Tawan nin Onra an mga Tinawan nin Autoridad sa Saindo
Tawan nin Onra an mga Tinawan nin Autoridad sa Saindo
“Tawan nin onra an gabos na klase nin tawo, mamoot kamo sa bilog na kasararoan nin mga tugang, matakot kamo sa Dios, tawan nin onra an hade.”—1 PEDRO 2:17.
1, 2. Ano an punto de vista nin mga tawo sa autoridad ngonyan? Taano?
“NASA mga aki gabos an diretso. Mayo nin paggalang sa mga magurang,” an reklamo nin sarong ina. “Kuestionon an Autoridad” sabi nin sarong istiker sa bamper. Duwa sana iyan na bunga nin sarong situwasyon na nangyayari ngonyan, arog kan seguradong aram nindo. Lakop sa bilog na kinaban an pankagabsan na kadaihan nin paggalang sa mga magurang, maestro, among, asin opisyales kan gobyerno.
2 An nagkapira tibaad magkimit sana kan saindang abaga asin magsabi, ‘Bueno, an mga nasa katongdan nin autoridad bakong angay na mag-ako kan sakong paggalang.’ Kun beses, tibaad masakit iyan na deharan. Napapaatubang kita sa daing pondong bareta manongod sa nasosobornohan na opisyales kan gobyerno, mahanab na mga among, daing kakayahan na mga maestro, asin abuserong mga magurang. Makaoogma, pira sanang Kristiano an arog kaiyan an pagheling sa mga may autoridad sa kongregasyon.—Mateo 24:45-47.
3, 4. Taano an mga Kristiano ta maninigong magtao nin galang sa mga nasa katongdan na may autoridad?
3 Bilang mga Kristiano, kita may “mapuersang dahelan” na igalang an mga nagkakapot nin sekular na autoridad. An mga Kristiano sinadol ni apostol Pablo na “magpasakop sa superyor na mga autoridad, huli ta mayo nin autoridad na dai itinogot nin Dios; an nagdadanay na mga autoridad nagtitirindog sa saindang relatibong mga kamugtakan na itinogot nin Dios.” (Roma 13:1, 2, 5; 1 Pedro 2:13-15) May sinabi man si Pablo na balidong dahelan sa pagkuyog sa mga autoridad sa pamilya: “Kamong mga agom na babae, magpasakop kamo sa saindong agom na lalaki, siring sa angay sa Kagurangnan. Kamong mga aki, magin makinuyog sa saindong mga magurang sa gabos na bagay, huli ta ini nakapaoogmang marhay sa Kagurangnan.” (Colosas 3:18, 20) An kamagurangan sa kongregasyon maninigong tawan niato nin onra ta sinda “ninombrahan kan banal na espiritu bilang mga paraataman, na pastoran an kongregasyon nin Dios.” (Gibo 20:28) Huli sa paggalang ki Jehova kaya kita nagtatao nin onra sa mga autoridad na tawo. Naturalmente, an pagtao nin onra sa autoridad ni Jehova pirmeng enot sa satong buhay.—Gibo 5:29.
4 Nasa isip an supremong autoridad ni Jehova, estudyaran niato an mga halimbawa nin nagkapira na daing paggalang sa mga nasa katongdan na may autoridad asin nin nagkapira na may paggalang.
An Dai Paggalang Nagbubunga nin Pagdesaprobar
5. Anong daing galang na aktitud an ipinaheling ni Mical ki David, asin ano an ibinunga kaiyan?
5 Sa kasaysayan ni Hadeng David, maheheling niato kun ano an punto de vista ni Jehova sa mga nagmemenus sa autoridad na itinao nin Dios. Kan ipadara ni David sa Jerusalem an kaban kan tipan, an agom niang si Mical “naheling si Hadeng David na naglulukso asin nagbabayle sa atubangan ni Jehova; asin nagpoon siang magduhagi sa saiya sa saiyang puso.” Maninigo na minidbid kutana ni Mical si David bilang bako sanang an payo kan pamilya kundi siring man an hade kan nasyon. Minsan siring, ipinahayag nia na may pagtuyatuya an nasa boot nia: “Abaa kapinamuraway kan hade sa Israel an saiyang sadiri ngonyan kan maghuba sia ngonyan sa pagheling kan mga oripon na babae kan saiyang mga lingkod, kun paanong an saro sa mga tawong daing isip naghuhuba nin biyo!” An sarong resulta kaini iyo na si Mical nungka na nagkaaki.—2 Samuel 6:14-23.
6. Paano minansay ni Jehova an dai paggalang ni Core sa Saiyang linahidan?
6 An sarong labi-labi karaot na halimbawa nin dai pagtao nin onra sa teokratikong pangengenot na nombrado nin Dios iyo an ki Core. Bilang sarong Coatita, kanigoan an pribilehio nia sa paglilingkod ki Jehova sa tabernakulo! Pero, tinatsaran nia si Moises asin Aaron, an linahidan nin Dios na mga namomoon sa mga Israelita. Si Core nakigrupo sa ibang namamayo sa Israel asin daing sopog na sinabihan si Moises asin Aaron: “An bilog na katiriponan, sinda gabos, banal asin si Jehova nasa tahaw ninda. Kun siring, taano ta ilalangkaw nindo an saindong sadiri sa kongregasyon ni Jehova?” Paano minansay ni Jehova an aktitud ni Core asin kan mga parasuportar nia? Minansay nin Dios na an saindang ginigibo paglapastangan ki Jehova mismo. Pakatapos na maheling na hinalon kan daga an gabos na kakampi ninda, si Core asin an 250 namamayo sinolo nin kalayo hale ki Jehova.—Bilang 16:1-3, 28-35.
7. May dahelan daw an “labi-labi karahay na mga apostol” na tatsaran an autoridad ni Pablo?
7 Sa Kristianong kongregasyon kan enot na siglo, may mga dai nag-intindi sa teokratikong autoridad. An “labi-labi karahay na mga apostol” sa kongregasyon nin Corinto may daing galang na aktitud ki Pablo. Tinatsaran ninda an saiyang abilidad sa pagtaram, na sinasabi: “An saiyang personal na presensia maluya asin an saiyang pagtaram daing kuenta.” (2 Corinto 10:10; 11:5) Baga man marahayon na magdiskurso si Pablo o bako, sia maninigong igalang bilang apostol. Alagad talaga daw na daing kuenta an pagtaram ni Pablo? An mga diskurso nia sa publiko na nasusurat sa Biblia nagtatao nin ebidensia kun gurano sia kanakakokombensir na magtaram. Tara, bilang resulta nin halipot na pakipag-olay ki Herodes Agripa II, sarong “eksperto sa gabos na . . . kontrobersia sa tahaw nin mga Judio,” an hade nadara ni Pablo sagkod sa punto na makasabi: “Sa halipot na panahon makokombensir mo akong magin Kristiano”! (Gibo 13:15-43; 17:22-34; 26:1-28) Pero, pinagsahotan sia kan labi-labi karahay na mga apostol sa Corinto na daing kuenta an saiyang pagtaram! Ano an punto de vista ni Jehova sa aktitud ninda? Sa sarong mensahe sa mga paraataman sa kongregasyon nin Efeso, si Jesu-Cristo paborableng nagtaram manongod sa mga nagsayumang madara kan mga ‘nagsabing sinda mga apostol, alagad bako man.’—Kapahayagan 2:2.
Paggalang sa Ibong nin Pagkabakong Sangkap
8. Paano ipinaheling ni David na sia nagtatao nin onra sa autoridad na itinao ni Jehova ki Saul?
8 Kadakol kan halimbawa sa Biblia nin mga nagtao nin onra sa mga indibiduwal na may autoridad, dawa kun ginagamit sa sala o inaabuso kan mga ini an saindang autoridad. Si David saro sa marahay na mga halimbawang iyan. Si Hadeng Saul, na saiyang pinaglilingkodan, nag-imon sa mga nagibo ni David asin naghingoa na gadanon sia. (1 Samuel 18:8-12; 19:9-11; 23:26) Pero, minsan ngani nagkaigwa nin mga oportunidad na gadanon si Saul, si David nagsabi: “Dai ko lamang pepensaron, sa punto de vista ni Jehova, na bikyawon an sakong kamot tumang sa linahidan ni Jehova!” (1 Samuel 24:3-6; 26:7-13) Aram ni David na sala si Saul, alagad ipinabaya nia ki Jehova an paghokom sa saiya. (1 Samuel 24:12, 15; 26:22-24) Sia dai nagtaram nin mapanlibak manongod ki o ki Saul.
9. (a) Ano an saboot ni David kan minamaltrato ni Saul? (b) Paano niato masasabi na tunay an paggalang ni David ki Saul?
9 Napurisaw daw si David mantang sia minamaltrato? “May . . . mga maisog na poon na naghahanap sa sakong kalag,” an agrangay ni David ki Jehova. (Salmo 54:3) Biyo niang ipinahayag ki Jehova an nasa saiyang puso: “Ligtasan ako sa sakong mga enemigo, O Dios ko . . . Sinasalakay ako nin makokosog, bakong huli sa pagrebelde ko, o sa ano man na kasalan ko, O Jehova. Minsan ngani mayo nin sala, sinda nagdadaralagan asin nag-aandam. Magmata ka sa pag-apod ko asin helinga.” (Salmo 59:1-4) Namatean na daw nindo an arog kaiyan—na mayo kamo nin nagibong sala sa sarong may autoridad, pero pigpaparapasakitan nia kamo? Si David dai nagkulang sa pagtao nin galang ki Saul. Kan magadan si Saul, imbes na maggayagaya, naggibo si David nin sarong panambitan: “Saul asin Jonatan, an mga madaling kamotan asin madaling pakiibanan kan sinda nabubuhay . . . Mas maliksi sinda sa mga agila, mas makosog sinda sa mga leon. Kamong mga aking babae nin Israel, tangisan nindo si Saul.” (2 Samuel 1:23, 24) Abaa karahay na halimbawa nin tunay na paggalang sa linahidan ni Jehova, dawa ngani nagkasala si Saul ki David!
10. Anong marahay na halimbawa an itinao ni Pablo sa pagtao nin onra sa autoridad kan namamahalang grupo na tao nin Dios, asin ano an ibinunga kaiyan?
10 Sa Kristianong kapanahonan, may makukua man kitang lataw na mga halimbawa kan mga nagtatao nin onra sa mga autoridad na itinao nin Dios. Halimbawa si Pablo. Sia nagtao nin galang sa mga desisyon kan namamahalang grupo kan Kristianong kongregasyon kan enot na siglo. Kaidtong ultimong pagsongko ni Pablo sa Jerusalem, hinatolan sia kan namamahalang grupo na linigan an sadiri sa seremonyal na paagi tanganing ipaheling sa iba na sia mayo nin maraot na boot sa Ley ni Moises. Puede kutanang nangatanosan si Pablo: ‘An mga tugang na iyan ininstruksionan ako kaidto na maghale sa Jerusalem kan namemeligro an sakong buhay. Ngonyan gusto nindang ipaheling ko sa publiko na iginagalang ko an Ley ni Moises. Nagsurat na ako sa mga taga Galacia na sinasadol sinda na dai na mag-otob kan Ley. Kun maduman ako sa templo, tibaad mapasala an pagsabot nin iba sa sakong ginibo, na iniisip na ako nakikikompromiso sa mga turi.’ Minsan siring, malinaw na dai nangatanosan nin arog kaiyan si Pablo. Mantang mayo man nin napapalabot na pagkompromiso nin Kristianong mga prinsipyo, saiyang iginalang asin sinunod an hatol kan namamahalang grupo kan enot na siglo. An ensegidang resulta iyo na kinaipuhan na isalbar si Pablo sa sarong pagsururog na Judio, asin pagkatapos nagduwang taon sia sa bilanggoan. Sa katapustapusi, naotob an kabotan nin Dios. Si Pablo nakapagpatotoo sa haralangkaw na opisyales sa Cesarea dangan dinara sa Roma na gobyerno an naggagasto tanganing makapagpatotoo ki Cesar mismo.—Gibo 9:26-30; 21:20-26; 23:11; 24:27; Galacia 2:12; 4:9, 10.
Nagtatao daw Kamo nin Galang?
11. Paano kita makatatao nin galang sa sekular na mga autoridad?
11 Nagtatao daw kamo nin nanonongod na galang sa mga may autoridad? An mga Kristiano pinagbotan na “itao sa gabos an nanonongod sa sainda, . . . sa saiya na naghahagad nin onra, an siring na onra.” Tunay nanggad, an kaiba sa satong pagpasakop sa “superyor na mga autoridad” bako sana na kita nagbabayad kan satong mga buhis kundi na tinatawan niato nin onra an mga autoridad paagi sa satong gawe-gawe asin pagtaram. (Roma 13:1-7) Kun napapaatubang sa opisyales nin gobyerno na tibaad maringis, ano an reaksion niato? Sa Estado nin Chiapas, Mejico, inagaw kan mga autoridad sa sarong komunidad an pamamahala sa oma na rogaring nin 57 pamilya nin mga Saksi ni Jehova huli ta an mga Kristianong ini dai nagpartisipar sa nagkapirang relihiosong kapiestahan. Sa mga miting na ginibo tanganing maresolberan an bagay, an mga Saksi, na malinig asin areglado an gubing, pirmeng may dignidad asin paggalang kun nagtataram. Pakalihis nin labing sarong taon, itinao an desisyon apabor sa sainda. Huli sa aktitud ninda nakua an paggalang nin nagkapirang nagmamasid sagkod sa punto na gusto naman nindang magin mga Saksi ni Jehova!
12. Taano ta mahalaga na magkaigwa nin “hararom na paggalang” sa agom na daing pagtubod?
12 Paano kamo makatatao nin galang sa itinao nin Dios na autoridad sa pamilya? Pakapaliwanagan kan halimbawa ni Jesus sa pagtios nin karatan, sinabi ni apostol Pedro: “Sa siring man na paagi, kamong mga agom na babae, magpasakop kamo sa saindong agom na lalaki, tangani na, kun an siisay man dai nagkukuyog sa tataramon, sinda madara minsan daing tataramon paagi sa gawe-gawe kan saindang agom na babae, huli sa pakaheling mismo sa saindong mabining gawe-gawe na may hararom na paggalang.” (1 Pedro 3:1, 2; Efeso 5:22-24) Idinoon digdi ni Pedro an halaga nin pagpasakop nin agom na babae sa saiyang agom na may “hararom na paggalang,” minsan ngani an nagkapirang agom na lalaki tibaad kakadikit kan ginigibo tanganing magin maninigo sa siring na paggalang. Huli sa magalang na aktitud nin sarong agom na babae tibaad makamtan nia an pagkamoot kan saiyang agom na daing pagtubod.
13. Paano matatawan nin onra nin mga agom na babae an saindang agom?
13 Sa konteksto kan mga tekstong ini, inaapod ni Pedro an satong atension sa halimbawa ni Sara, na an agom, si Abraham, lataw na halimbawa nin pagtubod. (Roma 4:16, 17; Galacia 3:6-9; 1 Pedro 3:6) Maninigo daw na an mga agom na babae na an agom may pagtubod magtao sa sainda nin mas kadikit na onra kisa itinatao sa saindang agom nin mga agom na babae na an agom daing pagtubod? Ano kun dai kamo oyon sa saindong agom manongod sa sarong bagay? Si Jesus may itinaong sadol na ikaaaplikar digdi sa pankagabsan na paagi: “Kun an saro na nasa irarom nin autoridad kumua sa saimo sa paglilingkod sa rayong sarong milya, ibanan mo sia sa duwang milya.” (Mateo 5:41) Tinatawan daw nindo nin onra an agom nindong lalaki paagi sa pagsunod sa gusto nia? Kun ini garo baga depisilon, sabihon sa saiya an saindong mga nasa boot manongod sa bagay. Dai ipamugtak na aram nia an nasa boot nindo. Alagad kun sinasabi nindo sa saiya an saindong gusto, gibohon iyan sa magalang na paagi. Sinasadol kita kan Biblia: “An saindo logod na pagtaram danay na igwa nin kabootan, na tinimplahan nin asin, tanganing maaraman nindo kun paano kamo matao nin simbag sa lambang saro.”—Colosas 4:6.
14. Ano an kalabot sa pagtao nin onra sa mga magurang?
14 Kumusta man kamo mga aki? Nagboboot an Tataramon nin Dios: “Mga aki, magin makinuyog sa saindong mga magurang na nasa Kagurangnan, huli ta ini matanos: ‘Tawan mo nin onra an saimong ama asin an saimong ina’; na iyo an enot na pagboot na may panuga.” (Efeso 6:1-3) Mangnoha na an pagigin makinuyog sa saindong mga magurang ibinibilang na kaparehong kahulogan kan ‘pagtao nin onra sa saimong ama asin sa saimong ina.’ An termino sa Griego na trinadusir na “onra” may kahulogan na “pahalagahan na marhay” o “bugtakan nin halaga.” Sa siring, an pagigin makinuyog naghahagad nin labi sa napipiritan sanang pagsunod sa mga reglamento kan magurang na tibaad garo baga bakong rasonable para sa saindo. Hinahagad nin Dios na magin halangkaw an pagheling nindo sa saindong mga magurang asin pahalagahan nindo an saindang paggiya.—Talinhaga 15:5.
15. Paano mapagdadanay nin mga aki an saindang paggalang dawa kun sa paghona ninda nasala an saindang mga magurang?
15 Kun an saindong mga magurang may gibohon na an tendensia inaan an saindong paggalang sa sainda, ano na? Hingoahon na mansayon an mga bagay sa punto de vista ninda. Bako daw na sinda “nagpangyari kan saimong pagkamundag” asin nagsusustento sa saindo? (Talinhaga 23:22) Bako daw na sinda minomotibar nin pagkamoot para sa saindo? (Hebreo 12:7-11) Magalang na makipag-olay sa saindong mga magurang, na ipinaliliwanag sa espiritu nin kahoyoan an nasa boot nindo. Dawa kun sumimbag sinda sa paagi na dai nindo gusto, magpogol sa daing galang na pagtaram sa sainda. (Talinhaga 24:29) Girumdoma kun paano pinapagdanay ni David an paggalang nia ki Saul dawa kan an hade naparayo na sa pagsunod sa hatol nin Dios. Arangon ki Jehova na tabangan kamo na maatubang an saindong mga saboot. “Sa atubangan nia biyong pahayagan an laog kan saindong puso,” sabi ni David. “An Dios sarong pailihan para sa satuya.”—Salmo 62:8; Lamentacion 3:25-27.
Tawan nin Onra an mga Nangengenot
16. Ano an manonodan niato sa mga halimbawa kan falsong mga paratokdo asin kan mga anghel?
16 An kamagurangan sa kongregasyon nombrado kan banal na espiritu, pero sinda bakong sangkap asin nasasala pa man giraray. (Salmo 130:3; Eclesiastes 7:20; Gibo 20:28; Santiago 3:2) Bilang resulta, an nagkapira sa kongregasyon tibaad deskontento sa kamagurangan. Ano an maninigong magin reaksion niato kun sa paghona niato bakong tama an pagkaasikaso sa sarong bagay sa kongregasyon, o minsan paano iyan an garo nangyari? Mangnoha an pagkakalaen kan falsong mga paratokdo kan enot na siglo asin kan mga anghel: “Mga mapangahas, mga sutil, dai sinda [an falsong mga paratokdo] nagtatakig sa mga mamuraway kundi nagtataram na may panlilibak, mantang an mga anghel, minsan ngani sinda orog an kosog asin kapangyarihan, dai nagdadara tumang sa sainda nin sumbong sa mapanlibak na mga pananaram, na dai iyan ginigibo huli sa paggalang ki Jehova.” (2 Pedro 2:10-13) Mantang an falsong mga paratokdo nagtaram na may panlilibak manongod sa “mga mamuraway”—an kamagurangan na tinawan nin autoridad sa Kristianong kongregasyon kan enot na siglo—an mga anghel dai nagtaram na may panlilibak manongod sa falsong mga paratokdo na ginigikanan nin dai pagkasararo kan mga tugang. An mga anghel, mantang nasa mas halangkaw na katongdan asin may mas makosog na sentido nin hustisya kisa mga tawo, nakaaaram kan nangyayari sa kongregasyon. Pero, “huli sa paggalang ki Jehova,” ipinabaya ninda sa Dios an paghokom.—Hebreo 2:6, 7; Judas 9.
17. Paano napapalabot an saindong pagtubod kun inaatubang an mga problema na dian sa paghona nindo nasala an kamagurangan?
17 Dawa kun an sarong bagay dai naasikaso sa paaging maninigo, bako daw na kita maninigong magkaigwa nin pagtubod ki Jesu-Cristo bilang an buhay na Payo kan Kristianong kongregasyon? Bako daw na aram nia an nangyayari sa sadiri niang kongregasyon sa bilog na kinaban? Bako daw na maninigo niatong igalang an saiyang paagi nin pag-asikaso sa situwasyon asin midbidon an saiyang abilidad na magkontrol sa mga bagay? An totoo, ‘siisay kita na maghohokom sa satong kapwa?’ (Santiago 4:12; 1 Corinto 11:3; Colosas 1:18) Taano ta dai darahon ki Jehova an saindong mga kapurisawan sa saindong mga pamibi?
18, 19. Ano an magigibo nindo kun sa paghona nindo nasala an sarong magurang sa kongregasyon?
18 Huli sa pagkabakong sangkap nin tawo, tibaad may lumataw na mga problema. Tibaad may panahon pa ngani na nasasala an sarong magurang sa kongregasyon, na nagigin dahelan na mapurisaw an nagkapira. An dali-dali niatong paggibo nin aksion sa irarom nin siring na mga kamugtakan dai makaliliwat sa situwasyon. Tibaad pagabaton sana kaiyan an problema. An mga may espirituwal na pakamansay maghahalat ki Jehova na itanos an mga bagay asin itao an ano man na disiplina na tibaad kaipuhan sa sadiri niang panahon asin paagi.—2 Timoteo 3:16; Hebreo 12:7-11.
19 Ano kun napupurisaw kamo manongod sa sarong bagay? Imbes na makipag-olay sa iba sa kongregasyon, taano ta dai dumolok nin magalang sa kamagurangan sa paghagad nin tabang? Dai nagigin tatsador, ipaliwanag kun paano kamo naapektaran. Pirmeng magkaigwa nin “pakikipagkapwa” sa sainda, asin papagdanayon an paggalang mantang kamo nagsasabi nin mga sekreto sa sainda. (1 Pedro 3:8) Dai magin mapagtuyatuya, kundi magtiwala sa saindang Kristianong pagkamaygurang. Apresyaron an ano man na pagparigon sa boot na sono sa Kasuratan na tibaad maboot nindang itao. Asin kun garo baga kaipuhan an iba pang pagtatanos, magkompiar na gigiyahan ni Jehova an kamagurangan na gibohon an marahay asin tama.—Galacia 6:10; 2 Tesalonica 3:13.
20. Ano an eestudyaran niato sa kasunod na artikulo?
20 Minsan siring, may saro pang aspekto na dapat estudyaran mapadapit sa pagtao nin onra asin paggalang sa mga may autoridad. Bako daw maninigo na igalang kan mga ibinugtak sa katongdan na may autoridad an mga ipinaaataman sa sainda? Siyasaton niato iyan sa kasunod na artikulo.
Ano an Isisimbag Nindo?
• Ano an marahay na dahelan niato sa pagtao nin onra sa mga may autoridad?
• Ano an punto de vista ni Jehova asin ni Jesus sa mga dai iginagalang an autoridad na itinao nin Dios?
• Ano an marahay na mga halimbawa niato kan mga nagtao nin onra sa mga tinawan nin autoridad?
• Ano an magigibo niato kun an saro na may autoridad sa sato garo baga nasala?
[Mga Hapot Para sa Pag-adal]
[Ritrato sa pahina 12]
Hararom an paggalang ni Sara sa autoridad ni Abraham asin sia maogma
[Ritrato sa pahina 13]
Dai ikinagalang ni Mical an autoridad ni David bilang payo kan pamilya asin hade
[Ritrato sa pahina 15]
“Dai ko lamang pepensaron . . . na bikyawon an sakong kamot tumang sa linahidan ni Jehova!”
[Ritrato sa pahina 16]
Taano ta dai darahon ki Jehova an saindong mga kapurisawan sa saindong mga pamibi?