Maranga sa Kosog ni Jehova

“Kan an sakuyang nakariribok na mga kaisipan duminakol sa sakong boot, an saimong mga panranga nakaranga sa sakong kalag.”​—SALMO 94:19.

 PARA sa gabos na naghihimuyawot nin ranga, an Biblia igwa nin mga tataramon nin karangahan. Kun siring, bakong makangangalas na an The World Book Encyclopedia nagsasabi na “an dai mabilang na mga tawo nag-asa sa Biblia para sa karangahan, paglaom, asin giya sa mga panahon nin problema asin pagkadaing kasegurohan.” Taano?

Huli ta an Biblia ipinasabong kan satong mamomoton na Kaglalang, “an Dios nin gabos na karangahan,” an Saro “na minaranga sa sato sa gabos niatong kahorasaan.” (2 Corinto 1:​3, 4) Sia ‘an Dios na nagtatao nin karangahan.’ (Roma 15:5) Ipinaheling ni Jehova an halimbawa sa pagtao nin paagi para sa kaginhawahan niato gabos. Isinugo nia sa daga an saiyang bugtong na Aki, si Cristo Jesus, tanganing tawan kita nin paglaom asin panranga. Itinokdo ni Jesus: “An Dios namoot na gayo sa kinaban na itinao nia an saiyang Aking bugtong, tanganing an lambang naggigibo nin pagtubod sa saiya dai mapahamak kundi magkaigwa nin buhay na daing katapusan.” (Juan 3:16) Ilinaladawan kan Biblia si Jehova bilang an saro “na sa aroaldaw dinadara an pasan para sa sato, an tunay na Dios kan satong kaligtasan.” (Salmo 68:19) An may takot sa Dios na mga tawo kompiadong makasasabi: “Danay kong ibinubugtak si Jehova sa atubangan ko. Huli ta sia yaon sa sakong too, dai ako matatanyog.”​—Salmo 16:8.

An siring na mga teksto sa Biblia nagpapaheling kan hararom na pagkamoot ni Jehova Dios sa sato na mga tawo. Nagigin malinaw na sia igwa nin odok sa pusong kamawotan​—siring man nin kakayahan​—na magtao nin abundang karangahan asin paginhawahon an satong mga kakologan sa mga panahon nin kapurisawan. “Sia nagtatao nin kosog sa napapagal; asin sa saro na mayo nin dinamikong kosog saiyang pinadadakol an bilog na puersa.” (Isaias 40:29) Kun siring, paano kita mararanga sa kosog ni Jehova?

An Nakapagiginhawang Pagmakolog ni Jehova

An salmista nagsurat: “Tawan ki Jehova mismo an pagabat sa saimo, asin sia mismo matabang sa saimo. Noarin man dai nia totogotan na matanyog an matanos.” (Salmo 55:22) Iyo, si Jehova Dios interesado sa pamilya nin tawo. Pinakosog liwat ni apostol Pedro an boot kan mga Kristiano kan enot na siglo: “Sia [an Dios] may pagmakolog sa saindo.” (1 Pedro 5:7) Idinoon ni Jesu-Cristo an pagpahalaga nin Dios sa mga tawo paagi sa pagsabi: “An limang dignos ipinapabakal nin duwang sentimos na kadikit an halaga, bako daw? Alagad ni saro sa sainda dai nalilingawan nin Dios. Alagad an mismong buhok kan saindong payo bilang gabos. Dai kamo matakot; orog kamong mahalaga kisa dakol na dignos.” (Lucas 12:​6, 7) Siring kita kaiyan kahalaga sa Dios kaya rinirisa nia maski an kasaditsaditing detalye manongod sa sato. May mga aram sia na dai ta mismo aram huli ta sia interesadong marhay sa lambang saro sa sato.

An pakamate sa personal na interes na ini ni Jehova nakarangang marhay ki Svetlana, an hoben pang patotot na nasambitan sa sinundan na artikulo. Sia mahugot na kutana kan makaolay nia an Mga Saksi ni Jehova. Dangan nag-ako sia nin pag-adal sa Biblia, na nakatabang sa saiya na mamidbid si Jehova bilang tunay na persona na interesado sa ikararahay nia. Napahiro kaini an saiyang puso, na nagmotibar sa saiya na bagohon an saiyang pamumuhay asin idusay an saiyang sadiri sa Dios. Nagtao man iyan ki Svetlana kan kinakaipuhan na pagpahalaga sa sadiri na kaipuhan nia tanganing magmaigot sa ibong kan saiyang mga problema asin magkaigwa nin positibong pananaw sa buhay. “Kombensido ako,” an sabi nia ngonyan, “na dai ako noarin man babayaan ni Jehova. Nanompongan kong totoo an nasusurat sa 1 Pedro 5:7. Iyan nagsasabi: ‘Ibugtak an gabos nindong kahaditan [ki Jehova], huli ta sia may pagmakolog sa saindo.’”

Nakararanga an Paglaom na Basado sa Biblia

An sarong partikular na paagi nin pagtao nin Dios nin karangahan iyo an saiyang nasusurat na Tataramon, na igwa nin makangangalas na paglaom para sa ngapit. Si apostol Pablo nagsurat: “An gabos na bagay na isinurat kaidto isinurat sa pagtokdo sa sato, tanganing paagi sa satong pakatagal asin sa karangahan hale sa Kasuratan magkaigwa kita nin paglaom.” (Roma 15:4) Lininaw ni Pablo an koneksion kan tunay na paglaom asin karangahan kan sia sumurat: “Logod na . . . an Dios na satong Ama, na namoot sa sato asin nagtao nin daing katapusan na karangahan asin marahay na paglaom paagi sa dai na kutana maninigong kabootan, rangahon an saindong puso asin parigonon kamo sa gabos na marahay na gibo asin tataramon.” (2 Tesalonica 2:​16, 17) Kabale sa “marahay na paglaom” na ini an oportunidad na kamtan an sangkap, maogma, asin daing katapusan na buhay sa sarong paraisong daga.​​—2 Pedro 3:13.

An siring na segurado asin maogmang paglaom nagparigon sa boot ni Laimonis, an alkoholikong paralitiko na nasambitan sa sinundan na artikulo. Sa pagbasa kan basado sa Biblia na mga literatura kan Mga Saksi ni Jehova, naggayagaya sia na  manodan an manongod sa bagong kinaban na sakop kan Kahadean nin Dios, kun saen an saiyang salud lubos na ibabalik. Sa Biblia, nabasa nia an minasunod na maogmang panuga na milagrosong pagpaomay: “Sa panahon na iyan an mga mata kan mga buta magkakaburuklat, asin an mismong mga talinga kan mga bungog magkakaburukasan. Sa panahon na iyan an pilay matukad na garo lalaking usa, asin an dila kan pula makurahaw sa kaogmahan.” (Isaias 35:​5, 6) Tanganing makualipikar sa buhay sa Paraiso na iyan, si Laimonis naggibo nin dakulang mga pagbabago. Tinalikdan nia an arak, asin an saiyang pagbabago narisa kan saiyang kataraed asin kamidbid. Sia ngonyan nagkokondukta nin nagkapirang pag-adal sa Biblia, na ihinihiras sa iba an karangahan na itinatao kan paglaom na basado sa Biblia.

An Kabtang nin Pamibi

Kun may kakologan an satong puso huli sa sarong dahelan, makanonompong kita nin karangahan paagi sa pamimibi ki Jehova. Puede kaiyan na haleon an satong pasan. Durante kan satong mga pagngayongayo, puede kitang maranga paagi sa paggirumdom sa mga bagay na sinabi sa Tataramon nin Dios. An pinakahalawig na salmo sa Biblia kapareho nin sarong magayon na pamibi. An kompositor kaiyan nag-awit: “Nagirumdoman ko an saimong hudisyal na mga desisyon poon sa daing talaan na panahon, O Jehova, asin nakakanompong ako nin karangahan para sa sakong sadiri.” (Salmo 119:52) Sa grabe kasakit na mga situwasyon, nangorogna an mga may labot sa problema sa salud, sa parate mayo nin sasaro, kompletong solusyon. Sa sato mismong kosog, tibaad dai ta aram kun saen man nanggad madolok. Nadiskobre nin dakol na kun nagibo na an gabos na posibleng mahihimo nin tawo, an pagdolok sa Dios sa pamibi nagbunga nin dakulang karangahan asin, kun beses, nin dai inaasahan na mga solusyon.​​—1 Corinto 10:13.

Naeksperyensiahan ni Pat, na idinalagan sa emergency room kan ospital, an nakararangang epekto na ini nin pamibi. Kan sia marahay na, sia nagsabi: “Namibi ako ki Jehova asin talagang nanodan ko na dapat kong ipabaya sa saiyang mga kamot an sakong buhay, na nagtitiwala na gigibohon nia kun ano man an saiyang kabotan. Durante kan bilog na panahon na ini, ako nakamateng kalmado; naeksperyensiahan ko an katoninongan nin Dios na sinambit sa Filipos 4:​6, 7.” Makararanga nanggad sa sato gabos an mga bersikulong ini! Sinasadol kita dian ni Pablo: “Dai kamo maghadit sa ano man na bagay, kundi sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan; asin an katoninongan nin Dios na minalampas sa gabos na kaisipan mag-iingat kan saindong puso asin kan saindong mga pag-isip paagi ki Cristo Jesus.”

An Banal na Espiritu Bilang Pararanga

Kan banggi bago kan saiyang kagadanan, lininaw ni Jesus sa saiyang mga apostol na madali na nia sindang bayaan. Ikinapurisaw asin ikinamondo ninda ini. (Juan 13:​33, 36; 14:​27-​31) Huling narerekonoser an saindang pangangaipo nin padagos na karangahan, si Jesus nanuga: “Makikimaherak ako sa Ama asin tatawan nia kamo nin saro pang paratabang [o, pararanga] tanganing makaibanan nindo sagkod lamang.” (Juan 14:​16; nota sa ibaba) An banal na espiritu nin Dios an boot sabihon digdi ni Jesus. Kabilang sa iba pang mga bagay, rinanga kan banal na espiritu nin Dios an mga apostol durante kan mga pagbalo sa sainda asin pinakosog sinda na magpadagos sa paggibo kan kabotan nin Dios.​—Gibo 4:31.

Nakayang atubangon ni Angie, na an agom dikit pang magadan pakatapos nin grabeng aksidente, an gabos na kapurisawan asin kakologan kan saiyang situwasyon. Ano an nakatabang sa saiya? Sia nagsabi: “Kun mayo an suporta kan banal na espiritu ni Jehova, dai mi kutana nakaya an naeksperyensiahan mi asin dai kutana kami nagdanay na makosog. An kosog ni Jehova tunay nanggad na nahayag paagi sa samong mga kaluyahan, asin sia nagin kuta sa samong panahon nin kapurisawan.”

Nakararangang Kasararoan nin Magturugang

Ano man an tibaad situwasyon sa buhay nin sarong indibiduwal, ano man na makolog na mga kamugtakan an tibaad lumataw, maninigo na makanompong sia nin karangahan sa kasararoan nin magturugang na yaon sa laog kan kongregasyon ni Jehova. An kasararoan nin magturugang na ini nagtatao nin espirituwal na suporta asin tabang sa mga asosyado dian. Sa laog kaiyan, manonompongan nin saro an grupo nin mamomoton, may pagmakolog, asin nakararangang mga katood, na andam asin gustong tumabang asin rangahon an iba sa mga panahon nin kapurisawan.​​—2 Corinto 7:​5-7.

 An mga miembro kan Kristianong kongregasyon tinotokdoan na ‘gumibo kan marahay sa gabos, alagad orog na sa mga may relasyon sa [sainda] sa pagtubod.’ (Galacia 6:10) An basado sa Biblia na edukasyon na saindang inaako nagpapahiro sa sainda na ipaheling an sa magturugang na pagkamoot asin mamomoton na kapadangatan sa lambang saro. (Roma 12:​10; 1 Pedro 3:8) An magturugang sa espirituwal na mga lalaki asin babae sa kongregasyon napahihiro na magin maboot, nakararanga, asin madinamayon sa mamomoton na paagi.​—Efeso 4:32.

Naeksperyensiahan ni Joe asin Rebecca, na makaturotristeng nagadanan nin aking lalaki, an siring na nakararangang pagsuportar kan mga miembro kan Kristianong kongregasyon. Sinda nagsasabi: “Tinabangan kami ni Jehova asin kan saiyang mamomoton na kongregasyon durante kan masakit na panahon niamo. Ginatos na kard, surat, asin apod sa telepono an naresibi. Dahel kaini nasabotan niamo kun gurano kahalagang marhay kan satong kasararoan nin magturugang. Mantang kami namumungnan pa sa trahedya, dakol na lokal na kongregasyon an nagtabang sa samo, na nagtatao nin mga kakanon asin linilinigan an harong.”

Maranga Kamo!

Kun an pabiglabiglang mga doros nin problema magpoon na mandestroso, asin an daing herak na oran asin graniso nin kapurisawan padagos na maghugpa, an Dios andam na tumao nin nakararangang proteksion. Ini an pagkaladawan sa saiya kan saro sa mga salmo bilang nagtatao nin nakararangang pahiplian: “Paagi sa saiyang mga gilid nin pakpak oolangon nia an pagdolok sa saimo, asin sa irarom kan saiyang mga pakpak ika mapaili.” (Salmo 91:4) An ilinaladawan digdi puedeng iyo an agila. Iyan ladawan nin sarong gamgam na nakamamate nin peligro dangan mapagprotehir na ibinubuka an mga pakpak kaiyan sa ibabaw kan mga siyo kaiyan. Sa mas dakulang pakahulogan, si Jehova nagigin tunay na Paraingat sa gabos na nagpapaili sa saiya.​​—Salmo 7:1.

Kun boot nindo na makanood nin orog pa manongod sa Dios, sa saiyang personalidad, sa saiyang mga katuyohan, asin sa saiyang kakayahan na magtao nin karangahan, inaagda kamo na pag-adalan an saiyang Tataramon. An Mga Saksi ni Jehova maoogmang tabangan kamo sa paghihingoang iyan. Iyo, kamo mararanga man sa kosog ni Jehova!

[Mga Ritrato sa pahina 7]

An basado sa Biblia na paglaom sa ngapit makatatao nin karangahan