Paghanap ki Jehova na May Andam na Puso

AN ISRAELITANG saserdote na si Esdras sarong marahayon na parasiyasat, intelektuwal, parakopya, asin paratokdo kan Ley. Para sa mga Kristiano ngonyan sia marahayon man na halimbawa nin bilog na kalag na paglilingkod. Taano man? Sa dahelan na pinagdanay nia an saiyang diosnon na debosyon dawa yaon sa Babilonya, sarong siudad na pano nin falsong mga dios asin pagsamba sa demonyo.

An diosnon na debosyon ni Esdras dai basta na sana nangyari. Pinagmaigotan nia iyan. Sa katunayan, sinasabi nia sa sato na ‘inandam nia an saiyang puso na siyasaton an ley ni Jehova asin gibohon iyan.’—Esdras 7:10.

Arog ki Esdras, boot kan banwaan ni Jehova ngonyan na gibohon an gabos na hinahagad sa sainda ni Jehova mantang nabubuhay sa sarong kinaban na kontra sa tunay na pagsamba. Kaya siyasaton ta an mga paagi na dian puede man niatong andamon an satong puso, an mas nasa laog na persona—kabale an satong kaisipan, aktitud, kamawotan, asin motibasyon—na “siyasaton an ley ni Jehova asin gibohon iyan.”

Pag-andam kan Satong Puso

An “pag-andam” nangangahulogan nin “pagpreparar nin patienot para sa sarong katuyohan: ikondisyon para sa sarong partikular na gamit, aplikasyon, o disposisyon.” Siempre, kun kamo igwa nang tamang kaaraman sa Tataramon nin Dios asin idinusay na an saindong buhay ki Jehova, kun siring an saindong puso siertong yaon na sa andam na kamugtakan asin puedeng iagid sa “marahay na daga” na sinambit ni Jesus sa saiyang parabola kan parasabwag.—Mateo 13:18-23.

Minsan siring, kaipuhan kan satong puso an dayaday na atension asin pagkultibar. Taano? May duwang rason. Enot, huli ta an nakadadanyar na mga tendensia, siring sa mga doot sa sarong tatamnan, madaling makagamot, nangorogna durante kan “huring mga aldaw” na ini na an “doros” kan sistema ni Satanas orog kisa kasuarin pa man na pano nin may nakadadanyar na mga banhi nin makalaman na kaisipan. (2 Timoteo 3:​1-5; Efeso 2:2) An ikaduwang rason may labot sa daga mismo. Kun dai kinukultibar, an daga puedeng madaling maalang, tumagas, asin magtagiltil. O kadakol na tawo an tibaad daing pakiaram na palakawlakaw sa ibabaw kan tatamnan asin tinatamakan an daga kaya minatagas. Kaagid kaiyan an piguratibong daga kan satong puso. Iyan puedeng magin tagiltil kun pinababayaan o tinatamakan nin mga tawo na daing interes sa satong espirituwal na ikararahay.

Kun siring, kanigoan kaimportante na iaplikar niato gabos an konseho kan Biblia: “Orog sa gabos na maninigong ingatan, ingatan mo an saimong puso, huli ta gikan dian an mga burabod nin buhay.”—Talinhaga 4:23.

Mga Bagay na Nagpapataba sa “Daga” kan Satong Puso

Estudyaran ta an nagkapirang bagay, o kualidad, na mapataba sa “daga” kan satong puso tanganing makakontribwir iyan sa matubang na pagtalubo. Siempre, dakol na bagay an mapaoswag sa satong puso, alagad digdi anom an eestudyaran ta: pagrekonoser sa satong espirituwal na pangangaipo, kapakumbabaan, pagkasadiosan, diosnon na takot, pagtubod, asin pagkamoot.

“Maogma idtong mga nakamamate kan saindang espirituwal na pangangaipo,” an sabi ni Jesus. (Mateo 5:3) Arog kan pisikal na gutom na nagpapagirumdom sa sato kan satong pangangaipo na kumakan, an pakamate sa satong espirituwal na pangangaipo pinapagdadanay kitang gutom para sa espirituwal na pagkakan. Natural na sa mga tawo an magkaigwa nin labi-labing pagmawot para sa siring na kakanon huli ta iyan nagtatao nin kahulogan asin katuyohan sa buhay. An mga pangigipit kan sistema nin mga bagay ni Satanas o an grabeng kahugakan sa  pag-adal puedeng magpangurol sa satong pakamate kan pangangaipong ini. Dawa siring, si Jesus nagsabi: “An tawo dapat na mabuhay, bakong sa tinapay sana, kundi sa lambang tataramon na minaluwas sa ngoso ni Jehova.”—Mateo 4:4.

Sa literal na paagi, an regular, balanse, asin masustansiang kakanon nakararahay sa salud kan hawak, asin iyan nagpapagana man kan hawak para sa masunod na pagkakan pag-abot nin oras. Totoo man iyan sa espirituwal na sentido. Tibaad dai nindo ibinibilang na kamo mainadal na tawo, alagad kun uugaleon nindo na basahon an Tataramon nin Dios aroaldaw asin pag-aadalan nindo nin regular an mga publikasyon na basado sa Biblia, maheheling nindo na nagkokosog an saindong gana. Sa katunayan, galaga nindong aantisiparon an saindong mga oras nin pag-adal sa Biblia. Kaya dai kamo tolos sumuko; pagmaigotan na magkaigwa nin nakararahay na gana sa espirituwal.

An Kapakumbabaan Nagpapalomoy kan Puso

An kapakumbabaan mahalagang marhay sa pagkaigwa nin andam na puso huli ta ginigibo kita kaiyan na magin madaling tokdoan asin tinatabangan kita na mas pasil na akoon an mamomoton na hatol asin pagtatanos. Estudyare an marahayon na halimbawa ni Hadeng Josias. Durante kan saiyang paghade nakua an sarong dokumento na igwa kan Ley nin Dios na itinao paagi ki Moises. Kan madangog ni Josias an mga tataramon kan Ley asin marealisar nia kun gurano na kanaparayo kan saiyang mga apoon sa dalisay na pagsamba, ginisi nia an saiyang gubing asin nagtangis sa atubangan ni Jehova. Taano ta tuminaros nin hararom na marhay an Tataramon nin Dios sa puso kan hade? An pagkasaysay nagsasabi na an saiyang puso “malomoy,” kaya ngani nagpakumbaba sia kan madangog an mga tataramon ni Jehova. Naheling ni Jehova an mapakumbaba, mapaghimate na puso ni Josias asin binendisyonan sia huli kaiyan.​—2 Hade 22:11, 18-​20.

An kapakumbabaan nagpangyari sa “daing inadalan asin ordinaryong” mga disipulo ni Jesus na masabotan asin iaplikar an espirituwal na mga katotoohan na dai napaduman sa mga “madonong asin intelektuwal” alagad “sa laman” sana. (Gibo 4:13; Lucas 10:21; 1 Corinto 1:26) An huring mga sinambit bakong andam na akoon an tataramon ni Jehova huli ta an saindang puso pinatagas nin kapalangkawan. Makangangalas daw na ikinaoongis ni Jehova an kapalangkawan?—Talinhaga 8:​13; Daniel 5:​20.

Pagkasadiosan Asin Diosnon na Takot

Si propeta Jeremias nagsurat na “madaya an puso nin labi sa ano pa man na bagay asin desesperado. Siisay an makamimidbid kaiyan?” (Jeremias 17:9) An kadayaan na ini nahahayag sa laen-laen na paagi, arog baga kun kita naggigibo nin mga sarahotan kun kita nasasala. Iyan nahahayag man kun ipinangangatanosan ta an seryosong mga depekto sa personalidad. Minsan siring, tatabangan kita kan pagkasadiosan na daogon an madayang puso paagi sa pagtabang sa sato na atubangon an katotoohan manongod sa satong sadiri tanganing kita umoswag. An salmista nagpaheling kan siring na pagkasadiosan kan sia mamibi: “Siyasata ako, O Jehova, asin baloa ako; dalisaya an sakong mga bato asin an sakong puso.” Malinaw nanggad, inandam kan salmista an saiyang puso na akoon an pagdalisay asin pagbalo ni Jehova, minsan ngani tibaad nangahulogan iyan nin pag-admitir kan pagkaigwa nin garo ati na mga karakteristiko tanganing mahale an mga iyan.—Salmo 17:3; 26:2.

An diosnon na takot, na kabale an “pagkaongis sa maraot,” sarong mapuersang pantabang sa prosesong ini nin pagdalisay. (Talinhaga 8:13) Minsan ngani inaapresyar an mamomoton na kabootan asin karahayan ni Jehova, an saro na tunay na may takot ki Jehova pirmeng nasa isip na si Jehova igwa nin kapangyarihan na magpadusa, gumadan pa ngani, sa mga nakikisuway sa saiya. Ipinaheling ni Jehova na an mga may takot sa saiya makuyog man sa saiya kan sia magsabi manongod sa Israel: “Kun pataluboon sana kutana ninda an saindang puso na matakot sa sako asin danay na otobon an gabos kong togon, tanganing ikarahay ninda asin kan saindang mga aki sagkod noarin pa man!”—Deuteronomio 5:29.

Malinaw nanggad, an katuyohan kan diosnon na takot, bakong ibugtak kita sa may pagkasindak na pagpasakop, kundi pahiroon kita na kuyogon an satong mamomoton na Ama, na aram tang nasa puso nia an sato mismong pinakaikararahay. Sa katunayan, an siring na diosnon na takot nakapaoogma asin nakapagagayagaya pa ngani, na angay na ipinaheling ni Jesu-Cristo mismo.​—Isaias 11:3; Lucas 12:5.

An Andam na Puso Nagsosopay an Pagtubod

An puso na makosog an pagtubod nakakaaram na an ano man na hagadon o ipagboot ni Jehova paagi sa saiyang Tataramon pirmeng tama asin para sa satong pinakaikararahay. (Isaias 48:17, 18) An saro na igwa kan siring na puso nagkakamit nin hararom na satispaksion asin pagkakontento sa pag-aplikar  kan sadol sa Talinhaga 3:5, 6, na nagsasabi: “Magtiwala ka ki Jehova sa bilog mong puso asin dai ka manarig sa saimong sadiring pakasabot. Sa gabos mong dalan girumdomon mo sia, asin itatanos nia mismo an saimong mga dana.” Minsan siring, an puso na daing pagtubod masayumang magtiwala ki Jehova, nangorogna kun an paggibo kaiyan may kalabot na mga pagsasakripisyo, arog baga nin paggibong simple kan buhay nin saro tanganing makakonsentrar sa intereses kan Kahadean. (Mateo 6:​33) May marahay na dahelan, an daing pagtubod na puso minamansay ni Jehova na “maraot.”—Hebreo 3:12.

An satong pagtubod ki Jehova nahahayag sa dakol na paagi, kabale an mga bagay na ginigibo niato nin pribado sa satong sadiring harong. Bilang halimbawa an prinsipyo sa Galacia 6:7: “Dai kamo palagalag: An Dios dai maoolog-olog. Huli ta ano man an itinatanom nin tawo, ini man an saiyang aanihon.” An satong pagtubod sa prinsipyong ini mahahayag sa mga bagay na arog kan mga pelikula na satong dinadalan, mga libro na satong binabasa, sa kun sagkod saen an pag-adal niato sa Biblia, asin sa satong mga pamibi. Iyo, an makosog na pagtubod na nagpapahiro sa sato na magtanom “sa espiritu” mahalagang marhay sa pagkaigwa nin puso na andam na akoon an Tataramon ni Jehova asin kuyogon iyan.—Galacia 6:8.

Pagkamoot—An Nakalalabi sa Gabos na Kualidad

Orog sa gabos na iba pang kualidad, an pagkamoot talagang ginigibo an daga kan satong puso na magin mapaghimate sa Tataramon ni Jehova. Sa siring, kan ikinokomparar iyan sa pagtubod asin paglaom, sinabi ni apostol Pablo na an pagkamoot “an nakalalabi sa gabos” na kualidad na ini. (1 Corinto 13:13) An puso na pano nin pagkamoot sa Dios nagkakamit nin hararom na marhay na satispaksion asin kagayagayahan sa pagkuyog sa saiya; iyan dai nanggad nasusurang sa mga kahagadan nin Dios. Si apostol Juan nagsabi: “Ini iyo an boot sabihon kan pagkamoot sa Dios, na kuyogon niato an saiyang mga togon; pero an saiyang mga togon dai nakapagagabat.” (1 Juan 5:3) Kaagid kaiyan, si Jesus nagsabi: “Kun an siisay man namomoot sa sako, ootobon nia an sakong tataramon, asin an sakong Ama mamomoot sa saiya.” (Juan 14:23) Mangnoha na an siring na pagkamoot binabalosan. Iyo, namomotan na marhay ni Jehova an mga minarani sa saiya sa pagkamoot.

Aram ni Jehova na kita bakong sangkap asin danay na nagkakasala tumang sa saiya. Dawa siring, dai sia minarayo sa sato. An hinahanap ni Jehova sa saiyang mga lingkod iyo an “bilog na puso,” puso na nagpapahiro sa sato na maglingkod sa saiya nin gikan sa boot na may “nakaoogmang marhay na kalag.” (1 Cronica 28:9) Siempre, aram ni Jehova na kaipuhan an panahon asin paghihingoa tanganing kita makapatalubo nin marahay na mga kualidad sa satong puso asin sa siring makapaluwas kan mga bunga kan espiritu. (Galacia 5:​22, 23) Huli kaini, sia nagpapasensia sa sato, “huli ta sia mismo nakaaaram na gayo kan pagkaporma sa sato, na ginigirumdom na kita kabokabo.” (Salmo 103:14) Sa pagpabanaag kan iyo man sanang aktitud, nungkang krinitika nin labi-labi ni Jesus an saiyang mga disipulo huli sa saindang mga sala kundi mapasensiang tinabangan asin pinarigon an saindang boot. Bako daw na pinahihiro kamo kan siring na pagkamoot, pagkaherak, asin pasensia ni Jehova asin ni Jesus na lalo pa sindang kamotan?​—Lucas 7:​47; 2 Pedro 3:9.

Kun may beses na nadedepisilan kamong gaboton an nakagamot nin hararom, arog-doot na mga ugale o ronoton an saradit na matagas, arog-dalipay na mga karakteristiko, dai kamo manluya o madesganar. Imbes, padagos kamong maghingoa na umoswag mantang kamo ‘nagmamaigot sa pamimibi,’ kaiba an parateng pagngayongayo ki Jehova para sa saiyang espiritu. (Roma 12:12) Paagi sa saiyang gikan sa boot na tabang, kamo, siring ki Esdras, magigin mapanggana sa pagkaigwa nin puso na biyong andam “na siyasaton an ley ni Jehova asin gibohon iyan.”

[Ritrato sa pahina 31]

Pinagdanay ni Esdras an saiyang diosnon na debosyon dawa sa Babilonya

[Picture Credit Line sa pahina 29]

Garo Nalbandian