An mga Ebanghelyo—Padagos an Debate

Totoo daw an pagkasaysay sa mga Ebanghelyo dapit sa pagkamundag ni Jesu-Cristo?

Itinao daw nia an Sermon sa Bukid?

Talaga daw na binuhay liwat si Jesus?

Totoo daw na sinabi nia: “Ako iyo an dalan asin an katotoohan patin an buhay”?—JUAN 14:6.

AN MGA bagay na arog kaini pinag-oorolayan nin mga 80 intelektuwal sa Seminar Dapit ki Jesus, na ginigibo nin duwang beses kada taon poon kan 1985. Sinimbag kan grupong ini nin mga intelektuwal an siring na mga hapot sa pambihirang paagi. An mga partisipante sa seminar naghoholog nin mga balota para sa kada mga tataramon na iinaatribwir ki Jesus sa mga Ebanghelyo. An pulang balota nagsasabi kan opinyon na an mga tataramon talagang sinabi ni Jesus. An rosas na balota nangangahulogan  na an mga tataramon kapareho kan posibleng sinabi ni Jesus. An abohon na balota nagpapaheling na an mga ideya puedeng kaagid kan mga ideya ni Jesus, alagad an mga tataramon bakong hale sa saiya. An itom na balota totalmenteng negatibo, na naniniwala na an mga tataramon kinua sa nahuring tradisyon.

Sa pagsunod sa paaging ini, sinayumahan kan mga partisipante sa Seminar Dapit ki Jesus an gabos na apat na punto na pinalataw bilang hapot sa kapinonan. Sa katunayan, sinda nagholog nin itom na balota para sa 82 porsiento kan mga tataramon na iinaatribwir ki Jesus sa mga Ebanghelyo. Segun sa sainda, 16 porsiento sana kan mga pangyayaring isinaysay manongod ki Jesus sa mga Ebanghelyo asin sa iba pang mga surat an minalataw na totoo.

An siring na mga kritisismo sa mga Ebanghelyo bako nang bago. An sarong pag-atake sa mga Ebanghelyo nagluwas kan 1774 kan an 1,400 na pahinang manuskrito ni Hermann Reimarus, sarong propesor sa mga lenguahe sa Oriente duman sa Hamburg, Alemania, ipinublikar pagkagadan nia. Segun dian inako ni Reimarus an grabeng mga pagduda manongod sa pagigin totoo sa kasaysayan kan mga Ebanghelyo. An saiyang mga konklusyon basado sa pag-analisar sa mga lenguahe asin sa garo baga mga kontradiksion na yaon sa apat na pagkasaysay sa mga Ebanghelyo kan buhay ni Jesus. Poon kaidto, an mga kritiko parateng nagpapahayag nin mga pagduda manongod sa pagigin totoo sa kasaysayan kan mga Ebanghelyo, na maski paano nagpapaluya sa kompiansa kan publiko sa mga surat na ini.

An pagkakapareho kan siring na mga intelektuwal iyo na ibinibilang ninda an pagkasaysay sa mga Ebanghelyo na relihiosong eroestorya na ipinasa nin laen-laen na indibiduwal. An parateng mga hapot na pinalalataw kan nagdududang mga intelektuwal iyo ini: Posible daw na an saindang mga paniniwala nagpangyari sa mga kagsurat kan apat na Ebanghelyo na dagdagan an aktuwal na pangyayari? An politika daw sa enot na Kristianong komunidad nagpangyari sa sainda na liwaton o dugangan an estorya dapit ki Jesus? Arin na mga kabtang kan mga Ebanghelyo an posibleng marhay na sadiosan na pagbareta imbes na pag-eroestorya sana?

An mga tawo na nagdakula sa sarong ateistiko o sekularisadong sosyedad naniniwala na an Biblia​—kabale na an mga Ebanghelyo​—sarong libro na pano nin mga leyenda asin eroestorya sana. An iba pa nakukubhanan sa kasaysayan kan Kakristianohan sa pagpabolos nin dugo, pan-aapi, dai pagkasararo, asin maraot na gawe-gawe. An siring na mga indibiduwal mayo nin naheheling na rason tanganing tawan nin ano man na atension an mga surat na sagrado para sa Kakristianohan. Iniisip ninda na an libro na nagpaluwas nin sarong mapagsaginsagin na relihion siertong basado sana sa daing kuentang mga pabula.

Ano sa paghona nindo? Maninigo daw nindong togotan an nagkapirang intelektuwal na nagkukuestion sa pagigin totoo sa kasaysayan kan mga Ebanghelyo na magin dahelan na magkaigwa man kamo nin mga pagduda sa saindong isip? Kun nakakadangog kamo nin mga pahayag manongod sa soboot pag-eroestorya sana kan mga kagsurat kan mga Ebanghelyo, maninigo daw nindong togotan ini na tanyogon an saindong kompiansa sa saindang mga surat? Maninigo daw na an maraot na rekord kan Kakristianohan magin dahelan na kuestionon nindo an pagkamasasarigan kan mga Ebanghelyo? Inaagda mi kamo na siyasaton an nagkapira sa mga katunayan.

[Ritrato sa pahina 4]

An mga Ebanghelyo daw igwa nin mga pabula o aktuwal na pangyayari?

[Credit Line]

Jesus Walking on the Sea/The Doré Bible Illustrations/Dover Publications

[Picture Credit Line sa pahina 3]

Retrato sa likod, pahina 3-5 asin 8: Sa karahayan nin boot kan Freer Gallery of Art, Smithsonian Institution, Washington, D.C.