Kita an Klase na May Pagtubod

Paghiras kan Kristianong Paglaom sa Senegal

AN SIRA dati nang mayor na pagkakan kaidto pang suanoy na mga panahon. Sa laog nin rinibong taon, an mga tawo nanira sa kadagatan, mga danaw, asin salog kan daga. An nagkapira sa mga apostol ni Jesu-Cristo mga parasira sa Dagat nin Galilea. Minsan siring, iinintrodusir sa sainda ni Jesus an ibang klase nin paninira. Ini espirituwal na paninira na pakikinabangan bako sana kan mga parasira kundi siring man kan sira.

Sa bagay na ini, sinabihan ni Jesus an parasirang si Pedro: “Poon ngonyan an dadakopon mo mga tawong buhay.” (Lucas 5:10) An klaseng ini nin paninira ginigibo ngonyan sa labing 230 kadagaan, kabale na an Senegal. (Mateo 24:14) Digdi an “mga parasira nin mga tawo” sa presenteng aldaw makosog an boot na ihinihiras sa iba an saindang Kristianong paglaom.​—Mateo 4:19.

An Senegal yaon sa pinakaporong solnopan nin Aprika. Iyan minapoon sa mabaybay na desiertong mga lugar na nasa linderos nin Sahara sa amihanan sagkod sa maalingahot na mga kadlagan kan rehion nin Casamance sa timog. An Senegal sarong nasyon na inaagihan nin nakapapasong doros hale sa desierto siring man nin malipot, nakakapapreskong mga huyop-huyop hale sa Atlantiko. Labing siyam na milyon katawo an nag-eerok digdi. An mga nag-eerok sa Senegal midbid sa saindang pagkamapag-istimar. An kadaklan dai naghihingako na Kristiano. Dakol an nagpapastor, mantang an iba nag-aataman nin mga baka, kamelyo, asin kanding. Igwa man nin mga paraoma, na nagtatanom nin mani, gapas, asin paroy. Iyo, asin igwa nin mga parasira, na an ipinupuli mga hikot na pano nin sira hale sa Oseano Atlantiko asin hale sa nagkapirang dakulang salog na pasikosiko sa laog kan nasyon. An industriya nin paninira mahalagang marhay an kabtang sa ekonomiya kan Senegal. Sa katunayan, an bantog na nasyonal na putahe iyo an ceebu jën, masiram na pagkakan na maluto, sira, asin gulay.

“Mga Parasira nin mga Tawo”

Igwa nin 863 na maigot na parahulit kan Kahadean nin Dios sa Senegal. An espirituwal na paninira nagpoon digdi kaidtong enot na mga taon nin 1950. Binukasan an sarong sangang opisina kan Watch Tower Society sa Dakar, an kabisera, kan 1965. An “mga parasirang” misyonero nagpoon na umabot hale sa hararayong nasyon. Pinonan an “paninira,” asin an paghiras kan Kristianong paglaom sa Senegal daing ontok na nag-ooswag. Pag-abot nin panahon, itinogdok an bagong mga pasilidad kan sangang opisina sa Almadies, sa luwas kan Dakar, asin idinusay ki Jehova kan Hunyo 1999. Kanigoan na panahon nin paggayagaya!

An Angat sa Pag-ako kan Katotoohan

Regular na nakakaolay an mga tawo na laen-laen an pinaghalean, asin an nagkapira nagtubod sa mensahe nin paglaom na yaon sa Tataramon nin Dios. Minsan ngani dakol an mayo nin kaaraman manongod sa Biblia, sinda naggagayagaya na manodan na madali nang maotob an mga ipinanuga ni Jehova Dios sa fiel na mga propeta kan suanoy na panahon.

Sa parate kaipuhan an kosog nin boot tanganing makapanindogan para sa Kristianong mga prinsipyo, nangorogna kun kalabot an mga tradisyon asin kostumbre nin pamilya. Halimbawa, an poligamya lakop na ginigibo sa Senegal. Estudyare an kamugtakan nin sarong lalaki na may duwang agom kan sia nagpoon na mag-adal sa Biblia. Magkakaigwa daw sia kan kosog nin boot na akoon an Kristianong katotoohan asin kumuyog sa kahagadan kan Kasuratan na magin agom na lalaki nin saro sanang agom na babae? (1 Timoteo 3:2) Asin pagdadanayon daw nia an agom na babae kan saiyang pagkabarobata, an babae na enot niang naagom? Iyan an ginibo nia, asin ngonyan sia naglilingkod bilang maigot na magurang sa saro kan mas dakulang mga kongregasyon sa Dakar. Inako man kan enot niang agom na babae an katotoohan patin kan gabos na 12 niang aki, 10 sa saiyang enot na agom asin 2 sa ikaduwa niang agom kaidto.

An saro pang balakid sa pag-ako kan Kristianong paglaom tibaad an dai pakabasa asin pakasurat. Boot daw sabihon kaini na an tawong dai tataong magbasa asin sumurat dai makaaako asin makaootob kan katotoohan? Dai nanggad. Estudyare an halimbawa ni Marie, sarong mahigos na ina nin walong saradit pang aki. Tolos-tolos niang naheling an importansia na ipakipag-olay an sarong teksto sa Biblia sa saiyang saradit pang aki aroaldaw bago sinda maghale pasiring sa eskuelahan asin bago sia magtrabaho. Alagad paano nia ini magigibo, mantang dai sia tataong bumasa? Amay pa kada aga, dinadara nia an pulyetong Pagsiyasat sa  Kasuratan Aroaldaw asin nagtitindog sa mabaybay na kalye sa atubangan kan saiyang harong. Mantang minaagi an mga tawo, hinahapot nia sinda kun sinda tataong magbasa. Kun makakua sia nin saro na tatao, pinakakaptan nia an pulyeto asin odok na sinasabi: “Dai ako tataong magbasa, kaya puede daw tabi na basahon mo an parteng ini para sa sako ngonyan na aldaw?” Sia naghihinanyog nin atento sa pagbasa. Dangan pinasasalamatan nia an nag-aagi asin marikas na minalaog sa saiyang harong tanganing magkaigwa nin maogmang pakipag-olay kan teksto sa saiyang mga aki bago sinda humale pasiring sa eskuelahan!

Naghihimate an Gabos na Klase nin Tawo

Sa Senegal, an mga tawo puedeng manompongan na nagtutukaw sa mga kalye mantang nagtitinda nin sira, gulay, o prutas sa sadan o nakahandig sa tangod nin sarong nakagugulat na poon nin kahoy na baobab mantang nag-iinom nin ataya, sarong klase nin mapait na berdeng tsa. Determinadong ihiras an maogmang bareta sa gabos na manuparan ninda, an duwang tugang na lalaki nakipag-olay sa sarong baldadong lalaki na nakikilimos sa kalye. Pakataratara sa saiya, sinda nagsabi: “Dakol na tawo an nagtatao sa saimo nin kuarta alagad dai minapondo tanganing makipag-olay. Kami nagdigdi tanganing makipag-olay sa saimo manongod sa mahalagang marhay na bagay na may labot sa saimong ngapit.” Nasorpresa an alabado. “Mawot ming hapoton ka,” an pagpadagos kan mga tugang na lalaki. “Taano sa paghona mo ta grabe an pagdusa sa kinaban?” “Kabotan iyan nin Dios,” an simbag kan alabado.

Dangan an mga tugang na lalaki nakipangatanosan sa saiya hale sa Kasuratan asin ipinaliwanag an Kapahayagan 21:4. An alabado napahirong marhay kan mensaheng ini nin paglaom asin kan bagay na igwa nin interesado sa saiya tangani na umontok asin ipakipag-olay an Biblia. Napano nin luha an saiyang mga mata. Imbes na humagad nin kuarta, nakimaherak sia sa mga tugang na lalaki na kuanon an gabos na sinsilyo na yaon sa saiyang lata na ginagamit nia sa pagpalimos! Grabe an saiyang pamimirit kaya naatraer kaini an atension kan gabos na nag-aaragi. Pakatapos sana nin grabeng pagsayuma na nakombensir sia kan mga tugang na lalaki na isaray an kuarta. Ominoyon sia sa katapustapusi alagad nag-insistir na dalawon ninda sia giraray.

An dakulang unibersidad sa Dakar dinudugangan man an dakop sa espirituwal na hikot. Duman sarong estudyante sa medisina na an ngaran Jean-Louis an nagpoon na mag-adal sa Biblia. Marikas niang inako an katotoohan, idinusay an saiyang buhay ki Jehova, asin nabautismohan. An saiyang kamawotan maglingkod sa Dios sa pambilog na panahon na paglilingkod bilang payunir, alagad nagustohan man nia an saiyang pag-adal nin medisina. Huli sa kontrata nia sa saiyang nasyon, obligado siang taposon an saiyang pag-adal. Pero, pinonan nia an paglilingkod bilang auxiliary payunir kadungan kaiyan. Dai nahaloy pakalihis na makua an saiyang diploma bilang sarong kualipikadong doktor, inimbitaran sia na maglingkod sa sarong dakulang erokan na Bethel sa Aprika bilang doktor kan pamilya. An saro pang hoben na lalaki na nanuparan sa Unibersidad nin Dakar naglilingkod na man ngonyan kaiba kan pamilyang Bethel sa saiyang nasyon.

An espirituwal na paninira sa Senegal tunay nanggad na kapakipakinabang. An mga babasahon sa Biblia kan Mga Saksi ni Jehova inaapresyar na marhay asin iniimprenta na ngonyan sa lokal na lenguahe na Wolof. An pakadangog kan maogmang bareta sa saindang nagimatan na lenguahe nakaenkaminar sa dakol na tawo na sadiosan an puso na maghimateng may pagpasalamat. Paagi sa bendisyon ni Jehova, daing duwa-duwa na dakol pang simbolikong sira an madadakop, mantang fiel asin makosog an boot na padagos na ihinihiras kan maigot na “mga parasira nin mga tawo” sa Senegal an Kristianong paglaom.

[Mapa/Ritrato sa pahina 31]

(Para sa aktuwal na format, hilingon an publikasyon)

SENEGAL

[Ritrato]

Paghiras kan Kristianong paglaom sa Senegal

[Credit Line]

Mountain High Maps® Copyright © 1997 Digital Wisdom, Inc.