Magkaigwa nin Pagtubod sa Makahulang Tataramon nin Dios!
Magkaigwa nin Pagtubod sa Makahulang Tataramon nin Dios!
“An makahulang tataramon orog pa niamong nasierto.”—2 PEDRO 1:19.
1, 2. Ano an enot na hula na isinurat kasuarin man, asin ano an saro sa mga hapot na pinalataw kaiyan?
SI Jehova an Burabod kan kaenot-enoteng hula na isinurat kasuarin man. Pagkatapos na magkasala si Adan asin Eva, an halas sinabihan nin Dios: “Bubugtakan ko nin pakikienemigo sa pag-oltanan mo asin kan babae saka sa pag-oltanan kan saimong banhi asin kan saiyang banhi. Lulugadon ka nia sa payo asin lulugadon mo sia sa bool.” (Genesis 3:1-7, 14, 15) Dakol na siglo an maagi bago lubos na masabotan an makahulang mga tataramon na idto.
2 An enot na hulang iyan nagtao nin tunay na paglaom sa makasalan na katawohan. Sa huri sinabi kan Kasuratan na si Satanas na Diablo “an enot na halas.” (Kapahayagan 12:9) Alagad siisay an magigin ipinanugang Banhi nin Dios?
Paghanap kan Banhi
3. Paano si Abel tuminubod sa enot na hula?
3 Bakong arog kan saiyang ama, an diosnon na si Abel tuminubod sa enot na hula. Malinaw na narealisar ni Abel na kakaipuhanon an pagpabolos nin dugo tanganing matahoban an kasalan. Kun siring, pinahiro sia nin pagtubod na magdolot nin atang na hayop na inako nin Dios. (Genesis 4:2-4) Pero, nagdanay na misteryo kun siisay an ipinanugang Banhi.
4. Anong panuga an itinao nin Dios ki Abraham, asin ano an ipinarisa kaiyan mapadapit sa ipinanugang Banhi?
4 Mga 2,000 na taon pakalihis kan kaaldawan ni Abel, tinawan ni Jehova an patriarkang si Abraham kan makahulang panugang ini: “Ika bebendisyonan ko nanggad asin padadakolon ko nanggad an saimong banhi siring kan mga bitoon sa kalangitan . . . Asin paagi sa saimong banhi an gabos na nasyon sa daga magbebendisyon nanggad kan saindang sadiri.” (Genesis 22:17, 18) Ikinonektar si Abraham kan mga tataramon na iyan sa kaotoban kan enot na hula. Ipinarisa kaiyan na an Banhi na paagi sa saiya paparaon an mga gibo ni Satanas malataw sa linahe ni Abraham. (1 Juan 3:8) “Huli sa panuga nin Dios dai [si Abraham] nag-urong-sulong sa kadaihan nin pagtubod” ni an ibang saksi ni Jehova bago kan mga Kristiano na “dai nagkamit kan kaotoban kan panuga.” (Roma 4:20, 21; Hebreo 11:39) Imbes, pinapagdanay ninda an pagtubod sa makahulang tataramon nin Dios.
5. Kiisay naotob an panuga nin Dios manongod sa Banhi, asin taano ta siring an simbag nindo?
5 Sinabi ni apostol Pablo kun siisay an ipinanugang Banhi nin Dios kan sia sumurat: “An mga panuga isinabi ki Abraham asin sa saiyang banhi. An sabi kaiyan, bakong: ‘Asin sa mga banhi,’ na arog kan sa kamugtakan nin dakol na siring, kundi arog kan sa kamugtakan nin saro: ‘Asin sa saimong banhi,’ na iyo si Cristo.” (Galacia 3:16) An Banhi na paagi sa saiya bebendisyonan kan mga nasyon an saindang sadiri dai kaiba an gabos na gikan ni Abraham. An mga gikan kan aki niang si Ismael asin kan mga aki nia ki Ketura dai ginamit sa pagbendisyon sa katawohan. An Banhi nin bendisyon nagdatong paagi sa aki niang si Isaac asin sa makoapo niang si Jacob. (Genesis 21:12; 25:23, 31-34; 27:18-29, 37; 28:14) Sinabi ni Jacob na an “mga banwaan” magigin makinuyog ki Silo kan tribo ni Juda, alagad sa huri an Banhi duman na sana sa linahe ni David. (Genesis 49:10; 2 Samuel 7:12-16) An mga Judio kan enot na siglo naglaom na may sarong tawo na madatong bilang an Mesiyas, o Cristo. (Juan 7:41, 42) Asin an hula nin Dios manongod sa Banhi naotob sa saiyang Aki, si Jesu-Cristo.
Luminataw an Mesiyas!
6. (a) Paano niato maninigong saboton an hula manongod sa 70 semana? (b) Kasuarin asin paano ‘an kasalan tinapos’ ni Jesus?
6 Si propeta Daniel may isinurat na mahalagang marhay na Mesiyanikong hula. Kan enot na taon ni Dario na Medo, narealisar nia na madali nang matapos an 70-taon na pagkagaba nin Jerusalem. (Jeremias 29:10; Daniel 9:1-4) Mantang namimibi si Daniel, an anghel na si Gabriel uminabot asin ihinayag na ‘pitong polong semana an itinalaan tanganing taposon an kasalan.’ An Mesiyas tataposon sa kabangaan kan ika-70 semana. An “pitong polong semana nin mga taon” nagpoon kan 455 B.C.E. kan si Hadeng Artajerjes I nin Persia ‘magpaluwas kan pagboot na itogdok giraray an Jerusalem.’ (Daniel 9:20-27; Moffatt; Nehemias 2:1-8) An Mesiyas maabot pakalihis nin 7 semana saka 62 na semana. An 483 na taon na ini poon 455 B.C.E. sagkod 29 C.E., kan si Jesus mabautismohan asin lahidan sia nin Dios bilang an Mesiyas, o Cristo. (Lucas 3:21, 22) ‘An kasalan tinapos’ ni Jesus paagi sa pagtao kan saiyang buhay bilang pantubos kan 33 C.E. (Marcos 10:45) Abaa karigon na mga dahelan na magkaigwa nin pagtubod sa makahulang tataramon nin Dios! *
7. Ginagamit an Kasuratan, sabihon kun paano inotob ni Jesus an Mesiyanikong hula.
7 An pagtubod sa makahulang tataramon nin Dios nagpapangyari sa sato na mamidbid kun siisay an Mesiyas. Sa dakol na Mesiyanikong hula na nasusurat sa Hebreong Kasuratan, an dakol direktang iinaplikar ki Jesus kan mga kagsurat kan Kristianong Griegong Kasuratan. Bilang ilustrasyon: Si Jesus ipinangaki nin sarong birhen sa Betlehem. (Isaias 7:14; Miqueas 5:2; Mateo 1:18-23; Lucas 2:4-11) Inapod sia hale sa Egipto, asin ginadan an mga omboy pagkamundag nia. (Jeremias 31:15; Oseas 11:1; Mateo 2:13-18) Pinasan ni Jesus an satong mga helang. (Isaias 53:4; Mateo 8:16, 17) Siring sa ihinula, luminaog sia sa Jerusalem na sakay sa pollino nin sarong asno. (Zacarias 9:9; Juan 12:12-15) An mga tataramon kan salmista naotob pagkapako ki Jesus kan paghirirasan kan mga soldados an saiyang gubing asin paagihon sa kapaladan an saiyang pan-irarom na gubing. (Salmo 22:18; Juan 19:23, 24) An bagay na an mga tolang ni Jesus dai binari asin na sia sinaksak nakaotob man sa hula. (Salmo 34:20; Zacarias 12:10; Juan 19:33-37) Pira sana ining halimbawa nin Mesiyanikong mga hula na iinaplikar ki Jesus nin mga kagsurat kan Biblia na pinasabngan nin Dios. *
Irukyaw an Mesiyanikong Hade!
8. Siisay an Suanoy kan mga Aldaw, asin paano naotob an hula na nasusurat sa Daniel 7:9-14?
8 Kan enot na taon ni Hadeng Belsasar nin Babilonya, tinawan ni Jehova nin pangatorogan asin pambihirang mga bisyon an propeta niang si Daniel. An enot na naheling kan propeta apat na darakulaon na hayop. Sinabi kan anghel nin Dios na sinda “apat na hade,” sa siring ipinaririsa na an mga iyan nagsisimbolisar sa sunod-sunod na kapangyarihan pankinaban. (Daniel 7:1-8, 17) Sumunod na naheling ni Daniel si Jehova, “an Suanoy kan mga Aldaw,” na nagtutukaw sa mamuraway na trono. Bakong paborable an paghokom sa mga hayop, hinale nia sa sainda an pamamahala asin linaglag nia an ikaapat na hayop. Dangan itinao an nagdadanay na pamamahala sa “mga banwaan, mga grupo nasyonal asin mga lenguahe” sa “saro na kaagid sa aki nin tawo.” (Daniel 7:9-14) Abaa kamakangangalas na hula may koneksion sa pagtukaw sa trono kan “Aki nin tawo,” si Jesu-Cristo, sa kalangitan kan taon 1914!—Mateo 16:13.
9, 10. (a) An manlaenlaen na kabtang kan imahen sa pangatorogan nagtokdo sa ano? (b) Paano nindo ipaliliwanag an kaotoban kan Daniel 2:44?
9 Aram ni Daniel na an Dios “naghahale nin mga hade asin nagpapamugtak nin mga hade.” (Daniel 2:21) May pagtubod ki Jehova, an “Parahayag nin mga hilom,” ibinuyagyag kan propeta an kahulogan kan pangatorogan ni Hadeng Nabucodonosor nin Babilonya na imahen na grabe kadakula. An manlaenlaen na kabtang kaiyan nagtokdo sa pagbangon asin pagbagsak nin mga kapangyarihan pankinaban na arog kan Babilonya, Medo-Persia, Grecia, asin Roma. Ginamit man nin Dios si Daniel sa pagsumaryo kan mga mangyayari sa kinaban sagkod sa satong panahon asin lihis pa.—Daniel 2:24-30.
10 “Sa mga aldaw kan mga hadeng idto,” sabi kan hula, “an Dios nin kalangitan mapatindog nin sarong kahadean na dai noarin man malalaglag. Asin an kahadean mismo dai itatao sa arin man na ibang banwaan. Iyan an maronot asin matapos kan gabos na ining kahadean, asin iyan mismo magdadanay sagkod sa mga panahon na daing talaan.” (Daniel 2:44) Kan “an itinalaan na mga panahon kan mga nasyon” matapos kan 1914, inestablisar nin Dios an langitnon na Kahadean sakop ni Cristo. (Lucas 21:24; Kapahayagan 12:1-5) Paagi sa kapangyarihan nin Dios an “gapong” Mesiyanikong Kahadean tinipak kaidto sa “bukid” kan unibersal na soberaniya nin Dios. Sa Armagedon tatamaan kan gapong iyan an imahen asin roronoton iyan sagkod na mapolbos. Bilang bukid na gobyerno na nakaaapektar sa “bilog na daga,” an Mesiyanikong Kahadean magdadanay sagkod lamang.—Daniel 2:35, 45; Kapahayagan 16:14, 16. *
11. An pagkaliwat kan itsura ni Jesus preliminaryong paheling kan ano, asin ano an epekto ki Pedro kan bisyon na idto?
11 Nasa isip an saiyang pamamahala sa Kahadean, sinabihan ni Jesus an saiyang mga disipulo: “Igwa nin nagkapira sa mga uya digdi na sa ano man na paagi dai magnanamit nin kagadanan sagkod na dai nguna ninda maheling an Aki nin tawo na minadatong sa saiyang kahadean.” (Mateo 16:28) Pakalihis nin anom na aldaw, iiniba ni Jesus si Pedro, Santiago, asin Juan sa sarong halangkaw na bukid na duman naliwat an itsura nia sa atubangan ninda. Mantang nalilindongan nin maliwanag na panganoron an mga apostol, ipinahayag nin Dios: “Ini an sakong Aki, an namomotan, na sakong inoyonan; maghinanyog kamo sa saiya.” (Mateo 17:1-9; Marcos 9:1-9) Kanigoan na preliminaryong paheling kan kamurawayan ni Cristo sa Kahadean! Bakong makangangalas na nasambitan ni Pedro an nakagugulat na bisyon na idto asin sinabi: “Bilang resulta an makahulang tataramon orog pa niamong nasierto.”—2 Pedro 1:16-19. *
12. Taano ta ini an nangorognang panahon na ipaheling an satong pagtubod sa makahulang tataramon nin Dios?
12 “An makahulang tataramon” minalataw na kaiba bako sanang an mga hula sa Hebreong Kasuratan manongod sa Mesiyas kundi pati an sinabi ni Jesus na sia madatong “na may kapangyarihan asin dakulang kamurawayan.” (Mateo 24:30) Binerepikar kan pagkaliwat kan itsura an makahulang tataramon manongod sa mamuraway na pagdatong ni Cristo na may kapangyarihan sa Kahadean. Madalion na, an pagkahayag nia na may kamurawayan mangangahulogan nin kalaglagan para sa mga daing pagtubod asin nin mga bendisyon para sa mga nagtutubod. (2 Tesalonica 1:6-10) An kaotoban kan hula sa Biblia nagpapatunay na ini na an “huring mga aldaw.” (2 Timoteo 3:1-5, 16, 17; Mateo 24:3-14) Bilang Pangenot na Parakastigo ni Jehova, si Miguel, na iyo si Jesu-Cristo, andam na taposon an maraot na sistemang ini nin mga bagay durante kan “dakulang kahorasaan.” (Mateo 24:21; Daniel 12:1) Kun siring, iyo na nanggad ini an panahon na ipaheling na kita may pagtubod sa makahulang tataramon nin Dios.
Papagdanayon an Pagtubod sa Makahulang Tataramon nin Dios
13. Ano an makatatabang sa sato na mapagdanay an satong pagkamoot sa Dios asin mapagdanay na buhay an satong pagtubod sa saiyang tataramon?
13 Segurado na napapalukso kaidto an puso niato kan enot niatong maaraman an mga kaotoban kan makahulang tataramon nin Dios. Alagad poon kaidto luminuya daw an satong pagtubod asin luminipot an satong pagkamoot? Logod na kita nungka na magin arog kan mga Kristiano sa Efeso na ‘binayaan an saindang pagkamoot kan enot.’ (Kapahayagan 2:1-4) Gurano man kita kahaloy nang naglilingkod ki Jehova, puede kitang mawaran kaiyan apuera sana kun satong ‘padagos na hahanapon nguna an kahadean nin Dios asin an saiyang katanosan’ tangani na makatipon kita nin kayamanan sa langit. (Mateo 6:19-21, 31-33) An utitok na pag-adal kan Biblia, regular na pakikikabtang sa Kristianong mga pagtiripon, asin maigot na paghuhulit kan Kahadean matabang sa sato na mapagdanay an satong pagkamoot ki Jehova, sa saiyang Aki, asin sa Kasuratan. (Salmo 119:105; Marcos 13:10; Hebreo 10:24, 25) Papagdadanayon man kaining buhay an satong pagtubod sa tataramon nin Dios.—Salmo 106:12.
14. Paano binabalosan an linahidan na mga Kristiano para sa saindang pagtubod sa makahulang tataramon ni Jehova?
14 Kun paanong naotob kan nakaagi an makahulang tataramon nin Dios, puede man kitang magkaigwa nin pagtubod sa ihinuhula kaiyan para sa ngapit. Halimbawa, saro nang tunay na bagay an presensia ni Cristo sa kamurawayan kan Kahadean, asin an linahidan na mga Kristiano na nagin fiel sagkod sa kagadanan nakaeksperyensia kan kaotoban kan makahulang panuga: “Sa makadaog itotogot ko na kumakan sa kahoy nin buhay, na yaon sa paraiso nin Dios.” (Kapahayagan 2:7, 10; 1 Tesalonica 4:14-17) Itinatao ni Jesus sa mga mapangganang ini an pribilehio na “kumakan sa kahoy nin buhay” sa langitnon na “paraiso nin Dios.” Pagkabuhay ninda liwat asin paagi ki Jesu-Cristo, sinda nagkakaigwa nin inmortalidad asin kadaihan nin kalapaan na itinatao ni Jehova, an “Hade sa panahon na daing sagkod, dai nin pagkalapa, dai naheheling, an solamenteng Dios.” (1 Timoteo 1:17; 1 Corinto 15:50-54; 2 Timoteo 1:10) Abaa karahay na balos sa saindang daing kagadanan na pagkamoot sa Dios asin marigon na pagtubod sa saiyang makahulang tataramon!
15. Kiisay ibinugtak an pundasyon kan “bagong daga,” asin sairisay an saindang kairibaiba?
15 Dai nahaloy pakabuhaya liwat kan nagadan na fiel na mga linahidan pasiring sa langitnon na “paraiso nin Dios,” an natatada kan espirituwal na Israel digdi sa daga kinalda sa “Dakulang Babilonya,” an pambilog na kinaban na imperyo nin falsong relihion. (Kapahayagan 14:8; Galacia 6:16) Sa sainda ibinugtak an pundasyon kan “bagong daga.” (Kapahayagan 21:1) Sa siring, ipinangaki an “sarong daga,” asin iyan ginibong sarong espirituwal na paraiso na maoswag ngonyan sa bilog na daga. (Isaias 66:8) Dian nagduduman ngonyan an mga kaburunyogan nin arog-karnerong kairibaiba kan espirituwal na Israel, “sa huring kabtang kan mga aldaw.”—Isaias 2:2-4; Zacarias 8:23; Juan 10:16; Kapahayagan 7:9.
An Ngapit nin Katawohan Ihinula sa Makahulang Tataramon nin Dios
16. Ano an mga tinatanaw kan maimbod na mga parasuportar sa mga linahidan?
16 Ano an mga tinatanaw kan maimbod na mga parasuportar sa mga linahidan? Sinda man may pagtubod sa makahulang tataramon nin Dios, asin an saindang paglaom yaon sa paglaog sa daganon na Paraiso. (Lucas 23:39-43) Duman mainom sinda sa nakasusustenir sa buhay na “salog kan tubig nin buhay” asin maoomayan sa “mga dahon kan mga kahoy” na nakatanom sa gilid kaiyan. (Kapahayagan 22:1, 2) Kun kamo may siring karahay na paglaom, logod na kamo padagos na magpaheling nin hararom na pagkamoot ki Jehova asin pagtubod sa saiyang makahulang tataramon. Makabilang logod kamo sa mga makaeeksperyensia kan daing sagkod na kagayagayahan nin buhay na daing katapusan sa Paraisong daga.
17. Anong mga bendisyon an kaiba sa buhay sa daganon na Paraiso?
17 Dai kayang biyong iladawan nin mga tawong bakong sangkap an buhay sa maabot na daganon na Paraiso, alagad an makahulang tataramon nin Dios nagtatao sa sato nin pakarorop sa mga bendisyon na nakatagama para sa makinuyog na katawohan sa panahon na iyan. Kun an Kahadean nin Dios dai nang kalaban na namamahala asin ginigibo na an saiyang kabotan digdi sa daga kun paano sa langit, mayo nin maisog na mga tawo—minsan ngani hayop—na “magibo nin maraot o manraraot.” (Isaias 11:9; Mateo 6:9, 10) An mga mahoyo mag-eerok sa daga, asin “manonompongan nanggad ninda an saindang nangongorog na dakulang kaogmahan sa nagsosopay na katoninongan.” (Salmo 37:11) Mayo na nin mga tawo na nagagadan sa gutom, ta “magkakaigwa nin abundang tipasi sa ibabaw kan daga; maglilipwas sa alitoktok kan kabukidan.” (Salmo 72:16) Mayo na nin mga pagluha huli sa kamondoan. Mawawara na an helang, asin pati kagadanan mawawara na. (Isaias 33:24; Kapahayagan 21:4) Maiimahinar daw nindo—mayo na nin mga doktor, mayo na nin mga bolong, mayo na nin mga ospital o mental na mga institusyon, mayo na nin mga lobong. Abaa karahay na mga tinatanaw!
18. (a) Sa ano tinawan nin garantiya si Daniel? (b) Ano an magigin “kabtang” ni Daniel?
18 Pati an pankagabsan na lolobngan nin katawohan hahalean nin laog mantang an mga kagadanan nasasalidahan nin mga pagkabuhay liwat. Iyan an paglaom kan matanos na tawong si Job. (Job 14:14, 15) Iyo man an propetang si Daniel, ta tinawan sia kan anghel ni Jehova kan nakararangang garantiya: “Kun para man sa saimo mismo, paduman ka sa katapusan; asin mapahingalo ka, alagad ika matindog para sa saimong kabtang sa katapusan kan mga aldaw.” (Daniel 12:13) Si Daniel fiel na naglingkod sa Dios sagkod sa katapusan kan saiyang buhay. Ngonyan sia nagpapahingalo sa kagadanan, alagad sia “matindog” sa “pagkabuhay liwat kan mga matanos” durante kan Milenyal na Paghade ni Cristo. (Lucas 14:14) Ano an magigin “kabtang” ni Daniel? Bueno, sa kaotoban kaiyan sa Paraiso, ipinaririsa kan hula ni Ezequiel na an gabos sa banwaan ni Jehova magkakaigwa nin lugar, na pati an daga hihirirason sa makatanosan asin aregladong paagi. (Ezequiel 47:13–48:35) Kaya si Daniel magkakaigwa nin lugar sa Paraiso, alagad bako sanang daga an kabtang nia duman. Kaiba dian an saiyang lugar sa katuyohan ni Jehova.
19. Ano an kaipuhan tanganing mabuhay sa daganon na Paraiso?
19 Kumusta man kamo asin an saindong kabtang? Kun kamo may pagtubod sa Tataramon nin Dios, an Biblia, posibleng marhay na naghihimuyawot kamo nin buhay sa daganon na Paraiso. Tibaad iniimahinar pa ngani nindo na kamo yaon na duman, na nagkakamit kan dakol na bendisyon kaiyan, nag-aasikaso sa daga, asin magayagayang sinasabat an mga gadan. Total, para talaga sa Paraiso an katawohan. An enot na mag-agom na tawo linalang nin Dios na mag-istar sa siring na lugar. (Genesis 2:7-9) Asin gusto nia na an makinuyog na mga tawo mag-istar sagkod lamang sa Paraiso. Magawe daw kamo oyon sa Kasuratan tangani na kamo makabilang sa binilyon na sa kahurihurihi mag-iistar sa Paraisong daga? Mapapaduman kamo kun kamo may tunay na pagkamoot sa satong langitnon na Ama, si Jehova, asin nagdadanay na pagtubod sa makahulang tataramon nin Dios.
[Mga Nota sa Ibaba]
^ par. 6 Helingon an kapitulo 11 kan Pay Attention to Daniel’s Prophecy! asin an “Seventy Weeks” sa Insight on the Scriptures, na ipinublikar kan Watchtower Bible and Tract Society of New York, Inc.
^ par. 7 Helingon an “All Scripture Is Inspired of God and Beneficial,” pahina 343-4, na ipinublikar kan Watchtower Bible and Tract Society of New York, Inc.
^ par. 10 Helingon an kapitulo 4 asin 9 kan librong Pay Attention to Daniel’s Prophecy!
^ par. 11 Helingon an artikulo na may titulong “Tawan nin Atension an Makahulang Tataramon nin Dios,” na luminuwas sa Abril 1, 2000 na An Torrengbantayan.
Ano an Isisimbag Nindo?
• Ano an enot na hula, asin siisay an ipinanugang Banhi?
• Ano an nagkapirang Mesiyanikong hula na naotob ki Jesus?
• Paano maootob an Daniel 2:44, 45?
• An makahulang tataramon nin Dios nagtotokdo sa anong ngapit para sa makinuyog na katawohan?
[Mga Hapot Para sa Pag-adal]
[Ritrato sa pahina 18]
Naglalaom daw kamong mabuhay sa daganon na Paraiso?