Bareta kan mga Parabalangibog kan Kahadean

An Maogmang Buhay Pampamilya Irinarani an Iba sa Dios

BINENDISYONAN ni Jehova si Jose nin bastanteng kadonongan asin pakamansay. (Gibo 7:10) Bilang resulta, an pakarorop ni Jose “nagin marahay sa pagheling ni Faraon asin kan gabos niang surogoon.”​—Genesis 41:37.

Ngonyan man, tinatawan ni Jehova nin pakarorop asin pakamansay an saiyang banwaan paagi sa saindang pag-adal sa Biblia. (2 Timoteo 3:​16, 17) An kadonongan asin pakarorop na ini nagpapaluwas nin marahay na bunga mantang iinaaplikar an hatol na basado sa Biblia. An saindang marahay na gawe-gawe sa parate ‘nagin marahay sa pagheling kan mga nakaoobserbar kaiyan,’ siring sa ipinaheheling kan minasunod na mga eksperyensia hale sa Zimbabwe.

• An sarong babae igwa nin mga kataed na Saksi ni Jehova. Minsan ngani habo nia sa mga Saksi, hanga sia sa saindang gawe-gawe, nangorogna sa saindang buhay sa harong. Naobserbaran nia na an mag-agom magayonon an relasyon asin na an saindang mga aki makinuyog. Partikularmenteng nariparo nia na an agom na lalaki namomotan na marhay an saiyang agom.

An paniniwala nin kadaklan sa nagkapirang kultura sa Aprika iyo na kun an agom na lalaki namomotan an saiyang agom na babae, sierto na linumay sia kan agom na babae tanganing “pagaroon” sia. Kaya an babae nagdolok sa Saksing agom na babae asin hinapot sia: “Puede mo daw tabi akong tawan kan panlumay na itinao mo sa saimong agom tanganing kamotan man ako kan agom ko siring kan pagkamoot kan agom mo sa saimo?” An Saksi nagsimbag: “Ay, iyo, dadarahon ko iyan sa saimo sa agang hapon.”

Kan sunod na aldaw, sinongko kan tugang na babae an saiyang kataed dara an saiyang “panlumay.” Ano daw iyan? Iyan an Biblia, kaiba an publikasyon na Kaaraman na Minagiya Pasiring sa Buhay na Daing Katapusan. Pakatapos na ipaliwanag an impormasyon hale sa librong Kaaraman sa temang “Pagtogdok nin Pamilya na Nagtatao nin Onra sa Dios,” sia nagsabi sa babae: “Ini an ‘panlumay’ na ginamit ming mag-agom tanganing ‘pagaroon’ an kada saro, asin iyan an dahelan kun taano ta nagkakaminootan kaming marhay.” Naponan an pag-adal sa Biblia, asin an babae marikas na nag-oswag sagkod na nagsimbolisar kan saiyang pagdusay ki Jehova paagi sa bautismo sa tubig.

• An duwang espesyal payunir na nadestino sa sarong sadit na kongregasyon harani sa amihanan-sirangan na linderos nin Zimbabwe asin Mozambique dai nagluwas sa ministeryong pagharongharong sa laog nin duwang semana. Taano? Huli ta an mga tawo nagduduruman sa sainda tanganing maghinanyog sa sasabihon ninda. An saro sa mga payunir nagsasaysay kun paano ini nangyari: “Nagbabaklay kami nin 15 kilometros tanganing magkondukta nin semanal na pag-adal sa Biblia sa sarong interesado. Bakong pasil para sa samo na maabot an lugar na ini. Kaipuhan kaming maglakaw sa laboy, asin kaipuhan kaming magbalyo sa binabahang mga salog na an tubig paliog niamo. Kalabot digdi an pagbalanse kan samong mga bado asin sapatos na suknong mi sa samong payo, pagbagtas sa salog, dangan pagbolos giraray pagkabalyo.

“An kataraed kan interesado naghangang marhay sa samong kaigotan. Kabilang sa mga nakariparo an namomoon sa sarong lokal na organisasyon nin relihion. Nagsabi sia sa saiyang mga parasunod: ‘Habo daw nindong magin maigot na arog kan duwang hoben na lalaki na Saksi ni Jehova?’ Kan sunod na aldaw, dakol sa mga parasunod nia an nagduman sa samong harong tanganing aramon kun taano kami ta desididong marhay. Saro pa, kan sumunod na duwang semana, kadakol kaming bisita kaya mayo na ngani kaming panahon na magluto para sa samo!”

An saro sa mga nagsongko sa harong kan mga payunir durante kan duwang semanang ini iyo idtong namomoon sa relihion. Imahinara an kagayagayahan kan mga payunir kan mag-ako sia nin pag-adal sa Biblia!