Paano Naghihiro Ngonyan an Espiritu nin Dios?

PILAY na sia poon kan nasa matris pa kan saiyang ina. Aroaldaw, nagtutukaw sia sa tata kan templo na inaapod Magayon tanganing makilimos sa nagraralaog sa templo. Minsan siring, sarong beses an biading parapakilimos na ini nag-ako nin sarong balaog na an halaga nakalalabing marhay kisa pipirang saradit na sinsilyo. Sia pinaomayan!​​—Gibo 3:​2-8.

Minsan ngani an apostol na si Pedro asin Juan an ‘nagbangon sa saiya’ kaya “an dapan kan saiyang mga bitis . . . napapusog,” dai ninda kinua an kredito sa pagpaomay. Taano ta dai? Si Pedro mismo nagpaliwanag: “Mga lalaking taga Israel, taano ta pinagngangalasan nindo ini, o taano kamo ta nakatorohok sa samo na garo baga sa sadiring kapangyarihan o diosnon na debosyon na pinalakaw mi sia?” Tunay nanggad, aram pareho ni Pedro asin Juan na, bakong paagi sa saindang kosog, kundi paagi sa banal na espiritu nin Dios na magigibo an siring na bagay.​—Gibo 3:​7-16; 4:​29-31.

Kan panahon na idto, an siring na “makapangyarihan na mga gibo” itinao tanganing ipaheling na an bago pa sanang Kristianong kongregasyon sinusuportaran nin Dios. (Hebreo 2:4) Alagad pakatapos na maotob an katuyohan kaiyan, iyan “mahahale,” an sabi ni apostol Pablo. * (1 Corinto 13:8) Sa siring, mayo kitang naheheling ngonyan sa tunay na Kristianong kongregasyon na ano man na ordenado nin Dios na mga pagpaomay, makahulang mga mensahe, o pagpaluwas nin mga demonyo.

Pero boot sabihon daw kaini na an banal na espiritu nin Dios dai na naghihiro? Dai nanggad! Estudyaran ta an nagkapirang iba pang paagi na an espiritu nin Dios aktibo kaidtong enot na siglo asin aktibo ngonyan sa satong kaaldawan.

“An Espiritu kan Katotoohan”

An sarong paghiro kan banal na espiritu iyo an magpaisi, magtaong liwanag, maghayag nin mga katotoohan. Kan madali na siang magadan, sinabihan ni Jesus an saiyang mga disipulo: “Igwa pa ako nin dakol na isasabi saindo, alagad ta dai pa nindo iyan kaya ngonyan. Minsan siring, kun an sarong iyan dumatong na, an espiritu kan katotoohan, gigiyahan nia kamo sa gabos na katotoohan.”​—Juan 16:​12, 13.

“An espiritu kan katotoohan” ibinubo kan Pentecostes 33 C.E. kan an mga 120 disipulo na nagtiripon sa sarong kuarto sa itaas sa Jerusalem binautismohan kan banal na espiritu. (Gibo 2:​1-4) Si apostol Pedro kabilang sa mga presente para sa taonan na kapiestahan na idto. Pano nin banal na espiritu, si Pedro “nagtindog” asin ipinaliwanag, o klinaro, an nagkapirang katotoohan manongod ki Jesus. Halimbawa, isinaysay nia kun paanong “si Jesus na Nazareno” “ilinangkaw sa too nin Dios.” (Gibo 2:​14, 22, 33) Pinahiro man si Pedro kan espiritu nin Dios na magpahayag nin pusoan sa mga Judiong nagdadangog sa saiya: “Maaraman logod kan bilog na harong ni Israel na may kasiertohan na ginibo sia nin Dios na magin Kagurangnan asin Cristo, an Jesus na ini na saindong ipinako.” (Gibo 2:​36) Bilang resulta kan mensahe ni Pedro na ipinasabong kan espiritu, mga tres mil katawo an “maogmang nag-ako kan saiyang tataramon” asin nagpabautismo. Sa paaging ini, an banal na espiritu nin Dios nagtabang na giyahan sinda sa katotoohan.​—Gibo 2:​37-41.

An banal na espiritu nin Dios nagserbi man na paratokdo asin parapagirumdom. Si Jesus nagsabi: “An paratabang, an banal na espiritu, na isusugo kan Ama sa ngaran ko, an sarong iyan matokdo sa saindo kan gabos na bagay asin mapagirumdom sa saindo kan gabos na bagay na isinabi ko sa saindo.”​—Juan 14:26.

Paano naghiro an banal na espiritu bilang paratokdo? Binuksan kan espiritu nin Dios an isip kan mga disipulo sa mga bagay na nadangog na ninda kaidto ki Jesus alagad dai ninda lubos na nasabotan. Halimbawa, aram kaidto kan mga apostol na durante kan pagbista sa saiya, sinabihan ni Jesus an Romanong gobernador nin Judea, si Poncio Pilato: “An sakong kahadean bakong kabtang kan kinaban  na ini.” Pero, kan panahon kan pagsakat ni Jesus sa langit pakalihis nin labing 40 aldaw, sala pa giraray an pagmansay kan mga apostol na an Kahadean ititindog digdi sa daga. (Juan 18:36; Gibo 1:6) Minalataw na lubos na nasabotan kan mga apostol an kahulogan kan mga tataramon ni Jesus kaidto sanang pakatapos na ibubo an banal na espiritu nin Dios kan Pentecostes 33 C.E.

An espiritu nin Dios nagserbi man na parapagirumdom paagi sa pagpabalik sa isip kan laen-laen na katokdoan ni Jesus. Halimbawa, an mga hula mapadapit sa kagadanan asin pagkabuhay liwat ni Cristo nagkaigwa nin bagong kahulogan sa tabang kan banal na espiritu. (Mateo 16:21; Juan 12:16) An pakagirumdom sa mga katokdoan ni Jesus nagpangyari sa mga apostol na pusoan na idepensa an saindang paninindogan sa atubangan nin mga hade, mahistrado, asin namomoon sa relihion.​​—Marcos 13:​9-​11; Gibo 4:​5-​20.

Saro pa, an banal na espiritu nin Dios nagtabang na idirehir an enot na mga Kristiano sa mabungang teritoryo sa ministeryo. (Gibo 16:​6-​10) Pinahiro man kan espiritu nin Dios an enot na mga Kristiano na magkaigwa nin kabtang sa pagsurat kan Tataramon nin Dios, an Biblia, para sa kapakinabangan kan bilog na katawohan. (2 Timoteo 3:​16) Kun siring, malinaw na aktibo an banal na espiritu sa laen-laen na paagi kaidtong enot na siglo. Dai iyan itinao na solamente gumibo nin mga milagro.

An Banal na Espiritu sa Satong Kaaldawan

An banal na espiritu naghihiro man para sa tunay na mga Kristiano sa satong kaaldawan. Nagin risang-risa ini sa sadit na grupo nin mga estudyante  sa Biblia sa Allegheny, Pennsylvania, E.U.A., sa huring kabangaan kan ika-19 siglo. An maigot na mga estudyanteng ini kan Biblia naghimuyawot na maaraman “an katotoohan.”​—Juan 8:32; 16:13.

An sarong miembro kan grupong ini, si Charles Taze Russell, nagsabi mapadapit sa paghanap nia kan katotoohan sa Kasuratan: “Namibi ako . . . na logod mahale ko sa sakong puso asin isip an ano man na prehuwisyo na puedeng makaolang asin magiyahan kan saiyang espiritu sa tamang pakasabot.” Binendisyonan nin Dios an mapakumbabang pamibi na ini.

Mantang maigot na sinisiyasat ni Russell asin kan saiyang kairiba an Kasuratan, dakol na bagay an nagin malinaw. “Nadiskobre mi na sa laog nin dakol na siglo,” an paliwanag ni Russell, “an laen-laen na sekta asin partido nagbaranga sa mga doktrina kan Biblia, na sinalakan iyan minsan paano nin espekulasyon asin sala nin tawo.” Nagbunga ini kan inapod nia na “pagsala kan katotoohan.” Tunay nanggad, an mga katotoohan sa Kasuratan itinalbong sa irarom nin paganong mga katokdoan na nakalaog sa Kakristianohan sa nag-aging mga siglo. Alagad desidido si Russell na aramon asin ipahayag an katotoohan.

Paagi sa mga pahina kan Zion’s Watch Tower and Herald of Christ’s Presence, may kosog nin boot na idinenunsiar ni Russell asin kan saiyang kairiba an falsong mga doktrina nin relihion na nagmisrepresentar sa Dios. Namansayan ninda na​—sarongat sa popular na relihiosong opinyon​—an kalag nagagadan, na sa kagadanan kita napapaduman sa lolobngan, asin na si Jehova an iyo sanang tunay na Dios asin kun siring bakong kabtang nin Trinidad.

Pero siring kan maiimahinar nindo, an siring na pagbuyagyag kan falsong mga katokdoan ikinaanggot kan klero nin Kakristianohan. Interesadong magdanay sa saindang maimpluwensiang mga posisyon, dakol na klerigong Katoliko asin Protestante an nag-organisar nin mga kampanya na an katuyohan pakaraoton si Russell. Alagad sia asin an saiyang kairiba dai nag-ontok. May kompiansa na nag-asa sinda sa paggiya kan espiritu nin Dios. “An asegurasyon kan satong Kagurangnan,” sabi ni Russell, “iyo na . . . an banal na espiritu kan Ama, na isinusugo paagi ki asin sa paghagad ni Jesus na satong Parabalukat, Parapangoltanan asin Payo, iyo an magigin satong paratokdo.” Asin talagang nagtokdo iyan! An sinserong Mga Estudyante sa Biblia na ini nagpadagos sa pagkua kan dalisay na tubig nin katotoohan hale sa Biblia asin pagbalangibog kaiyan sa bilog na kinaban.​​—Kapahayagan 22:17.

An organisasyon sa presenteng panahon kan Mga Saksi ni Jehova nagdanay na andam na sumunod sa mga paggiya kan banal na espiritu nin Dios sa laog nin labi nang sarong siglo ngonyan. Mantang gradwal na pinaliliwanagan kan espiritu ni Jehova an saindang espirituwal na pagheling, an mga Saksi gikan sa boot na ginigibo an kinakaipuhan na mga pagliliwat tanganing makasunod sa bagong pakasabot.​​—Talinhaga 4:​18.

“Kamo Magigin mga Saksi Ko”

Sinabi ni Jesus kun ano an saro pang pagparisa kan banal na espiritu nin Dios kan sabihan nia an saiyang mga disipulo: “Kamo mag-aako nin kapangyarihan kun dumatong na sa saindo an banal na espiritu, asin kamo magigin mga saksi ko . . . sagkod sa kaporoporohi kan daga.” (Gibo 1:8) An panuga ni Jesus na tawan an saiyang mga disipulo nin “kapangyarihan” asin “banal na espiritu” tanganing  mahaman an iinasignar sa sainda nin Dios na gibohon aplikado pa sagkod ngonyan.

Bilang grupo, an Mga Saksi ni Jehova midbid na marhay sa saindang aktibidad na paghuhulit. (Helingon an kahon.) Tunay nanggad, an Mga Saksi ni Jehova nagtataram kan mensahe nin katotoohan sa labing 230 kadagaan asin isla. Sa gabos na maiimahinar na kamugtakan, kabale an pagsapeligro kan saindang buhay sa mga lugar na nababanga huli sa guerra, may kosog nin boot na kinokosogan ninda an saindang tingog bilang pagsuportar sa Kahadean nin Dios. An saindang kaigotan sa Kristianong ministeryo makosog na ebidensia na an banal na espiritu naghihiro ngonyan. Asin risang-risa na binebendisyonan ni Jehova Dios an saindang mga paghihingoa.

Halimbawa, kan nakaaging taon, labi nanggad sa sarong bilyon na oras an idinusay sa paghuhulit kan maogmang bareta kan Kahadean nin Dios. Na ano an resulta? Mga 323,439 katawo an nagsimbolisar kan saindang pagdusay sa Dios paagi sa pagpabautismo sa tubig. Dugang pa, 4,433,884 semanal na pag-adal sa Biblia an kinonduktahan sa mga bagong interesado. Gabos-gabos, 24,607,741 libro, 631,162,309 magasin, asin 63,495,728 brosyur asin pulyeto an ikinapasakamot. Abaa kamapuersang patotoo na an espiritu nin Dios naghihiro!

An Espiritu nin Dios Asin Kamo

Kun an sarong indibiduwal paborable an paghimate sa maogmang bareta, ikinokomporme an saiyang buhay sa mga pamantayan nin Dios, asin nagpapahayag nin pagtubod sa probisyon na pantubos, nabubuksan an dalan para sa malinig na kamugtakan sa atubangan nin Dios. Sa mga siring nagsabi si apostol Pablo: “An Dios . . . nagbubugtak kan saiyang banal na espiritu sa saindo.”​—1 Tesalonica 4:​7, 8; 1 Corinto 6:​9-​11.

An pagkaigwa kan espiritu nin Dios nagbubunga nin dakol na marahayon na bendisyon. Anong klaseng mga bendisyon? Enot, an ipinasabong na Tataramon nin Dios nagsasabi: “An bunga kan espiritu iyo an pagkamoot, kagayagayahan, katoninongan, pakatios, kabootan, karahayan, pagtubod, kahoyoan, [asin] pagpopogol sa sadiri.” (Galacia 5:​22, 23) Kun siring, an banal na espiritu nin Dios sarong makosog na puersa para sa ikararahay, na nagpapangyari sa saro na makapaheling nin diosnon na mga kualidad.

Saro pa, kun binabasa nindo an Biblia asin iinaaplikar an saindong nanonodan, an espiritu nin Dios makatatabang sa saindo na umoswag sa kadonongan, kaaraman, pakarorop, paghusgar, asin kakayahan nin pag-isip. Si Hadeng Salomon nag-ako nin “dakulaon na kadonongan asin pakasabot asin kahiwasan nin puso” huli ta naghingoa sia na paogmahon an Dios imbes na an mga tawo. (1 Hade 4:29) Huling tinawan ni Jehova nin banal na espiritu si Salomon, sierto na dai nia isasayuma an saiyang banal na espiritu duman sa mga naghihingoang paogmahon sia ngonyan.

An banal na espiritu nin Dios nagtatabang man sa mga Kristiano na labanan si Satanas asin an mga demonyo, an maraot na sistemang ini nin mga bagay, asin an makasalan na mga tendensia kan saindang makasalan na laman. Paano iyan posible? Si apostol Pablo minasimbag: “Igwa ako kan kosog para sa gabos na bagay huli sa saiya na nagtatao nin kapangyarihan sa sako.” (Filipos 4:13) Tibaad dai haleon kan banal na espiritu an mga pagbalo o sugot; minsan siring, puede kamong tabangan kaiyan na tagalan iyan. Paagi sa pagsarig sa espiritu nin Dios, puede tang akoon an “kosog na lihis sa ordinaryo” tanganing atubangon an ano man na problema o kapurisawan.​—2 Corinto 4:7; 1 Corinto 10:13.

Kun eestudyaran nindo an gabos na ebidensia, daing duda na an banal na espiritu nin Dios naghihiro ngonyan. Pinakokosog kan espiritu ni Jehova an saiyang mga lingkod na magpatotoo manongod sa saiyang marahayon na mga katuyohan. Iyan padagos na naghahayag nin mga silyab nin espirituwal na liwanag, asin pinaririgon kaiyan an satong pagtubod, na tinatabangan kita na magdanay na maimbod sa satong Kaglalang. Makapasasalamat nanggad kita na inootob nin Dios an saiyang panuga paagi sa pagtao nin banal na espiritu sa saiyang fiel na mga lingkod ngonyan!

[Nota sa Ibaba]

[Kahon sa pahina 10]

Kun Ano an Sinasabi nin Iba Manongod sa Mga Saksi ni Jehova

“Mantang an ibang mga iglesia nagbabayad nin mga asesor tanganing akiton an mga tawo na magsimba o makitusay sa mga isyu sa presenteng aldaw na arog baga nin homoseksuwalidad asin aborsion, an mga Saksi dai nakikikompromiso sa nagliliwat na kinaban. Sistematiko pa giraray sindang nagkakampanya sa Daga.”​​—The Orange County Register kan Orange County, California, E.U.A.

“Pag-abot sa pagpalakop kan pagtubod, pipira sanang denominasyon an arog kaentusiastiko . . . kan Mga Saksi ni Jehova.”​​—The Republic kan Columbus, Indiana, E.U.A.

“Sinda sana an nagduduman sa mga pinto na dara an ‘maogmang bareta,’ na iinaaplikar an mga prinsipyo kan Biblia.”​​—Życie Literackie, Polandia.

“Sa pinakadakulang kampanya nin paghuhulit na aram kasuarin man, an Mga Saksi ni Jehova an nagpaabot kan mensahe ni Jehova sa bilog na kinaban.”​​—News-Observer, Tamaqua, Pennsylvania, E.U.A.

[Mga Ritrato sa pahina 9]

An banal na espiritu nin Dios pinaliliwanagan kita sa espirituwal,

. . . nagpapaoswag nin marahayon na Kristianong mga kualidad,

. . . asin sinusuportaran kita sa paghuhulit sa bilog na kinaban