Marigon na Suportaran an Diosnon na Katokdoan

“Magtiwala ka ki Jehova sa bilog mong puso asin dai ka manarig sa saimong sadiring pakasabot. Sa gabos mong dalan girumdomon mo sia, asin itatanos nia mismo an saimong mga dana.”​—TALINHAGA 3:​5, 6.

1. Paano kita nalalantad sa kaaraman nin tawo orog kasuarin man?

SA NGONYAN, mga 9,000 na diaryo an nasa sirkulasyon sa bilog na kinaban. Taon-taon mga 200,000 na bagong libro an ipinupublikar duman sana sa Estados Unidos. Segun sa sarong kalkulo, kaidtong Marso nin 1998, mga 275 milyones an pahina sa Web sa Internet. An kabilangan na ini sinasabing nagdadakol sa rikas na 20 milyones na pahina kada bulan. Orog kasuarin man, an mga tawo puedeng makakua nin impormasyon sa maski anong tema. Minsan ngani may positibong mga aspekto an situwasyon na ini, an siring na sobrang abundansia nin impormasyon ginikanan nin mga problema.

2. Anong mga problema an puedeng ibunga kan pakakua nin sobrang abundansia nin impormasyon?

² An nagkapira nagin adikto sa impormasyon, na pirmeng pinaninigoan an dai naiingustohan na kamawotan na aramon an pinakabagong impormasyon mantang pinababayaan an mga bagay na mas mahalaga. An iba nakakakua nin parsial na impormasyon manongod sa komplikadong mga langtad nin kaaraman dangan ibinibilang na an sadiri na mga eksperto. Basado sa limitado sanang pakasabot, tibaad gumibo sinda nin kritikal na mga desisyon na puedeng gikanan nin danyos sa saindang sadiri o sa iba. Asin pirmeng yaon an peligro na malantad sa falso o salang impormasyon. Parate na mayo nin masasarigan na paagi na maberepikar kun baga tama asin timbang an kadakoldakol na impormasyon.

3. Anong mga patanid mapadapit sa paghanap nin kadonongan nin tawo an yaon sa Biblia?

³ An pag-usyoso haloy nang ugale nin tawo. An mga peligro sa pagsayang nin kadakol na oras sa paghanap nin daing serbi o nakadadanyar pa nganing impormasyon minidbid kaidto pang kaaldawan ni Hadeng Salomon. Sabi nia: “Mag-ingat ka: An paggibo nin dakol na libro mayo nin katapusan, asin an dakulang debosyon sa mga iyan nakapapagal sa laman.” (Eclesiastes 12:12) Pakalihis nin dakol na siglo si apostol Pablo nagsurat ki Timoteo: “Ingatan mo an ipinaniwala sa saimo, na naglilikay sa basang na orolay na minalapas sa banal asin sa mga pagkakaturumang kan falsong inaapod na ‘kaaraman.’ Huli sa pagpasikat nin siring na kaaraman an nagkapira napasuhay sa pagtubod.” (1 Timoteo 6:​20, 21) Iyo, an mga Kristiano ngonyan dapat na lumikay sa dai kaipuhan na pagkalantad sa nakadadanyar na mga ideya.

4. Ano an sarong paagi na ikapaheheling niato an satong tiwala ki Jehova asin sa saiyang mga katokdoan?

⁴ Marahay man na himateon kan banwaan ni Jehova an mga tataramon sa Talinhaga 3:​5, 6: “Magtiwala ka ki Jehova sa bilog mong puso asin dai ka manarig sa saimong sadiring pakasabot. Sa gabos mong dalan girumdomon mo sia, asin itatanos nia mismo an saimong mga dana.” Kaiba sa pagtitiwala ki Jehova an paghabo sa ano man na ideya na kontra sa Tataramon nin Dios, baga man iyan gikan sa sadiri niatong pangangatanosan o sa pangangatanosan kan satong kapwa. Tanganing maprotehiran an satong espirituwalidad, mahalagang marhay na patoodon niato an satong kakayahan nin pagmansay tangani na mamidbid niato an nakadadanyar na impormasyon asin rayoan iyan. (Hebreo 5:14) Pag-olayan niato an nagkapirang ginigikanan nin siring na impormasyon.

Sarong Kinaban na Daog ni Satanas

5. Ano an sarong ginigikanan nin nakadadanyar na mga ideya, asin siisay an nasa likod kaiyan?

⁵ An sekular na kinaban maproduktong ginigikanan  nin nakadadanyar na mga ideya. (1 Corinto 3:19) Si Jesu-Cristo namibi sa Dios mapadapit sa saiyang mga disipulo: “Ako nakikimaherak sa saimo, bako na haleon sinda sa kinaban, kundi na bantayan sinda huli sa maraot.” (Juan 17:15) An pakiolay ni Jesus na protehiran an saiyang mga disipulo sa “maraot” rinekonoser an impluwensia ni Satanas sa kinaban. An pagigin Kristiano niato dai automatikong nagpoprotehir sa sato sa maraot na mga impluwensia kan kinaban na ini. Nagsurat si Juan: “Aram niato na kita gikan sa Dios, alagad an bilog na kinaban namumugtak sa kapangyarihan kan maraot.” (1 Juan 5:19) Nangorogna sa huring kabtang na ini kan huring mga aldaw, maaasahan na sasagomon ni Satanas asin kan saiyang mga demonyo an kinaban na ini nin nakadadanyar na impormasyon.

6. Paano an kinaban nin aling-alingan puedeng gikanan nin moral na pagtagas?

⁶ Maaasahan man na an nagkapira sa nakadadanyar na impormasyon na ini tibaad garo baga dai makakadanyar. (2 Corinto 11:14) Estudyare, halimbawa, an kinaban nin aling-alingan, kaiba an mga pasale kaiyan sa TV, pelikula, musika, asin babasahon. Dakol an oyon na sa padakol nang padakol na kaso, an nagkapirang klase nin aling-alingan nagpapalakop nin nakararaot na mga gibo, arog baga kan inmoralidad, kadahasan, asin pagdodroga. Sa enot na pagkalantad sa sarong klase nin aling-alingan na orog pang ruminaot kisa kasuarin man, tibaad mabigla an mga nagdadalan. Alagad an paorootrong pagkalantad puedeng patagason an saro. Nungka na maninigo niatong mansayon na puede na o dai makakadanyar an aling-alingan na nagpapalakop nin nakadadanyar na mga ideya.​—Salmo 119:37.

7. Anong klaseng kadonongan nin tawo an puedeng luway-luway na makaraot sa satong kompiansa sa Biblia?

⁷ Estudyare an saro pang ginigikanan nin impormasyon na may potensial na makadanyar​—an kadakoldakol na ideya na ipinupublikar nin nagkapirang sientista asin intelektuwal na kinukustion an pagigin totoo kan Biblia. (Ikomparar an Santiago 3:15.) An siring na materyal parateng minaluwas sa pangenot na mga magasin asin popular na mga libro, asin iyan puedeng luway-luway na makaraot sa kompiansa sa Biblia. May mga indibiduwal na ipinag-oorgolyo an pagpaluya sa autoridad kan Tataramon nin Dios paagi sa daing katapusan na mga pagbanabana. May kaagid na peligro kaidtong kaaldawan kan mga apostol, arog kan linilinaw kan mga tataramon ni apostol Pablo: “Mag-ingat kamo: tibaad may saro na makadara sa saindo bilang saiyang biktima paagi sa pilosopiya asin basang na daya segun sa tradisyon nin mga tawo, segun sa enot na mga katokdoan kan kinaban asin bakong segun ki Cristo.”​—Colosas 2:8.

Mga Enemigo kan Katotoohan

8, 9. Paano nahahayag an apostasiya ngonyan?

⁸ An mga apostata puedeng magtao nin saro pang peligro sa satong espirituwalidad. Naghula si apostol Pablo na magkakaigwa nin apostasiya sa tahaw nin naghihingakong mga Kristiano. (Gibo 20:​29, 30; 2 Tesalonica 2:3) Bilang kaotoban kan saiyang mga tataramon, pagkagadan kan mga apostol, an lakop na apostasiya nagbunga kan pagkaigwa nin Kakristianohan. Ngonyan, mayo nin nangyayaring lakop na apostasiya sa tahaw kan banwaan nin Dios. Pero, may nagkapira na suminiblag sa sato, asin an nagkapira sa sainda desididong balobagion an Mga Saksi ni Jehova paagi sa pagpalakop nin mga kaputikan asin salang impormasyon. An nagkapira nakikipagtabangan sa ibang grupo sa organisadong oposisyon sa dalisay na pagsamba. Sa paggibo nin siring, nakikakampi sinda sa kaenot-enoteng apostata, si Satanas.

⁹ An nagkapirang apostata paorog nang paorog na ginagamit an manlaenlaen na klase nin lakop na komunikasyon, pati an Internet, sa pagpalakop nin putik na impormasyon manongod sa Mga Saksi  ni Jehova. Bilang resulta, kun an sinserong mga indibiduwal nagsisiyasat sa satong mga tinutubod, tibaad masumpongan ninda an apostatang propaganda. Dawa an nagkapirang Saksi dai tinutuyo na ilinantad an sadiri ninda sa nakadadanyar na materyal na ini. Dugang pa, an mga apostata kun minsan nakikakabtang sa mga programa sa telebisyon o radyo. Ano an madonong na gibohon nin huli kaini?

10. Ano an madonong na reaksion sa apostatang propaganda?

¹⁰ An mga Kristiano sinabihan ni apostol Juan na dai pag-akoon sa saindang harong an mga apostata. Sia nagsurat: “Kun may siisay man na magdolok sa saindo asin dai nagdadara kan katokdoan na ini, nungka na padagoson sia sa saindong harong o taratarahon sia. Huli ta an minataratara sa saiya nakikikabtang sa saiyang maraot na mga gibo.” (2 Juan 10, 11) An paglikay sa gabos na pakikomunikar sa mga kalaban na ini maprotehir sa sato sa saindang maraot na kaisipan. An paglantad kan satong sadiri sa apostatang mga katokdoan paagi sa manlaenlaen na paagi nin modernong komunikasyon arog kanakadadanyar kan pagpadagos kan apostata mismo sa satong harong. Nungka na maninigo niatong togotan an pag-usyoso na akiton kita sa siring na kapahapahamak na paggawe!​—Talinhaga 22:3.

Sa Laog kan Kongregasyon

11, 12. (a) Ano an sarong ginikanan nin nakadadanyar na mga ideya sa kongregasyon kan enot na siglo? (b) Paano an nagkapirang Kristiano dai nagin marigon sa pagsuportar sa diosnon na mga katokdoan?

¹¹ Estudyare an saro pang posibleng gikanan nin nakadadanyar na mga ideya. Minsan ngani mayo nin intension na magtokdo nin mga kaputikan, an sarong nagdusay na Kristiano puedeng magkaigwa kan ugaleng magtaram na dai iniisip. (Talinhaga 12:18) Huli ta kita bakong sangkap, kita gabos may panahon na makalalapas paagi sa satong dila. (Talinhaga 10:​19; Santiago 3:8) Minalataw na kaidtong kaaldawan ni apostol Pablo, may nagkapira sa kongregasyon na dai napogolan an saindang dila asin napalabot sa mga debate manongod sa mga tataramon. (1 Timoteo 2:8) May iba na sobra an pagheling sa sadiri nindang opinyon asin inangat pa ngani an autoridad ni Pablo. (2 Corinto 10:​10-12) An siring na espiritu nagbunga nin iriwal na dai kaipuhan.

¹² Kun beses an mga dai pagkakaoyon na ini nagin “madahas na mga diskutiran manongod sa daing kamanungdanan na mga bagay,” na riniribok an katoninongan kan kongregasyon. (1 Timoteo 6:​5; Galacia 5:15) Manongod sa mga pinonan kan mga argumentong ini, nagsurat si Pablo: “Kun an siisay man nagtotokdo nin ibang doktrina asin dai minaoyon sa ikararahay na mga tataramon, an mga sa satong Kagurangnan na Jesu-Cristo, ni sa katokdoan na oyon sa diosnon na debosyon, sia maabhaw huli sa kapalangkawan, na mayo nin ano man na nasasabotan, kundi nagkakadiperensia an isip dapit sa mga pagduwaduwa asin debate manongod sa mga tataramon. Sa mga bagay na ini minagikan an pagkauri, iriwal, mapanlibak na mga pagtaram, maraot na mga pagsahotsahot.”​—1 Timoteo 6:​3, 4.

13. Ano an iginawe kan kadaklan na Kristiano kan enot na siglo?

¹³ Marahay sana ta kan panahon kan mga apostol an mayoriya sa mga Kristiano fiel asin nagdanay  na konsentrado sa gibohon na pagpahayag kan maogmang bareta kan Kahadean nin Dios. Sibot sinda sa pag-ataman sa “mga ilo asin babaeng balo sa saindang kasakitan” asin nagdanay sindang “daing digta kan kinaban,” na dai sinasayang an saindang panahon sa basang sanang mga debate manongod sa mga tataramon. (Santiago 1:27) Naglikay sinda sa “maraot na pag-iriba” dawa sa laog kan Kristianong kongregasyon tangani na maingatan an saindang espirituwalidad.​—1 Corinto 15:​33; 2 Timoteo 2:​20, 21.

14. Kun dai kita magmamaan, paano an normal na pagrinibayan nin ideya puedeng magin nakadadanyar na mga argumento?

¹⁴ Kaagid kaiyan, an mga situwasyon na ilinaladawan sa parapo 11 bakong tipiko sa mga kongregasyon nin Mga Saksi ni Jehova ngonyan. Pero, marahay na rekonoseron niato an potensial kan siring na basang sanang mga debate. Siempre, normal sanang pag-olayan an mga salaysay sa Biblia o isip-isipon an mga aspekto kan ipinanugang bagong kinaban na dai pa ihinahayag. Asin mayo man nin sala sa pagrinibayan nin ideya manongod sa personal na mga bagay, arog baga kan paggubing asin pag-alinyar o pagpili nin aling-alingan. Minsan siring, kun kita magigin dogmatiko manongod sa satong mga ideya asin maaanggot kun an iba dai minaoyon sa sato, tibaad mabanga an kongregasyon sa saradit na isyu. An sa kapinonan dai nakadadanyar na eroestorya tibaad magin nakadadanyar nanggad.

Pagbantay sa Ipinaniwala sa Sato

15. Guranong danyos sa espirituwal an puedeng itao sa sato kan “katokdoan nin mga demonyo,” asin anong hatol an itinatao sa Kasuratan?

¹⁵ Nagpatanid si apostol Pablo: “An ipinasabong na tataramon talagang nagsasabi na sa huring mga panahon an nagkapira masuhay sa pagtubod, na nagtatao nin atension sa nakalalagalag na ipinasabong na mga tataramon asin katokdoan nin mga demonyo.” (1 Timoteo 4:1) Iyo, an nakadadanyar na mga ideya nagtatao nin magabat na peligro. Natural sana, pinakimaherakan ni Pablo an mahal niang katood na si Timoteo: “O Timoteo, ingatan mo an ipinaniwala sa saimo, na naglilikay sa basang na orolay na minalapas sa banal asin sa mga pagkakaturumang kan falsong inaapod na ‘kaaraman.’ Huli sa pagpasikat nin siring na kaaraman an nagkapira napasuhay sa pagtubod.”​—1 Timoteo 6:​20, 21.

16, 17. Ano an ipinaniwala sa sato nin Dios, asin paano niato maninigong ingatan iyan?

¹⁶ Paano kita ngonyan makikinabang sa mamomoton na patanid na ini? May ipinaniwala ki Timoteo​—sarong bagay na mahalaga na iingatan asin poprotehiran. Ano idto? Ipinaliliwanag ni Pablo: “Padagos mong pangaptan an arogan nin ikararahay na mga tataramon na nadangog mo sa sako kaiba kan pagtubod asin pagkamoot na mapadapit ki Cristo Jesus. Ining marahay na ipinaniwala sa saimo ingatan mo paagi sa banal na espiritu na nag-eerok sa sato.” (2 Timoteo 1:​13, 14) Iyo, kaiba sa ipinaniwala ki Timoteo an “ikararahay na mga tataramon,” an “katokdoan na oyon sa diosnon na debosyon.” (1 Timoteo 6:3) Kaoyon kan mga tataramon na ini, determinado an mga Kristiano ngonyan na protehiran an saindang pagtubod asin an kabilogan nin katotoohan na ipinaniwala sa sainda.

¹⁷ Kaiba sa pag-iingat sa ipinaniwalang iyan an pagkultibar kan mga bagay na arog baga kan marahay na mga ugale sa pag-adal kan Biblia asin pagmamaigot sa pamibi, mantang ginigibo an “marahay sa gabos, alagad orog na sa mga may relasyon sa sato sa pagtubod.” (Galacia 6:​10; Roma 12:​11-17) Isinasadol pa ni Pablo: “Sunodon mo an katanosan, diosnon na debosyon, pagtubod, pagkamoot, pakatagal, kahoyoan nin boot. Makipaglaban ka kan marahay na pakilaban kan pagtubod, mangapot ka nin marigon sa buhay na daing katapusan na huli kaiyan ika inapod asin nagtao ka kan marahay na pagpahayag sa publiko sa atubangan nin dakol na saksi.” (1 Timoteo 6:​11, 12) Linilinaw kan paggamit ni Pablo kan mga frase na arog kan “makipaglaban ka kan marahay na pakilaban” asin “mangapot ka nin marigon” na dapat na aktibo asin determinado niatong labanan an mga impluwensiang nakadadanyar sa espirituwal.

An Pangangaipo nin Pakamansay

18. Paano niato ikapaheheling an Kristianong pagkatimbang sa aktitud niato sa sekular na impormasyon?

¹⁸ Siempre, sa pakikipaglaban kan marahay na pakilaban kan pagtubod, kaipuhan an pakamansay. (Talinhaga 2:​11; Filipos 1:9) Halimbawa, bakong rasonable na pagdeskompiaran an gabos na sekular na impormasyon. (Filipos 4:​5; Santiago 3:17) Bakong gabos na ideya nin tawo kontra sa Tataramon  nin Dios. Nanabihan ni Jesus an pangangaipo na an mga may helang kumonsulta sa sarong kualipikadong doktor​—sarong sekular na propesyon. (Lucas 5:31) Sa ibong kan medyo pagkaprimitibo kan medikal na pagbolong kan kaaldawan ni Jesus, rinekonoser nia na may makukuang pakinabang sa tabang nin sarong doktor. An mga Kristiano ngonyan nagpapaheling nin pagkatimbang kun manongod sa sekular na impormasyon, alagad linalabanan ninda an pagkalantad sa ano man na tibaad makadadanyar sa sainda sa espirituwal.

19, 20. (a) Paano an kamagurangan minagaweng may pakamansay kun nagtatabang sa mga nagtataram nin bakong madonong? (b) Ano an ginigibong aksion kan kongregasyon sa mga nag-iinsistir na magpalakop nin falsong mga katokdoan?

¹⁹ An pakamansay mahalaga man na marhay sa parte kan kamagurangan kun hinahagadan na tumabang sa mga nagtataram nin bakong madonong. (2 Timoteo 2:7) Kun beses, tibaad masiod an mga miembro kan kongregasyon sa mga diskutiran manongod sa daing kamanungdanan na mga bagay asin mga argumentong pagbanabana sana. Tanganing maprotehiran an pagkasararo kan kongregasyon, maninigo na maagap an kamagurangan na tawan nin atension an siring na mga problema. Kadungan kaiyan, linilikayan ninda na ibintang an salang mga motibo sa saindang mga tugang asin dai ninda sinda ibinibilang tolos na mga apostata.

²⁰ Ilinaladawan ni Pablo kun sa anong espiritu dapat na itao an tabang. Sabi nia: “Mga tugang, minsan kun an sarong tawo gumibo nin sala bago nia iyan maaraman, kamo na igwang espirituwal na mga kualipikasyon pagmaigotan nindo na pakarhayon giraray an tawong iyan sa espiritu nin kahoyoan.” (Galacia 6:1) Sa espesipikong pagtaram manongod sa mga Kristiano na nasasakitan huli sa mga pagduwaduwa, nagsurat si Judas: “Padagos kamong magpaheling nin pagkaherak sa nagkapira na igwa nin mga pagduwaduwa; iligtas nindo sinda paagi sa pag-agaw sa sainda hale sa kalayo.” (Judas 22, 23) Siempre, kun pakatapos nin paorootrong konseho an saro nag-iinsistir na magpalakop nin falsong mga katokdoan, an kamagurangan kaipuhan na gumibo nin desididong aksion tanganing maprotehiran an kongregasyon.​—1 Timoteo 1:​20; Tito 3:​10, 11.

Pagpano kan Satong Isip nin mga Bagay na Inoomaw

21, 22. Manongod sa ano na kita maninigong magin mapamili, asin maninigo na panoon niato an satong isip nin ano?

²¹ Rinarayoan kan Kristianong kongregasyon an nakadadanyar na mga tataramon na ‘nakakalakop na siring sa gangrena.’ (2 Timoteo 2:​16, 17; Tito 3:9) Totoo ini baga man an mga tataramon na iyan nagpapabanaag nin nakadadayang sekular na “kadonongan,” propaganda nin mga apostata, o dai inisip na orolay sa laog kan kongregasyon. Minsan ngani puedeng magin kapakipakinabang an tamang kamawotan na makanood nin bagong mga bagay, an daing prenong pag-usyoso puede kitang ilantad sa nakadadanyar na mga ideya. Bako kitang ignorante sa mga pakana ni Satanas. (2 Corinto 2:11) Aram niato na ginigibo nia an grabeng mga paghihingoa na disturbohon kita tangani na paluyahon kita sa satong paglilingkod sa Dios.

²² Bilang marahay na mga ministro, marigon niatong suportaran an diosnon na mga katokdoan. (1 Timoteo 4:6) Logod na madonong niatong gamiton an satong panahon paagi sa pagigin mapamili sa impormasyon na ilinalaog niato sa satong isip. Kun siring dai kita madaling matatanyog kan propagandang ipinasabong ni Satanas. Iyo, padagos niatong horophoropon an “ano man na totoo, ano man na seryosong bagay, ano man na matanos, ano man na malinig, ano man na makawiwili, ano man na marahay an dangog, ano man na birtud asin ano man na inoomaw.” Kun papanoon niato an satong isip asin puso kan siring na mga bagay, mapapasato an Dios nin katoninongan.​—Filipos 4:​8, 9.

Ano an Nanodan Niato?

• Paano an sekular na kadonongan tibaad magtao nin peligro sa satong espirituwalidad?

• Ano an magigibo niato tanganing maprotehiran an satong sadiri sa nakadadanyar na impormasyon hale sa mga apostata?

• Anong klaseng pagtaram an maninigong likayan sa laog kan kongregasyon?

• Paano ipinaheheling an Kristianong pagkatimbang sa pag-atubang sa sobrang abundansia nin impormasyon ngonyan?

[Mga Hapot Para sa Pag-adal]

[Ritrato sa pahina 9]

An dakol na popular na magasin saka libro kontra sa satong Kristianong mga prinsipyo sa buhay

[Ritrato sa pahina 10]

An mga Kristiano puedeng magrinibayan nin ideya na dai man nagigin dogmatiko