Nagtutubod daw Kamo sa Dai Nindo Naheheling?

KUN may magsabi, ‘Nagtutubod sana ako sa naheheling ko,’ sia nagtataram bakong sa literal na paagi. An totoo, kita gabos nagtutubod sa mga bagay na dai ta naheheling.

Halimbawa, sa eskuelahan tibaad kamo nag-eksperimento na tanganing patunayan an pag-eksister nin magnetikong puersa. Iyan puedeng arog kaini: Ibudbod an mga binalhag na batbat sa sarong papel. Dangan ibugtak an papel sa ibabaw kan batubalani. Kun an papel pakubogkubogon, garo baga paagi sa mahika an mga binalhag na batbat minadurukotan  harani sa polo kan batubalani asin napoporma kaoyon kan magnetikong puersa. Kun kamo an naggibo kaiyan, talaga daw na naheheling nindo an magnetikong puersa? Dai, alagad an epekto kaiyan sa binalhag na batbat malinaw na naheheling, na nagtatao sa saindo nin nakakokombensir na prueba na igwa nin magnetismo.

Inaako ta na daing pagduda an iba pang bagay na dai ta naheheling. Kun pinagmamasdan ta an sarong magayon na ipininta o naghahanga sa puerteng eskultura, dai ta pinagdududahan na may sarong pintor o eskultor. Kaya kun ineestudyaran ta an sarong busay o pinagmamasdan an pagsolnop nin saldang, bako daw na maninigo na kita mapahiro na kisuera konsideraron an posibilidad na an mga iyan gibo nin sarong Dakulang Eksperto sa Arte o Eskultor?

Kun Taano an Iba ta Dai Nagtutubod

Kabaliktaran sa tibaad linalaoman, may mga tawo na dai na nagtutubod sa Dios huli sa itinokdo sa sainda sa simbahan. Totoo ini sa sarong lalaking Noruego na sinabihan na sinosolo nin Dios an mga maraot sa nagkakalayong impierno. Dai talaga masabotan kan lalaki kun anong klaseng Dios an pasasakitan an mga tawo sa siring na paagi, kaya sia nagin ateista.

Minsan siring, paghaloyhaloy, an lalaki ominoyon na siyasaton an Biblia, na tinabangan nin saro sa Mga Saksi ni Jehova. Sia napangalas na manodan na an Biblia dai nagtotokdo na an mga maraot pinadudusahan sa sarong nagkakalayong impierno. An Biblia iinaagid an kagadanan sa pagtorog. Sa lolobngan, dai kitang namamatean na kolog; mayo man lamang kita nin pakaaram. (Eclesiastes 9:​5, 10) Nanodan man kan lalaki na an mga tawo na hinokoman nin Dios bilang maraot na dai na mababakle magdadanay sa lolobngan sagkod lamang. (Mateo 12:​31, 32) An iba pa kan mga gadan bubuhayon liwat sa itinalaan na panahon nin Dios, na may esperansang magkamit nin buhay na daing katapusan sa Paraisong mga kamugtakan. (Juan 5:​28, 29; 17:3) An paliwanag na ini makatanosan. Iyan kaoyon kan sinasabi kan Biblia na “an Dios pagkamoot.” (1 Juan 4:8) An sinserong tawong ini nagpadagos sa saiyang pag-adal kan Tataramon nin Dios asin, pag-abot nin panahon, namotan an Dios kan Biblia.

An iba hinahaboan an pag-eksister nin sarong mamomoton na Kaglalang huli ta lakop an kapurisawan asin inhustisya. Minaoyon sinda sa sarong lalaking Sueco na minsan nagtokdo sa kalangitan asin naghapot: “Paano magkakaigwa nin sarong makakamhan sa gabos, matinaong marhay na Dios dian sa kaitaasan mantang kita digdi sa ibaba yaon an labi-labing karatan?” Huling mayo nin nakasisimbag sa saiyang hapot, sia man nagin ateista. Paghaloyhaloy sia nagpoon na mag-adal sa Biblia kaiba kan mga Saksi ni Jehova. Nanodan nia na an Tataramon nin  Dios nagtatao nin nakakokontentong simbag sa haloyon nang hapot, Taano ta tinotogotan nin Dios an karatan? *

Nanodan kan sinserong lalaking ini na an pagkaigwa nin karatan dai nanggad nagpapatunay na an Dios dai nag-eeksister. Bilang ilustrasyon: An sarong tawo puedeng magdisenyo nin sarong kutsilyo na gagamiton na panlaplap nin karne. An sarong parokyano tibaad bakalon an kutsilyo asin gamiton iyan, bako na panlaplap nin karne, kundi na pangadan. An bagay na ginamit sa salang paagi an kutsilyo dai nanggad sa ano man na paagi pinahihimutikan an pag-eksister kan kaggibo kaiyan. Kaagid kaiyan, an bagay na an daga dai ginagamit kaoyon kan plinanong katuyohan para dian dai nangangahulogan na mayo iyan nin Kaglalang.

Itinotokdo kan Biblia na an gibo nin Dios sangkap. “Sa saiya mayo nin inhustisya; matanos asin tanos sia.” (Deuteronomio 32:4) An Dios nagtatao nin marahay na mga balaog sa tawo, alagad an nagkapira kan mga balaog ginamit sa salang paagi, na nagbubunga nin balakid na pagdusa. (Santiago 1:17) Minsan siring, tataposon nin Dios an pagdusa. Pakatapos kaiyan, “an mga mahoyo mismo makasasadiri kan daga, . . . asin sinda mag-eerok dian sagkod lamang.”​—Salmo 37:​11, 29.

An lalaking Sueco na nasambitan kasubago napukaw an boot kan maheling nia an pagdusa nin mga kapwa tawo. Tunay nanggad, an saiyang mamomoton na pagmakolog sa iba patunay na an Dios nag-eeksister. Taano man?

Para sa kadaklan na tawo, an solamenteng ikakasangli sa pagtubod sa Dios iyo an pagtubod sa ebolusyon. Itinotokdo kan mga ebolusyonista an “pagkatada kan pinakamatibay”​—na an mga tawo asin hayop nakikipagdaogan sa kanya-kanya nindang klase para sa pagkatadang buhay. An pinakamatibay an natatada; an maluya nagagadan. Iyan an natural na areglo kan mga bagay, an sabi ninda. Alagad kun “natural” para sa mga maluya na magadan tanganing tawan nin lugar an mga makosog, paano ta ikapaliliwanag an katunayan na, arog kan lalaking Sueco, an nagkapirang makosog na tawo napupukaw an boot sa pakaheling sa pagdusa kan saindang kapwa?

Pakamidbid sa Dios

Dai ta puedeng maheling an Dios huli ta bako siang kaporma nin tawo. Pero, mawot nin Dios na mamidbid ta sia. An sarong paagi na mamidbid ta sia iyo an pagmasid sa saiyang ekstraordinaryong mga gibo​—an “mga ipininta” asin “mga eskultura” nin paglalang. Sa Roma 1:​20, an Biblia nagsasabi: ‘An dai naheheling na mga kualidad nin Dios malinaw nang naheheling poon pa sa paglalang kan kinaban padagos, huli ta sinda namamansayan paagi sa mga bagay na ginibo, minsan an saiyang daing sagkod na kapangyarihan asin pagka-Dios.’ Iyo, kun paanong nakatatabang sa saindo an pag-adal sa sarong ipininta o sarong eskultura na magkaigwa nin pakarorop sa personalidad kan eksperto sa arte, an paghorophorop sa makangangalas na mga gibo nin Dios makatatabang sa saindo na orog na mamidbid an saiyang personalidad.

Siempre, dai ta masisimbag an gabos na nakapupurisaw na hapot sa buhay paagi sana sa pagheling sa mga paglalang nin Dios. Alagad makanonompong kita nin mga simbag sa siring na mga hapot paagi sa pagsiyasat sa Tataramon nin Dios, an Biblia. Idto paagi sa pagbasa kan Biblia na buka an isip kaya an duwang lalaki na nasambitan kasubago nakapagkonklusyon na an Dios nag-eeksister asin na sia may pagmakolog manongod sa nangyayari sa sato.

[Nota sa Ibaba]