Saen Kamo Puedeng Kumua nin Marahay na Sadol?

An “industriya sa pagtao nin sadol” nagin nang bilyon-bilyon na dolyar kada taon na negosyo. An mga tawo nangangaipo nin tabang. An propesyonal sa salud kan isip na si Heinz Lehmann nagkomento: “[Sa sosyedad ngonyan] igwa nin edukasyonal asin sosyal na mga kakulangan. An relihiosong mga pamantayan sa buhay bako nang pareho kan dati. An mga pamilya bako nang gayong marigon . . . , asin bilang resulta an mga tawo nasasakitan.” An autor na si Eric Maisel nagsasabi: “An mga kaidto minadolok sa shaman kan saindang tribo, pastor o doktor kan pamilya tanganing magpatabang sa mental, espirituwal asin pisikal na mga problema nag-aasa na ngonyan sa mga librong giya sa personal na pag-oswag para sa solusyon.”

AN Asosasyon Sikolohiko sa Amerika nagbilog nin sarong grupo na maimbestigar sa biglang asenso na industriyang ini. Sinda nagsabi na mantang igwa nin “dakulaon na potensial na matabangan an mga indibiduwal na masabotan an saindang sadiri asin an iba . . . , an mga paghihingako para sa pagpalakop asin titulo kan mga programang ini paorog nang paorog na pinasosobrahan asin pinapagin nakapupukaw.” An sarong parasurat sa Toronto Star nagsasabi: “Magmaan sa kadakolan nin relihioso asin espirituwal na pagpalsipikar. . . . Mag-ingat nangorogna sa gabos na librong giya sa personal na pag-oswag, mga tape o seminar na nag-aalok nin labi-labi, sa halipoton na panahon, para sa kadikiton na paghihingoa o disiplina sa sadiri.” Totoo, kadakol kan tunay na naghihingoang suportaran an mga nangangaipo. Minsan siring, an makamomondong katotoohan nangyayari na kadakol kan daing prinsipyong indibiduwal na kinakapital an kapungawan asin pagdusa nin mga tawo, na nag-aalok nin daing kuentang tabang o solusyon.

Huli kaini, ano an pinakagikanan nin tabang na puede niatong pagtiwalaan? Saen kita makanonompong nin praktikal na hatol na pirmeng epektibo?

Gikanan nin Seguradong Giya

An Amerikanong parahulit kan ika-19 siglo na si Henry Ward Beecher nagsabi: “An Biblia iyo an tsart nin Dios na dapat nindong sunodon, tanganing dai kamo malunod, asin tanganing giyahan kamo pasiring sa duongan, asin tanganing makaabot kamo duman na dai sumadsad sa darakulang gapo o bahora.” An saro pa nagsabi manongod sa Biblia: “Mayo nin siisay man na makalalabi sa Kasuratan maski noarin man; an libro minahiwas asin minararom mantang kita naggugurang.” Taano ta maninigo nindong tawan nin seryosong pag-estudyar an gikanan na ini?

Irinerekomendar an sadiri kaiyan, an Biblia nagsasabi: “An gabos na Kasuratan ipinasabong nin Dios asin kapakipakinabang para sa pagtokdo, sa pagsagwe, sa paghusay kan mga bagay, sa pagdisiplina sa katanosan, tanganing an tawo nin Dios magin lubos na may kakayahan, biyong nasangkapan para sa lambang marahay na gibo.” (2 Timoteo 3:​16, 17) An laog kan Biblia gikan sa mismong Burabod nin Buhay, si Jehova Dios. (Salmo 36:9) Bilang siring, sia nakaaaram na marhay kan pagkagibo sa sato, siring kan ipinagigirumdom sa sato kan Salmo 103:​14: “Sia mismo nakaaaram na gayo kan pagkaporma sa sato, na ginigirumdom na  kita kabokabo.” Kun siring, kita puedeng magkaigwa nin lubos na kompiansa sa halaga kan Biblia.

Sa katunayan, an Biblia igwa nin kadakol na prinsipyo asin giya na puedeng ikaaplikar sa kapakipakinabang na paagi sa ano man na kamugtakan nindo. Paagi kaiyan an Dios nagsasabi sa sato: “Iyo ini an dalan. Maglakaw kamo dian.” (Isaias 30:21) Talaga daw na ikatatao kan Biblia an mga pangangaipo nin mga indibiduwal ngonyan? Helingon niato.

Itinatao kan Biblia an Satong mga Pangangaipo . . .

Na Makaya an mga Kahaditan. Sinasabi sa sato kan Biblia: “Dai kamo maghadit sa ano man na bagay, kundi sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan; asin an katoninongan nin Dios na minalampas sa gabos na kaisipan mag-iingat kan saindong puso asin kan saindong mga pag-isip paagi ki Cristo Jesus.” (Filipos 4:​6, 7) Nagin epektibo daw an pamibi na makaya an emosyonal na mga kahaditan huli sa kasakitan sa pagbuhay, seksuwal asin berbal na pagmaltrato, o pagkagadan nin namomotan? Estudyare an minasunod na eksperyensia.

Pakatapos na maaraman an seksuwal na pagmaltrato sa saiyang aking babae, inadmitir ni Jackie: “An pakamate nin kasalan huli sa kadaihan nin kakayahan na protehiran an saimong aki dai masayod. Kinaipuhan kong labanan an pakamate nin kapaitan, paghinanakit, asin kaanggotan. An mga pakamateng ini nagpoon na raoton an sakong buhay. Kaipuhan ko nanggad si Jehova na ingatan an sakong puso.” Pakatapos na basahon asin otrohon na basahon an Filipos 4:​6, 7, naghingoa siang marhay na iaplikar an hatol kaiyan. “Namibi ako aroaldaw, na paorootrong naghahagad na dai ko togotan an sakong sadiri na raoton kan negatibong mga pakamate, asin tinabangan ako ni Jehova na pataluboon an sarong kalmado asin maogmang puso. Namatean ko nanggad an katoninongan sa kairaroman kan sakong boot,” an sabi ni Jackie.

Kamo man puedeng mamugtak sa sarong situwasyon na dai nindo kayang kontrolon o resolberan asin na nagbubunga nin emosyonal na mga kahaditan. Paagi sa pagsunod sa konseho kan Biblia na mamibi, kamo epektibong makaaatubang sa mga problema. An salmista pinaririgon an satong boot paagi sa mga tataramon na ini: “Idolot mo ki Jehova an saimong dalan, asin manarig ka sa saiya, asin sia mismo mahiro.”​—Salmo 37:5.

Nin Pagparigon sa Boot. An salmista nagsabi kan kapahayagan na ini nin pag-apresyar: “Jehova, namotan ko an lugar kan saimong harong asin an namumugtakan kan erokan kan saimong kamurawayan. An sakuyang bitis tunay nanggad na matindog sa sarong patag na lugar; sa tahaw kan nagkakasararong mga kadaklan oomawon ko si Jehova.” (Salmo 26:​8, 12) Ineenkaminar kita kan Biblia na regular na magtiripon tanganing sambahon si Jehova. Paano mapaninigoan kan pag-iriba na ini an saindong mga pangangaipo? Ano an nanompongan nin iba?

Isinasaysay ni Becky: “An sakong mga magurang dai naglilingkod ki Jehova, kaya kinokontra ninda ako kun hinihingoa kong gibohon an ano man na konektado sa paglilingkod sa Dios. Kaipuhan an dakulang paghihingoa tanganing ako makaatender sa mga pagtiripon.” Namamatean ni Becky na dakol na bendisyon an nakakamtan nia huli ta nagmaigot sia na makaatender nin regular sa Kristianong mga pagtiripon. “An mga pagtiripon nagpakosog sa sakong pagtubod, kaya nalalabanan ko an mga pangigipit sa aroaldaw bilang estudyante, aking babae, asin lingkod ni Jehova. An mga tawo sa Kingdom Hall laen na marhay sa mga estudyante sa eskuelahan! Sinda may pagmakolog asin matinabang, asin an samong orolay pirmeng nakaparirigon sa boot. Sinda tunay na mga katood.”

Iyo, paagi sa pagsunod sa instruksion kan Biblia na regular na magtiripon, mapaninigoan ni Jehova an satong pangangaipo nin pamparigon sa boot. Digdi ta maeeksperyensiahan an pagigin totoo kan mga tataramon kan salmista: “An Dios pailihan asin kosog para sa sato, sarong tabang na danay na makukua sa panahon nin mga kasakitan.”​—Salmo 46:1.

Para sa Nakakokontento Asin Kapakipakinabang na Gibohon. “Magin kamong marigon, dai natatanyog, na danay na dakol an gigibohon sa gibohon kan Kagurangnan, sa pakaaram na an saindong pagpapagal bakong sayang sana dian sa Kagurangnan,” an pakiolay kan Biblia. (1 Corinto 15:58) Nakakokontento daw talaga an “gibohon kan Kagurangnan”? An Kristianong ministeryo daw may nahahaman na kapakipakinabang?

 Ipinahahayag ni Amelia an saiyang saboot: “Tinokdoan ko sa Biblia an sarong mag-agom na madali nang magsuhay. Natabangan ko man an sarong babae na an aking babae kaini ginadan sa madahas na paagi. An babae pinasakitan kan kadaihan nin kasegurohan dapit sa kamugtakan nin mga gadan. Sa parehong pangyayaring ini, an pag-aplikar kan mga prinsipyo sa Biblia nagbunga nin katoninongan asin paglaom sa saindang buhay. Namatean ko an dakulang kagayagayahan asin pagkakontento huli ta nagkaigwa ako nin kabtang sa pagtabang sa sainda.” Si Scott nagsasabi: “Kun igwa kamo nin marahay na eksperyensia sa ministeryo sa langtad, nakapoon nin bagong pag-adal sa Biblia, o nagin mapanggana sa impormal na pagpatotoo, iiestorya nindo iyan sa dakol na taon na maabot. An iyo man sanang mga pagmate asin kaogmahan namamatean liwat sa lambang pagsaysay! An ministeryo an pinaghahalean kan pinakadakula asin nagdadanay na kagayagayahan.”

Malinaw nanggad, an pag-aplikar sa instruksion kan Biblia na magin aktibong mga ministro pinanigoan an pangangaipo kan mga indibiduwal na ini para sa nakakokontento asin kapakipakinabang na gibohon. Kamo man inaagda na makikabtang sa gibohon na ini na pag-edukar sa iba manongod sa mga dalan asin prinsipyo nin Dios, kadungan kaiyan pinakikinabang an saindong sadiri.​​—Isaias 48:​17; Mateo 28:​19, 20.

Pagkinabang sa Tataramon nin Dios

Daing duda, an Biblia sarong mapagtitiwalaan na gikanan nin realistikong mga giya sa kinaban ngonyan. Tanganing pakinabangan iyan, kita kaipuhan na gumibo nin daing liwat-liwat na paghihingoa. Kaipuhan tang regular na basahon iyan, pag-adalan iyan, asin horophoropon iyan. Si Pablo nagsadol: “Pensaron mo an mga bagay na ini; ipanongod mo dian an bilog mong buhay, tanganing an saimong pag-oswag mahayag sa gabos.” (1 Timoteo 4:​15; Deuteronomio 11:​18-​21) An Dios naggagarantiya na kun kamo maghihingoang iaplikar an saiyang hatol na manonompongan sa Biblia, kamo magigin mapanggana. Sia nanunuga: “Magtiwala ka ki Jehova . . . Sa gabos mong dalan girumdomon mo sia, asin itatanos nia mismo an saimong mga dana.”​—Talinhaga 3:​5, 6.

[Mga Ritrato sa pahina 31]

An pagsunod sa hatol kan Biblia ginigibong nakakokontento asin nakaoogma an buhay