Bareta kan mga Parabalangibog kan Kahadean

Binalosan an Saindang Pagtubod

SI APOSTOL Pablo sarong tawo na pambihira an pagtubod, asin inenkaminar nia an mga kapagtubod na magpatalubo man nin pagtubod. Sia nagsabi: “An minadolok sa Dios kaipuhan na magtubod na sia iyo nanggad asin na sia nagigin an parabalos sa mga maigot na naghahanap sa saiya.” (Hebreo 11:6) An minasunod na mga eksperyensia hale sa Mozambique nagpapaheling kun paano binabalosan ni Jehova an makosog na pagtubod asin sinisimbag an odok na mga pamibi.

• An sarong balong tugang na babae na taga amihanan na probinsia nin Niassa nahahadit kun paano sia asin an saiyang anom na aki makaaatender sa “Sa Dios na Dalan nin Buhay” na Pandistritong Kombension. An saiyang solamenteng pagbuhay iyo an pagtinda sa sarong lokal na sadan, alagad kan mag-abot an petsa kan kombension, an saiyang kuarta igo sana para sa sarong biahe na pamasahe sa tren nindang pamilya. Minsan siring, nagdesisyon sia na magkompiar sa mga probisyon ni Jehova asin idinagos an saiyang plano na magin presente sa kombension.

Nagsakay sia sa tren kaiba an saiyang anom na aki. Durante kan biahe an konduktor nagrani sa saiya tanganing tiketan sia. Kan mariparo an saiyang lapel card, naghapot ini kun anong klase an identipikasyon nia. Sinabi sa saiya kan tugang na babae na nagpapamidbid iyan sa saiya bilang delegado sa pandistritong kombension kan Mga Saksi ni Jehova. “Saen gigibohon an kombension na ini?” an hapot kan konduktor. Kan maaraman na an kombension duman sa kataed na probinsia nin Nampula, mga 300 kilometros an distansia, dai linalaoman na siningil nia sana sia nin kabanga kan normal na kantidad kan tiket! Dangan tinawan nia sia asin an saiyang pamilya nin tiket pabalik para sa kabanga pa kan saiyang pamasahe. Kanigoan an kaogmahan nia na nagtiwala sia ki Jehova!​—Salmo 121:​1, 2.

• Sa laog nin mga 25 taon, an sarong relihiosang marhay na babae namibi sa Dios na ipaheling sa saiya an tamang paagi sa pagsamba sa saiya. An iglesia na inaatenderan nia isinasalak an relihiosong mga seremonya sa tradisyonal na mga ritual, asin sia nagduda na an pormang ini nin pagsamba nasosonoan nin Dios.

Sia nagsaysay: “Pirme kong ginigirumdom an mga tataramon ni Jesus na nasusurat sa Mateo 7:7: ‘Padagos na maghagad, asin ta iyan itatao sa saindo; padagos na maghanap, asin ta kamo makakakua; padagos na magtoktok, asin ta iyan bubuksan sa saindo.’ Nasa isip an tekstong ini, regular akong namibi na giyahan ako nin Dios pasiring sa katotoohan. Sarong aldaw hinagad kan pastor kan samong iglesia sa gabos na nagtatrabaho sa lokal na sadan na darahan sia nin sarong kantidad nin kuarta kaiba an nagkapira sa saindang mga paninda tanganing mabendisyonan nia an mga iyan. Para sa sako bakong sono sa Kasuratan an kahagadan na ini, kaya mayo akong dinara. Kan maheling kan pastor na dai ako nagdara nin ‘dolot,’ nagpoon siang insultohon ako sa atubangan kan gabos na miembro kan iglesia. Kan aldaw na idto narealisar ko na bako ini an paagi na gusto nin Dios na sambahon, kaya naghale ako sa iglesia. Mientras tanto, sige-sige ako sa pamimibi na logod manompongan an katotoohan.

“Sa katapustapusi, kinosogan ko an sakong boot asin kinaolay ko an sarong paryente na saro sa Mga Saksi ni Jehova. Inalokan nia ako nin sarong pulyeto, asin kan mabasa iyan tolos-tolos kong narealisar na sinisimbag na nin Dios an sakong mga pamibi. Pag-abot nin panahon, an kasaroan ko nagpoon man na apresyaron an mga katotoohan sa Biblia, asin linegalisar mi an samong pag-agoman. Minsan siring, kan huri nagkahelang nin grabe an sakong agom. Alagad sagkod kan sia magadan, pinarigon nia an sakong boot na magpadagos sa dalan kan katotoohan tanganing maghelingan liwat kami sa Paraiso.

“Sagkod lamang akong nagpapasalamat ki Jehova sa pagsimbag sa sakong mga pamibi asin sa pagpaheling sa sako kan tamang paagi nin pagsamba sa saiya. Sinimbag man an sakong mga pamibi ta naheling ko an gabos kong walong aki na nagin dusay na lingkod ni Jehova.”