An Puersa nin Pamibi

Pasolnop na an saldang sa siudad ni Nacor sa Tahaw na Sirangan. An sarong Sirio na an ngaran Eliezer nagdatong na may kaibanan na surunodan na sampulong kamelyo sa sarong bubon sa luwas kan siudad. Minsan ngani daing duda na pagal asin napapaha, mas iniisip ni Eliezer an manongod sa mga pangangaipo nin iba. Hale sia sa ibang nasyon tanganing humanap nin agom na babae para sa aking lalaki kan saiyang kagurangnan. Dugang pa, dapat na hanapon nia an agom na babaeng ini sa tahaw kan mga paryente kan saiyang kagurangnan. Paano nia ootobon an depisil na ipinagigibong ini?

SI Eliezer nagtutubod sa puersa nin pamibi. Paagi sa pambihira, arog-aki na pagtubod, ini an mapakumbabang hinagad nia: “Jehova na Dios kan sakong kagurangnan na si Abraham, papangyariha, tabi, iyan sa atubangan ko sa aldaw na ini asin gibohan mo nin mamomoton na kabootan an sakong kagurangnan na si Abraham. Uya ako digdi sa may burabod nin tubig, asin an mga aking babae kan mga lalaki kan siudad nagruruluwas tanganing sumakdo nin tubig. An dapat na mangyari iyo na an hoben na babae na sabihan ko, ‘Ibaba mo, tabi, an saimong dulay tangani na makainom ako,’ asin masabi nanggad, ‘Inom, asin paiinomon ko man an saimong mga kamelyo,’ ini an dapat na itao mo sa saimong lingkod, ki Isaac; asin paagi kaini paaraman sa sako na guminibo ka nin maimbod na pagkamoot sa sakuyang kagurangnan.”—Genesis 24:12-14.

An pagkompiar ni Eliezer sa puersa nin pamibi bakong basang sana. Tara, an kaenot-enoteng babae na nagduman sa bubon natiempo na iyo an makoapong babae kan tugang na lalaki ni Abraham! An saiyang ngaran Rebeca, asin sia daing agom, mabini sa moral, asin magayon. Pambihira nanggad, bako sanang pinainom nia si Eliezer kundi maboot man na nag-alok na pararaon an gabos niang kamelyo. Sa huri, pakatapos nin pag-orolay kan pamilya, si Rebeca gikan sa boot na uminoyon na umiba ki Eliezer papuli sa sarong harayong nasyon tanganing magin agom kan aking lalaki ni Abraham na si Isaac. Pambihira nanggad asin malinaw na simbag sa pamibi ni Eliezer kaidtong panahon na an Dios paminsanminsan na milagrosong nag-iinterbenir sa mga pangyayari!

Dakol kitang manonodan sa pamibi ni Eliezer. Nagpaheling iyan kan saiyang pambihirang pagtubod, kapakumbabaan, asin daing kapasloan na pagmalasakit para sa mga pangangaipo nin iba. An pamibi ni Eliezer nagpaheling man kan saiyang pagpasakop sa paagi nin pagtratar ni Jehova sa katawohan. Daing duda na aram nia an espesyal na relasyon nin Dios ki Abraham asin an Saiyang panuga na an bilog na katawohan magkakamit nin mga bendisyon sa ngapit paagi ki Abraham. (Genesis 12:3) Sa siring, pinonan ni Eliezer an saiyang pamibi paagi sa mga tataramon na: “Jehova na Dios kan sakong kagurangnan na si Abraham.”

Si Jesu-Cristo iyo an gikan ni Abraham na gagamiton sa pagbendisyon sa gabos na makinuyog na katawohan. (Genesis 22:18) Kun boot niato na simbagon an satong mga pamibi sa ngonyan, kaipuhan kitang magpaheling nin mapakumbabang pagrekonoser sa paagi nin pagtratar nin Dios sa katawohan paagi sa saiyang Aki. Si Jesu-Cristo nagsabi: “Kun  kamo nagdadanay na kasaro ko asin an sakong mga tataramon nagdadanay sa saindo, hagadon nindo an ano man na boot nindo asin iyan mangyayari para sa saindo.”—Juan 15:7.

An sarong parasunod ni Cristo na nakaeksperyensia kan pagigin totoo kan mga tataramon na ini ni Jesus iyo si apostol Pablo. An saiyang pagtubod sa puersa nin pamibi segurado nanggad na bakong basang sana. Inenkaminar nia an mga kapwa Kristiano na idolok ki Jehova an gabos nindang kahaditan paagi sa pamibi asin pinatotoohan nia: “Igwa ako kan kosog para sa gabos na bagay huli sa saiya na nagtatao nin kapangyarihan sa sako.” (Filipos 4:6, 7, 13) Boot sabihon daw kaini na itinao an gabos na mapagngayongayong hinagad ni Pablo sa Dios? Helingon ta.

Bakong Gabos na Hinahagad Itinatao

Sa saiyang daing kapasloan na ministeryo, si Pablo nagkaigwa kan inapod niang “tonok sa laman.” (2 Corinto 12:7) Ini puedeng an kapurisawan sa isip asin emosyon dahelan sa mga paratumang asin “bakong tunay na mga tugang.” (2 Corinto 11:26; Galacia 2:4) O iyan puedeng an pisikal na kapawotan nin pabalikbalik na helang sa mata. (Galacia 4:​15) Ano man iyan, an “tonok sa laman” na ini nagpaluya ki Pablo. “Ako tolong beses na nakimaherak sa Kagurangnan na iyan mahale sa sako,” an isinurat nia. Minsan siring, dai itinao an hinagad ni Pablo. Ipinaliwanag ki Pablo na an espirituwal na mga pakinabang na saiya nang inako sa Dios, arog baga kan kosog na matagalan an mga pagbalo, igo na. Apuera kaini, an Dios nagsabi: “An sakuyang kapangyarihan sinasangkap sa kaluyahan.”—2 Corinto 12:8, 9.

Ano an satong nanonodan sa halimbawa ni Eliezer asin Pablo? Si Jehova Dios talagang naghihinanyog sa mga pamibi kan mga mapakumbabang naghihingoa na maglingkod sa saiya. Alagad dai boot sabihon kaini na pirme niang itinatao an saindang mga hinahagad huli ta an Dios igwa nin panhaloyan na pananaw sa mga bagay-bagay. Mas aram nia kisa sato kun ano an pinakaikararahay niato. Orog na mahalaga, sia pirmeng minahiro kaoyon kan saiyang ipinahayag na katuyohan na nasusurat sa Biblia.

Panahon Para sa Espirituwal na Pagpaomay

An Dios nanunuga na paomayan an katawohan sa gabos na kamatean sa pisikal, isip, asin emosyon durante kan Sangribong Taon na Paghade kan saiyang Aki digdi sa daga. (Kapahayagan 20:​1-3; 21:​3-5) An sinserong mga Kristiano galagang naghahalat sa ipinanugang ngapit na ini, na bilog an pagtubod sa kapangyarihan nin Dios na otobon iyan. Minsan ngani dai linalaoman an siring na milagrosong pagpaomay ngonyan, sinda namimibi sa Dios para sa saiyang pagranga asin kosog na makaya an mga pagbalo. (Salmo 55:22) Kun sinda nagkakahelang, sinda puede man na mamibi na logod giyahan nin Dios sa pagkua kan pinakamarahay na medikal na pagbolong na abot kan kaya ninda sa pinansial.

An nagkapirang relihion ineenkaminar an mga may helang na mamibing maomayan ngonyan, na sinasambit an milagrosong mga pagpaomay na ginibo ni Jesus asin kan saiyang mga apostol. Alagad an siring na mga milagro ginibo para sa sarong espesyal na katuyohan. Iyan nakatabang na patunayan na si Jesu-Cristo iyo an tunay na Mesiyas asin tanganing ipaheling na an pabor nin Dios hinale na sa Judiong nasyon asin itinao sa bagong Kristianong kongregasyon. Kaidto, kaipuhan an milagrosong mga balaog tanganing pakosogon an pagtubod kan bagong itindog na Kristianong kongregasyon. Kan an omboy pang kongregasyon makatindog na sa sadiri, sabi ngani, asin magin maygurang, an milagrosong mga balaog ‘pinara.’​—1 Corinto 13:8, 11.

Sa kritikal na panahon na ini, ginigiyahan ni Jehova Dios an mga nagsasamba sa saiya sa mas importanteng gibohon na espirituwal na pagpaomay. Sagkod na may panahon pa sinda, kaipuhan na marhay kan mga tawo na maghimate sa pakiolay na ini: “Hanapa nindo si Jehova, banwaan, mantang sia makukua pa. Mag-apod kamo sa saiya mantang sia harani pa. An maraot na tawo bayaan na an saiyang dalan, asin an maliwag na tawo an saiyang mga kaisipan; asin bumalik sia ki Jehova, na maheherak sa saiya, asin sa satong Dios, huli ta sia bulaos na magpapatawad.”—Isaias 55:6, 7.

An espirituwal na pagpaomay na ini sa nagsosolsol na mga parakasala ginigibo paagi sa paghuhulit kan maogmang bareta kan Kahadean nin Dios. (Mateo 24:14) Paagi sa pagtao nin kosog sa saiyang mga lingkod na gibohon an pagliligtas-buhay na ini, tinatabangan ni Jehova Dios an minilyon na tawo sa gabos na nasyon na magsolsol sa saindang mga kasalan asin magkaigwa nin paborableng relasyon sa saiya bago an katapusan kan maraot na sistemang ini. An gabos na sinserong namimibi para sa siring na espirituwal na pagpaomay asin an gabos na namimibi para sa tabang na gibohon an pagpaomay na ini talagang sinisimbag an saindang mga pamibi.

[Picture Credit Line sa pahina 3]

Si Eliezer asin Rebeca/The Doré Bible Illustrations/Dover Publications