Magayagayang mga Kasal na Nagtatao nin Onra ki Jehova

Si Welsh Asin Elthea Kinasal Sa Soweto, Aprika Del Sur, Kan 1985. Sa Panapanahon Hineheling Ninda An Saindang Mga Album Kaiba An Saindang Aking Babae, Si Zinzi, Asin Iniimahinar An Magayagayang Aldaw Na Idto. Gustong-gusto Ni Zinzi Na Sabihon Kun Sairisay An Mga Bisita Sa Kasal Asin Nangorognang Naoogma Sa Mga Retrato Kan Saiyang Ina Na Magayonon An Bado.

AN KASAL nagpoon paagi sa pahayag sa kasal na ginibo sa sarong tiriponan sa komunidad sa Soweto. Dangan an sarong koro nin mga hoben na Kristiano nag-awit nin mga awit nin pag-omaw sa Dios sa apat an kabtang na armoniya. Sunod, an mga bisita nagkarakan mantang pinatotogtog nin maluway sana an mga tape nin mga melodiyang pan-Kahadean. Dai nagpuesto nin mga inomon na de alkohol, asin mayo nin makosog na musika o baraylehan. Imbes, an mga bisita naogma sa pakipag-asosyar sa lambang saro asin sa pagpelisitar sa mag-agom. Gabos-gabos an okasyon naglawig nin mga tolong oras. “Idto sarong kasal na pirmeng magtatao sa sako nin nakaoogmang mga memorya,” an nagigirumdoman ni Raymond, sarong Kristianong magurang sa kongregasyon.

Sa panahon kan saindang kasal, si Welsh asin Elthea mga boluntaryong nagtatrabaho sa sangang opisina kan Watch Tower Bible and Tract Society sa Aprika del Sur. An kaya ninda simple sanang kasal. An nagkapirang Kristiano nagdesisyon na humale sa bilog na panahon na ministeryo asin kumua nin sekular na mga trabaho tanganing may magastos sa magarbong kasal. Minsan siring, si Welsh asin Elthea dai nagbabasol na pinili ninda an simple sanang kasal huli ta nagtogot iyan sa sainda na makapadagos sa paglilingkod sa Dios bilang bilog na panahon na mga ministro sagkod na namundag si Zinzi.

Pero paano kun gusto kan magkatrato na magkaigwa nin sekular na musika asin baraylehan sa saindang kasal? Paano kun magdesisyon sinda na magpuesto nin arak o iba pang inomon na de alkohol? Paano kun kaya nindang magkaigwa nin dakula asin magarbong kasal? Paano ninda masesegurado na an okasyon magigin maogma na angay sa mga nagsasamba sa Dios? An siring na mga hapot nagkakaipo nin maingat na pag-estudyar, ta an Biblia nagboboot: “Kamo man nagkakakan o nag-iinom o ano pa man an ginigibo, gibohon an gabos na bagay sa ikamumuraway nin Dios.”​—1 Corinto 10:31.

Paglikay sa Mariribok na Katiriponan sa Pag-ogma

Masakit imahinaron an sarong daing kagayagayahan na kasal. Mas dakula an peligro kun sobra naman asin kun igwa nin sobrang daing kontrol na mariribok na katiriponan sa pag-ogma. Sa dakol na kasal nin bakong Saksi, may mga nangyayari na naglalapastangan sa Dios. Halimbawa, komun an paggamit nin alkohol sagkod na maburat. Makamomondo, ini nangyari pa ngani sa nagkapirang Kristianong kasal.

An Biblia nagpapatanid na “an nakabuburat na arak paraparibok.” (Talinhaga 20:1) An termino sa Hebreo na trinadusir na “paraparibok” nangangahulogan na “magribok nin makosog.” Kun kaya nin alkohol na gibohon na maribok an saro, imahinara an magigibo kaiyan sa sarong dakulang kadaklan nin mga tawo na nagtitiripon asin nag-iirinom nin sobra! Siempre pa, an siring na mga okasyon madali sanang magin ‘mga pagburat, mariribok na katiriponan sa pag-ogma, asin mga bagay na siring kaini,’ na nakalista sa Biblia na “mga gibo kan laman.” An siring na mga gibo minadiskualipikar sa siisay man na dai nagsosolsol sa pagmana nin buhay na daing katapusan sa pamamahala kan Kahadean nin Dios.​—Galacia 5:​19-21.

 An termino sa Griego para sa “mariribok na katiriponan sa pag-ogma” ginamit tanganing iladawan an sarong maribok na parada sa tinampo nin mga hoben na medyo burat na nagkakaranta, nagbabarayle, asin nagtotorogtog. Kun daing kontrol an pag-inom nin alkohol sa sarong kasal, asin kun igwa nin makosog na musika asin daing pakundangan na baraylehan, igwa nin totoong peligro na an okasyon magigin siring sa mariribok na katiriponan sa pag-ogma. Sa siring na kamugtakan, an mga maluya tibaad madaling maholog sa sugot asin makakomiter nin iba pang gibo kan laman na arog kan “pakikisaro, karompotan, malaswang gawe, [o mapadara sa] mga pagputok nin kaanggotan.” Ano an puedeng gibohon tanganing malikayan an siring na mga gibo kan laman na raoton an kagayagayahan nin sarong Kristianong kasal? Tanganing masimbag an hapot na iyan, estudyaran ta an sinasabi kan Biblia manongod sa sarong kasal.

An Kasal na Inatenderan ni Jesus

Si Jesus asin an saiyang mga disipulo inimbitaran na umatender sa sarong kasal sa Cana nin Galilea. Inako ninda an imbitasyon, asin si Jesus nagkontribwir pa ngani sa kagayagayahan kan okasyon. Kan magkulang an arak, sia milagrosong naggibo nin dagdag na suplay na pinakamarahay an kualidad. Pagkatapos kan kasal, an natada daing duda na nagkaigo sa kinakaipuhan kan nagpapasalamat na nobyo asin kan saiyang pamilya sa laog nin kadikit na panahon.​​—Juan 2:​3-​11.

May manonodan kitang nagkapirang leksion sa kasal na inatenderan ni Jesus. Enot, si Jesus asin an saiyang mga disipulo dai nagduman na daing imbitasyon sa kasal. Espesipikong sinasabi kan Biblia na sinda imbitado. (Juan 2:​1, 2) Siring man, sa duwang ilustrasyon nin punsion sa kasal, si Jesus paorootrong nagsabi na an mga bisita presente huli ta sinda imbitado.​​—Mateo 22:​2-4, 8, 9; Lucas 14:​8-​10.

Sa nagkapirang kadagaan pinagkatodan na kan gabos sa komunidad na sinda puedeng umatender sa sarong punsion sa kasal imbitado man o dai. Minsan siring, puede ining magresulta sa pinansial na kasakitan. An sarong magkatrato na bakong mayaman tibaad mangutang tanganing maseguro na igwa nin igong kakanon asin inomon para sa daing limiteng mga tawo. Kun siring, kun an sarong Kristianong magkatrato magdesisyon na magkaigwa nin simple sanang punsion na may espesipikong bilang nin mga bisita, ini maninigo na saboton asin igalang kan mga kapwa Kristiano na dai naimbitaran. Nagigirumdoman nin sarong lalaki na nagpakasal sa Cape Town, Aprika del Sur, na 200 na bisita an inimbitaran nia sa saiyang kasal. Minsan siring, 600 an nag-arabot, asin tolos na naubos an saindang kakanon. Kabilang sa mga dai imbitado an sarong auto nin mga bisita na natagbong namamasyar sa Cape Town sa katapusan kan semana kaidtong kasal. An konduktor kan autong ini para sa pamamasyar sarong harayong paryente kan nobya asin nag-isip na diretso niang iiba an bilog na grupo na dai na ngani hinapot an nobya o nobyo!

Apuera sana kun sinabi na an punsion bukas para sa gabos, an sarong tunay na parasunod ni Jesus lilikayan an pag-atender sa sarong punsion sa kasal kun dai inimbitaran asin an pakikikabtang sa kakanon asin inomon na inandam para sa imbitadong mga bisita. An mga nasusugotan na umatender na bakong imbitado maninigo na hapoton an saindang sadiri, ‘Bako daw na an pag-atender ko sa punsion na ini sa kasal magpapaheling nin kadaihan nin pagkamoot para sa mga bagong kasalon? Dai daw ako makamomolestia asin makadidisturbo sa kagayagayahan kan okasyon?’ Imbes na magraot an boot na dai naimbitaran, an mapagsabot na Kristiano puedeng mamomoton na magpaabot nin sarong mensahe tanganing pelisitaron an mag-agom asin mawoton para sa sainda an bendisyon ni Jehova. Puede ngani niang isipon na tumabang sa mag-agom paagi sa pagpadara nin regalo tanganing makadugang sa kaogmahan kan saindang aldaw nin kasal.​​—Eclesiastes 7:​9; Efeso 4:28.

Siisay an May Paninimbagan?

Sa mga parte nin Aprika, pinagkatodan nang an gurang na mga paryente an mamahala sa mga areglo sa kasal. Puedeng magpasalamat digdi an magkatrato, huling nakalilibre na sinda sa pinansial na mga obligasyon. Puedeng isipon ninda na nakalilibre man sinda sa paninimbagan sa ano man na tibaad mangyari. Minsan siring, bago akoon an ano man na klase nin tabang nin may marahay na intension na mga paryente, maninigong seguradohon kan magkatrato na an saindang personal na mga kagustohan igagalang.

Minsan ngani si Jesus iyo an Aki nin Dios na “naghilig hale sa langit,” mayo nin nagpaparisa na sia an namahala asin nagdirehir sa kadaklan na bagay sa kasal duman sa Cana. (Juan 6:41) Imbes, an rekord kan Biblia nagsasabi sa sato na may ibang ninombrahan  na umakto bilang “namamahala sa punsion.” (Juan 2:8) An lalaking ini maninimbag man sa bagong payo nin pamilya, iyo na ngani an nobyo.​​—Juan 2:​9, 10.

Maninigo na igalang nin Kristianong mga paryente an nombrado nin Dios na payo kan bagong pamilya. (Colosas 3:​18-​20) Sia an maninigo na manimbag sa nangyayari sa kasal nia. Naturalmente, an nobyo maninigo na magin rasonable asin, kun posible, paonrahan an mga kagustohan kan saiyang nobya, kan saiyang mga magurang, asin kan saiyang mga panugangan. Pero, kun an mga paryente nag-iinsistir na mag-areglo nin mga bagay na kontra sa kagustohan kan magkatrato, kun siring tibaad kaipuhan na mataktikang sayumahan kan magkatrato an tabang ninda asin sinda na an gumasto sa saindang sadiring simpleng kasal. Sa paaging ini mayo nin mangyayari na magigin bakong magayon sa memorya kan magkatrato. Halimbawa, sa sarong Kristianong kasal sa Aprika, an sarong daing pagtubod na paryente na nag-akto bilang emcee nagtagay para sa gadan nang mga apoon!

Kun minsan an kinasal minahale na para sa saindang honeymoon bago matapos an selebrasyon kan kasal. Sa siring na kamugtakan, maninigo na iareglo kan nobyo na igwa nin mga mapagtitiwalaan tanganing seguradohon na an mga pamantayan sa Biblia napagdadanay asin na an selebrasyon matapos sa rasonableng oras.

Maingat na Pagplano Asin Pagigin Timbang

Minalataw na dakol an masisiram na pagkakan sa kasal na inatenderan ni Jesus, ta sinasabi kan Biblia na idto sarong punsion sa kasal. Siring kan nasabi na, dakol man an arak. Daing duda, igwa nin angay na musika asin may dignidad na bayle huli ta ini ordinaryo nang kabtang kan sosyal na buhay nin mga Judio. Ipinaheling ini ni Jesus sa saiyang bantog na ilustrasyon kan aking gastador. An mayaman na ama sa estoryang iyan naogmang marhay sa pagbalik kan saiyang nagsosolsol na aki kaya sia nagsabi: “Magkarakan kita patin mag-ogma.” Segun ki Jesus, an selebrasyon may kaibang “konsierto nin musika asin baraylehan.”​—Lucas 15:​23, 25.

Minsan siring, interesante nanggad na bakong espesipiko an pagkasambit kan Biblia sa musika asin baraylehan sa kasal sa Cana. Sa katunayan, an baraylehan dai nasasambitan sa arin man sa mga pagkasaysay kan Biblia dapit sa mga kasal. Minalataw na sa tahaw kan fiel na mga lingkod nin Dios kaidtong mga panahon kan Biblia, an baraylehan insidental sana asin bakong an pangenot na kabtang kan saindang mga kasal. May manonodan daw kita digdi?

Sa nagkapirang Kristianong kasal sa Aprika, may ginagamit na makokosog na elektronikong sound system. An musika makosogon kaya an mga bisita dai na makapag-orolay nin luway sana. Kun beses risang-risa na nagkukulang an pagkakan alagad dai nagkukulang an baraylehan na madaling nagigin daing kontrol. Imbes na magin punsion sa kasal, an siring na mga okasyon tibaad magin na sanang sarahotan para sa parti nin baraylehan. Apuera kaini, an makosog na musika sa parate nakaaatraer sa mga manriribok, mga estranghero na basta na sana minaduman na dai imbitado.

Mantang an rekord kan Biblia dapit sa mga kasal dai idinodoon an musika asin baraylehan, bako daw na maninigo ining gumiya sa sarong magkatrato na nagpaplano nin kasal na matao nin onra ki Jehova? Pero, bilang preparasyon sa nagkapirang dai pa sana nahahaloy na kasal sa timog Aprika, an mga hoben na Kristiano na piniling magkaigwa nin kabtang sa parti sa kasal dakol na oras an ginagamit sa pagpraktis nin komplikadong mga bayle. Sa laog nin dakol na bulan sobra-sobrang oras ninda an ginamit sa paaging ini. Alagad an mga Kristiano kaipuhan na ‘tubuson an panahon’ para sa “orog na mahalagang mga bagay,” arog baga kan pag-ebanghelyo, personal na pag-adal, asin pag-atender sa Kristianong mga pagtiripon.​—Efeso 5:​16; Filipos 1:10.

Sa kadakolan kan arak na itinao ni Jesus, minalataw na an kasal sa Cana dakula, magarbo. Minsan siring, makaseseguro kita na an okasyon bakong maribok asin na an mga bisita dai nagpasobra sa alkohol siring sa nangyayari sa nagkapirang kasal nin mga Judio. (Juan 2:10) Paano niato ini naseseguro? Huli ta an Kagurangnan na si Jesu-Cristo nag-atender. Sa gabos na tawo, si Jesus iyo an nagin pinakamaingat sa pagkuyog sa pagboot nin Dios mapadapit sa maraot na pag-iriba: “Dai ka makiiba  sa mga makosog na parainom nin arak.”​—Talinhaga 23:20.

Kun siring, kun an magkatrato magdesisyon na magpuesto nin arak o iba pang inomon na de alkohol sa saindang kasal, maninigo na iareglo ninda na ini gibohon sa irarom nin estriktong pagkontrol nin responsableng mga indibiduwal. Asin kun magdesisyon sinda na magkaigwa nin musika, maninigo sindang pumili nin angay na mga togtog asin mag-asignar nin sarong tawong responsable na makontrol sa kosog kaiyan. An mga bisita dai maninigong togotan na iyo nang magkontrol asin magpatogtog nin kuestionableng musika o pakosogon an tanog na bako nang rasonable. Kun magkakaigwa nin baraylehan, iyan puedeng iiba sa paagi na may dignidad asin kontrolado. Kun an daing pagtubod na mga paryente o bakong maygurang na mga Kristiano gumamit nin rapsak o nakaaakit na mga hiro sa pagbayle, puedeng salidahan kan nobyo an musika o mataktikang ipapondo an baraylehan. Ta kun dai an kasal puedeng magin maribok na okasyon asin ikasingkog.​​—Roma 14:21.

Huli sa mga peligro na natural nang yaon sa nagkapirang klase nin modernong bayle, makosog na musika, asin pagpasobra sa alkohol, dakol na Kristianong nobyo an nagdesisyon na dai iiba an mga bagay na ini sa saindang kasal. An iba krinitika huli kaini, alagad imbes kaiyan maninigo sindang komendaran sa saindang pagmawot na likayan an ano man na puedeng magtao nin katuyawan sa banal na ngaran nin Dios. Sa ibong na kampi, may mga nobyo na nag-aareglo na magkaigwa nin angay na musika, oras nin baraylehan, asin tama sanang alkohol. Arin man digdi an nobyo an responsable sa tinotogotan niang mangyari sa saiyang kasal.

Sa Aprika minemenus nin nagkapirang bakong maygurang an may dignidad na Kristianong mga kasal asin nagsasabi na garo man sana sinda nagduman sa lobong. Minsan siring, iyan bakong timbang na pagmansay. An makasalan na mga gibo kan laman tibaad magtao nin temporaryong kaogmahan, alagad dahel kaiyan an mga Kristiano nariribok an konsensia asin nagdadara nin katuyawan sa ngaran nin Dios. (Roma 2:24) Sa ibong na kampi, an banal na espiritu nin Dios nagbubunga nin tunay na kagayagayahan. (Galacia 5:22) An dakol na Kristianong mag-agom ginigirumdom na may pag-orgolyo an aldaw kan saindang kasal, sa pakaaram na idto maogmang okasyon asin bakong “dahelan nin pagkasingkog.”​—2 Corinto 6:3.

Nagigirumdoman pa ni Welsh asin Elthea an dakol na paborableng komento nin daing pagtubod na mga paryente na nag-atender sa kasal ninda. An sabi nin saro: “Sawa na kami sa maribok na mga kasal na nangyayari sa ngonyan. Magayonon mag-atender sa sarong disenteng kasal tanganing mapaiba naman.”

An pinakaimportante, an Kristianong mga kasal na magayagaya asin may dignidad nagtatao nin onra sa Kagtugdas nin pag-agom, si Jehova Dios.

[Kahon/Ritrato sa pahina 22]

MGA DAPAT GIRUMDOMON PARA SA PUNSION SA KASAL

• Kun nag-imbitar kamo nin sarong daing pagtubod na paryente na mataram, sinierto na daw nindo na dai sia maintrodusir nin sarong tradisyon na bakong sa Kristiano?

• Kun mapatogtog nin musika, nagpili na daw kamo nin angay sanang mga awit?

• Patotogtogon daw an saindong musika sa rasonableng kosog?

• Kun totogotan an bayle, iyan daw gigibohon sa paagi na may dignidad?

• Mapuesto daw nin alkohol na tama sana?

• Igwa daw nin mga tawong responsable na makontrol sa pagdistribwir kaiyan?

• Nagtalaan na daw kamo nin rasonableng oras para sa pagtapos kan punsion sa kasal?

• Igwa daw nin mga tawong responsable na maatender tanganing masegurado an areglo sagkod na matapos?