Dangoga an Sasabihon kan Espiritu

“An saimong mga talinga makadadangog nin tataramon sa likod mo na nagsasabi: ‘Iyo ini an dalan. Maglakaw kamo dian,’ enkaso kamo pumatoo o enkaso kamo pumawala.”—ISAIAS 30:21.

1, 2. Paano nakikomunikar si Jehova sa mga tawo sa bilog na kasaysayan?

AN ISLA nin Puerto Rico iyo an namumugtakan kan pinakadakula asin pinakasensitibong single-dish radio telescope sa kinaban. Sa laog nin dakol nang dekada, naglalaom an mga sientista na makaresibi nin mga mensahe hale sa buhay sa luwas kan planetang daga, na ginagamit an dakulaon na instrumentong ini. Alagad ta mayo pa nin naresibing siring na mensahe. Pero, kabaliktaran sa tibaad linalaoman, may malinaw na mga mensahe hale sa luwas kan rona nin mga tawo na mareresibi kan siisay man sa sato ano man na oras​—na dai na naggagamit nin komplikadong mga kasangkapan. An mga ini hale sa sarong Ginikanan na halangkawon na marhay kisa siisay man na iniimahinar na nabubuhay sa luwas kan planetang daga. Siisay an Ginikanan kan mga komunikasyon na iyan, asin sairisay an nakareresibi kaiyan? Ano an sinasabi kan mga mensahe?

² An rekord kan Biblia may nagkapirang salaysay nin mga pangyayari na an mga mensahe hale sa Dios ipinadangog sa talinga nin mga tawo. Kun beses an mga mensaheng ini dara nin espiritung mga linalang na naglilingkod bilang mga mensahero nin Dios. (Genesis 22:​11, 15; Zacarias 4:​4, 5; Lucas 1:​26-28) Sa tolong pangyayari, nadangog an mismong tingog ni Jehova. (Mateo 3:​17; 17:​5; Juan 12:​28, 29) An Dios nagtaram man paagi sa mga propetang tawo, na an dakol isinurat an ipinasabong nia sa saindang sabihon. Ngonyan, nasa sato an Biblia, na igwa kan nasusurat na rekord kan dakol sa mga  komunikasyon na ini, saka kan mga katokdoan ni Jesus asin kan saiyang mga disipulo. (Hebreo 1:​1, 2) Tunay na si Jehova nagpapaabot nin impormasyon sa saiyang linalang na mga tawo.

3. Ano an katuyohan kan mga mensahe nin Dios, asin ano an inaasahan sa sato?

³ An gabos na ipinasabong na mensaheng ini hale sa Dios kadikit an ihinahayag manongod sa pisikal na uniberso. An mga iyan konsentrado sa mas mahahalagang bagay, na may epekto sa satong buhay ngonyan asin sa ngapit. (Salmo 19:​7-11; 1 Timoteo 4:8) An mga iyan ginagamit ni Jehova sa pagkomunikar kan saiyang kabotan asin sa pagtao sa sato nin paggiya. An mga iyan sarong paagi na naootob an mga tataramon ni propeta Isaias: “An saimong mga talinga makadadangog nin tataramon sa likod mo na nagsasabi: ‘Iyo ini an dalan. Maglakaw kamo dian,’ enkaso kamo pumatoo o enkaso kamo pumawala.” (Isaias 30:21) Dai kita pinipirit ni Jehova na maghinanyog sa saiyang “tataramon.” Nasa sato an pagsunod sa pagdirehir nin Dios asin paglakaw sa saiyang dalan. Sa dahelan na iyan sinasadol kita kan Kasuratan na maghinanyog sa mga komunikasyon hale ki Jehova. Sa librong Kapahayagan, an pagparigon sa boot na “magdangog sa sinasabi kan espiritu” minalataw nin pitong beses.​—Kapahayagan 2:​7, 11, 17, 29; 3:​6, 13, 22.

4. Rasonable daw sa satong kaaldawan na asahan an Dios na deretsong makikomunikar hale sa langit?

⁴ Ngonyan, si Jehova dai nagtataram sa sato nin deretso hale sa langitnon na rona. Dawa kan mga panahon kan Biblia, an lihis sa natural na mga komunikasyon na ini bihirang mga pangyayari, kun beses mga siglo an pag-oltanan. Sa bilog na kasaysayan, si Jehova pinakaparate na nakikomunikar sa saiyang banwaan sa mga paaging mas bakong deretso. Siring man kaiyan sa satong kaaldawan. Pag-olayan niato an tolong paagi na si Jehova nakikikomunikar sa sato ngonyan.

“An Gabos na Kasuratan Ipinasabong”

5. Ano an mayor na instrumento sa komunikasyon ni Jehova ngonyan, asin paano kita makikinabang dian?

⁵ An mayor na instrumento sa komunikasyon sa pag-oltanan nin Dios asin nin mga tawo iyo an Biblia. Iyan ipinasabong nin Dios, asin an gabos na yaon dian puedeng magin kapakipakinabang para sa sato. (2 Timoteo 3:16) Kadakol kan halimbawa sa Biblia nin tunay na mga tawo na ginamit an saindang libreng kabotan sa pagdesisyon kun baga maghihinanyog o dai sa tingog ni Jehova. An siring na mga halimbawa nagpapagirumdom sa sato kun taano ta mahalagang marhay na maghinanyog sa sinasabi kan espiritu nin Dios. (1 Corinto 10:11) An Biblia igwa man nin praktikal na kadonongan, na nagtatao sa sato nin hatol para sa mga panahon na kita napapaatubang sa mga pagdedesisyon sa buhay. Garo baga nasa likod niato an Dios, na sinasabi sa satong talinga an mga tataramon na: “Iyo ini an dalan. Maglakaw kamo dian.”

6. Taano an Biblia ta nakalalabing marhay sa gabos na ibang kasuratan?

⁶ Tangani na madangog an sinasabi kan espiritu paagi sa mga pahina kan Biblia, dapat na iyan regular niatong basahon. An Biblia bako sanang magayon an pagkasurat, popular na libro, saro sa dakol na makukua ngonyan. An Biblia ipinasabong kan espiritu asin igwa kan mga kaisipan nin Dios. Sinasabi kan Hebreo 4:​12: “An tataramon nin Dios buhay asin mapuersa asin mas matarom kisa sa arin man na espada na may duwang tarom asin nakalalagbas sagkod sa pagbulag kan kalag asin espiritu, saka kan mga pagsokmolan asin hotok kaiyan, asin nakamamansay kan mga kaisipan asin intension kan puso.” Mantang binabasa niato an Biblia, an mga laog kaiyan nakalalagbas na garo espada sagkod sa satong mga kaisipan asin motibasyon sa laog, na ihinahayag kun gurano nakasusunod sa kabotan nin Dios an satong buhay.

7. Taano ta mahalagang marhay an pagbasa kan Biblia, asin kita ineenkaminar na gibohon iyan nin gurano kaparate?

⁷ An “mga kaisipan asin intension kan puso” puedeng mabago sa pag-agi nin panahon asin mantang naaapektaran kita kan mga eksperyensia niato sa buhay​— nakaoogma sagkod masakit. Kun kita dai pirmeng  mag-aadal kan Tataramon nin Dios, an satong mga kaisipan, aktitud, asin emosyon dai na magigin kaoyon nin diosnon na mga prinsipyo. Huli kaini, sinasadol kita kan Biblia: “Padagos na baloon kun baga kamo nasa pagtubod, padagos na patunayan kun ano man nanggad kamo.” (2 Corinto 13:5) Tangani na padagos niatong madangog an sinasabi kan espiritu, maninigo na himateon niato an hatol na basahon an Tataramon nin Dios aroaldaw.​—Salmo 1:2.

8. Anong mga tataramon ni apostol Pablo an nakatatabang sa sato na siyasaton an satong sadiri mapadapit sa pagbasa kan Biblia?

⁸ An sarong importanteng pagirumdom sa mga nagbabasa kan Biblia iyo ini: Magtao nin igong panahon na masabotan an binabasa nindo! Sa paghihingoa na masunod an hatol na basahon an Biblia aroaldaw, habo niato na dali-daling basahon an nagkapirang kapitulo na dai nasasabotan an satong binabasa. Minsan ngani mahalagang marhay an pagbasa kan Biblia nin regular, an motibasyon niato dai maninigo na tangani sanang makasabay sa iskedyul; maninigo na kita magkaigwa nin tunay na kamawotan na makanood manongod ki Jehova asin sa saiyang mga katuyohan. Mapadapit digdi, marahay na gamiton niato an mga tataramon na ini ni apostol Pablo para sa pagsiyasat sa sadiri. Sa pagsurat sa mga kapwa Kristiano, sinabi nia: “Ilinuluhod ko an sakong mga tuhod sa Ama, sa katuyohan na itao nia sa saindo . . . [na] an Cristo mag-erok sa saindong puso paagi sa saindong pagtubod na may pagkamoot; tanganing kamo makagamot asin mapatindog sa pundasyon, tanganing lubos na masabotan kan saindong isip kaibanan kan gabos na banal kun ano an lakbang asin laba asin langkaw patin rarom, asin maaraman an pagkamoot kan Cristo na minalampas sa kaaraman, tanganing kamo mapano kan bilog na kapanoan na itinatao nin Dios.”​—Efeso 3:​14, 16-19.

9. Paano niato makukultibar asin maparararom an satong kamawotan na makanood ki Jehova?

⁹ Totoo, an nagkapira sa sato sa kanaturalan dai naoogmang magbasa, mantang an iba apisyonadong marhay na mga parabasa. Minsan siring, ano man an satong indibiduwal na hilig, puede niatong kultibaron asin pararomon an satong kamawotan na makanood ki Jehova. Ipinaliwanag ni apostol Pedro na kita maninigong magkaigwa nin pagmawot sa kaaraman sa Biblia, asin minidbid nia na an siring na kamawotan tibaad kaipuhan na pataluboon. Isinurat nia: “Bilang mga omboy na bagong mamundag, magkaigwa kamo nin pagmawot sa daing kasalak na gatas kan tataramon, tanganing paagi kaiyan magtalubo kamo sa kaligtasan.” (1 Pedro 2:2) An disiplina sa sadiri mahalagang marhay tangani na kita ‘magkaigwa nin pagmawot’ sa pag-adal sa Biblia. Kun paano na puede niatong magustohan an bagong klaseng kakanon pakanamiti kaiyan nin nagkapirang beses, puedeng rumahay an satong aktitud sa pagbasa asin pag-adal kun didisiplinahon niato an satong sadiri na sunodon an regular na rutina.

“Kakanon sa Igong Panahon”

10. Sairisay an minakompuesto sa “fiel asin madonong na oripon,” asin paano sinda ginagamit ni Jehova ngonyan?

¹⁰ An saro pang paagi na ginagamit ni Jehova sa pagtaram sa sato ngonyan sinasabi ni Jesus sa Mateo 24:​45-47. Dian sia nagtaram manongod sa linahidan nin espiritu na Kristianong kongregasyon​—“an fiel asin madonong na oripon” na ninombrahan na magtao nin espirituwal na “kakanon sa igong panahon.” Bilang mga indibiduwal, an mga miembro kan grupong ini “mga domestiko” ni Jesus. An mga ini, kaiba an “sarong dakulang kadaklan” nin “ibang karnero,” nakareresibi nin pagparigon sa boot asin paggiya. (Kapahayagan 7:​9; Juan 10:16) An dakol sa kakanon na ini sa igong panahon minaabot sa porma nin inimprentang mga publikasyon, arog baga kan An Torrengbantayan, Awake!, asin iba pang mga publikasyon. An dugang pang espirituwal na kakanon itinatao sa porma nin mga pahayag asin demonstrasyon  sa mga kombension, asamblea, asin pagtiripon kan kongregasyon.

11. Paano kita nagigin mapaghimate sa sasabihon kan espiritu paagi sa “fiel asin madonong na oripon”?

¹¹ An impormasyon na itinatao kan “fiel asin madonong na oripon” dinisenyo na magpakosog sa satong pagtubod asin patoodon an satong kakayahan nin pagmansay. (Hebreo 5:14) An siring na hatol puedeng magin pankagabsan tangani na togotan an kada saro na gumibo nin personal na pag-aplikar. Sa panapanahon, nakareresibi man kita nin hatol na may labot sa espesipikong mga aspekto kan satong gawe-gawe. Ano an maninigong magin aktitud niato kun kita talagang naghihinanyog sa sinasabi kan espiritu paagi sa grupong oripon? Minasimbag si apostol Pablo: “Magin kamong makinuyog duman sa mga nangengenot dian sa tahaw nindo asin magin mapagpasakop.” (Hebreo 13:17) Totoo, an gabos na kalabot sa areglong ini mga tawong bakong sangkap. Pero, ikinaoogmang marhay ni Jehova an paggamit sa saiyang mga lingkod na tawo, minsan ngani bakong sangkap, sa paggiya sa sato sa panahon na ini kan katapusan.

Paggiya Gikan sa Satong Konsensia

12, 13. (a) Ano pang ibang ginigikanan nin paggiya an itinao sa sato ni Jehova? (b) Ano an puedeng magin positibong impluwensia kan konsensia dawa sa mga tawo na mayo nin tamang kaaraman sa Tataramon nin Dios?

¹² Tinawan kita ni Jehova nin saro pang ginigikanan nin paggiya​—an satong konsensia. Linalang nia an tawo na may sentido sa laog kun ano an tama asin sala. Iyan kabtang kan satong naturalesa. Sa surat nia sa mga Romano, ipinaliwanag ni apostol Pablo: “Kun an mga tawo kan mga nasyon na mayo nin ley minagibo sa saindang naturalesa nin mga bagay kan ley, an mga tawong ini, minsan ngani mayo nin ley, iyo na mismo an ley sa saindang sadiri. Sinda mismo an nagpapaheling na an ley nasusurat sa saindang puso, mantang an saindang konsensia nagpapatotoo sa kaibanan ninda asin, sa sainda mismong mga pag-isip, sinda inaakusar o ipinahahayag na daing kasalan.”​—Roma 2:​14, 15.

¹³ An dakol na dai nakakamidbid ki Jehova puede man na ioyon an saindang mga kaisipan asin gawe-gawe sa diosnon na mga prinsipyo sa tama asin sala. Iyan garo nakadadangog sinda nin maluyang tingog sa laog na naggigiya sa sainda sa tamang direksion. Kun ini puedeng magin totoo manongod sa mga mayo nin tamang kaaraman sa Tataramon nin Dios, gurano pa daw na an tingog na iyan sa laog maninigo na magtaram kun manongod sa tunay na mga Kristiano! Tunay nanggad, an Kristianong konsensia na dinalisay nin tamang kaaraman sa Tataramon nin Dios asin nagtatrabaho kaoyon kan banal na espiritu ni Jehova makatatao nin mapagtitiwalaan na paggiya.​—Roma 9:1.

14. Paano kita matatabangan nin konsensia na sinanay sa Biblia na sunodon an paggiya kan espiritu ni Jehova?

¹⁴ An sarong marahay na konsensia, saro na sinanay sa Biblia, puedeng magpagirumdom sa sato kan paagi na gusto kan espiritu na kita maglakaw. Tibaad may mga panahon na ni an Kasuratan ni an satong mga publikasyon na basado sa Biblia dai nagtatao nin espesipikong komento sa sarong partikular na situwasyon na tibaad namumugtakan niato. Pero, tibaad magtao nin patanid an satong konsensia, na pinatatanidan kita tumang sa gawe na puedeng makadanyar. Sa siring na mga kamugtakan, an pagpalimanliman sa dikta kan satong konsensia puedeng mangahulogan na garo man sana pinalilimanlimanan niato an sinasabi kan espiritu ni Jehova. Sa ibong na lado, paagi sa pakanood na manarig sa satong sinanay na Kristianong konsensia, makagigibo kita nin madonong na mga pagpili dawa kun mayo nin nasusurat na espesipikong pagdirehir. Minsan siring, mahalagang marhay na girumdomon na kun mayo nin prinsipyo, reglamento, o ley na itinao nin Dios, bakong tama na ipirit an mga paghusgar kan satong konsensia sa kapwa niato mga Kristiano sa personal sanang mga bagay.​—Roma 14:​1-4; Galacia 6:5.

15, 16. Ano an puedeng magpangyari na maraot an satong konsensia, asin paano niato iyan maoolang na mangyari?

¹⁵ An malinig, sinanay sa Biblia na konsensia marahay na balaog hale sa Dios. (Santiago 1:17) Alagad dapat na ingatan niato an balaog na ini sa nakararaot na mga impluwensia tangani na iyan magpunsionar nin tama bilang moral na panlikay sa peligro. An lokal na mga kostumbre, tradisyon, asin ugale na tumang sa mga pamantayan nin Dios puedeng, kun susunodon, magpangyari na an satong konsensia maraot asin dai na kita sadolon pasiring sa tamang direksion. Tibaad dai na niato mahusgaran nin tama an mga bagay asin madaya pa ngani niato an satong sadiri sa paniniwala na an salang gibo tama.​—Ikomparar an Juan 16:2.

¹⁶ Kun padagos niatong palilimanlimanan an mga patanid kan satong konsensia, an tingog kaiyan maluya  nang maluya sagkod na kita magin daing pakamate o bagol sa moral. An salmista nagtaram manongod sa siring na mga tawo kan sia magsabi: “An saindang puso nagin daing pakamate siring sa taba.” (Salmo 119:70) An nagkapira na pinalilimanlimanan an mga sadol kan saindang konsensia nawawaran kan abilidad na mag-isip nin tama. Sinda dai na ginigiyahan nin diosnon na mga prinsipyo asin dai nakagigibo nin tamang mga desisyon. Tanganing malikayan an siring na situwasyon, maninigo na kita magin sensitibo sa mga paggiya kan satong Kristianong konsensia dawa kun garo baga sadit an mga isyung pinag-oolayan.​—Lucas 16:10.

Maogma an mga Naghihinanyog Asin Nagkukuyog

17. Mantang hinihinanyog niato an ‘tataramon sa likod niato’ asin hinihimate an satong konsensia na sinanay sa Biblia, paano kita bebendisyonan?

¹⁷ Mantang nagigin ugale niato na maghinanyog sa ‘tataramon sa likod niato’​—na itinatao paagi sa Kasuratan saka sa fiel asin madonong na oripon​—asin mantang hinihimate niato an mga pagirumdom kan satong konsensia na sinanay sa Biblia, bebendisyonan kita ni Jehova kan saiyang espiritu. Dadagdagan man kan banal na espiritu an satong abilidad na resibihon saka saboton an sinasabi sa sato ni Jehova.

18, 19. Paano kita makikinabang sa paggiya ni Jehova sa satong ministeryo sagkod sa satong personal na buhay?

¹⁸ Gigibohon man kitang pusoan kan espiritu ni Jehova na atubangon an masakit na mga situwasyon na may kadonongan asin kosog nin boot. Arog kan mga apostol, mapahihiro kan espiritu nin Dios an satong kakayahan nin isip asin matatabangan kita na pirmeng gumawe saka magtaram kaoyon kan mga prinsipyo sa Biblia. (Mateo 10:​18-20; Juan 14:​26; Gibo 4:​5-8, 13, 31; 15:28) An kombinasyon kan espiritu ni Jehova asin kan satong personal na mga paghihingoa matao sa sato nin kapangganahan mantang kita naggigibo nin importanteng mga desisyon sa buhay, na tinatawan kita kan kosog nin boot na hamanon an mga desisyon na iyan. Halimbawa, tibaad iniisip nindo na liwaton an saindong estilo nin pamumuhay tangani na magkaigwa nin orog na panahon para sa espirituwal na mga bagay. O tibaad napapaatubang kamo sa importante, makaliliwat sa buhay na mga pagpipilian, arog baga kan pagpili nin agom, pagturotimbang sa alok na trabaho, o pagbakal nin harong. Imbes na pabayaan na an satong emosyon bilang tawo magin an solamenteng nakakokontribwir na bagay sa paggibo kan satong mga desisyon, maninigo niatong hinanyogon an sasabihon kan espiritu nin Dios asin gumawe kita kaoyon kan paggiya kaiyan.

¹⁹ Tunay na inaapresyar niato an maboot na mga pagirumdom asin an hatol na nareresibi niato hale sa mga kapwa niato Kristiano, pati an kamagurangan. Minsan siring, dai kaipuhan na pirme niatong halaton an iba na apodon an satong atension sa mga bagay. Kun aram niato an madonong na gibohon asin kun anong mga pagliwat sa satong aktitud asin gawe-gawe an dapat niatong gibohon tanganing mapaogma an Dios, gibohon niato iyan. Sabi ni Jesus: “Kun aram nindo an mga bagay na ini, maogma kamo kun gibohon nindo iyan.”​—Juan 13:17.

20. Anong bendisyon an nakakamtan kan mga naghihinanyog sa ‘tataramon sa likod ninda’?

²⁰ Malinaw nanggad, tanganing maaraman kun paano paoogmahon an Dios, an mga Kristiano dai kaipuhan na makadangog nin literal na tingog hale sa langit, ni kaipuhan nindang songkoon nin anghel. Sinda binendisyonan sa pagkaigwa kan nasusurat na Tataramon nin Dios asin nin mamomoton na paggiya paagi sa saiyang grupong linahidan digdi sa daga. Kun maingat nindang hihimateon ining ‘tataramon sa likod ninda’ asin susunodon an paggiya kan saindang konsensia na sinanay sa Biblia, sinda magigin mapanggana sa paggibo kan kabotan nin Dios. Kun siring, segurado na maheheling ninda an kaotoban kan panuga ni apostol Juan: “An naggigibo kan kabotan nin Dios magdadanay sagkod lamang.”​—1 Juan 2:17.

Halipot na Repaso

• Taano ta nakikikomunikar si Jehova sa saiyang linalang na mga tawo?

• Paano kita makikinabang sa programa nin regular na pagbasa kan Biblia?

• Ano an maninigong magin reaksion niato sa pagdirehir hale sa grupong oripon?

• Taano ta dai niato maninigong palimanlimanan an mga dikta nin konsensia na sinanay sa Biblia?

[Mga Hapot Para sa Pag-adal]

[Ritrato sa pahina 13]

Dai kaipuhan nin tawo an komplikadong mga kasangkapan tanganing makaresibi nin mga mensahe hale sa Dios

[Credit Line]

Sa karahayan nin boot kan Arecibo Observatory/David Parker/Science Photo Library

[Ritrato sa pahina 15]

Si Jehova nagtataram sa sato paagi sa Biblia asin sa “fiel asin madonong na oripon”