Kita an Klase na May Pagtubod

Pagpatalubo nin Pagtubod Paagi sa Pag-adal sa Biblia sa India

POON sa nakagugulat, natatahoban nin niebe na Kabukidan nin Himalaya sa amihanan sagkod sa maharasahas na baybayon kan Dagat Indio sa timog, an India sarong nasyon nin pagkalaenlaen, sa geograpiya asin sa relihion. Sa populasyon kaiyan na labing sarong bilyon, mga 83 porsiento an Hindu, 11 porsiento an Muslim, asin an natatada kompuesto sa pangenot nin mga Kristiano sa ngaran, Sikh, Budista, asin Jain. An gabos may katalingkasan sa pagsamba. “An relihion may mahalagang kabtang sa pamumuhay nin mga Bombay,” an sabi kan The World Book Encyclopedia.

An pamumuhay na kaoyon kan saindang Kristianong pagtubod angay na paglaladawan sa Mga Saksi ni Jehova, na an kabilangan labing 21,200 sa India. Arog kan saindang mga kaibaiba sa espirituwal sa ibang kabtang kan kinaban, an mga Saksi sa India minamansay na sarong pribilehio na tabangan an saindang mga kataed na pataluboon an sarong makosog na pagtubod sa Tataramon nin Dios, an Banal na Biblia. (2 Timoteo 3:​16, 17) Estudyare kun paano an sarong pamilya sa Chennai sa timog nin India nagkaigwa nin kaaraman sa katotoohan sa Biblia.

Bago ninda nakaasosyar an Mga Saksi ni Jehova, an pamilyang ini aktibo sa Katolikong mga mobimiento karismatiko, na naghihingakong nakaheheling nin mga bisyon, nagtataram nin laen-laen na tataramon, asin pinaoomayan an mga may helang. Sinda prominente sa iglesia asin sa komunidad, na inaapod pa ngani nin mga tawo an nagkapirang miembro kan pamilya na “swami,” na nangangahulogan “kagurangnan.” Dangan sarong aldaw dinalaw nin sarong Saksi an pamilya asin ipinaheling sa sainda sa Biblia na si Jesus iyo an Aki nin Dios, bakong an Makakamhan sa gabos na Dios, siring kan lakop na pinaniniwalaan. Ipinaheling man kan Saksi sa sainda na an ngaran nin Dios Jehova asin na an katuyohan ni Jehova para sa daga iyo na gibohon iyan na sarong magayon na paraiso.​—Salmo 83:​18; Lucas 23:​43; Juan 3:16.

Huli ta iginagalang ninda an Tataramon nin Dios asin nagustohan ninda an saindang nadangog, nag-oyon an mga miembro kan pamilyang ini na regular na makipag-adal sa Biblia sa Mga Saksi ni Jehova. Ini nagbunga nin pag-olog-olog kan saindang mga kamidbid sa iglesia. Minsan siring, an pamilya nagdanay na determinadong ipadagos an saindang pag-adal sa Biblia. Mantang nadudugangan an saindang kaaraman asin nagkokosog an saindang pagtubod, pinondo ninda an saindang falsong relihiosong mga kaugalean. Ngonyan, an tolong miembro kan pamilyang ini maigot, bautisadong mga Saksi, asin an ina naglilingkod bilang auxiliary payunir kun posible.

An Pagtubod na Kaipuhan Tanganing Mapaglabanan an Kabiadian

Si Sunder Lal, sarong hoben na lalaki na nag-eerok sa sarong baryo sa Punjab, nangangaipo nin dakulang marhay na pagtubod asin kosog nin boot tanganing ikahiras sa iba an maogmang bareta kan Kahadean nin Dios. (Mateo 24:14) An sarong dahelan, binayaan nia an paniniwala sa dakol na dios kan saiyang pamilya asin kan baryo tanganing sambahon an tunay na Dios, si Jehova. Saro pa, si Sunder Lal mayo nin mga tabay.

Sagkod kan 1992, an buhay ni Sunder Lal rutina na sana. Sia nagtrabaho bilang katabang nin sarong doktor asin nakiayon sa saiyang pamilya sa pagsamba sa manlaenlaen na dios na ginigiyahan kan pinili nindang guru. Dangan sarong banggi, natumba sia mantang minabalyo sa riles. Naligis sia nin sarong tren asin naputol an duwa niang tabay poon sa paa. Minsan ngani sia nabuhay, laglag na an saiyang kinaban. Siempre, si Sunder Lal nagmondo nin makuri asin nagplano pa nganing maghugot. An saiyang pamilya mapagsuportar,  alagad an saiyang ngapit garo baga dai nang esperansa.

Dangan sinongko si Sunder Lal nin saro sa mga Saksi ni Jehova asin ipinaheling sa saiya sa Biblia na an Dios nanuga na gigibohon na nakaoogmang marhay na paraiso an daga asin na matao nin sangkap na salud sa gabos na namomoot asin natatakot sa saiya. Si Sunder Lal ominoyon na mag-adal sa Biblia, asin sa laog nin sarong taon sia maigot na nag-adal. Inimbitaran sia na umatender sa Kristianong mga pagtiripon asin sa katapustapusi uminiba na nakasuno sa likod nin bisikleta nin sarong katood. Minsan ngani idto makolog na pagbiahe, dakula an balos. An saiyang nanodan sa saiyang personal na pag-adal sa Biblia napatunayan kan mamidbid nia an iba na tunay nanggad na naniniwala sa mga panuga sa Tataramon nin Dios asin namumuhay kaoyon sa mga katokdoan kan Biblia.

Pinonan ni Sunder Lal na ihiras an maogmang bareta sa saiyang mga kataed, asin kan 1995 sia nabautismohan. Kan primero, nakikabtang sia sa ministeryo na ginuguyod nia an saiyang sadiri sa pagharongharong sa saiyang baryo, na iyo an saiyang normal na paagi tanganing makaabot sa gusto niang dumanan. Alagad ngonyan igwa sia nin regalo hale sa saiyang mga tugang sa espirituwal​—sarong traysikel na pinasadya tangani na “mapedalan” nin kamot. Sa tabang kan saiyang traysikel, sia ngonyan mas independiente na asin kaya nang magbiahe nin 12 kilometros na sia sana tanganing makaatender sa mga pagtiripon kan kongregasyon. Kun beses sia nagbibisikleta nin solo durante nin grabeng kosog na tig-oran; sa ibang panahon an temperatura naglalabing 43° Sentigrado.

Apuera sa pag-atender sa mga pagtiripon, si Sunder Lal namamayo nin dakol na pag-adal sa Biblia sa iba na nagmamawot nin tabang na pataluboon an makosog na pagtubod sa tunay na Dios, si Jehova. Sa katunayan, an pito sa dati niang mga inaadalan sa Biblia bautisado na ngonyan, pareho kan tolong iba pa na nanompongan nia alagad inadalan sa Biblia kan mga kapwa Saksi.

An “pagtubod,” segun sa Biblia “bakong sadiri nin gabos na tawo.” (2 Tesalonica 3:2) Alagad para duman sa mga “may tamang tendensia sa buhay na daing katapusan,” an regular na pag-adal kan Tataramon nin Dios puedeng pataluboon an makosog na pagtubod. (Gibo 13:48) An siring na pag-adal pinakikinang man an mga mata na may paglaom na sarong makangangalas na ngapit​—bagay na dian an nagdadakol na kabilangan nin tawo sa India nagsasagibo nin pagtubod.

[Mapa sa pahina 30]

(Para sa aktuwal na format, hilingon an publikasyon)

AFGANISTAN

PAKISTAN

NEPAL

BUTAN

TSINA

BANGLADES

MYANMAR

LAOS

TAILANDIA

VIETNAM

CAMBODIA

SRI LANKA

INDIA

[Credit Line]

Mountain High Maps® Copyright © 1997 Digital Wisdom, Inc.