Kun Ano an Maninigo na Maaraman Nindo Manongod sa Panraratak

AN PANRARATAK sa presenteng aldaw depisil na tawan nin kahulogan. Ini huli ta nagkakalaen na marhay an mga nagsasagibo kaiyan. Mayo sindang rinerekonoser na sentral na autoridad o doktrina o banal na libro tanganing magin parareho an paniniwala. Sinda magkalaen man nin tradisyon, organisasyon, ritual, asin opinyon sa kun anong mga dios an tatawan nin onra. Nagsabi an sarong parasurat: “An kinaban nin okulto inaalok an indibiduwal nin ‘libreng sadan’ nin mga ideya.” An sabi nin saro pa: “An kadaklan na Neo-Pagano dai nagkakaoroyon sa haros gabos na bagay.”

Para sa dakol, an mga pagkakasarongatan bakong problema. An sarong giyang libro para sa mga gustong magin pararatak nagsasabi: “Kun ika nadedepisilan sa garo baga sarongat na impormasyon, siyasaton mo an impormasyon na ini asin magdesisyon ka kun arin an susunodon mo. Hinanyoga an saimong intuision. Sa ibang pagtaram, bahala ka nang kumua asin pumili sa ipinublikar na mga ritual asin mga libro para sa mga ritual tanganing makadesisyon kun ano an pinaghohona na tama.”

Para sa mga nakaaaram kun ano an katotoohan, problema an siring na mga pagkakasarongatan. An katotoohan iyo an katunayan, an totoo. An mga bagay bakong totoo huli sana ta an saro naghohona o naglalaom o naniniwala na an mga iyan totoo. Halimbawa, may panahon kaidto na an mga doktor naniniwala na mabobolong ninda an pulmonya paagi sa pagbaak sa sarong buhay na manok asin pagbugtak kan mga pidaso kaiyan sa ibabaw kan daghan nin pasyente. Daing duwa-duwa, dakol na pasyente an sinserong naniwala na an pagbolong na ini makakapaomay sa sainda. Minsan siring, an saindang mga paniniwala asin paglaom bakong kaoyon kan katunayan​—an siring na prosedimiento dai nakakabolong sa pulmonya. An mga tawo dai naggigibo nin katotoohan; sinda nagmamaigot na saboton iyan.

An Biblia nagsasabing igwa kan katotoohan manongod sa espirituwal na mga bagay. Si Jesu-Cristo, kan yaon digdi sa daga, nagsabi sa saiyang Ama sa pamibi: “An saimong tataramon katotoohan.” (Juan 17:17) Si apostol Pablo nagsurat: “An gabos na Kasuratan ipinasabong nin Dios.” (2 Timoteo 3:16) An dakol na nagsasagibo nin panraratak dai minaoyon. Imbes, sinda naghahanap nin pasabong asin giya sa osipon, suanoy na mga relihion, asin sa eroestorya sa siensia pa ngani. Pero bako daw na rasonable na kisuerra estudyaran an sinasabi kan Biblia? Total, iyan haros lakop na rinerekonoser bilang banal na libro. Saro man iyan sa kagurangguranging mga tekstong relihioso na nagdanay. An Biblia isinurat sa laog nin labing 1,600 na taon, alagad ta iyan daing liwat-liwat sa bilog na mga katokdoan kaiyan. Ikomparar ta an mga katokdoan kan Biblia  sa nagkapirang komun na paniniwala na ipinahahayag sa presente kan mga nagpapalakop nin panraratak.

Siisay an Nag-eerok sa Rona nin mga Espiritu?

An pundamental na hapot sa paghanap nin espirituwal na pakasabot iyo ini, Siisay an nag-eerok sa rona nin mga espiritu? Minsan ngani an kadaklan na pararatak sa presente nagsusunod sa pagtubod na interesado sa naturalesa asin dakol na sinasambang dios, an nagkapira nagsasamba sa sarong midbid na inang diosa, na ibinibilang na may tolong papel bilang daraga, ina, asin gurang, na nagrerepresentar sa pundamental na mga tangga sa buhay. An saiyang kaminootan sarong dios na may mga sungay. An ibang mga pararatak nagsasamba pareho sa dios asin diosa. An sarong parasurat nagsasabi: “An Diosa asin Dios ibinibilang na kapahayagan kan babae asin lalaking mga puersa nin naturalesa. An balang saro [igwa] nin napapalaen na mga karakteristiko na kun pinagsasaro nagreresulta sa oroyon na pagkalalang nin buhay.” An saro pang autoridad nagsurat: “An saro sa importanteng-importante na mga desisyon sa Panraratak iyo an pagpili nindo nin mga dios (Dios/Diosa) na pakikiibanan nindo. . . . An Panraratak nagtatao sa saindo kan katalingkasan na pilion asin pagkatapos tawan nin onra an saindong sadiring porma kan Dios.”

Dai sinusuportaran kan Biblia an arin man sa mga ideyang ini. Idinusay ni Jesu-Cristo an saiyang bilog na ministeryo sa pagtokdo sa iba manongod ki Jehova, an “iyo sanang tunay na Dios.” (Juan 17:3) An Biblia nagsasabi: “Si Jehova dakula asin dapat na gayong omawon, asin sia dapat na katakotan nin orog kisa gabos na iba pang dios. Huli ta an gabos na dios kan mga banwaan daing kamanungdanan na dios.”​—1 Cronica 16:​25, 26.

Kumusta man an Diablo? An Webster’s Ninth New Collegiate Dictionary tinatawan nin kahulogan an panraratak bilang “pagkomunikar sa diablo.” Masakit makanompong nin pararatak ngonyan na maoyon sa pakahulogan na ini, ta dakol an dai minaako maski sa pag-eksister ni Satanas na Diablo. An sarong hoben na babae, na sinambit sa The Irish Times bilang sarong “halangkaw an ranggong pararatak asin lider kan saro sa pinakadakulang grupo nin mga pararatak sa Irlandia,” nangatanosan nin arog kaini: “An paniniwala sa Diablo nangangahulogan nin pag-ako sa Kristianismo . . . [An Diablo] dai puedeng mag-erok sa sarong uniberso na mayo nin Dios.”

Pinatutunayan kan Biblia an pag-eksister kan Diablo asin sia an sinasabing dahelan kan dakol na pagdusa asin kariribokan sa daga. (Kapahayagan 12:12) Bako sanang itinokdo ni Jesus na nag-eeksister an Diablo kundi ipinaheling man nia na may posibilidad na magibo nin dai tinutuyo an kabotan kan Diablo. Halimbawa, an nagpapakangmatanos na mga namomoon sa relihion kan enot na siglo nag-insistir na sinda, minsan paano, mga aki nin Dios asin naniwala na ginigibo ninda an kabotan nin Dios. Iba an aram ni Jesus, na nakarororop kan nasa saindang puso. Prangka nia sindang sinabihan: “Gikan kamo sa saindong ama na Diablo, asin boot nindo na gibohon an mga mawot kan saindong ama.” (Juan 8:44) Saro pa, an libro sa Biblia na Kapahayagan nagsasabi na “ilinalagalag [kan Diablo] an bilog na ineerokan na daga.”​—Kapahayagan 12:9.

May Marahay daw na Mahika?

Siempre, an mahika kaidto pa konektado sa okulto. * Dakol na tawo kapwa sa suanoy asin presenteng mga panahon an naniniwala na an mahika kan mga pararatak ginigibo tanganing danyaran an iba. An mga pararatak sinasabing igwa kan kapangyarihan  na mangolog nin grabe asin gumadan pa ngani paagi sa mahika. Haloyon nang ibinabasol sa mga pararatak an haros daing limiteng bilang nin mga remalaso, kabale an paghelang, pagkagadan, asin pagkadestroso nin pananom.

Makosog na dinedeharan nin mga pararatak an mga sahot na iyan. Minsan ngani inaadmitir an pag-eksister kan paminsanminsan na daing kuentang pararatak na maraot an ginigibo, an kadaklan nagsasabi na an saindang mahika ginagamit sa pagtao nin mga pakinabang, bakong danyos. An mga Wiccan nagtotokdo na an ibubunga nin mahika tripleng pakinabang sa nagsasagibo kaiyan asin nagsasabi na ini sarong mayor na pan-olang sa mga pagsumpa. Kabale sa mga halimbawa kan maboot daang mahika na ini an mga orasyon tanganing protehiran an saindong sadiri, dalisayon an saindong harong sa negatibong puersa na nawalat kan mga dating nag-iistar, mangayuma, padalion an pagpaomay asin parahayon an salud, ebitaran na mawaran kamo nin trabaho, asin magkakuarta. Huli sa siring kalakop na mga puersa na iinaatribwir sa panraratak, bakong makangangalas na iyan nagin popular na marhay.

Minsan siring, an Biblia daing sinasabing pagkakalaen kan mahika na marahay asin kan mahika na maraot. Sa Ley na itinao ki Moises, lininaw nanggad nin Dios an saiyang paninindogan. Sia nagsabi: “Dai ka maggibo nin mahika.” (Levitico 19:26) Mababasa ta man: “Mayo nin maninigong makua sa saimo na . . . paramahika o siisay man na naghahanap nin mga signos o pararatak, o saro na nag-eengkanto o siisay man na nakihuhumapot sa patagolainan.”​—Deuteronomio 18:​10, 11.

Taano ta sinabi iyan nin Dios? Iyan bakong huli ta intension niang ipanguri sa sato an kapakipakinabang. Itinao ni Jehova an mga ley na ini sa saiyang banwaan huli ta namotan nia sinda asin habo nia na sinda magin oripon nin takot asin superstisyon. Imbes, inaagda nia an saiyang mga lingkod na dumolok sa saiya para sa mga bagay na kaipuhan ninda. Sia an Paratao nin “lambang marahay na balaog asin lambang sangkap na regalo.” (Santiago 1:17) Inasegurar ni apostol Juan an mga kapagtubod: “Ano man an satong hagadon inaako niato gikan sa [Dios], huli ta kinukuyog niato an saiyang mga pagboot asin ginigibo niato an mga bagay na nakapaoogma sa saiyang mga mata.”​—1 Juan 3:22.

Kumusta Man an Maraot na mga Espiritu?

Dakol na pararatak an minaoyon sa Biblia dapit sa puntong ini: Talagang nag-eeksister an maraot na mga espiritu. Sa sarong komposisyon an sarong promotor nin panraratak nagpapatanid: “Igwang mga Multo: Nag-eeksister sinda, sa dai naheheling na kinaban na kaagid kan sa sato, na pano nin nabubuhay na mga linalang. . . . An mga terminong ‘Impaktito,’ ‘Maraot na Espiritu’ asin ‘Demonyo’ garo tama man. Sinda makosogon. . . . An pinakaintelihenteng klase kaiyan . . . may kakayahan (kun may matabang na magbukas nin pinto para sa sainda) na lumaog sa satong kinaban.  . . . Puede sindang lumaog sa saindong hawak . . . , na puede pa ngani kamong kontrolon. Iyo, kaagid nanggad ini kan suanoy na mga estorya nin pagsanib nin Demonyo.”

Kaidtong mga panahon kan Biblia, an pagsanib nin demonyo nagpasakit sa mga tawo sa laen-laen na paagi. An nagkapira sa mga apektado napula, an nagkapira nabuta, an nagkapira nakapay, asin an nagkapira nagkaigwa nin kosog na lihis sa normal na tawo. (Mateo 9:​32; 12:22; 17:​15, 18; Marcos 5:​2-5; Lucas 8:​29; 9:​42; 11:14; Gibo 19:16) Kun minsan nadadagdagan an labi-labing kasakitan kun dakol na demonyo an sabay-sabay na nagsasanib sa sarong tawo. (Lucas 8:​2, 30) Kun siring, sierto nanggad na igwa nin marahay na dahelan kun taano ta pinatatanidan ni Jehova an mga tawo na rumayo sa panraratak asin iba pang mga gibo nin okulto.

Relihion na Basado sa Katotoohan

Dakol an naaagyat sa panraratak ngonyan huli ta iyan garo baga relihion na dai nakakaano, maboot, asin konektado sa naturalesa. Sa nagkapirang komunidad iyan rekonosido na. Dai iyan kinatatakotan. Imbes, sa parate iyan nagin ordinaryo na sana. Sa kamugtakan kun saen an pagpabaya sa ibang paniniwala nagin dahelan na akoon nin dakol maski an mga bagay na pambihira, an panraratak iginagalang nang gayo.

Tunay nanggad, an kinaban nin mga relihion nagin sarong sadan na dian libreng pumili an mga tawo kan angay sa saindang mga pangangaipo, siring nanggad kun an saro minabakal nin sapatos. Sa kabaliktaran, si Jesus nagtaram dapit sa duwa sanang pagpipilian. Sia nagsabi: “Maglaog kamo sa tatang hayakpit; huli ta halakbang asin mahiwas an dalan na pasiring sa kalaglagan, asin dakol an mga nagraralaog dian; mantang hayakpit an tata asin piot an dalan na pasiring sa buhay, asin diit an mga nakakukua kaiyan.” (Mateo 7:​13, 14) Naturalmente, libre kitang pumili kun arin an lalaogan ta. Alagad huling nakataya an satong daing sagkod na ikararahay, importanteng-importante an pagpili na iyan. Tanganing kamtan an espirituwal na kaliwanagan, dapat niatong sundon an dalan nin katotoohan​—an dalan na manonompongan sana sa Tataramon nin Dios, an Biblia.

[Nota sa Ibaba]

[Ritrato sa pahina 5]

Para sa dakol ngonyan an panraratak dai nakakaanong relihion na konektado sa naturalesa

[Ritrato sa pahina 6]

An mahika kaidto pa konektado sa okulto

[Ritrato sa pahina 6]

An mga nagsasagibo daw nin panraratak nagigibo nin dai tinutuyo an kabotan kan Diablo?

[Mga Ritrato sa pahina 7]

Ihinahayag kan Biblia an dalan nin katotoohan