Pagsukoro sa Isla Robinson Crusoe

AN Robinson Crusoe saro sa tolong isla sa Dagat Pasipiko na minakompuesto kan kapurohan na inaapod Juan Fernandez, mga 640 kilometros hale sa baybayon nin Chile. * An 93 kilometro kuadradong isla nagkua kan ngaran na iyan sa sarong bantog na nobela kan ika-18 siglo na may titulong Robinson Crusoe, na isinurat kan autor na Ingles na si Daniel Defoe. Minalataw na an nobela bakong eksaktong basado sa mga abentura nin sarong Eskoses, si Alexander Selkirk, na nag-istar nin solo sa isla sa laog nin mga apat na taon.

An sarong kahoy na karatula sa isla nagsasabi sa sarong kabtang: “Sa lugar na ini, aroaldaw sa laog nin labing apat na taon, an Eskoses na paralayag na si Alexander Selkirk galagang hinanap an pagdangadang kan pansukorong baroto na mapatalingkas sa saiya sa saiyang pagkakasuway.” Sa kahurihurihi, nasukorohan si Selkirk asin ibinalik sa saiyang dagang tinuboan, sa sarong kinaban na dai na nia nasonoan pakatapos na sia mag-istar sa saiyang sadiring sadit na paraiso. Kan huri sinabi daa nia: “Ay, namomotan kong isla! Kutana nungka ko ikang binayaan!”

Sa pag-agi nin panahon, an isla ginamit na presohan, na ineerokan nin nagkapira na nakagibo nin “mga krimen nin pagtubod” tumang sa Iglesia Katolika. Laen nang marhay sa paraisong isla na naaraman kaidto ni Selkirk! Minsan siring, an mga residente sa presenteng panahon duman sa isla igwa nin matoninong na katrangkilohan na dai aram sa dakol na parte kan kinaban. Huli sa pamugtak an boot na estilo nin pamumuhay, na natural na sa dakol na kultura sa isla, madaling magpoon nin pakikipag-olay maski kiisay.

Sa opisyal na rekord, an Robinson Crusoe igwa nin mga 500 na habitante, alagad durante kan kadaklan na panahon kan taon, mga 400 katawo sana an nag-eerok sa isla. Sa sarong kabtang, an dahelan iyo na  an nagkapirang ina asin an saindang mga aki nag-iistar sa kontinente nin Chile durante kan taon nin ereskuelahan, na minapuli sa isla durante sana kan mga bulan nin bakasyon tanganing makaibanan an iba pang miembro kan pamilya.

Sa ibong kan magayon na arog-hardin na mga palibot sa Robinson Crusoe, an nagkapirang taga duman sa isla nakamamate nin kakulangan sa espirituwal asin naghahanap nin mga simbag. An iba an pagmate garo sinda kinakaipuhan na sukorohan sa espirituwal.

Espirituwal na Pagsukoro

An siring na espirituwal na pagsukoro nagpoon kan mga 1979. An sarong babae na nakikipag-adal sa Biblia sa mga Saksi ni Jehova sa Santiago, Chile, nagbalyo sa isla asin nagpoon na itokdo sa iba an saiyang nanodan. Paghaloyhaloy an sarong magurang sa kongregasyon na nagduman sa isla huli sa sekular na mga dahelan nabigla kan manompongan an sarong grupo nin mga estudyante sa Biblia na nag-ooswag sa espirituwal sa tabang kan babaeng iyan. Kan panahon na magduman giraray sa isla an magurang sa kongregasyon pakalihis nin tolong bulan, an napapasuway na paratokdo na ini sa Biblia asin an duwa sa saiyang tinotokdoan andam nang pabautismo, kaya pinangenotan  kan magurang sa kongregasyon an bautismo sa sainda. Kan huri, an saro sa bagong mabautismohan na mga Kristianong ini nag-agom asin, kaibanan an saiyang agom na lalaki, nagpadagos sa paghanap sa iba pa na nangangaipo nin espirituwal na sukoro. Pinangenotan kan saiyang agom an pagtogdok nin sarong simpleng Kingdom Hall, na padagos na nagagamit kan sadit na grupo sa isla. Pag-abot nin panahon, huli sa pinansial na mga dahelan, naghale sinda sa Robinson Crusoe asin nagbalyo sa sarong kongregasyon sa sentral Chile, kun saen sinda padagos na aktibong naglilingkod ki Jehova.

Sa padikitdikit, an sadit na grupo sa isla padagos na nagtalubo mantang sinusukorohan an iba pa na makabutas sa falsong relihion. Minsan siring, huling an mga estudyante kaipuhan na bumalyo sa kontinente para sa saindang edukasyon sa haiskul, an grupo nagin na sanang duwang bautisadong tugang na babae asin sarong daragita. An grupo minadakol kun bakasyon na an nagkapirang ina minapuli sa isla. Nakatatabang ini na mabuhayan nin boot an tolong napapasuway na mga Kristiana na nagdadanay duman sa bilog na taon. Bilang resulta kan kahigosan kan mga tugang na babaeng ini, an Mga Saksi ni Jehova midbid na marhay sa Robinson Crusoe. Totoo, kinokontra nin nagkapirang taga isla an saindang gibohon asin naghihingoang piriton an iba na sayumahan an mensahe kan Kahadean. Minsan siring, an mga banhi kan katotoohan sa Biblia na ikinatanom sa sinserong mga puso padagos na nagtutubo.

Pagpakosog sa mga Sinukorohan

Makasaro sa sangtaon sinosongko nin sarong nagbibiaheng paraataman an isla. Paano an pagsongko sa kakadikit na Saksi sa sarong harayong isla? Ilinaladawan nin sarong paraataman sa sirkito an saiyang enot na pagsongko sa Robinson Crusoe:

“Magayonon an biaheng ini. Iyan nagpoon nin alas 7:​00 n.a. kan maghale kami sa Valparaiso tanganing magbiahe pasiring sa Cerrillos Airport sa Santiago. Naglunad kami sa sadit na eroplanong pitohan an pasahero. Pakalihis nin 2 oras asin 45 minutos na biahe, naheling niamo sa harayo an alitoktok nin sarong bukid na labaw sa mga panganoron. Mantang nagrarani kami, natanaw mi na an isla​—sarong nakagugulat na dakulang gapo sa tahaw nin kadagatan. Garo iyan naglalatawlataw sa kahiwasan nin katubigan, siring sa sarong barko na nalagalag sa dagat.

 “Pagkatugpa, hinatod kami nin sarong baroto pasiring sa baryo. Sa sarong lugar dangan sa iba naman, an darakulang gapo na nag-uuldot sa dagat nagigin saradit na isla na nagseserbing pahingaloan kan mga fur seal sa Juan Fernandez. An mga fur seal pinoprotehiran na mga klase nin hayop huli ta dikiton na sana sinda. Bigla na sana, may naglayog sa gilid kan baroto bago nawara giraray sa dagat. Idto sarong naglalayog na sira, na an may mga kuro na parikpik garo pakpak. Garo baga naoogma iyan na magparalukso sa tubig tanganing magdakop nin mga insekto. Siempre, kun minsan an nagdadakop nadadakop man; an saiyang paglukso puedeng mariparo kan ibang naniniba na andam nang halonon sia pagbugsok nia.

“Sa katapustapusi, uminabot kami sa baryo nin San Juan Bautista. Dakol na taga isla an yaon sa pantalan, magsalang hinahalat an saindang mga bisita o nag-uusyoso sana kun sairisay an nag-aarabot sa oras na ini. Naghanga kami sa magayon na tanawon​—an nakagugulat asin garanggasangon na bukid na inaapod El Yunque (An Palehan), na garo baga may alpombrang berdeng marhay na pelus, asin sa itaas, sarong maaliwalas, asul na langit na sa pagirilid igwa nin puting mga panganoron.

“Nariparo mi tolos an grupo kan samong mga tugang na Kristiana asin an saindang mga aki na naghahalat sa samo sa pantalan. Panahon kaidto nin bakasyon, kaya mas dakula an grupo kisa normal na bilang. Pakatapos nin maogmang pagtinaratarahan, dinara kami sa magayon na kamarote na inaapod ming harong niamo sa laog nin sarong semana.

“Espesyal na marhay an semanang idto, asin narealisar mi na marikas iyan na maagi. Kinaipuhan ming gamiton nin marahay an samong panahon. Kan aldaw mismong idto, pakapangodto mismo, sinongko mi an sarong inaadalan sa Biblia na madali nang magin samong espirituwal na tugang na babae asin magin kabtang kan espirituwal na paraiso nin Dios. Maheheling sa saiya an kagayagayahan alagad medyo ninenerbios. Nagrarani na an haloy na niang hinahalat na pasohan na bautismo. Ipinaliwanag mi sa saiya an nagkapirang mahalagang impormasyon tanganing sia makualipikar bilang parahayag kan maogmang bareta. Kan sunod na aldaw, uminiba sia sa paghuhulit sa kaenot-enote. Kan ikatolong aldaw, pinonan ming ipakipag-olay sa saiya an mga kahagadan sa bautismo. Bago natapos an semana, sia nabautismohan.

“An mga pagtiripon na ginibo durante kan semana sinuportaran na marhay, na 14 an pinakahalangkaw na kabilangan nin nag-atender. Kada aldaw igwa nin mga areglo para sa paglilingkod sa langtad, pagdalaw liwat, pag-adal sa Biblia, asin pagsongko sa pagpapastor. Kanigoan na pagparigon sa boot para sa mga tugang na babae na naggigibo kan aktibidad na sinda sana sa bilog na taon!”

Nagin mas masakit para sa mga lalaki sa isla na maghimate sa katotoohan, tibaad huli sa magabat na mga hinahagad sa saindang sekular na trabaho. An pangenot na trabaho pagdakop nin buyod, na nagkakaipo nin dakulang pagkadusay. An prehuwisyo may kabtang man sa negatibong reaksion nin dakol. Minsan siring, linalaoman na dakol pang taga isla, mga lalaki sagkod babae, an mahimate sa ngapit.

Sagkod ngonyan, sampulong indibiduwal an nasukorohan na sa isla paagi sa pakaaram kan katotoohan asin mga katuyohan ni Jehova Dios. An nagkapira sa sainda naghale na sa isla huli sa laen-laen na dahelan. Alagad magdanay man sinda o dai, an espirituwal na pagsukoro sa sainda nagin mas makahulogan kisa kan pagsukoro ki Alexander Selkirk. Sinda ngonyan yaon sa sarong espirituwal na paraiso saen man sinda nag-iistar. An mga tugang na babae na nag-eerok sagkod ngonyan sa isla asin an saindang mga aki yaon sa arog-hardin na palibot, alagad orog pa kaiyan, igwa sinda kan oportunidad na mabuhay kun an enterong daga lubos nang magin tunay na paraiso.

Padagos an Pagsukoro

Sa geograpikong kamugtakan, an sadit na grupong ini nin Mga Saksi ni Jehova sa Robinson Crusoe harayoon sa iba pa nindang espirituwal na mga tugang na lalaki asin babae. Pero, dai ninda iniisip na sinda nabayaan, arog kan Eskoses na si Selkirk. Paagi sa dayaday na pag-abot kan teokratikong mga babasahon, mga video sa mga asamblea asin kombension na ipinadadara sa sainda nin tolong beses sa sangtaon hale sa sangang opisina kan Watch Tower Society sa Chile, asin taonan na pagsongko kan paraataman sa sirkito, napagdadanay ninda an haraning komunikasyon sa organisasyon ni Jehova. Kaya sinda nagpapadagos na aktibong kabtang kan ‘bilog na kasararoan nin mga tugang sa kinaban.’​—1 Pedro 5:9.

[Nota sa Ibaba]

[Mga Mapa/Ritrato sa pahina 9]

(Para sa aktuwal na format, hilingon an publikasyon)

Chile

Santiago

ISLA ROBINSON CRUSOE

San Juan Bautista

El Yunque

DAGAT PASIPIKO

ISLA SANTA CLARA

[Ritrato]

Kun natatanaw na an isla, maheheling nin saro an sarong nakagugulat na dakulang gapo sa tahaw nin kadagatan

[Credit Line]

Mapa kan Chile: Mountain High Maps® Copyright © 1997 Digital Wisdom, Inc.

[Ritrato sa pahina 8, 9]

An nakagugulat na garanggasangon na bukid na inaapod El Yunque (An Palehan)

[Ritrato sa pahina 9]

An baryo nin San Juan Bautista

[Ritrato sa pahina 9]

An saradit na isla nagseserbing pahingaloan kan mga “fur seal” asin “sea lion”

[Ritrato sa pahina 10]

Naglunad kami sa sarong sadit na eroplano hale sa Santiago, Chile

[Ritrato sa pahina 10]

An garanggasangon na baybayon nin Isla Robinson Crusoe

[Ritrato sa pahina 10]

An simpleng Kingdom Hall sa isla