Taano ta Dapat na Daogon an Perpeksionismo?

Pirme daw kamong nagmamaigot na marhay na gibohon an saindong pinakamakakaya? Malinaw nanggad, sa dakol na paagi an paggibo nindo kaiyan puedeng magtao nin pakinabang sa saindo asin sa mga nasa palibot nindo. Sa ibong na kampi, may mga suminobra man na marhay asin nagin perpeksionista. Ano an kahulogan kaiyan?

BUENO, an sarong kahulogan kan terminong “perpeksionismo” sarong “ugale na ibinibilang na dai puede an ano man na dai nakakaabot sa pagigin perpekto.” Posible na may nakaatubang na kamong mga tawo na igwa kan siring na ugale. Maheheling nindo na an sobra nang marhay na hinahagad ninda sa iba puedeng magin dahelan nin dakol na problema, na nagbubunga nin pagkadiskontento asin pagkadesganar. Rinerekonoser nin kadaklan na timbang na tawo na an perpeksionismo sa sentido nin sobra nang marhay asin bakong rasonableng mga hinahagad sa gabos na bagay sa buhay talagang bakong kawiliwili. Iyan dapat na daogon. Minsan siring, an sarong problema iyo na pag-abot sa sato mismong aktitud o ugale, tibaad masakit na rekonoseron an tendensia sa siring na perpeksionismo, kaya masakit na daogon iyan.

Si Nelson igwa nin dakulang paninimbagan asin dakol na problemang dapat resolberan. Regular siang nag-aanalisar nin estadistika, asin prioridad nia an produksion. An perpeksionismo parateng ibinibilang na kaipuhan tanganing magin mapanggana sa paghanap nin malalaogan na trabaho kun saen makosog an kompetensia. Minsan ngani tibaad aapresyaron nin nagkapira an pagkaepisiente ni Nelson, an saiyang perpeksionismo nagtao sa saiya nin pisikal na mga problema, siring kan kolog nin payo asin tension. Kapareho daw kamo ni Nelson?

An mga aki apektado man nin perpeksionismo. Bilang aki, si Rita, na taga Rio de Janeiro, gustohon mag-eskuela. Hiningoa nia na sia dai magluwas na ambisyosa, alagad ta naaaburido sia kun dai nia nakukua an pinakahalangkaw na marka. Si Rita nagsabi: “Poon sa pagkaaki, ikinomparar ko an sakong sadiri sa iba na kadakol nin panahon, mantang ako pirmeng natetension asin nag-aapura. Nungka kong namatean na ako igwa nin panahon na magpahingalo huli ta pirmeng igwa nin mga gigibohon.”

Bilang sadit na aking babae, si Maria naghihibi sa pagkadesganar kun dai sia nakakadrowing nin siring  kahusay kan iba. Dugang pa, sa saiyang paghihingoang maabot an artistikong pagkaperpekto sa musika, parate siang natetension asin naghahadit imbes na maogma sa saiyang pagtogtog o pagkanta. An saro pang aking babae na taga Brazil, si Tania, na naghingoang magin madonong asin likayan an pakikompetensia, nag-admitir na sia nagbubugtak pa man giraray nin mga pamantayan para sa saiyang sadiri na halangkawon, kapwa sa eskuelahan asin sa harong. Inisip nia na kun bakong perpekto an saiyang ginigibo, dai siang gayo magugustohan kan mga tawo. Apuera dian, kun beses sobrang marhay an inaasahan ni Tania sa iba, na dahel kaiyan nakamamate sia nin pagkadesganar asin kamondoan.

Minsan ngani importante an pagkatatao, kahigosan, asin pakamate nin personal na satispaksion, an negatibong mga saboot, arog baga nin pagkatakot na masudya, puedeng magresulta sa pagbugtak nin dai maaabot na mga pasohan. An mga magurang o iba pa tibaad magbugtak nin sarong pamantayan nin pagkaperpekto sa mga leksion o sa isport na para sa mga aki masakit aboton. Halimbawa, an ina ni Ricardo halangkaw an mga inaasahan sa saiya, na gusto siang magin doktor, magtogtog nin piano, asin makapagtaram nin nagkapirang lenguahe. Naheheling daw nindo na an paaging ini, kun sobra na man na marhay, may posibilidad na pagponan nin mga problema o pagkadesganar?

Taano ta Dapat na Likayan an Perpeksionismo?

An trabahong marahayon an kalidad, na nakakaabot sa halangkaw na mga pamantayan nin pagkaeksakto asin kahusayan, iyo an hinahanap. Kaya an mga tawo dapat na makikompetensia sa paghanap nin malalaogan na trabaho. An saro pang nagigin dahelan na an dakol orog na nagmamaigot sa trabaho iyo an pagkatakot na mawaran nin ikabubuhay. An nagkapirang trabahador nagigin kaagid kan atleta na labi-labi an mga pagsasakripisyo tanganing makagibo nin sarong bagong rekord. Dangan, kun napaatubang sa masakit na kompetisyon, tibaad mapiritan sia na magsanay nin orog pa, na tibaad naggagamit nin kemikal na mga bagay tanganing umoswag pa asin​—an linalaoman nia​—manggana. Imbes na marahay na pagmamaigot na magin mahusay, an perpeksionismo nagpapangyari sa mga tawo na magin “motibado kan takot na masudya” o “itinutulod na magin numero uno.”​​—The Feeling Good Handbook.

Totoo, may mga naniniwala na an nagigibo ninda sa arte o sa isport pirmeng puedeng paoswagon. Pero, segun ki Dr. Robert S. Eliot, “an perpeksionismo sarong inaasahan na nungkang naootob.” Sinabi pa nia: “Iyan kompuesto nin pakamate nin kasalan, pananarahotan tolos, asin pagkatakot sa pag-olog-olog.” Huli kaini, totoo nanggad an mga tataramon kan madonong na si Hadeng Salomon: “Naheling ko mismo an gabos na kahigosan asin an gabos na kahusayan sa trabaho, na iyan nangangahulogan nin pagriribal nin saro tumang sa saro; ini man daing kapakanan asin paglapag sa doros.”​—Eclesiastes 4:4.

Ano an magigibo nindo kun kamo may tendensiang magin perpeksionista? Totoo daw na mientras na orog an saindong pagmamaigot, orog man kamong nadedesganar? Boot daw nindong magin bakong gayong eksihido asin orog na pamugtak an boot? Ano an boot sabihon kan pagigin perpekto? Dai daw kamo ngonyan naghihimuyawot na gamiton an pinakapotensial nindo mantang linilikayan an perpeksionismo? Kun kayang gamiton nin bakong sangkap na mga tawo an saindang mga kakayahan na itinao nin Dios tanganing magdiskobre nin mga bagay para sa kapakinabangan nin iba, imahinara an kayang gibohon nin katawohan sa irarom nin sangkap na mga kamugtakan asin sa paggiya nin Dios!

[Ritrato sa pahina 4]

An mga magurang o iba pa tibaad maghagad nin pagkaperpekto, na dai kayang aboton nin mga aki