Kun Paano Kita Ginigiyahan ni Jehova

“Giyahe ako sa dana nin pagkatanos.”—SALMO 27:11.

1, 2. (a) Paano ginigiyahan ni Jehova an saiyang banwaan ngonyan? (b) Ano an kalabot sa lubos na pag-aprobetsar sa mga pagtiripon?

SI Jehova an Burabod nin liwanag asin katotoohan, arog kan nanodan niato sa naenot na artikulo. An saiyang Tataramon nagtataong liwanag sa satong dalan mantang kita naglalakaw sa dana nin pagkatanos. Ginigiyahan kita ni Jehova paagi sa pagtotokdo sa sato sa saiyang mga dalan. (Salmo 119:105) Arog kan salmista kaidtong suanoy, kita may pagpasalamat na naghihimate sa mga paggiya nin Dios asin namimibi: “Tokdoi ako, O Jehova, sa saimong dalan, asin giyahe ako sa dana nin pagkatanos.”​—Salmo 27:11.

² An sarong paagi na si Jehova nagtatao nin pagtotokdo ngonyan iyo an Kristianong mga pagtiripon. Lubos daw niatong inaaprobetsaran an mamomoton na probisyon na ini paagi sa (1) regular na pag-atender, (2) maingat na paghinanyog sa programa, asin (3) daing pag-alangan na pakikikabtang sa mga kabtang na kalabot an mga nagdadangog? Apuera kaini, kita daw may pagpasalamat na naghihimate kun kita nakakaako nin mga suhestion na matabang sa sato na makapagdanay “sa dana nin pagkatanos”?

Kumusta an Saindong Pag-atender sa mga Pagtiripon?

3. Paano an sarong bilog na panahon na lingkod nagkaigwa kan marahay na ugale na regular na pag-atender sa mga pagtiripon?

³ An nagkapirang parahayag kan Kahadean regular na nag-aatender sa mga pagtiripon poon kan sinda aki pa. “Kan nagdadakula kami kan sakong mga tugang na babae kaidtong mga taon nin 1930,” an paggirumdom nin sarong bilog na panahon na ministro kan Mga Saksi ni Jehova, “dai mi na kaipuhan na hapoton an samong mga magurang kun baga maduman kami sa pagtiripon. Aram niamo na maduman kami apuera sana kun may helang kami. An pamilya mi dai nanggad nagpapalta sa mga pagtiripon.” Arog kan propetisang si Ana, an tugang na babaeng  ini “dai noarin man nagpapalta” sa lugar nin pagsamba ki Jehova.​—Lucas 2:​36, 37.

4-6. (a) Taano an nagkapirang parahayag kan Kahadean ta nagpapalta sa mga pagtiripon? (b) Taano ta importante na umatender sa mga pagtiripon?

⁴ Kabilang daw kamo sa mga regular na nag-aatender sa Kristianong mga pagtiripon, o nagin na daw kamong abot-abot sa bagay na ini? An nagkapirang Kristiano na an paghona ayos man sinda nagdesisyon na seguradohon iyan. Sa laog nin pirang semana, isinurat ninda an kada pagtiripon na inatenderan ninda. Kan repasohon ninda an rekord pagkatapos kan designadong panahon, napangalas sinda sa kadakolan nin pagtiripon na napaltahan ninda.

⁵ ‘Bako iyan na makangangalas,’ tibaad may magsabi. ‘Grabeng sakit an inaagihan nin mga tawo ngonyan kaya bakong pasil para sa sainda na magin regular sa mga pagtiripon.’ Totoo nanggad na kita nabubuhay sa mga panahon na nagtatao nin tension. Dugang pa, daing duda na maorog an sakit. (2 Timoteo 3:13) Alagad bako daw na huli kaiyan mas importante na regular na umatender sa mga pagtiripon? Kun mayo nin dagos-dagos na pagkakan nin masustansiang espirituwal na kakanon na masustenir sa sato, dai kita makaaasang makaya an sakit na itinatao kan sistemang ini. Tara, kun mayo nin regular na pakikiasosyar tibaad masugotan kitang biyo nang bayaan “an dana kan mga matanos”! (Talinhaga 4:18) Totoo, kun kita minapuli sa katapusan nin sarong mapagal na aldaw, tibaad dai kita pirmeng ganahan na umatender sa pagtiripon. Minsan siring, kun kita umatender sa ibong kan satong kapagalan, nakikinabang kita asin naparirigon niato an boot kan mga kapwa niato Kristiano sa Kingdom Hall.

⁶ An Hebreo 10:25 nagsusuherir nin saro pang mahalagang dahelan kun taano kita ta maninigong magin regular sa pag-atender sa pagtiripon. Dian pinakasasadol ni apostol Pablo an mga kapwa nia Kristiano na magtorotiripon ‘lalo na ta naheheling ninda na an aldaw harani na.’ Iyo, dai niato dapat  na paglingawan na naghaharani na an “aldaw ni Jehova.” (2 Pedro 3:12) Kun iisipon niato na harayoon pa an katapusan kan sistemang ini, tibaad ponan niatong togotan an personal na mga pinag-aaabot na makasalida sa kaipuhan na espirituwal na mga aktibidad, arog baga kan pag-atender sa mga pagtiripon. Dangan, siring sa patanid ni Jesus, ‘sa panale an aldaw na iyan puedeng mag-abot sa sato.’​—Lucas 21:34.

Magin Matibay Maghinanyog

7. Taano ta mahalaga na an mga aki magtao nin atension sa mga pagtiripon?

⁷ Bakong igo na mag-atender sana sa mga pagtiripon. Dapat na kita maingat na maghinanyog, na nagtatao nin atension sa sinasabi duman. (Talinhaga 7:24) Kaiba digdi an satong mga aki. Kun an aki minalaog sa klase, hinahagad sa saiya na magtao nin atension sa maestro, dawa kun an sarong partikular na leksion dai nia nagugustohan o garo baga dai nia kayang saboton. Aram kan maestro na kun an aki maghihingoang magtao nin atension, minsan paano makikinabang sia sa leksion. Kun siring, bako daw na rasonable na an mga aking nag-eeskuela na magtao nin atension sa pagtotokdong itinatao sa mga pagtiripon kan kongregasyon imbes na pabayaan na matorog oras na pumoon an pagtiripon? Totoo, kabilang sa mahalagang marhay na mga katotoohan na yaon sa Kasuratan an “nagkapirang bagay na mapawot saboton.” (2 Pedro 3:16) Alagad dai niato maninigong menoson an abilidad nin aki na makanood. An Dios dai. Kan mga panahon kan Biblia, pinagbotan nia an saiyang hoben na mga lingkod na ‘maghinanyog asin makanood patin matakot ki Jehova asin mag-ingat na otobon an gabos na tataramon kan ley na ini,’ na an nagkapira daing duwa-duwa na masakit na saboton nin mga aki. (Deuteronomio 31:12; ikomparar an Levitico 18:​1-30.) Mas kadikit daw an hinahagad ni Jehova sa mga aki ngonyan?

8. Anong mga paagi an ginigibo kan nagkapirang magurang tanganing matabangan an saindang mga aki na magin atento sa mga pagtiripon?

⁸ Aram nin Kristianong mga magurang na an espirituwal na mga pangangaipo kan saindang mga aki sa sarong kabtang napaninigoan kan nanonodan ninda sa mga pagtiripon. Huli kaini, may mga magurang na iinaareglo na an saindang mga aki matorog nin kadikit bago an pagtiripon tangani na sinda umabot sa Kingdom Hall na presko asin andam na makanood. An nagkapirang magurang tibaad estriktong limitaran o madonong na olangon pa ngani an pagdalan nin telebisyon kan saindang mga aki sa mga bangging may pagtiripon. (Efeso 5:​15, 16) Asin pinapagdadanay nin siring na mga magurang na pinakakadikit an disturbo, na ineenkaminar an saindang mga aki na maghinanyog asin makanood, kaoyon kan saindang edad asin abilidad.​—Talinhaga 8:32.

9. Ano an puedeng makatabang sa sato na mapatalubo an satong abilidad sa paghinanyog?

⁹ Mga nasa edad na an kaolay ni Jesus kan sia magsabi: “Tawan nindo nin atension kun paano kamo naghihinanyog.” (Lucas 8:18) Ngonyan na mga aldaw, parate na iyan mas pasil na sabihon kisa gibohon. Totoo, an aktibong paghinanyog mapagal na trabaho, alagad puedeng pataluboon an abilidad na maghinanyog. Mantang kamo naghihinanyog sa sarong pahayag sa Biblia o kabtang sa pagtiripon, pagmaigotan na isuway an mayor na mga ideya. Antisiparon an sunod na sasabihon kan nagtataram. Humanap nin mga punto na magagamit  nindo sa saindong ministeryo o ikaaaplikar nindo sa saindong buhay. Repasohon sa isip an mga punto mantang iyan pinag-oolayan. Kumua nin haralipot na nota.

10, 11. Paano tinabangan nin nagkapirang magurang na magin mas matibay maghinanyog an saindang mga aki, asin anong mga paagi an naheling nindo na nakatatabang?

¹⁰ An marahay na mga ugale sa paghinanyog pinakamarahay na manodan kun aki pa. Bago pa man sinda makanood na magbasa asin sumurat, an nagkapirang dai pa nag-eeskuela ineenkaminar kan saindang mga magurang na kumua nin “nota” sa panahon kan mga pagtiripon. Minamarkahan ninda an sarong kapidasong papel kun ginagamit an pamilyar na mga termino na arog baga kan “Jehova,” “Jesus,” o “Kahadean.” Sa paaging ini, an mga aki makakanood na magkonsentrar sa sinasabi hale sa plataporma.

¹¹ Dawa an mas matuang mga aki kun beses kaipuhan na enkaminaron na magtao nin atension. Kan marisa na an saiyang 11 anyos na aking lalaki nangangatorogan na mata sa panahon nin sarong Kristianong kombension, an aki tinawan kan payo nin pamilya nin Biblia asin sinabihan siang hanapon an mga teksto na sinisitar kan mga nagpapahayag. Binantayan kan ama, na nagkukua nin mga nota, mantang kapot kan saiyang aki an Biblia. Pakatapos kaiyan, mas entusiastikong sinundan kan aki an programa kan kombension.

Ipadangog an Saindong Boses

12, 13. Taano ta mahalaga na makikabtang sa pag-awit kan kongregasyon?

¹² Nag-awit si Hadeng David: “Maglalakaw ako sa palibot kan saimong altar, O Jehova, tanganing ikapadangog nin makosog an pagpasalamat.” (Salmo 26:​6, 7) An mga pagtiripon kan Mga Saksi ni Jehova nagtatao nin marahayon na mga oportunidad na ikapahayag niato nin makosog an satong pagtubod. An sarong paagi na magibo niato ini iyo an pakikikabtang sa pag-awit kan kongregasyon. Ini mahalagang aspekto kan satong pagsamba, alagad iyan madaling mapabayaan.

¹³ An nagkapirang aki na dai pa nakakabasa tinutuom an liriko kan mga awit na pan-Kahadean na gagamiton sa mga pagtiripon serosemana. Napapalukso an puso ninda na makaawit kaiba kan mga nasa edad na. Minsan siring, mantang nagdadakula  an mga aki, tibaad dai nang gayo sinda ginaganahan na umiba sa pag-awit nin mga awit na pan-Kahadean. An nagkapirang nasa edad na nasusupog man na umawit sa mga pagtiripon. Pero, an pag-awit kabtang kan satong pagsamba, kun paanong an ministeryo sa langtad kabtang kan satong pagsamba. (Efeso 5:19) Ginigibo niato an satong pinakamakakaya na omawon si Jehova sa ministeryo sa langtad. Bako daw na mapamumuraway man niato sia paagi sa pagkosog kan satong boses​—baga man magayon pagdangogon o bako​—sa odok sa pusong mga awit nin pag-omaw?​—Hebreo 13:15.

14. Taano an pinag-aadalan niato sa mga pagtiripon kan kongregasyon ta maninigong tawan nin maingat na pag-andam antes pa?

¹⁴ Inoomaw man niato an Dios kun kita nagtatao nin mga komentong nakapakokosog sa mga kabtang kan satong pagtiripon na naghahagad nin pakikikabtang kan mga nagdadangog. Ini nagkakaipo nin pag-andam. Kaipuhan an panahon na pensaron an mas hararom na mga aspekto kan Tataramon nin Dios. Aram ini ni apostol Pablo, sarong apisyonadong marhay na estudyante kan Kasuratan. Isinurat nia: “O an rarom kan mga kayamanan asin kadonongan patin kaaraman nin Dios!” (Roma 11:33) Mga payo nin pamilya, mahalagang marhay na tabangan nindo an lambang miembro kan saindong pamilya na magsiyasat sa kadonongan nin Dios, na ihinayag kan Kasuratan. Magtagama nin oras durante kan pampamilyang pag-adal sa Biblia na ipaliwanag an depisil na mga punto asin tabangan an saindong pamilya na mag-andam para sa mga pagtiripon.

15. Anong mga suhestion an tibaad makatabang sa saro na makakomento sa mga pagtiripon?

¹⁵ Kun gusto nindo na mas parateng magkomento sa mga pagtiripon, taano ta dai mag-andam antes pa nin gusto nindong sabihon? Dai kaipuhan an komplikadong komento. Pasasalamatan an sarong angay na teksto sa Biblia na binasang may kombiksion o an pira sanang piling tataramon na itinaram nin gikan sa puso. An nagkapirang parahayag pinakikiolayan an namamayo sa pag-adal na ireserba sa sainda an enot na komento sa sarong espesipikong parapo, tangani na dai ninda malipasan an oportunidad na ipahayag an saindang pagtubod.

An Daing Kabatidan Nagigin Madonong

16, 17. Anong hatol an itinao nin sarong magurang sa kongregasyon sa sarong ministeryal na lingkod, asin taano idto ta epektibo?

¹⁶ Sa mga pagtiripon kan Mga Saksi ni Jehova, parateng ipinagigirumdom sa sato na basahon an Tataramon nin Dios aroaldaw. Nakagiginhawa an paggibo kaiyan. Tinatabangan man kita kaiyan na gumibo nin madonong na mga desisyon, itanos an mga depekto sa personalidad, labanan an mga sugot, asin mabawi an satong espirituwal na pagkatimbang kun napasala kita nin lakad.​—Salmo 19:7.

¹⁷ Yaon an may kabatidan na kamagurangan sa kongregasyon tanganing tumao nin sono sa Kasuratan na hatol na ibinagay sa satong mga pangangaipo. An kaipuhan ta sanang gibohon ‘sakdohon iyan’ paagi sa paghagad kan saindang hatol na basado sa Biblia. (Talinhaga 20:5) Sarong aldaw an sarong entusiastiko, hoben na ministeryal na lingkod naghagad nin mga suhestion sa sarong magurang sa kongregasyon sa kun paano magigin mas kapakipakinabang sa kongregasyon. An magurang sa kongregasyon, na midbid na marhay an hoben na lalaki, binuksan an saiyang Biblia sa 1 Timoteo 3:​3, na nagsasabi na an mga lalaking nombrado dapat na magin “makatanosan.” Maboot na sinabi nia an mga paagi na an hoben na lalaki makapaheheling nin pagkamakatanosan sa saiyang relasyon sa iba. Nakolgan daw an boot kan hoben na tugang sa inako niang prangkang hatol? Dai nanggad! “Ginamit kan magurang sa kongregasyon an Biblia,” an paliwanag nia, “kaya narealisar ko na an hatol hale ki Jehova.” An ministeryal na lingkod may pagpasalamat na inako an hatol asin marahay an nagigin pag-oswag.

18. (a) Ano an nakatabang sa sarong hoben na Kristiana na labanan an sugot sa eskuelahan? (b) Anong mga teksto sa Biblia an ginigirumdom nindo kun napapaatubang sa sugot?

¹⁸ An Tataramon nin Dios makatatabang man sa mga hoben na ‘dumulag sa mga mawot na konektado sa pagkabarobata.’ (2 Timoteo 2:22) An sarong hoben na Saksi ni Jehova na bago pa sanang maggradwar sa haiskul napaglabanan an sugot sa bilog na panahon na sia nag-eeskuela paagi sa paghorophorop asin pag-aplikar nin nagkapirang teksto sa Biblia. Parate niang iniisip-isip an hatol na nasusurat sa Talinhaga 13:20: “Sia na naglalakaw na kaiba nin mga madonong magigin madonong.” Huli kaiyan, maingat sia na makikatood sana sa mga may hararom na paggalang sa mga prinsipyong sono sa Kasuratan. An pangangatanosan nia: “Mayo akong ikinalalabi sa iba. Kun ako makikiayon sa bakong marahay na grupo, bobooton kong paogmahon an sakong mga katood, asin iyan puedeng magbunga  nin problema.” Natabangan man sia kan hatol ni Pablo na nasusurat sa 2 Timoteo 1:8. Isinurat nia: “Dai mo ikasopog an patotoo dapit sa satong Kagurangnan, . . . kundi makikabtang ka sa pagtios nin maraot para sa maogmang bareta.” Kaoyon kan hatol na iyan, pusoan niang ipinaabot sa saiyang mga kaklase an saiyang mga tinutubod na basado sa Biblia sa lambang angay na okasyon. Basta maasignaran siang magtao nin berbal na report sa klase, pinipili nia an tema na nagtotogot sa saiya na tumao nin mataktikang patotoo mapadapit sa Kahadean nin Dios.

19. Taano ta dai napaglabanan nin sarong hoben na lalaki an mga impluwensia kan kinaban na ini, alagad ano an nagtao sa saiya nin espirituwal na kosog?

¹⁹ Kun maparayo man kita sa “dana kan mga matanos,” an Tataramon nin Dios makatatabang sa sato na itanos an satong mga lakad. (Talinhaga 4:18) Ini nanodan mismo nin sarong hoben na lalaki na nag-iistar sa Aprika. Kan songkoon sia nin saro sa Mga Saksi ni Jehova, inako nia an pag-adal sa Biblia. Nagustohan nia an saiyang nanonodan alagad dai nahaloy napaayon sia sa maraot na pag-iriba sa eskuelahan. Pag-abot nin panahon, napadara sia sa inmoral na pamumuhay. “Tinotormento ako kan sakong konsensia, asin napiritan akong pumondo sa pag-atender sa mga pagtiripon,” an pag-admitir nia. Paghaloyhaloy, nagpoon na naman siang mag-atender sa mga pagtiripon. An hoben na lalaki nagsabi kan may ihinahayag na komentong ini: “Nadiskobre ko na an mayor na dahelan kaini gabos iyo na gutom ako sa espirituwal. Mayo ako nin personal na pag-adal. Iyan an dahelan na dai ko mapaglabanan an sugot. Dangan pinonan kong basahon An Torrengbantayan asin an Awake! Luway-luway, nabawi ko an sakong espirituwal na kosog asin lininig ko an sakong buhay. Ini marahay na patotoo sa mga nakarisa sa mga pagbakleng ginibo ko. Nagpabautismo ako, asin ngonyan maogma na ako.” Ano an nagtao sa hoben na lalaking ini kan kosog na mapangganahan an saiyang mga kaluyahan sa laman? Nabawi nia an saiyang espirituwal na kosog paagi sa regular, personal na pag-adal sa Biblia.

20. Paano mapaglalabanan nin sarong hoben an mga pananalakay ni Satanas?

²⁰ Kristianong hobenes, sinasalakay kamo ngonyan! Tangani na mapaglabanan nindo an mga pananalakay ni Satanas, dapat na regular kamong magkakan nin espirituwal na kakanon. Ini nasabotan kan salmista, na minalataw na saro man na hoben na lalaki. Pinasalamatan nia si Jehova sa pagtao kan saiyang Tataramon, tangani na ‘malinigan nin sarong hoben na lalaki an saiyang dana.’​—Salmo 119:9.

Saen Man Kita Giyahan nin Dios, Masunod Kita

21, 22. Taano ta dai niato maninigong isipon na masakit na marhay an dalan kan katotoohan?

²¹ Giniyahan ni Jehova an nasyon nin Israel paluwas sa Egipto pasiring sa Dagang Panuga. An pinili niang agihan tibaad kun sa pagheling nin tawo garo baga masakit na dai man kuta kaipuhan. Imbes na umagi sa minalataw na mas pasil, mas direktang agihan sa may Dagat Mediterraneo, giniyahan ni Jehova an saiyang banwaan sa masakit na agihan sa desierto. Minsan siring, ini sa katunayan kabootan nin Dios. Maski mas halipot, an agihan sa may dagat dadarahon kutana an mga Israelita sa daga kan kalaban na mga Filisteo. Paagi sa pagpili nin ibang agihan, ilinikay ni Jehova an saiyang banwaan sa amay na pakienkuentro sa mga Filisteo.

²² Kaagid kaiyan, an dana na dian kita ginigiyahan ni Jehova ngonyan tibaad garo baga masakit kun beses. Serosemana, pano an satong iskedyul nin Kristianong mga aktibidad, kaiba an mga pagtiripon kan kongregasyon, personal na pag-adal, asin paglilingkod sa langtad. An ibang dana tibaad garo baga mas pasil. Alagad makaaabot sana kita sa destinasyon na pinagmamaigotan niatong marhay na maabot kun kita masunod sa paggiya nin Dios. Kun siring, padagos niatong ilaog sa isip an mahalagang marhay na pagtotokdo gikan ki Jehova asin magdanay kita sa “dana nin pagkatanos” sagkod lamang!​—Salmo 27:11.

Ikapaliliwanag daw Nindo?

• Taano ta kita nangorognang nangangaipo na regular na umatender sa Kristianong mga pagtiripon?

• Ano an magigibo nin mga magurang tanganing matabangan an saindang mga aki na magtao nin atension sa mga pagtiripon?

• Ano an kalabot sa pagigin matibay maghinanyog?

• Ano an makatatabang sa sato na makakomento sa mga pagtiripon?

[Mga Hapot Para sa Pag-adal]

[Ritrato sa pahina 16, 17]

An pag-atender sa Kristianong mga pagtiripon nakatatabang sa sato na isaisip an aldaw ni Jehova

[Mga Ritrato sa pahina 18]

Manlaenlaen an paagi na omawon si Jehova sa Kristianong mga pagtiripon