon para sa mga nagugutom? Ihinula kan Deuteronomio 18:18: “Mapatindog ako nin sarong propeta para sa sainda hale sa tahaw kan saindang mga tugang, arog mo [si Moises]; asin ibubugtak ko nanggad an sakong mga tataramon sa saiyang ngoso, asin tunay na itataram nia sa sainda an gabos na ipagboboot ko sa saiya.” Kaya mantang nakanonood an mga apostol na magkaigwa saka magpahayag nin mapagpadangat na saboot, makakapagkonklusyon sinda na an isip ni Cristo dapat na mapatunayan man sa saindang aktibidad na paghuhulit asin pagtotokdo. Iyan an pinakamarahay na magigibo ninda para sa mga tawo. Paagi kaiyan, an mga may helang asin dukha magkakamit nin permanenteng mga pakinabang, bako sanang kan makukua sa halipot na buhay nin tawo o pirang pagkakan.—Juan 6:26-30.

Pataluboon an Isip ni Cristo Ngonyan

14. Paanong kalabot sa satong paghuhulit an pagkaigwa kan isip ni Cristo?

¹⁴ Mayo sa sato na maghohona na an isip ni Cristo kaidto sanang enot na siglo—ki Jesus sana asin sa enot na mga disipulo na manongod sa sainda nagsurat si apostol Pablo: “Kita igwa kan isip ni Cristo.” (1 Corinto 2:16) Asin daing pag-alangan na aadmitiron niato na kita obligadong maghulit kan maogmang bareta asin gumibo nin mga disipulo. (Mateo 24:14; 28:19, 20) Pero, kapakipakinabang na horophoropon an sadiri niatong mga motibo sa paggibo kaiyan. Maninigo na iyan bako sanang huli sa pakamate nin obligasyon. An pagkamoot sa Dios pangenot na dahelan kun taano kita ta nakikakabtang sa ministeryo, asin kaiba sa talagang pagigin arog ni Jesus an mapahiro kita nin pakikidamay na maghulit asin magtokdo.—Mateo 22:37-39.

15. Taano an pakikidamay ta angay na kabtang kan satong pampublikong ministeryo?

¹⁵ Totoo, bakong pirmeng pasil na makidamay sa mga bako niatong kapareho sa pagtubod, nangorogna kun napapaatubang kita sa pagkaindiperente, paghabo, o oposisyon. Pero, kun mawawaran kita kan satong pagkamoot asin pakikidamay sa mga tawo, puedeng mawara sa sato an mahalagang marhay na motibasyon sa pakikikabtang sa Kristianong ministeryo. Kun siring, paano daw niato makukultibar an pakikidamay? Puede niatong hingoahon na helingon an mga tawo arog kan pagheling sa sainda ni Jesus, bilang “naanitan asin nagkakaralagalag  siring sa mga karnero na mayong pastor.” (Mateo 9:36) Bako daw na iyan naglaladawan kan dakol ngonyan? Sinda pinabayaan asin binuta sa espirituwal nin mga pastor nin falsong relihion. Bilang resulta, dai ninda aram an tamang giya na yaon sa Biblia o an mga kamugtakan nin Paraiso na madali nang papangyarihon kan Kahadean nin Dios sa satong daga. Inaatubang ninda an mga problema sa buhay aroaldaw—kaiba an kadukhaan, dai pagkaoroyon kan pamilya, helang, asin kagadanan—na mayo kan paglaom sa Kahadean. Nasa sato an kaipuhan ninda: an nagliligtas-buhay na maogmang bareta kan Kahadean nin Dios na establisado na ngonyan sa langit!

16. Taano ta maninigo na gustohon niatong ipaabot sa iba an maogmang bareta?

¹⁶ Kun pinepensar nindo sa siring na paagi an espirituwal na mga pangangaipo kan mga nasa palibot nindo, bako daw na pinahihiro kamo kan saindong puso na gustohon na gibohon an bilog nindong makakaya na sabihon sa sainda an manongod sa mamomoton na katuyohan nin Dios? Iyo, an gibohon niato huli sa pakikidamay. Kun kita may simpatiya sa mga tawo arog ni Jesus, iyan magigin risang-risa sa tono kan satong boses, satong panlauog, satong paagi nin pagtotokdo. Iyan gabos magpapangyari na an satong mensahe magin orog na nakaaakit sa mga “may tamang tendensia sa buhay na daing katapusan.”—Gibo 13:48.

17. (a) Ano an nagkapirang paagi na ikapaheheling niato an satong pagkamoot asin pakikidamay sa iba? (b) Taano iyan ta bakong magsalang gumibo nin marahay na mga gibo o makikabtang sa pampublikong ministeryo?

¹⁷ Siempre, an satong pagkamoot asin pakikidamay maninigong maheling sa bilog niatong pamumuhay. Kaiba digdi an satong pagigin maboot sa mga daing sukat, may helang, asin dukha—na ginigibo an kaya niato sa rasonableng sokol tangani na pagianan an saindang pagdusa. Kaiba dian an mga paghihingoa niato sa tataramon asin gibo na haleon an kamondoan kan mga nagadanan nin mga namomotan. (Lucas 7:11-15; Juan 11:33-35) Pero, an siring na mga pagpaheling nin pagkamoot, kabootan, asin pakikidamay dapat na dai magin an pangenot na katuyohan kan satong marahay na mga gibo, arog kan sa nagkapirang humanitaryo. May mas nagdadanay na kahulogan an mga paghihingoa na minotibar nin siring na mga kualidad nin Dios alagad ipinaheheling sa pakikikabtang sa gibohon na Kristianong paghuhulit asin pagtotokdo. Girumdoma an sinabi ni Jesus manongod sa Judiong mga namomoon sa relihion: “Nagtatao kamo nin tinagba kan yerbabuena asin kan anis patin kan komino, alagad liningawan nindo an mas magabat na mga bagay kan Ley, arin na baga, an hustisya asin pagkaherak patin pagigin fiel. An mga bagay na ini obligasyon na gibohon, pero bakong tanganing basangbasangon an ibang bagay.” (Mateo 23:23) Para ki Jesus idto bakong pagpili kun arin sa duwa—magsalang tabangan an mga tawo sa saindang pisikal na mga pangangaipo o tokdoan sinda nin nagtatao nin buhay na espirituwal na mga bagay. Ginibo ni Jesus an duwa. Pero, malinaw na pangenot an saiyang gibong pagtotokdo ta an karahayan na nagibo nia sa siring na paagi makatatao nin daing katapusan na tabang.—Juan 20:16.

18. An pag-estudyar niato sa isip ni Cristo maninigong magpahiro sa sato na gibohon an ano?

¹⁸ Kanigoan an pasasalamat niato na ihinayag sa sato ni Jehova an isip ni Cristo! Paagi sa mga Ebanghelyo, orog niatong maaaraman an kaisipan, saboot, mga kualidad, aktibidad, asin ipinaoorog kan pinakadakulang tawo na nabuhay kasuarin man. Nasa sato na an pagbasa, paghorophorop, asin paggibo kan ihinahayag kan Biblia manongod ki Jesus. Girumdoma, tangani na kita talagang makagawe nin arog ki Jesus, dapat na kita makanood nguna na isipon, sabooton, asin turotimbangon an mga bagay arog kan ginibo nia, sa pinakamakakaya niato bilang mga tawong bakong sangkap. Kun siring, magin kitang determinado na kultibaron asin ipaheling an isip ni Cristo. Mayo na nin mas marahay pang pamumuhay, mayo na nin mas marahay pang pagtratar sa mga tawo, asin mayo na nin mas marahay pang paagi na kita asin an iba makarani sa saro na ipinamidbid nia sa sangkap na paagi, an satong mapagpadangat na Dios, si Jehova.—2 Corinto 1:3; Hebreo 1:3.

Ano an Isisimbag Nindo?

• Anong pakarorop an itinatao kan Biblia sa kun ano an parateng reaksion ni Jesus sa mga tawong nangangaipo?

• Ano an idinoon ni Jesus sa pagboot sa saiyang mga parasunod?

• Paano niato ikapaheheling an “isip ni Cristo” sa satong mga aktibidad?

[Mga Hapot Para sa Pag-adal]

 [Bilog na pahinang ritrato sa pahina 23]

[Ritrato sa pahina 24]

Ano an pinakadakulang karahayan na magigibo nin mga Kristiano sa iba?