Talagang Sinisimbag nin Dios an mga Pamibi
Talagang Sinisimbag nin Dios an mga Pamibi
Si Cornelio sarong tawo na gustong kamtan an pabor nin Dios paagi sa parate, odok sa puso na mga pamibi. Saro pa, ginamit nia sa marahay na paagi an saiyang katongdan bilang opisyal sa hukbo. Sono sa Biblia, “nagtao sia nin dakol na balaog nin pagkaherak” sa mga tawong nangangaipo.—Gibo 10:1, 2.
KAN panahon na idto, an Kristianong kongregasyon kompuesto nin nagtutubod na mga Judio, proselito, asin Samaritano. Si Cornelio bakong turi na Hentil asin bakong kabtang kan Kristianong kongregasyon. Boot sabihon daw kaiyan na basang sana an saiyang mga pamibi? Dai. Tinawan ni Jehova Dios nin atension si Cornelio asin an saiyang mapagngayongayong mga gibo.—Gibo 10:4.
Paagi sa paggiya nin anghel, si Cornelio nadara sa laog kan Kristianong kongregasyon. (Gibo 10:30-33) Bilang resulta, sia asin an saiyang kasararo sa harong nagkapribilehio na magin an enot na bakong turi na mga Hentil na inako sa Kristianong kongregasyon. An personal na eksperyensia ni Cornelio ibinilang ni Jehova Dios na maninigong iiba sa rekord kan Biblia. Daing duda, dakol na pagbabago an ginibo nia tanganing lubos na ioyon an saiyang buhay sa mga pamantayan nin Dios. (Isaias 2:2-4; Juan 17:16) An eksperyensia ni Cornelio maninigo na magin dakulang pamparigon sa boot kan mga tawo sa gabos na nasyon na gustong kamtan an pabor nin Dios ngonyan. Estudyare an nagkapirang halimbawa.
Mga Halimbawa sa Presenteng Aldaw
An sarong hoben na babae sa India nangangaipong marhay nin karangahan. May agom sa edad na 21, sia may duwang aki. Alagad dai nahaloy pagkamundag kan panduwang aki, an saiyang agom nagadan. Bigla na sana, sa edad na 24, sia saro nang balo na may duwang bulan na aking babae asin 22 na bulan na aking lalaki. Bakong makangangalas na kaipuhan nia an karangahan! Saen sia puedeng dumolok? Sarong banggi, sa grabeng kapurisawan, sia namibi, na nagsasabi, “Makalangit na Ama, rangaha tabi ako paagi sa saimong Tataramon.”
Pagkaaga, nagkaigwa sia nin bisita. Sia saro sa Mga Saksi ni Jehova. Kan aldaw na idto, nagin masakit an saiyang ministeryo sa harong-harong huli ta pipira sana an nagpadagos sa saiya. Pagal asin medyo nanluluya an boot, mapuli na kutana sia, alagad sa dai maaraman na paagi nakamate siang itinutulod na dumuman sa saro na sanang harong. Duman nia nanompongan an hoben pang balo. Pinadagos nia sia asin nag-ako nin publikasyon na nagpapaliwanag kan Biblia. An babae narangang
marhay sa pagbasa kan publikasyon na iyan asin sa pakikipag-olay nia sa Saksi. Naaraman nia an dapit sa panuga nin Dios na buhayon an mga gadan asin an dapit sa Kahadean nin Dios, na sa dai na mahahaloy gigibohon na paraiso an daga. An pinakamahalaga, namidbid asin namotan nia an sarong tunay na Dios, si Jehova, na nagsimbag sa saiyang pamibi.Si Nora, na taga siudad nin George, Aprika del Sur, nagtalaga nin sarong bulan na makikabtang sa bilog na panahon na pag-ebanghelyo. Bago nagpoon, sia odok na namibi ki Jehova na logod tabangan siang makanompong nin saro na totoong interesadong mag-adal sa Biblia. Kabale sa teritoryong iinasignar na gibohon nia an harong nin sarong tawo na maraoton na ugale an ipinaheling ki Nora sa nakaaging mga pagsongko. Makosog an boot na sinongko giraray ni Nora an harong na iyan. Sa pagkabigla nia, nanompongan nia na may bago nang nag-iistar, na an ngaran Noleen. Dugang pa, si Noleen asin an saiyang ina namimibi sa Dios na logod tabangan sinda na masabotan an Biblia. “Kan alokon ko sinda nin pag-adal sa Biblia,” an paliwanag ni Nora, “sinda naogmang marhay.” Si Noleen asin an saiyang ina marikas na nag-oswag. Pag-abot nin panahon, sinda pareho nagpoon na umiba ki Nora sa espirituwal na pagpaomay.
An saro pang halimbawa na nagpapaheling kan puersa nin pamibi iyo an sa mag-agom na taga siudad nin Johannesburg sa Aprika del Sur. Sarong Sabadong banggi kan 1996, an relasyon mag-agom ni Dennis asin Carol uminabot sa delikadong kamugtakan. Bilang ultimong remedyo, sinda nagdesisyon na mamibi para sa tabang, na paorootro nindang ginibo sagkod kan matanga na. Pagkaaga, kan alas 11, duwa sa Mga Saksi ni Jehova an nagtoktok sa saindang pinto. Binuksan ni Dennis an pinto asin sinabihan sinda na maghalat ta aapodon nia an saiyang agom. Pinatanidan ni Dennis si Carol na kun papadagoson ninda an mga Saksi, tibaad depisil nang isubol sinda. Ipinagirumdom ni Carol ki Dennis na sinda namimibi para sa tabang asin nagsabi na tibaad ini na an simbag nin Dios sa saindang mga pamibi. Kaya pinadagos an mga Saksi, asin naponan an pag-adal sa Biblia sa librong Kaaraman na Minagiya Pasiring sa Buhay na Daing Katapusan. Si Dennis asin Carol naogmang marhay sa saindang nanodan. Kan hapon man sanang idto iyo an enot na pag-atender ninda sa pagtiripon sa lokal na Kingdom Hall kan Mga Saksi ni Jehova. Paagi sa pag-aplikar kan kaaraman na nanodan ninda sa Biblia, nanompongan ni Dennis asin Carol an mga solusyon sa mga problema nindang mag-agom. Sinda ngonyan maogma, bautisadong mga paraomaw ki Jehova asin regular na naghihiras sa saindang kataraed kan saindang mga tinutubod na basado sa Biblia.
Paano kun an Pagmate Nindo Bako Kamong Angay na Mamibi?
An nagkapirang sinserong tawo tibaad an pagmate bako sindang angay na mamibi dahelan sa saindang maraot na pamumuhay. Isinaysay ni Jesu-Cristo an estorya nin siring na tawo, sarong dinuduhaging parasingil nin buhis. Paglaog sa patyo kan templo, an tawong ini nakamate na bako siang angay na magduman sa nakaugalean nang lugar nin pamibi. “Nagtitindog sa harayo . . . daing ontok na tinutumbok [nia] an saiyang daghan, na nagsasabi, ‘O Dios, kaherake ako na parakasala.’” (Lucas 18:13) Segun ki Jesus, an tawong ini dinangog na may pag-oyon. Ini nagpapatunay na si Jehova Dios talagang maheherakon asin gustong tabangan an mga parakasala na sinsero an pagsolsol.
Estudyare an sarong hoben na lalaking taga Aprika del Sur na an ngaran Paul. Kan aki pa, si Paul nag-aatender sa Kristianong mga pagtiripon kaiba kan saiyang ina. Alagad durante kan saiyang mga taon sa haiskul, sia nagpoon na makiibaiba sa mga hoben na dai nagsusunod
sa mga dalan nin Dios. Pakatapos na pumondo sa pag-eskuela, sia naglaog sa hukbo kan dating gobyernong apartheid nin Aprika del Sur. Dangan, sa dai linalaoman, sinuwayan sia kan saiyang kailusyon. An dai nakakokontentong pamumuhay na ini ipinagmondo nin makuri ni Paul. “Sarong banggi,” nagigirumdoman nia, “ako namibi ki Jehova asin naghagad nin tabang sa saiya, minsan ngani dai ako nagdolok nin sinsero sa Dios sa laog nin dakol na taon.”Dai nahaloy pakatapos kan pamibing ini, an ina ni Paul inimbitaran sia na umatender sa taonan na Memorial kan kagadanan ni Cristo. (Lucas 22:19) Nabagohan si Paul ta ginibo ini kan saiyang ina, ta sia nagin lagalag asin daing interes sa Biblia. “Ibinilang ko na an imbitasyon na ini an simbag ni Jehova sa sakong pamibi asin nakamate ako na kaipuhan kong balosan iyan.” Poon kaidto, si Paul nagpoon nang umatender sa gabos na Kristianong pagtiripon. Pakalihis nin apat na bulan na pag-adal sa Biblia, sia nakualipikar na mabautismohan. Saro pa, nagpondo sia sa pag-adal nin inhenyeriya asin pinili an karera na pakikikabtang sa bilog na panahon na pag-ebanghelyo. Ngonyan, si Paul sarong maogmang tawo, dai na nagmomondo nin makuri manongod sa saiyang nakaaging buhay. Sa laog kan nakaaging 11 taon, sia naglilingkod sa sangang opisina kan Watch Tower Society sa Aprika del Sur.
Tunay nanggad, maheherakon na sinisimbag ni Jehova Dios an mga pamibi asin sia “nagigin an parabalos sa mga maigot na naghahanap sa saiya.” (Hebreo 11:6) Sa dai na mahahaloy an dakulang aldaw ni Jehova madatong asin tataposon an gabos na karatan. Mientras tanto, sinisimbag ni Jehova an mga pamibi kan saiyang banwaan para sa kosog asin paggiya mantang sinda maigot na nakikikabtang sa mahalagang marhay na gibohon na pagpatotoo. Sa siring, minilyon na indibiduwal hale sa gabos na nasyon an nadadara sa laog kan Kristianong kongregasyon asin binebendisyonan nin kaaraman sa Biblia na minagiya pasiring sa buhay na daing katapusan.—Juan 17:3.
[Ritrato sa pahina 5]
An odok sa pusong pamibi ni Cornelio nagresulta sa pagsongko sa saiya ni apostol Pedro
[Ritrato sa pahina 6]
An pamibi nakatabang sa dakol sa mga panahon nin kapurisawan
[Mga Ritrato sa pahina 7]
Marahay na mamibi na tabangan na masabotan an Biblia
An mga mag-agom puedeng mamibi na tabangan sindang pakosogon an saindang relasyon mag-agom