Si Jehova Orog Kadakula Kisa Satong Puso

“IKINAOOGMA ni Jehova an mga natatakot sa saiya,” an isinurat kan salmista. Tunay nanggad, an Kaglalang naggagayagaya mantang naheheling an lambang saro kan saiyang mga lingkod na nagmamaigot na suportaran an saiyang matanos na mga pamantayan. Binebendisyonan nin Dios an mga maimbod sa saiya, pinaririgon an boot ninda, asin rinaranga sinda sa mga panahon nin pagkadesesperar. Sia nakaaaram na an mga nagsasamba sa saiya bakong sangkap, kaya sia realistiko sa linalaoman nia sa sainda.​—Salmo 147:11.

Tibaad bakong masakit para sa sato na maniwala na si Jehova may dakulang pagkamoot sa saiyang mga lingkod sa pankagabsan. Minsan siring, an nagkapira garo baga sobra an pagkapurisaw dapit sa sadiri nindang mga pagkukulang kaya sinda kombensido na nungka sindang mamomotan ni Jehova. “Ako grabe kabakong sangkap tanganing ako mamotan ni Jehova,” an tibaad ikonklusyon ninda. Siempre, igwa kita nin negatibong mga saboot paminsanminsan. Alagad an nagkapira garo baga nasa danay na pakikilaban sa mga pakamate nin kadaihan nin halaga.

Mga Pakamate nin Panluluya nin Boot

Kan mga panahon kan Biblia dakol na fiel na indibiduwal an nagkaigwa nin mga pakamate nin grabeng panluluya nin boot. Ikinaongis ni Job an buhay asin nakamate na sia binayaan nin Dios. Si Ana, na nagin ina ni Samuel, sarong beses napurisaw na gayo huli ta dai sia nagkakaaki asin mapait na nanangis. Si David “napadongdong . . . nin makuri,” asin si Epafrodito napurisaw huli ta an bareta dapit sa saiyang helang nagpamondo sa saiyang mga tugang.​—Salmo 38:​6; 1 Samuel 1:​7, 10; Job 29:​2, 4, 5; Filipos 2:​25, 26.

Kumusta man an mga Kristiano ngonyan? Tibaad inoolang nin helang, naglalangkaw na edad, o iba pang personal na mga kamugtakan an nagkapira na magibo an arog kan mawot ninda sa sagradong paglilingkod. Ini tibaad magin dahelan na isipon  ninda na nasusudyaanan sa sainda si Jehova asin an saindang mga kapagtubod. O tibaad daing ontok na basolon nin nagkapira an saindang sadiri huli sa nakaaging mga sala, na nagdududa na pinatawad na sinda ni Jehova. Tibaad an iba pa na hale sa pamilya na may masakit na mga kamugtakan kombensido na bako talaga sindang angay sa pagkamoot. Paano ini nagin posible?

An nagkapira nagdakula sa mga pamilya na an nangingibabaw na espiritu bakong pagkamoot kundi kaimotan, pagtuyatuya, asin takot. Sinda tibaad nungkang nakamidbid nin sarong ama na namomoot na marhay sa sainda, na naghahanap nin mga oportunidad na mag-omaw asin magparigon nin boot, na linilingawan an sadit na mga sala asin andam na magpatawad maski sa mas magabat na mga sala, asin na an mainit na pakikiiba nagpapangyari sa bilog na pamilya na makamateng tiwasay. Mantang sinda nungkang nagkaigwa nin mamomoton na ama digdi sa daga, tibaad masakit para sa sainda na masabotan kun ano an boot sabihon nin pagkaigwa nin sarong mamomoton na langitnon na Ama.

Halimbawa, si Fritz nagsurat: “An sakong pagkaniaki asin pagkahoben naimpluwensiahan na marhay kan bakong mamomoton na gawe-gawe kan sakong ama. * Nungka siang nagtao nin ano man na komendasyon, asin nungka akong nagin dayupot sa saiya. Sa katunayan, sa kadaklan na panahon, natatakot ako sa saiya.” Bilang resulta, si Fritz, na ngonyan labi nang 50 anyos, igwa pa giraray nin mga pakamate nin kakulangan. Asin ipinaliliwanag ni Margarette: “An sakong mga magurang mayong init asin bakong mamomoton. Kan pinonan ko an pag-adal sa Biblia, nasakitan akong imahinaron kun anong klase an sarong mamomoton na ama.”

An siring na mga pagmate, ano man an dahelan, puedeng mangahulogan na an satong paglilingkod sa Dios kun minsan motibado, sa pangenot bako nin pagkamoot, kundi sa dakulang kabtang nin pakamate nin kasalan o takot. An pinakamarahay niato garo baga bakong igo. An pagmawot na paogmahon si Jehova asin an satong mga kapagtubod tibaad magpangyari na kita makamate na dai ta nagigibo an gabos na mawot tang gibohon. Bilang resulta, tibaad dai niato maabot an satong mga pasohan, basolon niato an satong sadiri, asin magin desesperado.

Ano an puedeng gibohon? Tibaad kaipuhan niatong pagirumdomon an satong sadiri kun gurano kamadinamayon si Jehova. An saro na nakasabot sa mamomoton na aspektong ini kan personalidad nin Dios iyo si apostol Juan.

“An Dios Orog Kadakula Kisa Satong Puso”

Sa katapusan kan enot na siglo C.E., si Juan nagsurat sa saiyang mga kapagtubod: “Paagi kaini makaaaram kita na kita nasa katotoohan, asin tatawan niato nin kasiertohan an satong puso sa atubangan nia kun mapadapit sa kun sa ano man kita kondenaron kan satong puso, huli ta an Dios orog kadakula kisa satong puso asin nakaaaram kan gabos na bagay.” Taano ta isinurat ni Juan an mga tataramon na ini?​—1 Juan 3:​19, 20.

Aram nanggad ni Juan na posible para sa sarong lingkod ni Jehova na magsaboot na sia kondenado sa saiyang puso. Tibaad naeksperyensiahan mismo ni Juan an siring na mga pagmate. Bilang hoben na lalaki na iriniton an ugale, si Juan may pangyayari na ikinorehir ni Jesu-Cristo huli sa pagigin sobra kamapagkondenar sa pagtratar sa iba. Sa katunayan, tinawan ni Jesus si Juan asin an saiyang tugang na si Santiago “kan ikaduwang ngaran na Boanerges, na nangangahulogan Mga Aki nin Dagoldol.”​​—Marcos 3:​17; Lucas 9:​49-​56.

Kan sumunod na 60 taon, si Juan nagin maboot asin nagin sarong timbang, mamomoton, asin maheherakon na Kristiano. Kan isurat nia, bilang an huring nabubuhay na apostol, an saiyang enot na ipinasabong na surat, aram nia na si Jehova dai naniningil sa lambang sadit na sala kan saiyang mga lingkod. Imbes, sia mainit, madinamayon, buka an palad, asin maheherakon na Ama, na may hararom na pagkamoot sa gabos na namomoot sa saiya asin nagsasamba sa saiya sa katotoohan. Si Juan nagsurat: “An Dios pagkamoot.”​—1 Juan 4:8.

Si Jehova Naggagayagaya sa Satong Paglilingkod sa Saiya

Aram nin Dios an satong minanang mga kaluyahan asin pagkukulang, asin kinokonsiderar nia ini. “Sia mismo nakaaaram na gayo kan pagkaporma sa sato, na ginigirumdom na kita kabokabo,” an isinurat ni David. Nasasabotan ni Jehova an epekto kan satong pinaghalean sa kun ano kita. Sa katunayan, mas midbid nia kitang marhay kisa pakamidbid niato sa satong sadiri.​—Salmo 103:14.

Sia nakaaaram na an dakol sa sato nagmamawot  na magin napapalaen, alagad dai ta kayang daogon an satong mga pagkabakong sangkap. An satong situwasyon puedeng ikomparar sa situwasyon ni apostol Pablo, na nagsurat: “An marahay na minamawot ko dai ko ginigibo, kundi an maraot na hinahaboan ko iyo an ginigibo ko.” Kita gabos nasa kaparehong pakipagtusayan. Sa nagkapirang kamugtakan ini tibaad magbunga nin pagkaigwa niato nin puso na nagkokondenar sa sadiri.​—Roma 7:19.

Pirme nindong girumdomon ini: An mas importante kisa satong pagmansay sa satong sadiri iyo an kun paano kita minamansay ni Jehova. Basta maheling nia kita na naghihingoang paogmahon sia, an reaksion nia bako sanang naninigoan nin dikit kundi naggagayagaya. (Talinhaga 27:11) Minsan ngani garo baga medyo sadit an nagibo ta sa sadiri niatong pagheling, an satong pagigin andam asin marahay na motibo ikinaoogma niang marhay. Lampas pa sa nagibo ta an naheheling nia; namamansayan nia an gusto tang gibohon; aram nia an satong mga kamawotan. Nababasa ni Jehova an satong puso.​—Jeremias 12:​3; 17:10.

Halimbawa, an dakol sa mga Saksi ni Jehova masusopgon asin bakong paragirong na mga tawo na mas sunong dai mariparo. Sa mga siring, an paghuhulit kan maogmang bareta sa harong-harong tibaad magin nakapanluluya sa boot na angat. Pero, huling napahiro nin kamawotan na maglingkod sa Dios asin tabangan an saindang mga kataed, dawa an mga masusopgon nakanonood na dolokon an saindang mga kataed asin makipag-olay manongod sa Biblia. Tibaad magsaboot sinda na kadikit kan nagigibo ninda, asin tibaad haleon kaini an saindang kagayagayahan. An saindang puso tibaad magsuherir na bakong kapakipakinabang an saindang ministeryo sa publiko. Alagad seguradong naggagayagaya si Jehova sa dakulang paghihingoa na itinatao kan mga siring sa saindang paglilingkod. Dugang pa, dai ninda sierto kun noarin asin saen matubo, matalubo, asin mabunga an mga banhi nin katotoohan na isinabwag.​—Eclesiastes 11:​6; Marcos 12:​41-​44; 2 Corinto 8:12.

An ibang mga Saksi nagdudusa huli sa nagpapadagos na maluyang salud o naggugurang na. Para sa sainda, an regular na pag-atender sa Kingdom Hall may kaibang kolog asin kahaditan. An paghinanyog sa sarong pahayag manongod sa paghuhulit tibaad ipagirumdom sa sainda an dati nindang ginigibo asin an gusto pa nindang gibohon, minsan ngani napopogolan sinda kan kamatean. An mga siring tibaad nakokonsensia huli ta dai ninda nasusunod an hatol siring sa gusto nindang gibohon. Pero, seguradong pinahahalagahan na marhay ni Jehova an saindang kaimbodan asin pakatagal. Sagkod na sinda nagdadanay na maimbod, nungka niang malilingawan an saindang fiel na rekord.​—Salmo 18:​25; 37:28.

‘Tawan nin Kasiertohan an Satong Puso’

Kan aboton ni Juan an pagkagurang, siertong mahiwas na an saiyang pakasabot sa pagkamadinamayon nin Dios. Girumdoma na sia nagsurat: “An Dios orog kadakula kisa satong puso asin nakaaaram kan gabos na bagay.” Apuera kaini, inenkaminar kita ni Juan na ‘tawan nin kasiertohan an satong puso.’ Ano an boot sabihon ni Juan kan mga tataramon na iyan?

Segun sa Vine’s Expository Dictionary of Old and New Testament Words, an berbo sa Griego na trinadusir “tawan nin kasiertohan” nangangahulogan “gumamit nin pan-agyat, mangibabaw o madarang kumampi, makombensir.” Sa ibang pagtaram, tanganing matawan nin kasiertohan an satong puso, kaipuhan niato na madarang kumampi an satong puso, makombensir iyan na maniwala na kita namomotan ni Jehova. Paano?

Si Fritz, na nasambitan sa enotan kan artikulong ini, labi nang 25 taon na naglilingkod bilang sarong magurang sa saro kan mga kongregasyon kan Mga Saksi ni Jehova asin nakanompong na an personal na pag-adal puedeng magtao nin kasiertohan sa saiyang puso manongod sa pagkamoot ni Jehova. “Inaadalan ko an Biblia asin an satong mga publikasyon nin regular asin maingat. Tinatabangan ako kaini na dai magdanay an sakong atension sa nakaagi kundi magkaigwa nin malinaw na pakamansay sa satong makangangalas na ngapit. Kun beses, pinangingibabawan ako kan sakong nakaagi, asin nagsasaboot ako na nungka akong mamomotan nin Dios. Alagad, sa pankagabsan, nanonompongan ko na an regular na pag-adal pinaririgon an  sakong puso, dinudugangan an sakong pagtubod, asin tinatabangan ako na magdanay na magayagaya asin timbang.”

Totoo, tibaad dai mabago kan pagbasa asin paghorophorop sa Biblia an satong aktuwal na situwasyon. Pero, puedeng bagohon kaiyan an pagmansay niato sa satong situwasyon. An paglaog nin kaisipan hale sa Tataramon nin Dios sa satong puso nagtatabang sa sato na magin kapareho nia an satong pag-isip. Dugang pa, an pag-adal nagpapangyari na kita magtalubo sa pakasabot sa pagkamadinamayon nin Dios. Luway-luway na maaako ta na dai kita binabasol ni Jehova sa mga kamugtakan kan pagkaniaki ta, asin dai nia kita binabasol sa satong mga kamatean. Sia nakaaaram na an mga pagabat na dinadara kan dakol sa sato​—magin iyan man emosyonal o pisikal​—sa parate bako kita an mismong kaggibo, asin mamomoton niang kinokonsiderar ini.

Kumusta man si Margarette, na nasambitan kasubago? Kan saiyang mamidbid si Jehova, nagtao man sa saiya nin dakulang pakinabang an pag-adal sa Biblia. Sia, arog ni Fritz, kinaipuhan na bagohon an saiyang impresyon sa sarong ama. An pamibi nakatabang ki Margarette na pagsararoon an saiyang nanodan paagi sa pag-adal. “Sa primero ibinilang ko si Jehova na sarong dayupot na katood, huli ta mas dakol an sakong eksperyensia sa mamomoton na mga katood kisa sarong mamomoton na ama. Luway-luway, nanodan kong biyong ipahayag an sakong mga namamatean, pagduda, kahaditan, asin problema ki Jehova. Paorootro akong nakipag-olay sa saiya sa pamibi, na kadungan kaiyan sinusurusurugpon an gabos na bagong bagay na nanonodan ko manongod sa saiya, na garo mosaic. Paghaloyhaloy, nagtalubo an sakong pagmate para ki Jehova sagkod na ngonyan ako bihira nang nagkakaproblema mapadapit sa saiya bilang sakong mamomoton na Ama,” an sabi ni Margarette.

Pakabutas Hale sa Gabos na Kahaditan

Sagkod na yaon pa an maraot, daan na sistemang ini, mayo nin makalalaom na mawaran nin mga kahaditan. Para sa nagkapirang Kristiano ini nangangahulogan na an mga pakamate nin kahaditan o pagduda sa sadiri tibaad bumalik asin magcausa nin kapurisawan. Alagad makasisierto kita na aram ni Jehova an satong marahay na motibo asin an kahigosan ta sa paglilingkod sa saiya. Nungka niang malilingawan an pagkamoot na satong ipinaheheling para sa saiyang ngaran.​​—Hebreo 6:10.

Sa nagdadangadang na bagong daga na sakop kan Mesiyanikong Kahadean, an gabos na fiel na tawo puedeng maglaom na butasan sa mga pagabat kan sistema ni Satanas. Kanigoan na pakaginhawa iyan! Dangan maheheling niato nin orog pa an ebidensia kun gurano an pagkamadinamayon ni Jehova. Sagkod sa panahon na iyan, an gabos makasisierto na “an Dios orog kadakula kisa satong puso asin nakaaaram kan gabos na bagay.”​—1 Juan 3:20.

[Nota sa Ibaba]

[Blurb sa pahina 30]

Si Jehova bakong grabe kaisog na namomoon kundi sarong mainit, madinamayon, asin maheherakon na Ama

[Ritrato sa pahina 31]

An pag-adal sa Tataramon nin Dios nagtatabang sa sato na magin kapareho nia an satong pag-isip