‘O Dios, Sugoan an Saimong Liwanag’

“Sugoan an saimong liwanag asin an saimong katotoohan. An mga ini logod gumiya sa sako.”​—SALMO 43:3.

1. Paano ihinahayag ni Jehova an saiyang mga katuyohan?

SI Jehova makonsiderasyon na marhay sa pagsabi nia kan saiyang mga katuyohan sa saiyang mga lingkod. Imbes na ihayag an katotoohan nin durungan sa sarong nakabubutang silyab nin liwanag, gradwal nia kitang pinaliliwanagan. An satong pagbaklay sa dana nin buhay ikakokomparar sa paglakaw nin sarong parabaklay sa sarong halawig na dalan. Sia minapoon nin amay na aga asin kakadikit pa kan naheheling nia. Mantang nagpopoon na sumirang an saldang, namimidbid na kan parabaklay an nagkapirang bagay sa palibot nia. An iba malibog pa. Alagad mantang padagos na naglalangkaw  an saldang, parayo nang parayo an naheheling nia. Iyo man an espirituwal na liwanag na itinatao nin Dios. Pinababayaan nia na mamansayan niato an papirapira sanang bagay. An Aki nin Dios, si Jesu-Cristo, nagtao nin espirituwal na kaliwanagan sa kaagid na paagi. Estudyaran niato kun paano tinawan ni Jehova nin kaliwanagan an saiyang banwaan kan suanoy na mga panahon asin kun paano nia iyan ginigibo ngonyan.

2. Paano si Jehova nagtao nin kaliwanagan kan mga panahon bago kan mga Kristiano?

² An mga kompositor kan ika-43 na Salmo posibleng marhay na an mga aki ni Core. Bilang mga Levita, sinda may pribilehiong itokdo sa banwaan an Ley nin Dios. (Malaquias 2:7) Siempre, si Jehova an saindang Kaharohalangkaweng Paratokdo, asin sia an saindang inasahan bilang an Burabod nin gabos na kadonongan. (Isaias 30:20) “O Dios, . . . sugoan an saimong liwanag asin an saimong katotoohan,” an pamibi kan salmista. “An mga ini logod gumiya sa sako.” (Salmo 43:​1, 3) Sagkod na an mga Israelita fiel sa saiya, tinokdoan sinda ni Jehova kan saiyang mga dalan. Pakalihis nin mga siglo, tinawan sinda ni Jehova nin pambihira nanggad na klase nin liwanag asin katotoohan. Ginibo iyan nin Dios kan isugo nia an saiyang Aki sa daga.

3. Sa anong paagi na nabalo an mga Judio kan pagtotokdo ni Jesus?

³ Bilang an tawong si Jesu-Cristo, an Aki nin Dios “an ilaw kan kinaban.” (Juan 8:12) Tinokdoan nia an mga tawo “nin dakol na bagay paagi sa mga ilustrasyon”​—bagong mga bagay. (Marcos 4:2) Sinabihan nia si Poncio Pilato: “An sakong kahadean bakong kabtang kan kinaban na ini.” (Juan 18:36) Idto bagong ideya para sa sarong Romano asin daing duwa-duwa para sa nasyonalistikong mga Judio, ta an paghona ninda dadaogon kan Mesiyas an Imperyo nin Roma asin ibabalik an Israel sa dating kamurawayan kaiyan. Ipinababanaag ni Jesus an liwanag hale ki Jehova, alagad an saiyang mga tataramon dai ikinaogma kan Judiong mga namamahala, na ‘namoot sa kamurawayan nin mga tawo nin labi pa ngani sa kamurawayan nin Dios.’ (Juan 12:​42, 43) An dakol sa banwaan piniling mangapot sa saindang tradisyon na hale sa tawo imbes na akoon an espirituwal na liwanag asin katotoohan hale sa Dios.​—Salmo 43:3; Mateo 13:15.

4. Paano niato naaaraman na an mga disipulo ni Jesus padagos na matalubo sa pakasabot?

⁴ Minsan siring, an nagkapirang lalaki asin babae na sadiosan an puso magayagayang inako an katotoohan na itinotokdo ni Jesus. Dagos-dagos an pag-oswag ninda sa saindang pakasabot sa mga katuyohan nin Dios. Pero, mantang nagrarani an katapusan kan daganon na buhay kan saindang Paratokdo, kadakol pa kan dapat nindang manodan. Sinabihan sinda ni Jesus: “Dakol pa an sasabihon ko sa saindo, alagad ta dai pa nindo iyan kaya ngonyan.” (Juan 16:12) Iyo, an mga disipulo padagos na matalubo sa pakasabot sa katotoohan nin Dios.

An Liwanag Padagos na Minasirang

5. Anong hapot an naglataw kan enot na siglo, asin siisay an may paninimbagan na resolberan iyan?

⁵ Pagkagadan asin pagkabuhay liwat ni Jesus, an liwanag hale sa Dios suminirang nin mas maliwanag kisa dati. Sa sarong bisyon na itinao ki Pedro, ihinayag ni Jehova na poon sa panahon na idto an mga Hentil na bakong turi puede nang magin mga parasunod ni Cristo. (Gibo 10:​9-17) Idto sarong kapahayagan! Minsan siring, may naglataw na hapot sa huri: Hinahagad daw ni Jehova sa mga Hentil na iyan na paturi pagkatapos na sinda magin mga Kristiano? An hapot na iyan dai nasimbag sa bisyon, asin an bagay na iyan nagin tema nin mainit na debate sa tahaw nin mga Kristiano. Kaipuhan na idto maresolberan, ta tibaad paluyahon an saindang mahalagang marhay na pagkasararo. Sa Jerusalem, kun siring, “an mga apostol asin an kamagurangan na lalaki nagtiripon sa pag-orolay dapit sa bagay na ini.”​—Gibo 15:​1, 2, 6.

6. Anong prosedimiento an sinunod kan mga apostol asin kamagurangan na lalaki kan estudyaran ninda an hapot manongod sa pagturi?

⁶ Paano madedeterminaran kan mga yaon sa miting na idto an kabotan nin Dios para sa may pagtubod na mga Hentil? Dai nagsugo si Jehova nin sarong anghel na mangenot sa orolay, ni tinawan man nia nin bisyon an mga yaon. Pero, an mga apostol asin kamagurangan na lalaki dai man biyong pinabayaan na mayo nin paggiya. Inestudyaran ninda an patotoo nin nagkapirang Kristianong Judio na nakaheling kun paano an Dios nagpoon nang mangunlabot sa mga tawo kan mga nasyon, na ibinububo an saiyang banal na espiritu sa mga Hentil na bakong turi. Siniyasat man ninda an Kasuratan para sa giya. Bilang resulta, an disipulong si Santiago nagtao nin rekomendasyon na basado sa sarong teksto na nagtatao nin kaliwanagan. Mantang pinepensar ninda an ebidensia, nagin malinaw an kabotan nin Dios. An mga hale sa  mga nasyon dai kaipuhan na magpaturi tanganing kamtan an pag-oyon ni Jehova. An mga apostol asin kamagurangan na lalaki listong isinurat an desisyon tangani na magiyahan kaiyan an mga kapwa ninda Kristiano.​—Gibo 15:​12-29; 16:4.

7. Sa anong paagi na progresibo an mga Kristiano kan enot na siglo?

⁷ Bakong arog kan Judiong mga namomoon sa relihion, na nangapot sa mga tradisyon kan saindang mga apoon, an kadaklan na Judiong Kristiano naggayagaya kan akoon ninda an pambihirang bagong pakasabot na ini sa katuyohan nin Dios mapadapit sa mga tawo kan mga nasyon, dawa ngani hinagad kan pag-ako dian an pagliwat nin punto de vista mapadapit sa mga Hentil sa pankagabsan. Binendisyonan ni Jehova an saindang mapakumbabang espiritu, asin “an mga kongregasyon nagpadagos na maparigon sa pagtubod asin magdakol an bilang aroaldaw.”​—Gibo 15:31; 16:5.

8. (a) Paano niato naaaraman na may malalaoman na mas dakol na liwanag pagkatapos kan enot na siglo? (b) Anong pertinenteng mga hapot an eestudyaran niato?

⁸ An espirituwal na liwanag padagos na suminirang sa bilog na enot na siglo. Alagad dai ihinayag ni Jehova an gabos na aspekto kan saiyang mga katuyohan sa enot na mga Kristiano. Sinabihan ni apostol Pablo an mga kapagtubod nia kaidtong enot na siglo: “Sa ngonyan kita nagheheling nin malibog paagi sa salming na metal.” (1 Corinto 13:12) An siring na salming dai nagtatao kan pinakamalinaw na pagpabanaag. Kun siring, sa primero, magigin limitado an pakasabot sa espirituwal na liwanag. Pagkagadan kan mga apostol, nagin marumarom an ilaw sa kadikit na panahon, alagad kasuarin pa sana nagin abunda an kaaraman sa Kasuratan. (Daniel 12:4) Paano tinatawan nin kaliwanagan ni Jehova an saiyang banwaan ngonyan? Asin ano an maninigong magin reaksion niato kun pinahihiwas nia an satong pakasabot sa Kasuratan?

An Liwanag Paliwanag Nang Paliwanag

9. Anong napapalaen asin epektibong paagi nin pag-adal sa Biblia an ginamit kan enot na Mga Estudyante sa Biblia?

⁹ Sa presenteng mga panahon an enot na tunay na banaag nin liwanag nagpoon na lumataw kaidtong ultimong un-kuarto kan ika-19 siglo kan ponan nin sarong grupo nin Kristianong mga lalaki asin babae an maigot na pag-adal sa Kasuratan. May namukna sindang praktikal na paagi nin pag-adal sa Biblia. May sarong nagpapalataw nin hapot; dangan aanalisaron kan grupo an gabos na konektadong teksto sa Kasuratan. Kun garo baga kontra an sarong bersikulo sa Biblia sa saro pa, hiningoa kan sinserong mga Kristianong ini na pag-oyonon an duwa. Bakong arog kan mga namomoon sa relihion kaidto, an Mga Estudyante sa Biblia (na apod kaidto sa Mga Saksi ni Jehova) determinado na pabayaan  na an magin giya ninda iyo an Banal na Kasuratan, bakong an tradisyon o opisyal na doktrina na gibo nin tawo. Pakaestudyare ninda kan gabos na makukuang ebidensia sa Kasuratan, isinusurat ninda an saindang mga konklusyon. Paagi kaiyan nagin malinaw an pakasabot ninda sa dakol na pundamental na doktrina kan Biblia.

10. Anong nakatatabang na mga pantabang sa pag-adal sa Biblia an isinurat ni Charles Taze Russell?

¹⁰ Lataw sa Mga Estudyante sa Biblia si Charles Taze Russell. Isinurat nia an sarong serye nin anom na nakatatabang na pantabang sa pag-adal sa Biblia na may titulong Studies in the Scriptures. Intension ni Tugang na Russell na isurat an ikapitong tomo, na magpapaliwanag kan mga libro sa Biblia na Ezequiel asin Kapahayagan. “Basta makua ko an pinakasolusyon,” sabi nia, “isusurat ko an Ikapitong Tomo.” Minsan siring, idinugang nia: “Kun an pinakasolusyon itao kan Kagurangnan sa iba, sia an puedeng sumurat kaiyan.”

11. Ano an koneksion sa pag-oltanan kan pagpili kan tamang-tamang oras asin kan satong pakasabot sa mga katuyohan nin Dios?

¹¹ An nasambitan sa enotan na sinabi ni C. T. Russell nag-iilustrar nin sarong importanteng bagay sa satong kakayahan na masabotan an nagkapirang halipot na kabtang kan Biblia​—an pagpili kan tamang-tamang oras. Aram ni Tugang na Russell na dai nia mapipirit na sumirang an liwanag sa librong Kapahayagan kun paanong dai mahihimo nin sarong gustong marhay na parabaklay na suyoon an saldang na sumirang bago an itinalaan na panahon kaiyan.

Ihinayag—Alagad sa Itinalaan na Panahon nin Dios

12. (a) Noarin pinakanasasabotan an hula sa Biblia? (b) Anong halimbawa an nagpapaheling na an satong kakayahan na masabotan an hula sa Biblia depende sa iskedyul nin Dios? (Helingon an nota sa ibaba.)

¹² Kun paanong nasabotan sana kan mga apostol an dakol na hula may labot sa Mesiyas pagkagadan asin pagkabuhay liwat ni Jesus, nasasabotan sana kan mga Kristiano ngonyan an hula sa Biblia sa kasaditsaditing detalye kaiyan pagkaotob na kaiyan. (Lucas 24:​15, 27; Gibo 1:​15-21; 4:​26, 27) An Kapahayagan makahulang libro, kaya maninigo na laoman niato na masabotan iyan nin pinakamalinaw mantang nahahayag an mga pangyayaring sinasabi kaiyan. Halimbawa, dai puedeng masabotan nin tama ni C. T. Russell an kahulogan kan simbolikong mabangis na hayop na mapula na nasasambitan sa Kapahayagan 17:​9-11, ta an mga organisasyon na irinerepresentar kan hayop, arin na baga, an Liga de Naciones asin an Naciones Unidas, naglataw sana pagkagadan nia. *

13. Ano an nangyayari kun beses kun tinatawan nin liwanag an sarong tema sa Biblia?

¹³ Kan maaraman kan enot na mga Kristiano na puede nang magin mga kapagtubod an mga Hentil na bakong turi, an pagbagong iyan nagbunga nin bagong hapot mapadapit sa pangangaipo na turion an mga tawo kan mga nasyon. Ini nagpahiro sa mga apostol asin kamagurangan na lalaki na siyasaton liwat an enterong isyu nin pagturi. Totoo man ngonyan an arog kaiyan. An masulang silyab nin liwanag sa sarong tema sa Biblia kun beses naggigiya sa linahidan na mga lingkod nin Dios, “an fiel asin madonong na oripon,” na siyasaton liwat an konektadong mga topiko, siring sa malinaw na ipinaheheling kan minasunod na halimbawa kasuarin pa sana.​—Mateo 24:45.

14-16. Paano an pagliwat sa satong punto de vista mapadapit sa espirituwal na templo nakaapektar sa pagsabot niato sa Ezequiel kapitulo 40 sagkod 48?

¹⁴ Kan 1971 may esplikasyon kan hula ni Ezequiel na ipinublikar sa librong “The Nations Shall Know That I Am Jehovah”​​—How? An sarong kapitulo kan librong iyan trinatar sa halipot an bisyon ni Ezequiel nin sarong templo. (Ezequiel, kapitulo 40-​48) Kaidto, an konsentrasyon nasa kun paano maootob sa bagong kinaban an bisyon ni Ezequiel nin templo.​—2 Pedro 3:13.

¹⁵ Minsan siring, an duwang artikulo na ipinublikar sa The Watchtower kan Disyembre 1, 1972, nakaapektar sa satong pakasabot sa bisyon ni Ezequiel. Trinatar kaiyan an dakulang espirituwal na templo na ilinadawan ni apostol Pablo sa Hebreo kapitulo 10. Ipinaliwanag kan The Watchtower na an kuartong Banal asin an nasa laog na patyo  kan espirituwal na templo konektado sa kamugtakan kan mga linahidan mantang sinda yaon digdi sa daga. Kan an Ezequiel kapitulo 40 sagkod 48 repasohon pakalihis nin dakol na taon, namansayan na kun paanong nagpupunsionar ngonyan an espirituwal na templo, segurado na nagpupunsionar man ngonyan an templo na naheling ni Ezequiel sa bisyon. Taano man?

¹⁶ Sa bisyon ni Ezequiel, an mga saserdote naheheling na naglalakawlakaw sa mga patyo kan templo mantang pinaglilingkodan ninda an mga tribong bakong saserdote. An mga saserdoteng ini malinaw na nagrerepresentar sa “makahadeng kabilogan na grupo nin mga saserdote,” an linahidan na mga lingkod ni Jehova. (1 Pedro 2:9) Minsan siring, dai sinda maglilingkod sa daganon na patyo kan templo sa bilog na Sangribong Taon na Paghade ni Cristo. (Kapahayagan 20:4) Sa kadaklan kan panahon na iyan, kun bakong sa kabilogan kaiyan, an mga linahidan maglilingkod sa Dios sa Kabanalbanale kan espirituwal na templo, an “langit mismo.” (Hebreo 9:24) Mantang naheheling an mga saserdote na pabalikbalik sa mga patyo kan templo ni Ezequiel, an bisyon na iyan seguradong naootob ngonyan, mantang yaon pa digdi sa daga an nagkapira sa mga linahidan. Huli kaiyan, an luwas na Marso 1, 1999, kan magasin na ini naghayag nin liniwat na punto de vista sa temang ini. Sa siring, sagkod sa katapusan kan ika-20 siglo, may espirituwal na liwanag na pinasirang sa hula ni Ezequiel.

Magin Andam na Liwaton an Saindong Punto de Vista

17. Anong mga pagliwat an ginibo nindo sa personal na punto de vista poon kan makaaram kamo kan katotoohan, asin paano kamo nakinabang dian?

¹⁷ An siisay man na boot na magkaigwa nin kaaraman sa katotoohan dapat na magin andam na darahon “an lambang kaisipan sa pagkabihag tanganing iyan magin makinuyog ki Cristo.” (2 Corinto 10:5) Iyan bakong pirmeng pasil, nangorogna kun marigonon an pagkaestablisar nin mga punto de vista. Halimbawa, bago nindo nanodan an katotoohan nin Dios, tibaad ikinaogma nindo an pagselebrar nin nagkapirang relihiosong kapiestahan kaiba kan saindong pamilya. Kan magpoon na kamong mag-adal kan Biblia, narealisar nindo na an mga selebrasyon na ini sa katunayan may paganong ginikanan. Sa primero, tibaad magabat an boot nindo na iaplikar an saindong nanonodan. Minsan siring, sa katapustapusi, an pagkamoot sa Dios nagin mas makosog kisa relihiosong saboot, asin nagpondo kamong makikabtang sa mga selebrasyon na ikinaaanggot nin Dios. Bako daw na binendisyonan ni Jehova an saindong desisyon?​—Ikomparar an Hebreo 11:25.

18. Ano an maninigong magin reaksion niato kun linilinaw an satong pagsabot sa katotoohan sa Biblia?

¹⁸ Pirme kitang nakikinabang sa paggibo kan mga bagay sa paagi nin Dios. (Isaias 48:​17, 18) Kaya kun linilinaw an satong punto de vista sa sarong halipot na kabtang kan Biblia, ipaggayagaya niato an nag-ooswag na katotoohan! An totoo, an padagos na pagtao sa sato nin kaliwanagan nagpapatunay na kita nasa tamang dana. Iyan “an dana kan mga matanos,” na “kabaing kan liwanag na paorog nang paorog na nagliliwanag sagkod na magin lubos an aldaw.” (Talinhaga 4:18) Totoo, sa ngonyan “malibog” an pagheling niato sa nagkapirang aspekto kan katuyohan nin Dios. Alagad pag-abot kan itinalaan na panahon nin Dios, maheheling niato an katotoohan sa bilog na kagayonan kaiyan, basta an satong mga bitis nagdanay na marigon sa “dana.” Mientras tanto, magpakagayagaya logod kita sa mga katotoohan na lininaw ni Jehova, na hinahalat an kaliwanagan sa mga dai pa nasasabotan nin malinaw.

19. Ano an sarong paagi na ipaheling na namomotan niato an katotoohan?

¹⁹ Paano niato ikapaheheling an satong pagkamoot sa liwanag sa praktikal na paagi? An sarong paagi regular na pagbasa kan Tataramon nin Dios​—aroaldaw kun puede. Ano may sinusunod kamong regular na programa nin pagbasa kan Biblia? An mga magasin na An Torrengbantayan asin  Awake! nagtatao man sa sato nin abunda, masustansiang espirituwal na kakanon. Isip-isipa man an mga libro, brosyur, asin iba pang publikasyon na ginibo para sa satong kapakinabangan. Asin kumusta man an nakaparirigon sa boot na mga report sa paghuhulit kan Kahadean na ipinupublikar sa Yearbook of Jehovah’s Witnesses?

20. Ano an koneksion kan liwanag saka katotoohan gikan ki Jehova asin kan satong pag-atender sa Kristianong mga pagtiripon?

²⁰ Iyo, sinimbag ni Jehova sa makangangalas na paagi an pamibi sa Salmo 43:3. Sa katapusan kan bersikulong iyan, nababasa niato: “Darahon logod ako kan [saimong liwanag asin katotoohan] sa saimong banal na bukid asin sa saimong tabernakulong grande.” Inaantisipar daw nindo an pagsamba ki Jehova, kaiba nin kadakoldakol pang iba? An espirituwal na pagtotokdo na itinatao sa satong mga pagtiripon importanteng paagi na itinatao ni Jehova an kaliwanagan ngonyan. Ano daw an magigibo niato tanganing mapararom an satong pag-apresyar sa Kristianong mga pagtiripon? Inaagda niamo kamo na mapagngayongayong estudyaran an temang ini sa kasunod na artikulo.

[Nota sa Ibaba]

Masisimbag daw Nindo?

• Taano ta gradwal an paghayag ni Jehova kan saiyang mga katuyohan?

• Paano rinesolberan kan mga apostol asin kan kamagurangan na lalaki sa Jerusalem an isyu manongod sa pagturi?

• Anong paagi nin pag-adal sa Biblia an ginamit kan enot na Mga Estudyante sa Biblia, asin taano idto ta napapalaen?

• Iilustrar kun paano ihinahayag an espirituwal na liwanag sa itinalaan na panahon nin Dios.

[Mga Hapot Para sa Pag-adal]

[Ritrato sa pahina 12]

Aram ni Charles Taze Russell na masirang an liwanag sa libro nin Kapahayagan sa itinalaan na panahon nin Dios