Saradang na Hawak, Darakulang Puso

PAANO daw an pakikipag-olay sa mga dai midbid manongod sa Kahadean nin Dios kun ika 76 sentimetros sana kalangkaw? Masasabi iyan sa saindo ni Laura. Sa edad na 33, iyan an saiyang langkaw, 76 sentimetros sana. Sia asin an saiyang tugang, si Maria, na 24 anyos asin 86 sentimetros an langkaw, nag-iistar sa Quito, Ecuador. Togoti nindo sinda na ipaliwanag an mga balakid na inaatubang ninda sa saindang Kristianong ministeryo.

“Tanganing makaduman sa samong teritoryo sa paghuhulit asin sa Kristianong mga pagtiripon, kami naglalakaw nin mga kabangang kilometro pasiring sa aagihan nin auto. Hale sa linusadan mi, kami naglalakaw na naman nin kabangang kilometro tanganing lumunad sa saro pang auto. An problema sana ta sa dalan na ini igwa nin limang maiisog na ayam. Takot kaming marhay sa mga ayam huli ta para sa samo an mga iyan garo siring kadakula nin mga kabayo. Tanganing bugawon an mga iyan kun kinakaipuhan, kami nagdadara nin badas, na itinatago mi sa sarong lugar bago lumunad sa auto tanganing magamit iyan sa paglakaw papuli.

“An paglunad sa auto literal na masakit na lakad para sa samo. Minatongtong kami sa ibabaw nin sarong tambak nin daga sa pondohan kan auto tanganing mas pasil an paglunad. An nagkapirang tsuper minapondo sa may tambak, alagad an iba dai. Kun siring kaiyan, an mas halangkaw sa samo tinatabangan an mas hababa sa paglunad. An paglunad sa ikaduwang auto nagkakaipo na kami bumalyo nin sarong mayor na tinampo na dakol an nag-aagi—na totoong masakit huli sa samuyang haralipot na tabay. Huli sa samuyang kasaditan, an magabat na bag saro pang problema. Tanganing magin mas magian an bag, kami naggagamit nin pambulsang Biblia asin linilimitaran mi man an dara ming mga literatura.

“Poon sa pagkaniaki, pareho kami nagin sadiri sanang gayo an iniisip. Aram kan samong mga kataed na kaidto pa natatakot na kaming makipag-olay sa mga dai mi midbid. Kun siring napangalas asin naghanga sinda na maheling kaming nagtotoktok sa saindang pinto, asin sa parate sinda nagdadangog sa samo. Alagad sa mga lugar na dai kaming gayo midbid, sa parate an pagheling sana sa samo kan mga tawo mga mungan; sa siring, dai ninda pirmeng itinatao sa samo an seryosong atension na maninigo sa samong mensahe. Minsan siring, an pakamate sa pagkamoot ni Jehova nagtatao sa samo kan pagkapusoan na magpadagos sa pag-ebanghelyo. An paghorophorop sa Talinhaga 3:​5, 6 nagtatao man samo nin kosog nin boot.”

Siring sa ipinaheheling ni Laura asin Maria, an pagmamaigot sa ibong kan pisikal na mga kaolangan puedeng makapamuraway sa Dios. Namibi si apostol Pablo na logod haleon an saiyang “tonok sa laman,” na posibleng helang sa pisikal. Alagad sinabihan sia nin Dios: “An sakuyang dai na kutana maninigong kabootan igo na para sa saimo; huli ta an sakuyang kapangyarihan sinasangkap sa kaluyahan.”  Iyo, an diperensia sa pisikal dai kaipuhan na haleon tanganing kita makapaglingkod sa Dios. An lubos na pagsarig sa Dios makatatabang sa sato na gibohon an pinakamakakaya sono sa satong mga kamugtakan. Huling siring kaini an nagin pagmansay ni Pablo sa saiyang “tonok sa laman,” makasasabi sia: “Kun ako maluya, dangan ako makosog.” (2 Corinto 12:7, 9, 10) Pakalihis nin pirang taon si Pablo nagsurat: “Igwa ako kan kosog para sa gabos na bagay huli sa saiya na nagtatao nin kapangyarihan sa sako.”—Filipos 4:13.

Sa presenteng mga panahon, an Dios naggigibo nin mapangyaring mga gibo paagi sa mga lalaki, babae, asin mga aki na lubos na deboto sa saiya. Dakol sa sainda an may diperensia minsan paano. Minsan ngani sinda gabos naglalaom sa pagpaomay nin Dios sa irarom kan Kahadean nin Dios, dai sinda naghahalat na haleon nguna nin Dios an saindang mga problema bago magmaigot na maglingkod sa saiya.

Kamo daw may kaluyahan sa pisikal? Kosogan an saindong boot! Paagi sa saindong pagtubod mapapabilang kamo sa mga arog ki Pablo, Laura, asin Maria. Masasabi mapadapit sa sainda, siring kan nangyari sa mga lalaki asin babaeng may pagtubod kan suanoy na mga panahon: “[Sinda] napakosog hale sa kaluyahan.”—Hebreo 11:34.

[Ritrato sa pahina 8]

Si Maria

Si Laura

[Ritrato sa pahina 9]

Tinatabangan ni Maria si Laura sa paglunad sa auto

[Mga Ritrato sa pahina 9]

“Takot kaming marhay sa mga ayam huli ta para sa samo an mga iyan garo siring kadakula nin mga kabayo”

Ibaba: Si Laura asin Maria saka an mga nakipag-adal sa sainda sa Biblia