Bareta kan mga Parabalangibog kan Kahadean

“Kadakol Kamong Aram Manongod sa Biblia”

KAN an 12 anyos na si Jesus makosog an boot na nagtaram sa mga namomoon sa relihion sa Jerusalem, “an gabos na naghihinanyog sa saiya danay na nagngangalas sa saiyang pakasabot asin sa saiyang mga simbag.” (Lucas 2:47) Siring man ngonyan, an dakol na hoben na lingkod ni Jehova nagkakaigwa nin kosog nin boot na magtaram sa saindang mga maestro asin kaeskuela manongod sa Dios asin sa Biblia, asin sa parate sinda nakaeeksperyensia nin kaparehong nakaoogmang mga resulta.

Si Tiffany, 14 anyos, kaiba sa sarong klase kun saen an pinag-oolayan iyo an hula sa Biblia manongod sa 70 semana nin mga taon, na makukua sa Daniel 9:​24-​27. An maestro nagtao nin pira sanang impormasyon manongod sa mga teksto asin daing gayo ipinaliwanag an leksion.

Kan primero, si Tiffany nag-aalangan na iitaas an saiyang kamot. “Alagad sa dai maaraman na dahelan,” an sabi nia, “napurisaw nanggad ako na dai biyong ikinapaliwanag an mga teksto. Asin bigla na sana, ikinaitaas ko an sakong kamot.” Napangalas an maestro na may saro na talagang may masasabi manongod sa leksion, mantang an kadaklan kan mga estudyante nasasakitan na masabotan iyan.

Tinawan kan oportunidad na ipaliwanag an hula, si Tiffany nagtindog asin nagtaram sa ekstemporanyong paagi. Kan sia matapos, silensiong marhay an kuarto kan klase. Si Tiffany medyo ninerbios. Dangan an klase biglang nag-urupakan nin halawig.

“Kahangahangang marhay iyan, Tiffany, kahangahangang marhay iyan,” an paorootrong sinabi kan maestro. Inadmitir nia na aram niang igwa nin orog pang impormasyon manongod sa mga tekstong idto, alagad si Tiffany an kaenot-enoteng nakapaliwanag kaiyan sa saiya nin malinaw na marhay. Pakatapos kan klase, hinapot nia si Tiffany kun taano ta kadakol siang aram manongod sa Biblia.

“Iyan huli ta ako saro sa Mga Saksi ni Jehova,” an simbag nia. “Kinaipuhan kan sakong mga magurang na ipaliwanag sa sako nin nagkapirang beses an hula na iyan bago ko iyan nasabotan.”

An mga kaklase napangalas man sa saiyang kaaraman manongod sa Biblia. An sarong estudyante nagsabi ki Tiffany: “Aram ko na ngonyan kun taano kamong mga Saksi ni Jehova ta naghaharongharong; iyan huli ta kadakol kamong aram manongod sa Biblia.” An iba nangako na dai na ninda noarin man sia kakarawan manongod sa saiyang mga paniniwala.

Kan sabihon ni Tiffany sa saiyang mga magurang an manongod sa saiyang eksperyensia, isinuherir ninda na alokan nia kan librong Kaaraman na Minagiya Pasiring sa Buhay na Daing Katapusan an saiyang maestro. Kan gibohon nia iyan asin ipinaheling sa maestro an kabtang na nagpapaliwanag kan hula ni Daniel, inako nia tolos an libro asin nagpasalamat sa saiya para dian.

Totoo nanggad, kun an mga hoben na Kristiano makosog an boot na nagtataram manongod sa itinokdo sa sainda kan saindang mga magurang mapadapit sa Dios asin sa Biblia, sinda nagtatao nin pag-omaw asin onra ki Jehova asin mga bendisyon sa saindang sadiri.​—Mateo 21:​15, 16.