Papagdanayon na Maliwanag an Saindong “Paglaom sa Kaligtasan”!
Papagdanayon na Maliwanag an Saindong “Paglaom sa Kaligtasan”!
“Isolog . . . bilang takop sa payo an paglaom sa kaligtasan.”—1 TESALONICA 5:8.
1. Paano “an paglaom sa kaligtasan” nakatatabang sa pakatagal?
AN PAGLAOM na maligtas puedeng makatabang sa saro na magpadagos dawa sa pinakamakamomondong mga kamugtakan. An sarong biktima nin pagkalunod nin barko na sakay sa barsang salbabida mas haloy na makatatagal kun aram nia na madali nang umabot an tabang. Siring man, sa laog nin rinibong taon, an paglaom sa “pagliligtas ni Jehova” nakasustenir sa mga lalaki asin babaeng may pagtubod sa mga panahon nin kapurisawan, asin an paglaom na ini nungka na nagbunga nin pagkadesganar. (Exodo 14:13; Salmo 3:8; Roma 5:5; 9:33) Ibinaing ni apostol Pablo “an paglaom sa kaligtasan” sa “takop sa payo” kan espirituwal na pangalasag nin Kristiano. (1 Tesalonica 5:8; Efeso 6:17) Iyo, an satong pagigin kompiado na ililigtas kita nin Dios nagpoprotehir sa satong abilidad sa pag-iisip, na tinatabangan kita na papagdanayon an toltol na pag-iisip sa ibong nin kasakitan, oposisyon, asin sugot.
2. Sa anong mga paagi na “an paglaom sa kaligtasan” pundamental sa tunay na pagsamba?
2 “An paglaom mapadapit sa ngapit bakong karakteristiko kan paganong kinaban,” an kinaban na nasa palibot kan mga Kristiano kan enot na siglo, sabi kan The International Standard Bible Encyclopedia. (Efeso 2:12; 1 Tesalonica 4:13) Pero, “an paglaom sa kaligtasan” pundamental na elemento nin tunay na pagsamba. Taano man? Enot, an kaligtasan kan mga lingkod ni Jehova konektado sa saiyang sadiring ngaran. An salmistang si Asaf namibi: “Tabangi kami, O Dios nin samong kaligtasan, para sa kamurawayan kan saimong ngaran; asin kaldaha kami.” (Salmo 79:9; Ezequiel 20:9) Dugang pa, an pagkaigwa nin kompiansa sa ipinanugang mga bendisyon ni Jehova mahalagang marhay sa pagkaigwa nin marahay na relasyon sa saiya. Arog kaini an pagkasabi dian ni Pablo: “Kun dai nin pagtubod imposible na mapanigoan sia nin marhay, huli ta an minadolok sa Dios kaipuhan na magtubod na sia iyo nanggad asin na sia nagigin an parabalos sa mga maigot na naghahanap sa saiya.” (Hebreo 11:6) Apuera kaini, ipinaliwanag ni Pablo na an kaligtasan nin mga nagsolsol sarong mayor na dahelan kan pagdigdi ni Jesus sa daga. Sinabi nia: “Fiel asin maninigong lubos na akoon an pagsabi na si Cristo Jesus napadigdi sa kinaban tanganing magligtas nin mga parakasala.” (1 Timoteo 1:15) Asin inapod ni apostol Pedro an kaligtasan na ‘kasagkoran [o, bunga] kan satong pagtubod.’ (1 Pedro 1:9) Malinaw nanggad, tama na maglaom sa kaligtasan. Alagad ano man nanggad an kaligtasan? Asin ano an kaipuhan tanganing kamtan iyan?
Ano an Kaligtasan?
3. Anong klaseng kaligtasan an naeksperyensiahan kan mga lingkod ni Jehova kan suanoy na mga panahon?
3 Sa Hebreong Kasuratan, an “kaligtasan” parateng nangangahulogan nin pagsalbar o pagkalda sa pan-aapi o sa madahas, dai pa napapanahon na kagadanan. Halimbawa, inaapod si Jehova na “Paratao nin dudulagan,” sinabi ni David: “An Dios ko iyo an sakong gapo. . . . An sakong lugar na dudulagan, sakong Paraligtas; sa kadahasan iliniligtas mo ako. Sa Saro na dapat omawon, si Jehova, maapod ako, asin sa sakong mga enemigo ililigtas ako.” (2 Samuel 22:2-4) Aram ni David na si Jehova naghihinanyog kun nag-aarang nin tabang an Saiyang fiel na mga lingkod.—Salmo 31:22, 23; 145:19.
4.May anong paglaom sa buhay sa ngapit an mga lingkod ni Jehova kaidtong bago kan mga Kristiano?
4 An mga lingkod ni Jehova kaidtong bago kan mga Kristiano may paglaom man sa buhay sa ngapit. (Job 14:13-15; Isaias 25:8; Daniel 12:13) Sa katunayan, an dakol sa mga panuga nin pagsalbar na yaon sa Hebreong Kasuratan makahula sa mas dakulang kaligtasan—saro na nagbubunga nin buhay na daing katapusan. (Isaias 49:6, 8; Gibo 13:47; 2 Corinto 6:2) Kan aldaw ni Jesus, dakol na Judio an naglaom sa buhay na daing katapusan, alagad habo nindang akoon si Jesus bilang an nagdedeterminar na bagay sa pagkamit ninda kan saindang paglaom. Sinabihan ni Jesus an mga namomoon sa relihion kan saiyang panahon: “Sinisiyasat nindo an Kasuratan, huli ta naghohona kamo na paagi kaiyan magkakaigwa kamo nin buhay na daing katapusan; asin an mga ini mismo an nagpapatotoo dapit sa sako.”—Juan 5:39.
5. Ano an kahulogan nin kaligtasan sa katapustapusi?
5 Paagi ki Jesus, ihinayag nin Dios an bilog na kahulogan nin kaligtasan. Kaiba dian an pagkasultar sa pamamahala nin kasalan, sa kaoripnan sa falsong relihion, sa kinaban na kontrolado ni Satanas, sa takot sa tawo, asin pati sa takot sa kagadanan. (Juan 17:16; Roma 8:2; Colosas 1:13; Kapahayagan 18:2, 4) Sa katapustapusi, para sa fiel na mga lingkod nin Dios, an pagliligtas nin Dios nangangahulogan bako sanang nin pagkakalda sa pan-aapi asin kapurisawan kundi siring man kan oportunidad na magkamit nin buhay na daing katapusan. (Juan 6:40; 17:3) Itinokdo ni Jesus na para sa “sadangoton na aripompon,” an kaligtasan nangangahulogan kan pagkabuhay ninda liwat pasiring sa langitnon na buhay tanganing makaibanan ni Cristo sa pamamahala sa Kahadean. (Lucas 12:32) Para sa iba sa katawohan, an kaligtasan nangangahulogan nin pagbabalik sa sangkap na buhay asin sa relasyon sa Dios na nakamtan ni Adan asin Eva sa tatamnan nin Eden bago sinda nagkasala. (Gibo 3:21; Efeso 1:10) An buhay na daing katapusan sa siring na paraisong mga kamugtakan iyo an orihinal na katuyohan nin Dios para sa katawohan. (Genesis 1:28; Marcos 10:30) Pero, paano posible an pagbabalik sa siring na mga kamugtakan?
An Basehan nin Kaligtasan—An Pantubos
6, 7. Ano an kabtang ni Jesus sa satong kaligtasan?
6 An daing katapusan na kaligtasan posible sana paagi sa pantubos na atang ni Cristo. Taano? Ipinaliliwanag kan Biblia na kan magkasala si Adan, “ipinabakal” nia an saiyang sadiri asin an gabos niang gikan sa ngapit, pati kita, sa kasalan—sa siring na paagi kinaipuhan an pantubos tangani na an katawohan magkaigwa nin balidong paglaom. (Roma 5:14, 15; 7:14) An bagay na an Dios matao nin pantubos para sa bilog na katawohan ipinanganino kan atang na mga hayop sa irarom kan Ley ni Moises. (Hebreo 10:1-10; 1 Juan 2:2) Si Jesus an saro na an atang nakaotob sa makahulang mga ladawan na idto. Ipinaisi kan anghel ni Jehova bago namundag si Jesus: “Ililigtas nia an saiyang banwaan sa saindang mga kasalan.”—Mateo 1:21; Hebreo 2:10.
7 Si Jesus milagrosong ipinangaki kan birhen na si Maria, asin bilang an Aki nin Dios, sia dai nagmana nin kasalan ki Adan. An bagay na ini kaiba kan saiyang iginawe na sangkap na pagkafiel nagtao sa buhay nia kan halagang kaipuhan tanganing mabalukat an katawohan sa kasalan asin kagadanan. (Juan 8:36; 1 Corinto 15:22) Bakong arog nin gabos na ibang tawo, si Jesus dai kondenadong magadan huli sa kasalan. Sia tuyong nagdigdi sa daga tanganing “itao an saiyang kalag bilang pantubos na karibay nin dakol.” (Mateo 20:28) Huling nagibo na iyan, an binuhay na liwat asin natutukaw na sa tronong si Jesus nasa posisyon na magtao nin kaligtasan sa gabos na nakaootob sa mga kahagadan nin Dios.—Kapahayagan 12:10.
Ano an Kaipuhan Tanganing Magkamit nin Kaligtasan?
8, 9. (a) Paano sinimbag ni Jesus an hapot nin sarong mayaman, hoben na namamahala manongod sa kaligtasan? (b) Paano ginamit ni Jesus an okasyon na ini na tokdoan an saiyang mga disipulo?
8 Sarong beses, hinapot si Jesus nin sarong mayaman, hoben na namamahalang Israelita: “Ano an dapat kong gibohon tanganing magmana nin buhay na daing katapusan?” (Marcos 10:17) An hapot nia tibaad nagpapabanaag kan komun na Judiong kaisipan kaidtong panahon nia—na an Dios may hinahagad na marahay na mga gibo asin na paagi sa paggibo nin igo sa mga gibong iyan, an kaligtasan maaako nin saro bilang bayad hale sa Dios. Alagad an siring na pormal na debosyon puedeng gumikan sa maimot na mga motibo. An siring na mga gibo dai nakatao nin seguradong paglaom sa kaligtasan, ta mayo nin tawong bakong sangkap na talagang makaaabot sa mga pamantayan nin Dios.
9 Bilang simbag sa hapot kan tawo, ipinagirumdom sana sa saiya ni Jesus na maninigo niang kuyogon an mga togon nin Dios. Listong sinierto ki Jesus kan hoben na namamahala na an mga iyan inotob nia poon sa saiyang pagkaniaki. An simbag nia nagpahiro ki Jesus na makamate nin pagkamoot sa saiya. Sinabi sa saiya ni Jesus: “Sarong bagay an kulang sa saimo: Lakaw, pabakalan an mga bagay na nasa saimo asin tawan sa mga dukha, asin magkakaigwa ka nin kayamanan sa langit, asin madia sumunod ka sa sako.” Minsan siring, an hoben na lalaki naghaleng mamondo, “ta dakol siang rogaring.” Pakatapos kaiyan idinoon ni Jesus sa saiyang mga disipulo na an sobrang pagkamuya sa mga rogaring kan kinaban na ini nakaoolang sa pagkamit nin kaligtasan. Idinugang nia na mayo nin magkakamit nin kaligtasan paagi sa sadiri niang mga paghihingoa. Alagad pinakosog liwat ni Jesus an boot ninda: “Kun sa tawo iyan imposible, alagad bakong sa Dios, huli ta an gabos na bagay posible sa Dios.” (Marcos 10:18-27; Lucas 18:18-23) Paano posible an kaligtasan?
10. Anong mga kondisyon an dapat na maabot niato tanganing makamtan an kaligtasan?
10 An kaligtasan regalo hale sa Dios, alagad iyan dai automatikong minaabot. (Roma 6:23) May nagkapirang pundamental na mga kondisyon na dapat na maabot nin lambang indibiduwal tanganing makualipikar para sa regalong iyan. Sinabi ni Jesus: “An Dios namoot na gayo sa kinaban na itinao nia an saiyang Aking bugtong, tanganing an lambang naggigibo nin pagtubod sa saiya dai mapahamak kundi magkaigwa nin buhay na daing katapusan.” Asin idinagdag ni apostol Juan: “An naggigibo nin pagtubod sa Aki igwa nin buhay na daing katapusan; an nakikisuway sa Aki dai makakaheling nin buhay.” (Juan 3:16, 36) Malinaw nanggad, hinahagad nin Dios an pagtubod asin pagkuyog sa lambang indibiduwal na naglalaom na magkamit nin daing katapusan na kaligtasan. An lambang saro dapat na magdesisyon na akoon an pantubos asin sumunod sa mga lakad ni Jesus.
11. Paano makakamtan nin sarong tawong bakong sangkap an pag-oyon ni Jehova?
11 Mantang kita bakong sangkap, bakong natural na inklinasyon para sa sato na kumuyog asin imposible para sa sato na makakuyog sa sangkap na paagi. Kaya ngani itinao ni Jehova an pantubos tanganing mabayadan an satong mga kasalan. Minsan siring, dapat na padagos kitang maghingoa na mamuhay kaoyon kan mga dalan nin Dios. Arog kan sabi ni Jesus sa mayaman, hoben na namamahala, dapat na otobon niato an mga togon nin Dios. An paggibo kaiyan nagbubunga bako sanang kan pag-oyon nin Dios kundi nin dakula man na kagayagayahan, ta “an saiyang mga togon dai nakapagagabat”; an mga iyan “kaginhawahan.” (1 Juan 5:3; Talinhaga 3:1, 8) Pero, bakong pasil na papagdanayon an paglaom sa kaligtasan.
“Makipaglaban nin Maigot Para sa Pagtubod”
12. Paano an paglaom sa kaligtasan nagpapakosog sa sarong Kristiano na labanan an inmoral na mga sugot?
12 Boot kan disipulong si Judas na sumurat sa enot na mga Kristiano manongod sa “kaligtasan na pinangangaptan [ninda] gabos.” Minsan siring, inobligar sia kan nangingibabaw na maraot na kamugtakan sa moral na hatolan an saiyang mga tugang na “makipaglaban nin maigot para sa pagtubod.” Iyo, tanganing magkamit nin kaligtasan bakong igo na magkaigwa nin pagtubod, magdanay sa tunay na Kristianong pagtubod, asin kumuyog kun marahay an dalagan kan gabos. An satong debosyon ki Jehova dapat na may igong kosog na matabang sa sato na labanan an mga sugot asin inmoral na mga impluwensia. Pero, an mga pagpalabilabi asin salang paggamit sa sekso, dai paggalang sa autoridad, mga pagkabaranga, asin pagduda nagkakaigwa kaidto nin grabeng epekto sa espiritu kan kongregasyon kaidtong enot na siglo. Tanganing matabangan sinda na malabanan an siring na mga tendensia, sinadol ni Judas an mga kapwa nia Kristiano na papagdanayon na malinaw sa isip an saindang obheto: “Mga namomotan, paagi sa pagpakosog sa saindo man sana sa saindong kabanalbanaleng pagtubod, asin pamimibi na igwa kan banal na espiritu, magdanay kamo sa pagkamoot nin Dios, mantang kamo naghahalat sa pagkaherak kan satong Kagurangnan na si Jesu-Cristo na nasa isip an buhay na daing katapusan.” (Judas 3, 4, 8, 19-21) An paglaom na magkamit nin kaligtasan makapakokosog sa sainda sa saindang pakikilaban na magdanay na malinig sa moral.
13. Paano niato ikapaheheling na dai niato nalipasan an katuyohan kan dai na kutana maninigong kabootan nin Dios?
13 Hinahagad ni Jehova Dios an arogan na gawe-gawe sa moral sa mga tatawan nia nin kaligtasan. (1 Corinto 6:9, 10) Minsan siring, an pangangapot sa moral na mga pamantayan nin Dios dai nangangahulogan nin pagigin mapaghusgar sa iba. Bako kita an madesisyon sa daing sagkod na kaaabtan kan satong mga kapwa. Imbes, an Dios an magibo kaiyan, arog kan sabi ni Pablo sa mga Griego sa Atenas: “Sia nagtalaan nin aldaw na katuyohan niang hokoman an ineerokan na daga sa katanosan paagi sa sarong lalaki na saiyang ninombrahan”—si Jesu-Cristo. (Gibo 17:31; Juan 5:22) Kun kita namumuhay komporme sa pagtubod sa pantubos ni Jesus dai kita kaipuhan na matakot sa nagdadangadang na aldaw nin paghokom. (Hebreo 10:38, 39) An importante iyo na dapat na nungka niatong “akoon an dai na kutana maninigong kabootan nin Dios [an pakiulian niato sa saiya paagi sa pantubos] asin lipasan an katuyohan kaiyan” paagi sa pagtogot na kita masugotan sa salang kaisipan asin gibo. (2 Corinto 6:1) Saro pa, paagi sa pagtabang sa iba na magkamit nin kaligtasan, ipinaheheling niato na dai niato nalipasan an katuyohan kan pagkaherak nin Dios. Paano niato sinda matatabangan?
Paghiras sa Iba kan Paglaom sa Kaligtasan
14, 15. Siisay an iinasignar ni Jesus na magpahayag kan maogmang bareta nin kaligtasan?
14 Kinokotar an propetang si Joel, nagsurat si Pablo: “An gabos na nag-aapod sa ngaran ni Jehova maliligtas.” Dangan idinugang nia: “Minsan siring, paano sinda mag-aapod sa saiya na dai ninda tinutubod? Paano man sinda matubod sa saiya na dai ninda nadangog? Paano man sinda makadadangog kun mayo nin parahulit?” Mga pirang bersikulo pakalihis kaini, sinabi ni Pablo na an pagtubod dai basta na sana minaabot; imbes, iyan “minasunod sa bagay na nadangog,” an boot sabihon, an “tataramon manongod ki Cristo.”—Roma 10:13, 14, 17; Joel 2:32.
15 Siisay an madara sa mga nasyon kan “tataramon manongod ki Cristo”? Itinao ni Jesus an gibohon na iyan sa saiyang mga disipulo—an mga natokdoan na kan “tataramon” na iyan. (Mateo 24:14; 28:19, 20; Juan 17:20) Kun kita nagpapartisipar sa paghuhulit kan Kahadean asin paggibo nin mga disipulo, ginigibo mismo niato an isinurat ni apostol Pablo, na ngonyan kinokotar si Isaias: “Abaang gayon kan mga bitis kan mga nagpapahayag kan maogmang bareta nin marahay na mga bagay!” Dawa kun dakol an dai nag-aako kan maogmang bareta na dara niato, an satong mga bitis ‘magayon’ pa man giraray para ki Jehova.—Roma 10:15; Isaias 52:7.
16, 17. Anong duwang katuyohan an naootob kan satong paghuhulit?
16 An pag-otob sa sugong ini duwang mahalagang katuyohan an nahahaman. Enot, an maogmang bareta dapat na ihulit tangani na mabantog sa kadakulaan an ngaran nin Dios asin maaraman kan mga gusto nin kaligtasan kun saen madolok. Nasabotan ni Pablo an aspektong ini kan sugo. Sabi nia: “Sa katunayan, si Jehova nagboot sa samo sa mga tataramon na ini, ‘Ninombrahan taka bilang ilaw kan mga nasyon, tanganing ika magin kaligtasan sagkod sa kaporoporohi kan daga.’” Huli kaini, bilang mga disipulo ni Cristo, an lambang saro sa sato dapat na magkaigwa nin kabtang sa pagdara sa mga tawo kan mensahe nin kaligtasan.—Gibo 13:47; Isaias 49:6.
17 Ikaduwa, an paghuhulit kan maogmang bareta nagbubugtak kan pundasyon para sa matanos na paghokom nin Dios. Manongod sa paghokom na iyan, sinabi ni Jesus: “Kun an Aki nin tawo dumatong na sa saiyang kamurawayan, asin an gabos na anghel kaibanan nia, dangan sia matukaw sa saiyang mamuraway na trono. Asin an gabos na nasyon titiponon sa atubangan nia, asin pagbubulagbulagon nia an mga tawo, kun paanong ibinubulag nin pastor an mga karnero sa mga kanding.” Minsan ngani an paghokom asin pagbubulagbulag gigibohon “kun an Aki nin tawo dumatong na sa saiyang kamurawayan,” an paghuhulit nagtatao ngonyan sa mga tawo kan oportunidad na mamidbid an espirituwal na mga tugang ni Cristo asin sa siring sumuportar sa sainda para sa sadiri nindang kaligtasan na daing sagkod.—Mateo 25:31-46.
Papagdanayon an “Biyong Kasiertohan kan Paglaom”
18. Paano niato mapagdadanay na maliwanag an satong “paglaom sa kaligtasan”?
18 An satong aktibong pakikikabtang sa paghuhulit saro man na paagi na matabangan kita na mapagdanay na maliwanag an satong paglaom. Isinurat ni Pablo: “Minamawot niamo na an lambang saro sa saindo magpaheling kan kaparehong kahigosan tanganing magkaigwa kan biyong kasiertohan kan paglaom sagkod sa katapusan.” (Hebreo 6:11) Kun siring, isolog logod kan lambang saro sa sato “bilang takop sa payo an paglaom sa kaligtasan,” sa siring ginigirumdom na “itinalaga kita nin Dios, bakong sa grabeng kaanggotan, kundi sa pagkamit nin kaligtasan paagi sa satong Kagurangnan na si Jesu-Cristo.” (1 Tesalonica 5:8, 9) Isapuso man niato an sadol ni Pedro: “Pasariga an saindong isip para sa gibohon, lubos na papagdanayon an toltol na pag-iisip; ibugtak an saindong paglaom sa dai na kutana maninigong kabootan na dadarahon sa saindo.” (1 Pedro 1:13) An gabos na naggigibo nin siring maheheling na lubos na naotob an saindang “paglaom sa kaligtasan”!
19. Ano an pag-oolayan niato sa kasunod na artikulo?
19 Mientras tanto, ano an maninigong magin punto de vista niato manongod sa panahon na natatada para sa sistemang ini? Paano niato magagamit an panahon na iyan tanganing magkamit nin kaligtasan para sa satong sadiri asin sa iba? Pag-oolayan niato an mga hapot na ini sa kasunod na artikulo.
Ikapaliliwanag daw Nindo?
• Taano ta dapat niatong papagdanayon na maliwanag an satong “paglaom sa kaligtasan”?
• Ano an kaiba sa kaligtasan?
• Ano an dapat niatong gibohon tangani na mag-ako kan regalong kaligtasan?
• Ano an nahahaman kan satong paghuhulit kaoyon kan katuyohan nin Dios?
[Mga Hapot Para sa Pag-adal]
[Mga Ritrato sa pahina 10]
An kaligtasan bako sanang pagkakalda sa kalaglagan an kahulogan