Estorya nin Buhay

Pagpapadanay na Simple an Buhay Tanganing Makapaglingkod ki Jehova

ISINAYSAY NI CLARA GERBER MOYER

Ako 92 anyos na asin haros dai na makalakaw, alagad malinaw, matinanda pa an sakong isip. Abaang pasasalamat ko na magkapribilehiong maglingkod ki Jehova poon sa pagkaniaki! An simple, bakong komplikadong pamumuhay dakulaon an ikinakontribwir sa kayamanan na iyan.

NAMUNDAG ako kan Agosto 18, 1907, sa Alliance, Ohio, E.U.A., an panganay sa limang aki. Kan ako otso anyos, an sarong bilog na panahon na ministro kan Mga Estudyante sa Biblia, an apod kaidto sa Mga Saksi ni Jehova, nagbisikleta paduman sa samong pagibohan nin mga produktong gatas. Saiyang nakaolay an sakong ina, si Laura Gerber, sa may pinto asin hinapot kun aram nia kun taano ta tinotogotan an karatan. Kaidto pa iyan iniisip-isip ni Nanay.

Pakatapos na maghapot ki Tatay, na yaon duman sa kamalig, si Nanay nagpedido kan anom na tomo kan Studies in the Scriptures. Binasa nia ini na may pagkagalaga asin napahirong marhay an boot kan mga katotoohan sa Biblia na saiyang nanonodan. Pinag-adalan nia an Tomo 6, an The New Creation, asin nasabotan nia nin malinaw an pangangaipo para sa Kristianong bautismo paagi sa pagladop sa tubig. Huling dai aram kun paano manunuparan an Mga Estudyante sa Biblia, nagpabautismo sia ki Tatay sa sarong sadit na sapa sa oma, minsan ngani idto an malipot na bulan nin Marso 1916.

Dai nahaloy pakatapos kaiyan naheling ni Nanay an sarong anunsio sa diaryo na ipinapaisi an sarong pahayag sa Daughters of Veterans Hall sa Alliance. An pahayag may titulong “The Divine Plan of the Ages.” Huminiro tolos sia, huling an titulo kan Tomo 1 kan Studies in the Scriptures kapareho kan pahayag. Isinalong an kalesa, asin an bilog na pamilya nagduman sa samong enot na pagtiripon na nakasakay sa kalesa na guyod nin kabayo. Poon kaidto nag-aatender kami sa mga pagtiripon sa harong nin mga tugang kun Domingo asin Mierkoles na banggi. Dai nahaloy pakalihis kaiyan, si  Nanay binautismohan giraray nin sarong representante kan Kristianong kongregasyon. Si Tatay, na pirmeng sibot sa trabaho sa oma, sa kahurihurihi nagkainteres sa pag-adal sa Biblia, asin nabautismohan sia pakalihis nin pirang taon.

Pakamidbid sa mga Nangengenot

Kan Hunyo 10, 1917, si J. F. Rutherford, an presidente kaidto kan Watch Tower Society, nagsongko sa Alliance tanganing magpahayag manongod sa temang “Taano ta Naggeguerra an mga Nasyon?” Nuebe anyos ako kaidto asin nag-atender ako kaiba an sakong mga magurang patin an duwa kong tugang na lalaki, si Willie asin Charles. Labi sa sanggatos kami na nag-atender. Pakatapos kan pahayag ni Tugang na Rutherford, an kadaklan sa mga nag-atender nagparetrato sa luwas kan Columbia Theater, kun saen sia nagpahayag. Kan sumunod na semana, sa lugar man sanang iyan, si A. H. Macmillan nagtao nin pahayag na may temang “An Madatong na Kahadean nin Dios.” Sarong pribilehio na songkoon kan mga tugang na ini an samong sadit na banwaan.

Dai Malilingawan na Enot na mga Kombension

An enot na kombension na inatenderan ko kaidtong 1918 sa Atwater, Ohio, pirang kilometro hale sa Alliance. Hinapot ni Nanay an representante duman kan Sosyedad kun igo na an edad ko tanganing bautismohan. Naniniwala ako na balido na an pagdusay ko sa Dios na gibohon an saiyang kabotan, kaya tinogotan akong bautismohan kan aldaw na idto sa sarong sapa harani sa sarong dakulang tanoman nin mga mansanas. Nagbolos ako sa sarong tolda na itinogdok kan mga tugang para sa katuyohan na iyan asin binautismohan ako sulog an sarong daan, mahibog na badong pantorog.

Kan Setyembre 1919, kami kan sakong mga magurang naglunad sa tren paduman sa Sandusky, Ohio, sa Lake Erie. Duman nagsakay kami sa baroto, asin dai nahaloy, nag-abot kami sa Cedar Point kun saen gigibohon an samong dai malilingawan na kombension. Paglusad mi sa baroto, igwa nin sadit na kakanan sa duongan. Nagbakal ako nin hamburger, na talagang saro nang luho para sa sako kan panahon na idto. Masiramon iyan! An pinakahalangkaw na kabilangan nin nag-atender sa samong walong aldaw na kombension 7,000. Mayo nin sound system, kaya kinaipuhan kong maghinanyog na marhay.

Sa kombension na ini ilinuwas an kaibang magasin kan The Watch Tower, na may titulong The Golden Age (ngonyan Awake!). Tanganing makaatender sa kombension na idto, nagpalta ako sa enot na semana kan klase, alagad bako nanggad na sayang iyan. An Cedar Point sarong pasyaran kun bakasyon, asin igwa sinda nin mga paraluto duman sa restawran na nag-adam nin mga pagkakan para sa mga delegado. Alagad sa dai maaraman na dahelan, an mga paraluto asin serbidor nagwerelga, kaya an Kristianong mga tugang na may aram sa pagluto an nagtrabaho asin nag-andam nin pagkakan para sa mga delegado. Sa laog nin dakol na dekada pakalihis kaiyan, an banwaan ni Jehova an nag-andam kan saindang sadiring mga pagkakan sa mga asamblea asin kombension.

Nagkapribilehio man kaming makabalik sa Cedar Point kan Setyembre 1922 para sa siyam na aldaw na kombension na inatenderan nin pinakahalangkaw na kabilangan na labing 18,000. Duman kami inenkaminar ni Tugang na Rutherford na “ipaisi, ipaisi, ipaisi, an Hade asin an saiyang kahadean.” Minsan siring, nagkapirang taon bago kaini an sakong personal na ministeryo nagpoon na paagi sa pagwaras nin mga pulyeto asin kan The Golden Age.

Apresasyon sa Ministeryo

Sa kapinonan nin 1918, nakikabtang ako sa paghatod kan pulyetong The Fall of Babylon sa mga kataraed na oma. Huli sa lipot, nagpapainit kami nin sarong soapstone sa kalan sa harong asin dinadara iyan sa kalesa tanganing pahimbongon an samong bitis. Nagsusulot kami nin mahibog asin nagkukupya, huling an kalesa igwa sana nin atop asin may kurtina sa gilid alagad mayo nin pampainit. Alagad maogmang mga panahon idto.

Kan 1920 sarong espesyal na edisyon kan The Finished Mystery, na inapod na ZG, an ginibo sa pormang magasin. * Kami kan sakong mga magurang nagluwas sa Alliance dara an publikasyon na ini. Kan mga aldaw na idto an gabos solong nagduduman sa mga pinto, kaya nahahandal akong nagsakat sa sarong beranda kun saen may nagkapirang tawo na nagtutukaw. Pakatapos kong magtao nin pag-atubang, an sarong babae nagsabi: “Magayon an halipot na sinabi nia, ano,” asin inako an publikasyon. Nakapasakamot ako nin 13 ZG kan aldaw na idto, an primerong pagtao ko nin harohalawig, pormal na pag-atubang sa harong-harong.

 Kan ako nasa ikasiyam nang grado, si Nanay nagkapulmoniya asin dai nakabangon sa laog nin labing sambulan. An kangodhan kong tugang na babae, si Hazel, omboy pa, kaya nagpondo ako sa pag-eskuela tanganing tumabang sa trabaho sa oma asin mag-asikaso sa mga aki. Sa ibong kaiyan, isinaboot kan samong pamilya an katotoohan sa Biblia, asin regular kaming nag-atender sa gabos na pagtiripon kan kongregasyon.

Kan 1928 sa Memorial kan kagadanan ni Cristo, an pulyeto na may titulong “Where Are the Nine?” ipinanao sa gabos na nag-atender. Ipinaliwanag kaiyan an Lucas 17:11-​19, na dian sinasabi kan Biblia na saro sana sa sampulong nalinigan na daoton an mapakumbabang nagpasalamat ki Jesus sa milagrosong pagpaomay. Natudok kaiyan an puso ko. Hinapot ko an sakong sadiri, ‘Gurano ako kamapag-apresyar?’

Mantang marahay na ngonyan an kamugtakan sa harong saka marahay an salud ko asin daing paninimbagan na nakaoolang, nagdesisyon akong humale sa harong asin lumaog sa pagpapayunir, an apod sa bilog na panahon na ministeryo. Inenkaminar ako kan sakong mga magurang na gibohon iyan. Sa siring, naresibi mi kan kapadis ko, si Agnes Aleta, an samong asignasyon, asin kan Agosto 28, 1928, naglunad kami sa tren kan alas 9:00 n.b. Tigsaro sana kaming maleta asin bag na lalagan kan samong mga babasahon sa Biblia. Sa istasyon, an mga tugang kong babae asin an mga magurang ko naghihiribi, asin iyo man kami. Paghona ko tibaad nungka ko na sindang maheheling liwat, huling naniniwala kami na harani na an Armagedon. Pagkaaga, nag-abot kami sa samong destino sa Brooksville, Kentucky.

Nag-arkila kami nin sarong sadit na kuarto sa sarong pakaserahan asin nagbakal kami nin mga de latang spaghetti patin naggibo nin mga sanwits para sa samo. Kada aldaw magkalaen kami nin direksion, na naghuhulit nin solo asin nag-aalok sa mga kagharong nin limang libro sa kontribusyon na $1.98. Luway-luway, nakobrehan mi an bilog na banwaan, na nakanompong nin dakol na tawo na interesadong gayo sa Biblia.

Sa laog nin mga tolong bulan, nakaolay mi na an gabos sa laog asin palibot kan Brooksville siring man sa Augusta. Kaya ginibo mi naman an banwaan nin Maysville, Paris, asin Richmond. Durante kan sunod na tolong taon, nakobrehan mi an dakol na distrito sa Kentucky kun saen mayo nin kongregasyon. Sa parate tinatabangan kami nin mga katood asin kapamilya hale sa Ohio na nagbibiahe pasiring duman asin iniibanan kami sa ministeryo sa laog nin sarong semana o labi pa.

Iba Pang Dai Malilingawan na mga Kombension

An kombension sa Columbus, Ohio, Hulyo 24-​30, 1931, talagang dai malilingawan. Duman ipinaisi na kami aapodon na sa ngaran na basado sa Biblia na Mga Saksi ni Jehova. (Isaias 43:12) Bago kaiyan, kun hinahapot kami nin mga tawo kun ano an relihion mi, an sinasabi mi, “Internasyonal na Mga Estudyante sa Biblia.” Alagad dai talaga kaiyan ikinapamidbid na marhay an samong kalaenan, huling igwa kaidto nin mga estudyante sa Biblia na asosyado sa laen-laen na ibang grupong relihioso.

An kapadis ko, si Agnes, nag-agom, asin solo na ako; kaya naogma akong marhay kan ipaisi na an mga naghahanap nin kapadis na payunir maninigong magduman sa sarong lugar. Duman ko nakamidbid si Bertha asin Elsie Garty saka si Bessie Ensminger. Duwa an kotse ninda asin naghahanap sinda nin pan-apat na tugang na babaeng payunir na makakaibanan ninda. Magkairibanan kami paghale sa kombension, minsan ngani dai pa kami noarin man nagkamiridbidan bago kaidto.

Kun tig-init naghuhulit kami sa bilog na estado nin Pennsylvania. Dangan, pag-abot nin tiglipot, naghahagad kami na idestino sa mas maalingahot na timog na estado nin North Carolina, Virginia, asin Maryland. Kun tigsoli minabalik kami sa amihanan. Iyan an nakatodan nin mga payunir kan panahon na idto. Kan 1934, si John Booth asin Rudolph Abbuhl, na nag-arog sa nakatodan na ini, iiniba si Ralph Moyer asin an saiyang ngohod na tugang na si Willard paduman sa Hazard, Kentucky.

Nakaolay ko na si Ralph sa nagkapirang okasyon, asin orog kaming nagkamidbidan durante kan dakulang kombension sa Washington, D.C., na ginibo kan Mayo 30–Hunyo 3, 1935. Magkataed kaming nakatukaw ni Ralph sa balkonahe kan itao an pahayag manongod sa “dakulang kaburonyogan,” o “dakulang kadaklan.” (Kapahayagan 7:​9-​14) Sagkod kaidto an pagtubod mi iyo na an mga kabilang sa dakulang kaburonyogan mga miembro kan langitnon na grupo na kulang nin pagigin fiel kisa sa 144,000. (Kapahayagan 14:​1-3) Kaya habo kong magin kabilang sa sainda!

Kan ipaliwanag ni Tugang na Rutherford na an  mga kabilang sa dakulang kaburunyogan iyo an daganon na grupo nin fiel na mga maliligtas sa Armagedon, dakol an nabigla. Dangan sinabihan niang tumindog an gabos na kabilang sa dakulang kaburonyogan. Bueno, dai ako nagtindog, alagad si Ralph iyo. Kan huri, nagin mas malinaw sa sakong isip an mga bagay, kaya an 1935 iyo an ultimong taon na ako nakikabtang sa emblemang tinapay asin arak sa Memorial kan kagadanan ni Cristo. Minsan siring, si Nanay padagos na nakikabtang sagkod na sia magadan kan Nobyembre 1957.

Sarong Permanenteng Kapadis

Kami ni Ralph padagos na nagsuratan. Ako naglilingkod sa Lake Placid, Nueva York, asin sia sa Pennsylvania. Kan 1936 naggibo sia nin sarong sadit na harong na de rueda na puedeng guyodon kan saiyang kotse. Dinara nia iyan hale sa Pottstown, Pennsylvania, pasiring sa Newark, New Jersey, para sa kombension na ginibo duman kan Oktubre 16-18. Sarong banggi pakatapos kan programa, nagkapira kaming payunir na nagduman tanganing helingon an bagong harong na de rueda ni Ralph. Nagtitindog kaming duwa sa laog kan harong na de rueda sa kataed kan sadit na lababo duman kan hapoton nia ako, “Nagustohan mo an harong na de rueda?”

Kan magtango ako, naghapot sia, “Gusto mong mag-istar digdi?”

“Iyo,” an simbag ko, asin mamomoton na hinadokan nia ako na nungka kong malilingawan. Pakalihis nin duwang aldaw, nagkua kami nin lisensia sa kasal. Kan Oktubre 19, an aldaw pakatapos kan kombension, nagduman kami sa Brooklyn asin nagpasyar sa pasilidad kan imprentahan kan Watch Tower Society. Dangan naghagad kami nin asignasyon na teritoryo. Si Grant Suiter an nag-aasikaso kan teritoryo, asin naghapot sia kun siisay an magibo kaiyan. Si Ralph nagsabi: “Kami po kun puede kaming makapakasal.”

“Kun mabalik kamo pag-alas 5:00 n.h., puede tang iareglo iyan,” an simbag ni Tugang na Suiter. Kaya kan bangging idto kami kinasal sa harong nin sarong Saksi sa Brooklyn Heights. Kami nagkarakan kaiba an nagkapirang katood sa sarong lokal na restawran dangan naglunad sa pampublikong sasakyan pasiring sa harong na de rueda ni Ralph sa Newark, New Jersey.

Dai nahaloy pakatapos kaiyan, kami pasiring na sa Heathsville, Virginia, an samong enot na destino sa pagpapayunir na magkaibanan. Kami naghulit sa Northumberland County dangan nagbalyo sa distrito nin Fulton asin Franklin sa Pennsylvania. Kan 1939, si Ralph inimbitaran para sa gibohon sa sona, sarong aktibidad na dian maglilibot kami sa pagsongko sa dakol na kongregasyon. Naglingkod kami sa mga kongregasyon sa estado nin Tennessee. Kan sumunod na taon namundag an samong aking lalaki, si Allen, asin kan 1941 pinondo an gibohon sa sona. Dangan idinestino kami sa Marion, Virginia, bilang espesyal payunir. Kan mga panahon na idto, iyan nangahulogan nin paggamit nin 200 na oras kada bulan sa ministeryo.

Paggibo nin mga Pagliliwat

Kan 1943, naheling kong kaipuhan na butasan an ministeryo bilang espesyal payunir. An pag-istar sa sarong sadit na harong na de rueda, pag-asikaso sa sadit na aki, pagluto, pagpadanay sa samo gabos na malinig an gubing, asin paggamit nin mga 60 oras sa ministeryo kada bulan iyo na sana an kaya  kong gibohon. Alagad si Ralph nagpadagos bilang espesyal payunir.

Nagbalik kami sa Alliance, Ohio, kan 1945, ipinabakal mi an harong na de rueda na nagin erokan mi sa laog nin siyam na taon, asin nagbalyo duman sa harong sa oma sa kaibanan kan sakong mga magurang. Duman, sa atubangan na beranda, namundag an samong aking babae, si Rebekah. Si Ralph nagkua nin trabahong por ora sa banwaan asin nagpadagos bilang regular payunir. Nagtrabaho ako sa oma asin ginibo ko an makakaya ko na tabangan siang makapadagos sa pagpapayunir. Minsan ngani inalokan kami kan pamilya ko nin libreng daga asin harong, nagsayuma si Ralph. Gusto niang magdanay na daing nakaoolang tanganing mas lubos ming magibo an intereses kan Kahadean.

Kan 1950 nagbalyo kami sa Pottstown, Pennsylvania, asin nag-arkila nin harong sa kantidad na $25 kada bulan. Sa laog kan suminunod na 30 taon, an arkila luminangkaw sa kantidad sanang $75. Namatean mi na tinatabangan kami ni Jehova na mapagdanay na simple an samong buhay. (Mateo 6:​31-​33) Si Ralph nagtrabaho nin tolong aldaw kada semana bilang barbero. Kada semana nag-aadal kami sa Biblia kaiba an samong duwang aki, nag-aatender sa mga pagtiripon kan kongregasyon, asin naghuhulit kan maogmang bareta kan Kahadean bilang pamilya. Si Ralph naglingkod bilang nangengenot na paraataman sa lokal na kongregasyon. Paagi sa pagpapadanay na simple kan samong buhay, dakol kaming nagibo sa paglilingkod ki Jehova.

Pagkagadan kan Sakong Mahal na Agom

Kan Mayo 17, 1981, nasa Kingdom Hall kami, naghihinanyog sa sarong pampublikong pahayag. Nakamate nin maraot si Ralph, nagduman sa likod kan hall, asin may ipinatao sa sako sa sarong attendant na sarong surat na nagsasabing mapuli sia. Bako nanggad na arog kaiyan si Ralph kaya may pinakiolayan ako na ihatod tolos ako sa harong. Mayo pang sarong oras si Ralph nagadan sa grabeng atake sa puso. Pagkatapos kan pag-adal sa Torrengbantayan kan agang idto, ipinaisi sa kongregasyon na sia gadan na.

Kan bulan na idto si Ralph nakalabing 50 oras na sa ministeryo. An saiyang bilog na panahon na karera bilang payunir uminabot nin labing 46 na taon. Sia nagkondukta nin mga pag-adal sa Biblia sa labing sanggatos katawo na sa kahurihurihi nagin bautisadong mga Saksi ni Jehova. Bawi nanggad kan espirituwal na mga bendisyon na inako mi an ano man na mga pagsasakripisyo mi sa nag-aging mga taon.

Nagpapasalamat sa Sakong mga Pribilehio

Sa nakaaging 18 taon, nagsosolo ako sa buhay, na nag-aatender sa mga pagtiripon, naghuhulit sa iba sagkod na kaya ko, asin nag-aadal kan Tataramon nin Dios. Ngonyan nag-iistar ako sa sarong apartment nin mga retirado para sa mga siudadano na may edad na. Igwa sana ako nin pipirang muebles asin pinagmarhay kong dai magkaigwa nin telebisyon. Alagad an sakong buhay kontento asin mayaman sa espirituwal. An mga magurang ko asin an duwa kong tugang na lalaki fiel sagkod na sinda nagadan, asin an duwa kong tugang na babae fiel na nagpapadagos sa dalan nin katotoohan.

Naggagayagaya ako ta an sakong aking lalaki, si Allen, naglilingkod bilang Kristianong magurang sa kongregasyon. Sa laog nin dakol nang taon sia nakapag-instalar nin mga sound system sa mga Kingdom Hall asin Assembly Hall asin nakapagtrabaho sa pag-instalar nin mga sound system sa mga kombension durante nin tig-init. An saiyang agom sarong maimbod na lingkod nin Dios, asin an saindang duwang aking lalaki naglilingkod bilang magurang sa kongregasyon. An aki kong babae, si Rebekah Karres, labi nang 35 taon sa bilog na panahon na ministeryo, kabale an apat na taon sa pankinaban na opisina prinsipal kan Mga Saksi ni Jehova sa Brooklyn. Sia asin an saiyang agom 25 taon nang nasa gibohon na pagbibiahe sa laen-laen na parte kan Estados Unidos.

Sinabi ni Jesus na an Kahadean kaagid nin natatagong kayamanan na puedeng makua. (Mateo 13:44) Nagpapasalamat ako ta nakua kan sakong pamilya an kayamanan na iyan kaidtong kadakol nang taon an nakaagi. Kanigoan na pribilehio na salingoyon an labing 80 taon nin dusay na paglilingkod sa Dios—na mayo nin pagbasol! Kun mabubuhay giraray ako, iyan giraray an gigibohon ko huli ta, tunay nanggad, ‘an mamomoton na kabootan nin Dios orog karahay kisa buhay mismo.’—Salmo 63:3.

[Nota sa Ibaba]

[Ritrato sa pahina 23]

Nadangog mi an pahayag ni Tugang na Rutherford kan 1917 sa Alliance, Ohio

[Ritrato sa pahina 23]

Kaiba si Ralph sa atubangan kan harong na de rueda na ginibo nia

[Ritrato sa pahina 24]

Kaiba an duwa kong aki ngonyan