An Bagong Kinaban—Yaon daw Kamo Duman?

“Mayong orog karahay para sa sainda kisa maggayagaya asin gumibo nin marahay sa panahon kan pagkabuhay nin saro; asin siring man na an lambang tawo kumakan asin uminom nanggad patin makaheling nin karahayan para sa gabos niang kahigosan. Iyan an balaog nin Dios.”​—ECLESIASTES 3:​12, 13.

1. Taano ta puede kitang magin optimistiko manongod sa ngapit?

INIISIP nin dakol na tawo na an Makakamhan sa gabos na Dios estrikto, mahigpit. Pero, an teksto sa itaas sarong katotoohan na manonompongan nindo sa saiyang ipinasabong na Tataramon. Kaoyon iyan kan saiyang pagigin “maogmang Dios” asin kan pagbugtak nia sa satong enot na mga magurang sa sarong daganon na paraiso. (1 Timoteo 1:​11; Genesis 2:​7-9) Kun naghahanap nin pakarorop sa ngapit na ipinanunuga nin Dios sa saiyang banwaan, dai kita maninigong mabigla na maaraman an mga kamugtakan na matao sa sato nin nagdadanay na kaogmahan.

2. Ano an nagkapirang bagay na inaasahan nindo?

² Sa sinundan na artikulo, siniyasat niato an tolo sa apat na paghula kan Biblia nin “bagong kalangitan asin sarong bagong daga.” (Isaias 65:17) An saro sa masasarigan na mga prediksion na iyan nasusurat sa Kapahayagan 21:1. An minasunod na mga bersikulo nagtataram dapit kan panahon na biglang babagohon kan Makakamhan sa gabos na Dios an mga kamugtakan sa daga para sa orog na ikararahay. Papahidon nia an mga luha nin kamondoan. An mga tawo dai na magagadan dahelan sa kagurangan, helang, o mga aksidente. An pagmondo, pagtangis, asin kolog mawawara na. Abaa kanakaoogmang marhay na paglaom! Alagad  makaseseguro daw kita na iyan mangyayari, asin ano an puedeng magin epekto sa sato ngonyan mismo kan paglaom na iyan?

Mga Dahelan na Magkompiar

3. Taano ta makapagtitiwala kita sa mga panuga kan Biblia manongod sa ngapit?

³ Mangnoha kun paano nagpapadagos an Kapahayagan 21:5. Kinokotar kaiyan an Dios, na nagtutukaw sa saiyang langitnon na trono, na nagpapahayag: “Uya! ginigibo kong bago an gabos na bagay.” An panuga na iyan nin Dios mas marahay kisa ano man na nasyonal na deklarasyon nin independensia, ano man na bill of rights sa presenteng aldaw, o ano man na kamawotan nin tawo para sa ngapit. Iyan sarong biyong mapananarigan na kapahayagan kan Saro na sinasabi kan Biblia na “dai makakapagputik.” (Tito 1:2) Siempre, tibaad isipon nindo na puede na kitang pumondo digdi, na naoogma na sa magayonon na paglaom na ini asin nagtitiwala na sa Dios. Alagad dai kita kaipuhan na pumondo. Igwa pa kitang dapat na manodan manongod sa satong ngapit.

4, 5. Anong mga hula sa Biblia na inestudyaran na an puedeng makapasarig kan satong kompiansa manongod sa mangyayari sa ngapit?

⁴ Horophoropa an pinatunayan kan sinundan na artikulo dapit sa mga panuga kan Biblia na bagong kalangitan asin sarong bagong daga. Ihinula ni Isaias an siring na bagong sistema, asin an saiyang hula nagkaigwa nin kaotoban kan an mga Judio bumalik sa saindang dagang tinuboan asin establisaron giraray an tunay na pagsamba. (Esdras 1:​1-3; 2:​1, 2; 3:​12, 13) Pero, idto sana daw an pinanongdan kan hula ni Isaias? Bako nanggad! An mga bagay na ihinula nia maootob sa mas dakulang paagi sa harayo pang ngapit. Taano ta iyan an konklusyon ta? Huli sa satong binasa sa 2 Pedro 3:​13 asin Kapahayagan 21:​1-5. An mga tekstong iyan nanonongod sa bagong kalangitan asin sarong bagong daga na magtataong pakinabang sa mga Kristiano sa bilog na globo.

⁵ Siring kan naenot nang sinabi, apat na beses na ginagamit kan Biblia an fraseng “bagong kalangitan asin sarong bagong daga.” Inestudyaran ta na an tolo kaini asin nakua ta na an nakaparirigon sa boot na mga konklusyon. Malinaw nanggad, ihinuhula kan Biblia na paparaon nin Dios an karatan asin iba pang dahelan nin pagdusa asin na orog pa niang bebendisyonan an katawohan sa saiyang ipinanugang bagong sistema.

6. Ano an sinasabi nin ikaapat na hula na nagsasambit kan “bagong kalangitan asin sarong bagong daga”?

⁶ Siyasaton ta ngonyan an natatadang paglataw kan pananaram na “bagong kalangitan asin sarong bagong daga,” sa Isaias 66:​22-24: “‘Kun paanong an bagong kalangitan asin an bagong daga na sakuyang gigibohon nagdadanay sa atubangan ko,’ sabi ni Jehova, ‘siring man an saindong banhi asin an saindong ngaran magdadanay. Asin mangyayari nanggad na poon sa bagong bulan sagkod sa bagong bulan asin poon sa sabbath sagkod sa sabbath an gabos na laman madirigdi tanganing dumoko sa atubangan ko,’ sabi ni Jehova. ‘Asin sinda maruluwas nanggad asin hehelingon an mga bangkay kan mga tawo na nagkakasala tumang sa sako; huli ta an mga ulod sa ibabaw ninda dai magagadan asin an saindang kalayo dai mapaparong, asin sinda magigin makababalde sa gabos na laman.’”

7. Taano ta maninigo niatong ikonklusyon na an Isaias 66:​22-​24 maootob sa maabot na mga aldaw?

⁷ An hula na ini uminaplikar sa mga Judio na nakabalik na sa saindang daga, alagad magkakaigwa nin saro pang kaotoban. Iyan mangyayari pakaagi nin panahon poon kan isurat an ikaduwang surat ni Pedro asin an libro nin Kapahayagan, dahel ta iyan nanonongod sa sarong maabot na ‘bagong langit asin daga.’ Maaasahan ta an dakula asin biyong kaotoban na iyan sa bagong sistema. Estudyare an nagkapira sa mga kamugtakan na inaasahan tang kamtan.

8, 9. (a) Sa anong sentido na an banwaan nin Dios “magdadanay”? (b) Ano an kahulogan kan hula na an mga lingkod ni Jehova masamba “poon sa bagong bulan sagkod sa bagong bulan asin poon sa sabbath sagkod sa sabbath”?

⁸ Sinabi kan Kapahayagan 21:​4 na an kagadanan mawawara na. Minaoyon dian an teksto sa Isaias kapitulo 66. Maheheling ta sa bersikulo 22 na aram ni Jehova na an bagong kalangitan asin an bagong daga dai magigin temporaryo, na limitado an lawig. Apuera kaini, an saiyang banwaan magdadanay; sinda “magdadanay” sa atubangan nia. An ginibo na kaidto nin Dios sa saiyang piniling banwaan nagtatao sa sato nin dahelan na magkompiar. An tunay na mga Kristiano napaatubang sa maringis na paglamag, pati na sa panatikong mga paghihingoa na pohoon sinda. (Juan 16:​2; Gibo 8:1) Pero, maski an makapangyarihan na marhay na mga kaiwal kan banwaan nin  Dios, arog ki Emperador Nero nin Roma asin Adolf Hitler, dai nakayang pohoon an mga maimbod sa Dios, na nagdadara kan saiyang ngaran. Iningatan ni Jehova an kongregasyon kan saiyang banwaan, asin makaseseguro kita na kaya niang papagdanayon iyan sagkod lamang.

⁹ Siring man, an mga fiel sa Dios bilang kabtang kan bagong daga, an sosyedad nin tunay na mga parasamba sa bagong kinaban, magdadanay bilang mga indibiduwal huli ta sinda magtatao nin dalisay na pagsamba sa Kaglalang kan gabos na bagay. Iyan bakong paminsanminsan o patibasang na pagsamba. An Ley nin Dios, na itinao sa Israel paagi ki Moises, may kahagadan na mga gibo nin pagsamba kada bulan, na tinandaan kan bagong bulan, asin kada semana, na tinandaan kan aldaw nin Sabbath. (Levitico 24:​5-9; Bilang 10:​10; 28:​9, 10; 2 Cronica 2:4) Kaya an Isaias 66:​23 nanonongod sa regular, nagpapadagos na pagsamba sa Dios, serosemana asin bulan-bulan. An ateismo asin relihiosong pagsaginsagin mayo na sa panahon na iyan. “An gabos na laman madirigdi tanganing dumoko sa atubangan” ni Jehova.

10. Taano ta makakokompiar kamo na an bagong kinaban dai permanenteng raraoton nin mga maraot?

¹⁰ Inaasegurar kita kan Isaias 66:​24 na an katoninongan asin katanosan kan bagong daga nungkang masasapeligro. Dai iyan raraoton nin maraot na mga tawo. Tandaan na an 2 Pedro 3:​7 nagsasabi na nasa enotan niato an “aldaw nin paghokom asin kalaglagan kan maraot na mga tawo.” An mga malalaglag iyo an mga maraot. Daing kapahamakan na mangyayari sa mga daing sala, bakong arog kan parateng nangyayari sa mga guerra nin tawo, kun saen an biktimang mga sibilyan mas dakol kisa mga militar. Iginagarantiya sa sato kan Dakulang Hokom na an saiyang aldaw magigin kalaglagan kan mga maraot.

11. Ano an ipinaheheling ni Isaias na magigin ngapit nin siisay man na minatumang sa Dios asin sa pagsamba sa saiya?

¹¹ Maheheling kan maliligtas na mga matanos na an makahulang tataramon nin Dios totoo. Ihinuhula kan bersikulo 24 na “an mga bangkay kan mga tawo na nagkakasala tumang” ki Jehova magigin prueba kan saiyang paghokom. An klarong pananaram na ginamit ni Isaias tibaad garo nakakukubhan. Pero, kaoyon iyan kan aktuwal na pangyayari sa kasaysayan. Sa luwas kan mga lanob kan suanoy na Jerusalem yaon an aponan nin mga basura asin, kun minsan, nin mga bangkay nin ginadan na mga kriminal na hinusgaran na bakong angay na tawan nin disenteng lobong. * Duman an mga ulod asin nakatotomtom na kalayo madaling pinapara kapwa an mga basura asin an mga bangkay na idto. Malinaw nanggad, iiniilustrar kan piguratibong pagtaram ni Isaias an pagigin ultimo asin dai maliliwat kan paghokom ni Jehova sa mga parakasala.

 Kun Ano an Ipinanuga Nia

12. An Isaias nagtatao nin ano pang mga nagpaparisa mapadapit sa buhay sa bagong kinaban?

¹² An Kapahayagan 21:​4 nagsasabi sa sato nin nagkapirang bagay na dai na maeksister sa maabot na bagong sistema. Minsan siring, ano an talagang maeksister sa panahon na iyan? Paano an magigin buhay? May makukua daw kitang masasarigan na nagpaparisa kaiyan? Igwa. Makahulang ilinaladawan kan Isaias kapitulo 65 an magigin mga kamugtakan niato kun igwa kita kan pag-oyon ni Jehova na mabuhay kun, sa pangultimong sentido, lalangon na nia an bagong kalangitan asin bagong daga na ini. An mga binendisyonan nin nagdadanay na lugar sa bagong daga dai na magurang asin magagadan sa dai malilikayan na paagi. Inaasegurar kita kan Isaias 65:​20: “Dai na magkakaigwa nin omboy na pirang aldaw pa sana an edad sa lugar na iyan, ni gurang na dai nag-ootob sa saiyang mga aldaw; huli ta an saro magagadan bilang aki, minsan sanggatos nang taon; asin kun manongod sa parakasala, minsan ngani sanggatos nang taon sia susumpaon.”

13. Paano kita inaasegurar kan Isaias 65:​20 na an banwaan nin Dios magkakaigwa nin katiwasayan?

¹³ Kan ini enot na maotob sa banwaan ni Isaias, iyan nangahulogan na ligtas an mga omboy sa daga. Daing mga kaiwal na naglaog, na arog kan ginibo sarong beses kan mga Babilonyo, tanganing bihagon an mga omboy o gadanon an mga lalaking nasa kabagsikan kan saindang buhay. (2 Cronica 36:​17, 20) Sa maabot na bagong kinaban, an mga tawo magigin ligtas, tiwasay, naoogma sa buhay. Kun pilion nin saro na magrebelde tumang sa Dios, dai sia totogotan na mabuhay nin padagos. Hahaleon sia nin Dios. Paano kun an rebeldeng parakasala sanggatos nang taon? Sia magagadan “bilang aki” kun ikokomparar sa pagkaigwa nin buhay na daing katapusan.​​—1 Timoteo 1:​19, 20; 2 Timoteo 2:​16-​19.

14, 15. Basado sa Isaias 65:​21, 22, anong nakakokontentong mga aktibidad an puede nindong antisiparon?

¹⁴ Imbes na magkonsentrar sa kun paano tibaad hahaleon an sarong tuyong parakasala, ilinaladawan ni Isaias an mga kamugtakan nin pamumuhay na mangyayari sa bagong kinaban. Probaring imahinaron na yaon kamo duman. An tibaad primerong maimahinar nindo iyo an mga bagay na nakakaapektar mismo sa saindo. Ipinaliliwanag iyan ni Isaias sa bersikulo 21 asin 22: “Sinda siertong magtotogdok nin mga harong asin mag-oontok sinda dian; asin siertong magtatanom sinda nin mga ubasan asin kakakanon ninda an bunga kaiyan. Dai sinda magtotogdok asin iba an mag-oontok; dai sinda matanom asin iba an makakan. Huli ta magigin siring sa mga aldaw nin kahoy an mga aldaw kan sakuyang banwaan; asin an ginibo kan saindang mga kamot lubos na gagamiton kan sakuyang mga pinili.”

¹⁵ Kun mayo pa kamo nin eksperyensia sa pagtogdok o paghardin, an hula ni Isaias nagsusuherir na may edukasyon na naghahalat sa saindo. Pero, gusto daw nindong makanood sa tabang nin may kakayahan na mga instruktor, tibaad maboot na mga kataed na naoogmang tumabang sa saindo? Dai sinabi ni Isaias kun baga an saindong harong magkakaigwa nin darakulang bintana na daing salming na igwa nin blinds, tanganing mamatean nindo an mga hinuyuhoy sa tropiko, o sirradong de salming na mga bintana na dian mamamasdan nindo an pagliliwat nin mga kapanahonan. Madisenyo  daw kamo nin harong na trabesado an atop tanganing ibolos an oran asin niebe? O mas marahay an patag na atop huli sa lokal na klima​—arog sa saro kan mga nasa Tahaw na Sirangan​—atop na puede nindong pagtiriponan kan saindong pamilya para sa nakaoogmang karakanan asin pag-orolay?​​—Deuteronomio 22:​8; Nehemias 8:16.

16. Taano ta maaasahan nindo na magigin permanenteng nakakokontento an bagong kinaban?

¹⁶ An mas mahalaga kisa pakaaram kan siring na mga detalye iyo na kamo magkakaigwa nin sadiri nindong istaran. Iyan magigin saindo​—bakong arog ngonyan na kamo tibaad magpaoripon sa pagtogdok alagad ta ibang tawo an nakikinabang. An Isaias 65:​21 nagsasabi man na kamo matanom asin makakan kan bunga. Malinaw nanggad, sinusumaryo kaiyan an pankagabsan na situwasyon. Kamo makakukua nin dakulaon na satispaksion sa saindong mga paghihingoa, sa mga bunga kan saindong sadiring mga pagpapagal. Magigibo nindo iyan sa halawig na buhay​—“siring sa mga aldaw nin kahoy.” Tunay nanggad na angay iyan sa paglaladawan na “bago an gabos na bagay”!​—Salmo 92:​12-​14.

17. Anong panuga an nangorognang magigin nakaparirigon sa boot para sa mga magurang?

¹⁷ Kun kamo magurang, matutudok kan mga tataramon na ini an saindong puso: “Dai sinda magpapagal na mayong kapakanan, ni mangangaki man sinda para sa karibokan; huli ta sinda an mga aki na kompuesto kan mga pinili ni Jehova, asin an saindang mga aki kaiba ninda. Asin mangyayari na bago sinda mag-apod masimbag na ako; nagtataram pa sinda, magdadangog na ako.” (Isaias 65:​23, 24) Aram daw nindo paagi sa eksperyensia an kolog nin ‘pangangaki para sa karibokan’? Dai ta kaipuhan na ilista an kadakol na tibaad problema nin mga aki na ikinariribok nin mga magurang asin nin iba. Konektado dian, naobserbaran ta gabos an mga magurang na sibot na marhay sa saindang sadiring mga karera, aktibidad, o kasingawan kaya kadikit na sana an panahon ninda sa saindang mga aki. Sa kabaliktaran, inaasegurar kita ni Jehova na dadangogon asin aasikasohon nia an satong mga pangangaipo, aantisiparon pa ngani iyan.

18. Taano ta maaasahan nindo na maoogma kamo sa mga hayop sa bagong kinaban?

¹⁸ Mientras na iniisip-isip nindo an puedeng makamtan nindo sa bagong kinaban, imahinara an kamugtakan na ipinaheheling kan makahulang tataramon nin Dios: “‘An lobo asin an kordero makakan na sararo, asin an leon makakan nin dagami siring sa toro; asin kun dapit sa halas, an saiyang magigin kakanon kabokabo. Dai sinda magibo nin maraot ni manraraot sa bilog kong banal na bukid,’ an sabi ni Jehova.” (Isaias 65:25) An mga tawong pintor nagprobar na ipinta an kamugtakan na iyan, alagad ini bako sanang paglaladawan na bunga nin sobrang imahinasyon sa pagpinta. Ini magigin totoo. Mangingibabaw an katoninongan sa tahaw nin mga tawo asin magigin kapareho kan katoninongan sa mga hayop. Dakol na biologo asin mahilig sa mga hayop an naggagamit kan pinakamarahay na mga taon kan saindang buhay sa  pag-adal manongod sa pirang klase nin hayop o sa saro sanang klase. Sa kabaliktaran, isipa nindo an saindong manonodan kun an mga hayop dai madadaog nin takot sa mga tawo. Dangan mararanihan nindo maski an mga gamgam asin saradit na linalang na nag-iistar sa kadlagan​—iyo, masdan, makanood, asin maogma sa mga iyan. (Job 12:​7-9) Mahihimo nindo iyan na dai kamo naaano, daing peligro sa tawo o hayop. Si Jehova nagsasabi: “Dai sinda magibo nin maraot ni manraraot sa bilog kong banal na bukid.” Kanigoan na pagbabago iyan kisa naheheling asin naeeksperyensiahan niato ngonyan!

19, 20. Taano an banwaan nin Dios ta laen na marhay sa kadaklan na tawo ngonyan?

¹⁹ Siring kan naenot nang sinabi, an mga tawo dai makahuhula nin eksakto kan ngapit, sa ibong kan lakop na pagkahandal may koneksion sa sarong bagong milenyo. Dahel kaiyan dakol an nadedesganar, nariribaraw, o nadedesesperar. Si Peter Emberley, direktor sa sarong unibersidad sa Canada, nagsurat: “An dakol [na adulto] sa katapustapusi napapaatubang sa pundamental na mga hapot dapit sa pag-eksister. Siisay ako? Ano an talagang pinag-aaabot ko? Ano an pamana na iwawalat ko para sa sunod na kapag-arakian? Sinda maigot na naghihingoa pag-abot nin mga 40 anyos tanganing magkaigwa nin katiwasayan asin kahulogan an saindang buhay.”

²⁰ Masasabotan nindo kun taano ta arog kaiyan an kamugtakan nin dakol. Tibaad naghihingoa sinda na maogma sa buhay paagi sa mga apisyon o nakaoogmang aling-alingan. Pero, dai ninda aram an mangyayari sa ngapit, kaya an buhay tibaad mayo nin kamanungdanan, katiwasayan, o tunay na kahulogan. Ngonyan ikomparar nindo an kalaenan kaiyan sa pagmansay nindo sa buhay, sa liwanag kan satong inestudyaran. Aram nindo na sa ipinanuga ni Jehova na bagong kalangitan asin bagong daga, makapangangalagkalag kita asin makasasabi gikan sa satong puso, ‘Tunay nanggad, ginibo nin Dios na bago an gabos na bagay!’ Maoogma nanggad kita dian!

21. Anong magkaparehong bagay an maheheling niato sa Isaias 65:​25 asin Isaias 11:9?

²¹ Bakong mapangahas na imahinaron an buhay sa bagong kinaban nin Dios. Kita saiyang inaagda, sinasadol pa ngani, na sambahon sia sa katotoohan ngonyan asin makualipikar para sa buhay sa panahon na ‘dai sinda magibo nin maraot ni manraraot sa bilog niang banal na bukid.’ (Isaias 65:25) Pero, aram daw nindo na naenot digdi sinambit na man iyan ni Isaias asin na may iiniba siang sarong bagay na nagdedeterminar kan talagang pagkakamit niato kan bagong kinaban? An Isaias 11:​9 nagsasabi: “Dai sinda magibo nin maraot o manraraot sa bilog kong banal na bukid; huli ta an daga mapapano nanggad kan kaaraman dapit ki Jehova kun paanong an tubig nakatatahob sa mismong kadagatan.”

22. An pag-estudyar niato sa apat na hula sa Biblia maninigo na magpakosog kan satong determinasyon na gibohon an ano?

²² An “kaaraman dapit ki Jehova.” Kun gibohon nang bago ni Jehova an gabos na bagay, an mga nag-eerok sa daga magkakaigwa nin tamang kaaraman dapit sa saiya asin sa saiyang kabotan. Orog pa sa pakanood sa linalang na mga hayop an magigin kalabot dian. Kalabot an saiyang ipinasabong na Tataramon. Halimbawa, horophoropa kun gurano kadakol kan satong nasabotan sa pagsiyasat sa apat sanang hula na nagsasambit kan “bagong kalangitan asin sarong bagong daga.” (Isaias 65:​17; 66:​22; 2 Pedro 3:​13; Kapahayagan 21:1) Igwa kamo nin marahay na dahelan na basahon an Biblia aroaldaw. Iyan daw kabtang kan saindong pinagkatodan? Kun bako, anong mga pagliliwat an puede nindong gibohon tanganing kada aldaw mababasa nindo an nagkapira sa sinasabi nin Dios? Manonompongan nindo na apuera sa pag-antisipar na makamtan an bagong kinaban, aakoon nindo an dugang pang kaogmahan ngonyan mismo, arog kan salmista.​​—Salmo 1:​1, 2.

[Nota sa Ibaba]

Ano an Isisimbag Nindo?

• Taano ta makakokonklusyon kita na an Isaias 66:​22-​24 naghuhula kan mga mangyayari pa sa ngapit?

• Ano an nangorognang inaantisipar nindo sa mga bagay na nasambit sa mga hula sa Isaias 66:​22-​24 asin Isaias 65:​20-​25?

• Ano an mga dahelan kan pagkompiar nindo manongod sa saindong ngapit?

[Mga Hapot Para sa Pag-adal]

[Mga Ritrato sa pahina 15]

Ihinula ni Isaias, Pedro, asin Juan an mga aspekto kan “bagong kalangitan asin sarong bagong daga”