Kun Taano an Katawohan ta Nangangaipo nin Paratabang

‘AKO sarong parapakaraot na paralamag,’ an inadmitir nin sarong tawo na dating mapalangkaw asin madahas. Sia nagin mapanlibak na paralanghad na maringis na rinibok asin kinolgan an may takot sa Dios na mga parasunod ni Jesu-Cristo. “Minsan siring,” an may pagpasalamat na sinabi nia, “ako naherakan.” Minsan ngani tibaad garo masakit paniwalaan, an labi-labi kadahas na paralamag na ini nagin an fiel na Kristianong apostol na si Pablo.​—1 Timoteo 1:​12-16; Gibo 9:​1-​19.

Bakong gabos nakagibo kan siring sa mga ginibo ni Pablo. Pero, kita gabos dai nakaaabot sa mga pamantayan nin Dios. Taano? Huli ta “an gabos nagkasala asin nagkulang sa kamurawayan nin Dios.” (Roma 3:23) Saro pa, madalion na madaog nin pagkadesesperar, na tibaad iniisip ta na kita maraoton tanganing umako kan pagkaherak nin Dios. Mantang hinohorophorop an saiyang makasalan na mga tendensia, si Pablo mismo nagkagsing: “Herak man sa sako! Siisay an maligtas sa sako hale sa hawak na napapairarom sa kagadanan na ini?” Sinisimbag an saiyang sadiring hapot, sia nagsurat: “Salamat sa Dios paagi ki Jesu-Cristo na satong Kagurangnan!”​—Roma 7:​24, 25.

Paanong an sarong matanos na Kaglalang may pagtratar sa mga parakasala? (Salmo 5:4) Mangnoha na nagsabi si Pablo: “Salamat sa Dios paagi ki Jesu-Cristo na satong Kagurangnan.” An saro pang nag-ako kan pagkaherak nin Dios nagpaliwanag: “Kun an siisay man makaginibo nin kasalan, igwa kita nin paratabang sa Ama, si Jesu-Cristo, sarong matanos. Asin sia sarong pampagian nin boot na atang para sa satong mga kasalan, pero bako sanang kan sa sato kundi siring man kan sa bilog na kinaban.”​—1 Juan 2:​1, 2.

Taano si Jesu-Cristo ta inapod na “paratabang sa Ama”? Asin paanong si Jesus “sarong pampagian nin boot na atang” para sa mga kasalan?

Kun Taano ta Kaipuhan an Paratabang

Nagdigdi si Jesus sa daga tanganing “itao an saiyang kalag bilang pantubos na karibay nin dakol.” (Mateo 20:28) An pantubos iyo an halaga na ibinabayad tanganing balukaton an, o papangyarihon an  pakabutas nin, sarong tawo o sarong bagay. An porma nin berbo kan termino sa Hebreo na trinadusir na “pantubos” nagtatao kan ideya nin pagtahob, o pagtubos, sa mga kasalan. (Salmo 78:38) An termino sa Griego, arog kan yaon sa Mateo 20:​28, ginamit partikularmente manongod sa halaga na ibinabayad tanganing tuboson an mga bihag sa guerra o butasan an mga oripon. Tanganing panigoan an hinahagad nin hustisya, may sarong bagay na itinatao karibay nin saro pa na kapareho an halaga.

An katawohan namugtak sa pagkaoripon huli sa pagrebelde kan enot na tawo tumang sa Dios. Siring kan ipinaheheling sa Genesis kapitulo 3, an sangkap na tawong iyan​​—si Adan​​—pinili an pakisuway ki Jehova Dios. Sa paggibo kaiyan, ipinabakal nia an saiyang sadiri asin an saiyang dai pa namumundag na mga gikan sa pagkaoripon sa kasalan asin kagadanan. Para sa saiya asin sa gabos niang aki, sa siring ipinatunod ni Adan an balaog na sangkap na buhay bilang tawo.​​—Roma 5:​12, 18, 19; 7:​14.

Sa suanoy na Israel, iinareglo nin Dios na mga atang na hayop an gamiton sa pagtubos, o pagtahob, sa mga kasalan kan banwaan. (Levitico 1:4; 4:​20, 35) An buhay kan atang na hayop garo man sana itinatao bilang karibay kan buhay kan nagkasala. (Levitico 17:11) Bilang resulta, “an aldaw nin pagtubos” puede man na apodon na “an aldaw nin mga pantubos.”​​—Levitico 23:​26-​28.

Minsan siring, mantang an mga hayop mas hababang klase kisa tawo, “dai mahihimo na an dugo nin mga toro asin kanding [lubos na] makahale nin mga kasalan.” (Hebreo 10:​1-4) Tanganing an atang magkaigwa nin igong halaga na permanenteng makatutubos, o makahahale, nin mga kasalan, iyan kaipuhan na kapareho sa halaga kan ipinatunod ni Adan. An timbangan nin hustisya naghagad nin sangkap na tawo (si Jesu-Cristo) tanganing timbangan an iwinara nin saro pang sangkap na tawo (si Adan). Solamente sangkap na buhay bilang tawo an makababayad kan pantubos na halaga tanganing balukaton an mga aki ni Adan hale sa pagkaoripon na pinabaklan sa sainda kan saindang enot na ama. ‘Kalag sa kalag’ an makapaninigo sa hinahagad nin tunay na hustisya.​—Exodo 21:​23-25.

Kan si Adan magkasala asin sentensiahan nin kagadanan, an saiyang dai pa namumundag na mga aki nasa saiya pang mga habayan asin kun siring nagadan sa kaibanan nia. An sangkap na tawong si Jesus, “an huring Adan,” gikan sa boot na dai nagpamilya. (1 Corinto 15:45) Igwa sia nin dai pa namumundag na mga aki sa saiyang mga habayan kan sia magadan bilang sangkap na atang na tawo. Kun siring, puedeng sabihon na nagadan kaiba nia an magigin rasa nin tawo na nasa saiyang habayan. Kinua ni Jesus na magin saiya na an makasalan, magagadanon na pamilya ni Adan. Binutasan nia an diretso na magkaigwa nin pamilya na sadiri nia. Paagi sa pag-atang kan saiyang sangkap na buhay bilang tawo, binalukat ni Jesus an bilog na katawohan na gikan ki Adan tanganing sinda magin Saiyang pamilya, kaya Sia an nagigin saindang “Amang Daing Sagkod.”​—Isaias 9:​6, 7.

Pinangyari kan pantubos na atang ni Jesus na an makinuyog na katawohan mag-ako kan pagkaherak nin Dios asin magkamit nin buhay na daing katapusan. Bilang resulta, si apostol Pablo nagsurat: “An ibinabayad nin kasalan kagadanan, alagad an regalo na itinatao nin Dios buhay na daing katapusan paagi ki Cristo Jesus na satong Kagurangnan.” (Roma 6:23) Mayo kitang magibo kundi omawon si Jehova huli sa pagkamoot asin pakikidamay na konektado sa pantubos, na itinao na may kaibang dakulaon na pagsasakripisyo sa saiyang sadiri asin sa saiyang namomotan na marhay na Aki. (Juan 3:16) Asin si Jesus siertong nagin “paratabang sa Ama” kan sia buhayon liwat sa langitnon na buhay asin iinatubang an halaga kan saiyang pantubos na atang sa Dios sa kalangitan. * (Hebreo 9:​11, 12, 24; 1 Pedro 3:​18) Alagad paano si Jesu-Cristo ngonyan nagigin satong paratabang sa langit?

[Nota sa Ibaba]

[Ritrato sa pahina 4]

An sangkap na buhay ni Jesus bilang tawo nagin an halagang pantubos sa mga aki ni Adan