Sangkap na Buhay—Bakong Pangatorogan Sana!

Sangkap na kinaban​—ano an kahulogan kaiyan para sa saindo? Imahinara an sarong sosyedad nin tawo na mayo nin krimen, pagdodroga, gutom, kadukhaan, o inhustisya. An gabos marahayon an salud sa emosyon asin hawak. Mayo nin kapungawan o kamondoan huli ta hinale na minsan an kagadanan. Realistiko daw na himuyawoton an siring na kinaban?

MINSAN ngani dai iniignoro an mga pag-oswag sa siensia asin teknolohiya, an kadaklan na tawo dai talaga naniniwala na an intelihensia o inadalan nin tawo an mapangyari nin sarong sangkap na kinaban na dian an gabos mamumuhay na may katoninongan asin kaogmahan. Sa ibong na kampi, dai manenegaran na an tendensia nin tawo iyo na magmawot na pakarhayon an situwasyon asin itanos an mga bakong pagkasangkap. Siempre, an bakong realistikong pangatorogan sana dai makatatabang sa mga daing maistaran asin dukha, ni mapaninigoan kaiyan an mga biadi asin may helang na naghihimuyawot nin kaginhawahan sa saindang pagdusa. An sarong sangkap na kinaban dai basta mangyayari paagi sa pagkamapag-imbento nin tawo. Minsan siring, sa ibong kan presenteng kasakitan asin kaapihan, igwa nin masarig na mga dahelan na maniwala na talagang harani na an sarong kinaban na sasabihon nindong sangkap.

Kun iniisip nindo an sangkap na buhay, an buhay ni Jesu-Cristo tibaad sumabong sa isip nindo. Si Jesus bakong an solamenteng sangkap na tawo na nabuhay digdi sa daga kasuarin man. Si Adan asin Eva, na linalang sa ladawan nin Dios, sangkap an buhay sa sarong paraiso. Minsan siring, nawara ninda an marahayon na kamugtakan na ini huli sa saindang pagrebelde tumang sa saindang langitnon na Ama. (Genesis 3:​1-6) Pero, an Kaglalang itinadom sa mga tawo an pagmawot na mabuhay sagkod lamang. Pinatutunayan iyan kan Eclesiastes 3:​11: “An gabos . . . ginibo [nin Dios] na magayon sa kapanahonan kaiyan. Minsan an daing talaan na panahon ibinugtak nia sa saindang puso, tanganing an katawohan dai noarin man makarorop sa ginibo kan tunay na Dios poon sa kapinonan sagkod sa katapusan.”

Minsan ngani an pagkabakong sangkap asin kasalan dinara an katawohan sa buhay nin “kasayangan” asin “pagkaoripon sa kalapaan,” mangnoha an nakararangang mga tataramon ni apostol Pablo: “An galagang pag-antisipar kan mga linalang naghahalat sa  paghahayag kan mga aki nin Dios. Huli ta an mga linalang ipinasakop sa kasayangan, bakong sa sadiring boot kaiyan kundi paagi sa saiya na nagpasakop kaiyan, basado sa paglaom na an mga linalang man mismo patatalingkason sa pagkaoripon sa kalapaan asin magkakaigwa kan mamuraway na katalingkasan kan mga aki nin Dios.” (Roma 8:​19-21) Linilinaw kan Biblia na an mga probisyon nin Dios tanganing ibalik an sangkap na buhay nin tawo makakamtan paagi ki Jesu-Cristo.​​—Juan 3:​16; 17:3.

Apuera sa makangangalas na paglaom na ini sa ngapit, kita gabos igwa kan potensial na umoswag sa espirituwal, na ipinahahayag an satong pag-oswag dawa sa ngonyan.

Hingoahon na Magin Rasonable

Ibinilang ni Jesu-Cristo na importanteng marhay an pagkasangkap kaya sinabihan nia an sarong dakulang grupo nin mga nagdadangog: “Kaya ngani kamo kaipuhan na magin sangkap, kun paanong an saindong langitnon na Ama sangkap.” (Mateo 5:48) Talaga daw na linaoman ni Jesus na kita magin daing depekto sa presenteng maraot na sistema? Dai. Tunay nanggad na maninigo kitang magmaigot na pataluboon an mga kualidad na pagigin buka an palad, kabootan, asin pagkamoot sa satong kapwa, pero parateng dai niato nagigibo an tama. Maski an saro sa mga apostol ni Jesus nagsurat: “Kun ituga niato an satong mga kasalan, sia fiel asin matanos tanganing ipatawad sa sato an satong mga kasalan asin linigan kita sa gabos na kabikoan. Kun kita magsabi: ‘Dai kita nagkasala,’ ginigibo niato siang putikon, asin an saiyang tataramon dai nasa sato.”​—1 Juan 1:​9, 10.

Minsan siring, mapaooswag ta an pagheling niato sa satong sadiri asin pagtratar sa iba, na linilikayan an pagigin sobra na man na marhay. Siisay an makakukua nin mas marahay na preskripsion sa pagkaigwa nin timbang, rasonableng personalidad kisa kan yaon sa Tataramon nin Dios, an Biblia? An pagkultibar sa mga kualidad na arog kan kagayagayahan asin pagigin tama sana matabang sa sato sa marahay na pakikiiba sa mga katrabaho, sa satong agom, asin sa satong mga magurang o aki. Si apostol Pablo nagsadol sa mga Kristiano: “Danay kamong maggayagaya dian sa Kagurangnan. Sa giraray sasabihon ko, Maggayagaya kamo! Ipaaram nindo sa gabos na tawo an saindong pagkamakatanosan.”​—Filipos 4:​4, 5.

Mga Pakinabang sa Pagigin Rasonable

Kun kamo rasonable sa saindong mga inaasahan asin lilikayan nindo an perpeksionismo na nagpapasakit sa sadiri asin nakasusudya sa sadiring katuyohan, makikinabang kamo siring man an iba. Kalabot sa pakaaram kan saindong totoong potensial an pagigin realistiko sagkod rasonable manongod sa gusto nindong gibohon. Girumdomon, linalang kita nin Dios tanganing mabuhay digdi sa daga asin makamate nin satispaksion sa makahulogan na gibohon na nagtatao nin pakinabang sa sato asin sa iba.​​—Genesis 2:​7-9.

Kun kamo sobra kaeksihido sa saindong sadiri, taano ta dai dumolok ki Jehova sa pamibi? An pagkamit kan pabor nin Dios matao sa saindo nin dakulang pakaginhawa. Aram ni Jehova an pagkagibo sa sato asin pagkabakong sangkap niato, kaya sia bakong mayo nin pagkarasonable o depisil panigoan. Inaasegurar kita kan salmista: “Kun paanong an ama nagpapaheling nin pagkaherak sa saiyang mga aki, si Jehova nagpapaheling man nin pagkaherak sa mga natatakot sa saiya. Huli ta sia mismo nakaaaram na gayo kan pagkaporma sa sato, na ginigirumdom na kita kabokabo.” (Salmo 103:​13, 14) Makapasasalamat nanggad kita na an Dios maheherakon na gayo an pagtratar sa mga tawo! Aram nia an satong mga limitasyon, alagad ta kita puedeng magin mahalagang marhay sa saiyang pagheling siring sa namomotan na mga aki.

 Imbes na magparahanap nin perpeksionismo, mas madonong nanggad na pataluboon an espirituwal na pakamansay asin timbang na punto de vista! Saro pa, makaseseguro kita na mayo nin makaoolang ki Jehova sa pag-otob sa saiyang katuyohan na darahon an katawohan sa pagkasangkap sa irarom kan Kahadean nin Dios. Alagad ano an boot sabihon kan pagkasangkap nin tawo?

Sangkap na Buhay na Mas Marahay Kisa Perpeksionismo

An pagkasangkap dai nangangahulogan nin pagigin perpeksionista. An mga may pribilehiong mabuhay sa Paraiso digdi sa daga sa irarom kan Kahadean nin Dios seguradong dai magigin eksihido, nagpapakangmatanos na mga indibiduwal. An saro sa mga kahagadan tanganing makaligtas sa dakulang kahorasaan iyo an odok sa pusong apresasyon sa pantubos na atang, siring kan ipinahayag kan internasyonal na dakulang kadaklan na ilinadawan ni apostol Juan: “Utang niato an kaligtasan sa satong Dios, na nagtutukaw sa trono, asin sa Kordero.” (Kapahayagan 7:​9, 10, 14) An gabos na makaliligtas sa nagdadangadang na dakulang kahorasaan magpapasalamat na si Cristo gikan sa boot na nagadan para sa sainda asin sa gabos na naggigibo nin pagtubod sa saiya. An saiyang mamomoton na atang nagseserbing basehan sa pagtao nin nagdadanay na kaginhawahan sa saindang mga pagkabakong sangkap asin kaluyahan.​​—Juan 3:​16; Roma 8:​21, 22.

Anong klase an sangkap na buhay? Imbes na kompetisyon asin paslong ambisyon, magigin kapakipakinabang na mabuhay dahelan sa pagkamoot asin kabootan sa tahaw kan mga tawo, na nakahahale sa kahaditan asin hababang pagheling sa sadiri. Pero, an sangkap na buhay dai magigin nakalalangkag o nakasusumo. Dai itinatao kan Tataramon nin Dios an gabos na detalye manongod sa Paraiso alagad talagang ilinaladawan kaiyan an klase nin buhay na puede niatong asahan: “Sinda siertong matogdok nin mga harong asin maontok sinda dian; asin siertong matanom sinda nin mga ubasan asin kakakanon ninda an bunga kaiyan. Dai sinda matogdok asin iba an maontok; dai sinda matanom asin iba an makakan. Huli ta magigin siring sa mga aldaw nin kahoy an mga aldaw kan sakuyang banwaan; asin an ginibo kan saindang mga kamot lubos na gagamiton kan sakuyang mga pinili. Dai sinda magpapagal na mayong kapakanan, ni mangangaki man sinda para sa karibokan.”​—Isaias 65:​21-23.

Imbes na magparaisip manongod sa kun anong klaseng aling-alingan, mga pasilidad na pamakalan, teknolohiya, o transportasyon an itatao kan Kahadean, imahinara an saindong sadiri na nakaeeksperyensia kan kaotoban kan mga tataramon na ini: “‘An lobo asin an kordero makakan na sararo, asin an leon makakan nin dagami siring sa toro; asin kun dapit sa halas, an saiyang magigin kakanon kabokabo. Dai sinda magibo nin maraot ni manraraot sa bilog kong banal na bukid,’ an sabi ni Jehova.” (Isaias 65:25) An sangkap na buhay magigin laen nanggad sa naheheling nindo ngonyan! Kun kamo mapapabilang sa mga angay na mabuhay sa panahon na iyan, magkakaigwa kamo nin dahelan na magkompiar na an saindong mamomoton na langitnon na Ama magmamakolog sa saindo asin sa saindong pamilya. “Magkaigwa nin labi-labi nanggad na pagkakontento dian ki Jehova, asin itatao nia sa saimo an mga kahagadan kan saimong puso.”​—Salmo 37:4.

An sangkap na buhay bakong pangatorogan sana. An mamomoton na katuyohan ni Jehova mapadapit sa katawohan lubos na maootob. Kamo asin an saindong pamilya puedeng magin kabilang sa mga dadarahon sa pagkasangkap bilang tawo asin mabubuhay sagkod lamang sa bagong kinaban nin Dios. Ihinuhula kan Biblia: “An mga matanos mismo magmamana kan daga, asin sinda mag-eerok dian sagkod lamang.”​—Salmo 37:29.

[Ritrato sa pahina 6]

Mapaooswag ta an pagheling niato sa satong sadiri asin sa iba, na linilikayan an perpeksionismo o pagkametikuloso

[Ritrato sa pahina 7]

Taano ta dai imahinaron an saindong sadiri na yaon na sa matoninong asin matanos na mga kamugtakan sa Paraiso?