Galagang Ipahayag an Maogmang Bareta
Galagang Ipahayag an Maogmang Bareta
“Magin malaad sa espiritu. Maglingkod ki Jehova.”—ROMA 12:11.
1, 2. Anong aktitud an pinagmamaigotan na papagdanayon kan mga Kristiano bilang mga parahulit kan maogmang bareta?
AN SARONG hoben na lalaki ogmahon sa bagong trabaho. Sa enot niang aldaw sa trabaho, galaga niang hinahalat an mga instruksion kan saiyang among. Saiyang inaantisipar an enot na ipagigibo sa saiya asin pinakaseseryoso nia iyan. Galaga sia na gibohon an saiyang pinakamakakaya.
2 Sa kaagid na paagi, kita bilang mga Kristiano puede tang mansayon an satong sadiri na bagohan na mga trabahador. Mantang an paglaom niato mabuhay sagkod lamang, masasabi na nagpoon pa sana kitang magtrabaho para ki Jehova. Seguradong may nasa isip an satong Kaglalang na dakol na ipagigibo sa sato na mapadanay sa sato na sibot sa panahon na daing sagkod. Alagad an pinakaenot na sugo na inako ta iyo an pagpahayag kan maogmang bareta kan saiyang Kahadean. (1 Tesalonica 2:4) Ano an satong saboot manongod sa asignasyon na ini hale sa Dios? Arog kan hoben na lalaki, boot niatong gibohon iyan sa abot kan satong pinakamakakaya, na may kaigotan, may kagayagayahan—iyo, na may pagkagalaga!
3. Ano an kaipuhan tanganing magin mapanggana bilang ministro kan maogmang bareta?
3 Totoo, an pagpadanay kan siring na positibong aktitud puedeng depisil. Apuera sa satong ministeryo, dakol kitang iba pang paninimbagan, na an nagkapira kaiyan tibaad mapagal kita sa pisikal asin emosyon. Sa pankagabsan, nakakaya tang asikasohon an mga bagay na ini mantang igong naaatenderan an ministeryo. Pero, puede iyan na magin nagpapadagos na kadepisilan. (Marcos 8:34) Idinoon ni Jesus na an satong kapangganahan bilang mga Kristiano mangangaipo nin maigot na paghihingoa.—Lucas 13:24.
4. Ano an puedeng magin epekto kan aroaldaw na mga kahaditan sa satong espirituwal na pananaw?
4 Huli sa kadakol na gigibohon, madali kitang mapagal o magabatan kun beses. An “mga kahaditan sa buhay” puedeng olangon an satong kaigotan asin pagpapahalaga sa teokratikong mga aktibidad. (Lucas 21:34, 35; Marcos 4:18, 19) Huli sa satong kanaturalan nang pagkabakong sangkap, tibaad bayaan ta ‘an satong pagkamoot kan enot.’ (Kapahayagan 2:1-4) An nagkapirang aspekto kan satong paglilingkod ki Jehova puedeng magin garo rutina na sana. Paano itinatao kan Biblia an kinakaipuhan na pagparigon sa boot tanganing mapagdanay tang buhay an satong kaigotan sa ministeryo?
Siring sa “Naglalaad na Kalayo” sa Satong Puso
5, 6. Paano minansay ni apostol Pablo an saiyang pribilehio na paghuhulit?
5 An ministeryo na ipinagkatiwala sa sato ni Jehova mahalagang marhay nanggad tanganing pabayaan na magin ordinaryo na sana. Ibinilang ni apostol Pablo an paghuhulit kan maogmang bareta na sarong dakulaon na pribilehio, asin minansay nia an saiyang sadiri na bakong angay na pagkatiwalaan kaiyan. Sia nagsabi: “Sa sako, tawong sadit sa pinakasadit sa gabos na banal, itinao an dai na kutana maninigong kabootan na ini, na ipahayag ko sa mga nasyon an maogmang bareta manongod sa dai marorop na mga kayamanan kan Cristo asin ipasabot sa mga tawo kun paano an sagradong hilom ipinaootob na kaidtong daing talaan na nakaagi natago dian sa Dios, na naglalang kan gabos na bagay.”—Efeso 3:8, 9.
6 An positibong aktitud ni Pablo manongod sa saiyang ministeryo marahayon na halimbawa para sa sato. Sa saiyang surat sa mga taga Roma, sia nagsabi: “Ako galagang ipahayag . . . an maogmang bareta.” Dai nia ikinasopog an maogmang bareta. (Roma 1:15, 16) Sia igwa kan tamang aktitud asin galagang gibohon an saiyang ministeryo.
7. Sa saiyang surat sa mga taga Roma, tumang sa ano nagpatanid si Pablo?
7 Rinekonoser ni apostol Pablo an pangangaipo na papagdanayon an maigot na punto de vista, kaya sinadol nia an mga Kristiano sa Roma: “Dai kamo maghinugak sa saindong gibohon. Magin malaad sa espiritu. Maglingkod ki Jehova.” (Roma 12:11) An termino sa Griego na trinadusir na “maghinugak” igwa kan ideya nin pagigin “buntol, maluya.” Minsan ngani tibaad sa aktuwal dai man kita naghihinugak sa satong ministeryo, kita gabos kaipuhan na magin alisto sa ano man na enot na mga sintoma nin espirituwal na kabuntolan asin gumibo nin angay na mga pagliliwat sa satong aktitud kun mamansayan ta na kita igwa kan siring na mga sintoma.—Talinhaga 22:3.
8. (a) Ano an nagin siring sa “naglalaad na kalayo” sa puso ni Jeremias, asin taano? (b) Anong leksion an manonodan ta sa eksperyensia ni Jeremias?
8 An espiritu nin Dios puede man na tumabang sa sato kun kita pinanluluyahan nin boot. Halimbawa, sarong beses namatean ni propeta Jeremias an panluluya nin boot, asin inisip niang pumondo sa saiyang gibohon na paghula. Nagsabi pa ngani sia dapit ki Jehova: “Dai ko na sia sasambiton, asin dai na ako noarin man magtataram pa sa saiyang ngaran.” Ebidensia daw ini na si Jeremias may grabeng kakulangan sa espirituwal? Dai. Sa katunayan, an makosog na espirituwalidad ni Jeremias, an saiyang pagkamoot ki Jehova, asin an saiyang kaigotan para sa katotoohan iyo an nagtao sa saiya nin kosog na ipadagos an paghula. Sia nagpaliwanag: “Sa sakong puso [an tataramon nin Jehova] nagin siring sa naglalaad na kalayo na tuminaros sa sakong mga tolang; asin ako napagal sa pagpogol kaiyan, asin dai ko na iyan natagalan.” (Jeremias 20:9) Natural sana na an fiel na mga lingkod nin Dios makamate nin panluluya nin boot paminsanminsan. Alagad kun sinda mamibi ki Jehova para sa tabang, babasahon nia an saindang puso asin bulaos na itatao sa sainda an saiyang banal na espiritu kun, arog ki Jeremias, yaon sa saindang puso an saiyang tataramon.—Lucas 11:9-13; Gibo 15:8.
“Dai Nindo Pagsigbohon an Laad kan Espiritu”
9. Ano an puedeng makaolang sa aktibidad kan banal na espiritu para sa sato?
9 Sinadol ni apostol Pablo an mga taga Tesalonica: “Dai nindo pagsigbohon an laad kan espiritu.” (1 Tesalonica 5:19) Iyo, an mga hiro asin aktitud na kontra sa diosnon na mga prinsipyo puedeng makaolang sa aktibidad kan banal na espiritu para sa sato. (Efeso 4:30) An mga Kristiano ngonyan may asignasyon na ihulit an maogmang bareta. Hararom an paggalang ta sa pribilehiong ini. Dai kita nagngangalas na an mga dai nakamimidbid sa Dios linalapastangan an satong paghuhulit. Alagad kun tuyo na pinababayaan nin sarong Kristiano an saiyang ministeryo, iyan puedeng magresulta sa pagsigbo sa laad kan nagmomotibar na espiritu nin Dios.
10. (a) Paano puedeng makaapektar sa sato an pagmansay kan satong kapwa? b) Anong halangkaw na pagmansay sa satong ministeryo an ipinahayag sa 2 Corinto 2:17?
10 An nagkapira sa luwas kan Kristianong kongregasyon tibaad an pagmansay sa satong ministeryo pagwaras sana nin mga babasahon. An iba tibaad salang magkonklusyon na kita naghaharongharong tangani sanang mag-ako nin mga donasyon. Kun totogotan ta an siring na negatibong mga pagmansay na makaimpluwensia sa satong aktitud, puedeng paluyahon kaini an satong pagkaepektibo sa ministeryo. Imbes na togotan an siring na kaisipan na makaapektar sa sato, papagdanayon ta an pagmansay ni Jehova asin ni Jesus sa satong ministeryo. Sinambit ni apostol Pablo an halangkaw na pagmansay na iyan kan sia magpahayag: “Kita bakong mga paratinda kan tataramon nin Dios arog nin dakol na tawo, kundi bilang gikan sa sinseridad, iyo, bilang isinugo nin Dios, na naheheling nin Dios, kaiba ni Cristo, kita nagtataram.”—2 Corinto 2:17.
11. Ano an nagpangyari sa enot na mga Kristiano na magdanay na maigot dawa pinaglalamag, asin ano an maninigong magin epekto sa sato kan saindang halimbawa?
11 Dai nahaloy pagkagadan ni Jesus, an saiyang mga disipulo sa Jerusalem napaatubang sa panahon nin paglamag. Sinda hinuma asin pinagbotan na umontok sa paghuhulit. Pero, an Biblia nagsasabi na sinda “napano kan banal na espiritu asin nagtaram kan tataramon nin Dios na may pagkapusoan.” (Gibo 4:17, 21, 31) An mga tataramon ni Pablo ki Timoteo pakaagi nin pirang taon nagpapaheling kan positibong kaisipan na maninigong papagdanayon nin mga Kristiano. Si Pablo nagsabi: “An Dios nagtao sato bakong nin espiritu nin pagkamatalaw, kundi nin kapangyarihan asin nin pagkamoot patin nin marahay na kaisipan. Kun siring dai mo ikasopog an patotoo dapit sa satong Kagurangnan, ni ako na bilanggo huli sa saiya, kundi makikabtang ka sa pagtios nin maraot para sa maogmang bareta sono sa kapangyarihan nin Dios.”—2 Timoteo 1:7, 8.
Ano an Utang Niato sa Satong Kataed?
12. Ano an pangenot na dahelan kun taano ta naghuhulit kita kan maogmang bareta?
12 Tanganing magkaigwa nin tamang aktitud dapit sa satong ministeryo, kita dapat na igwa kan tamang motibo. Taano ta naghuhulit kita? An pangenot na dahelan maheheling sa mga tataramon kan salmista: “An saimong mga maimbod mag-oomaw sa saimo [Jehova]. Sinda magtataram dapit sa kamurawayan kan saimong paghade, asin isasabi ninda an dapit sa saimong kapangyarihan, tanganing ipaisi sa mga aki nin mga tawo an saiyang makapangyarihan na mga gibo asin an kamurawayan kan kagayonan kan saiyang paghade.” (Salmo 145:10-12) Iyo, kita naghuhulit tanganing omawon si Jehova sa publiko asin santipikaron an saiyang ngaran sa atubangan kan bilog na katawohan. Dawa kun dikit an naghihinanyog sa sato, an satong fiel na pagbalangibog kan mensahe nin kaligtasan nagtatao nin kaomawan ki Jehova.
13. Ano an nagtutulod sa sato na isabi sa iba an paglaom na kaligtasan?
13 Kita naghuhulit man huli sa pagkamoot sa mga tawo asin tanganing malikayan an pagkakasala sa dugo. (Ezequiel 33:8; Marcos 6:34) Konektado digdi an mga tataramon ni Pablo kan nagtataram dapit sa mga nasa luwas kan Kristianong kongregasyon: “Ako may utang kapwa sa mga Griego asin sa mga Barbaro, kapwa sa mga madonong asin sa mga mangmang.” (Roma 1:14) Sa pagmate ni Pablo utang nia sa mga tawo na ipahayag sa sainda an maogmang bareta, huling kabotan nin Dios na “an gabos na klase nin tawo makaligtas.” (1 Timoteo 2:4) Ngonyan, namamatean ta an iyo man sanang pagkamoot asin obligasyon sa satong kataed. An pagkamoot ni Jehova sa katawohan an nagpahiro sa saiya na isugo an saiyang Aki digdi sa daga tanganing magadan para sa sainda. (Juan 3:16) Dakulaon na sakripisyo idto. Inaarog ta an pagkamoot ni Jehova kun kita naggagamit nin panahon asin paghihingoa sa pagsabi sa iba dapit sa maogmang bareta nin kaligtasan basado sa atang ni Jesus.
14. Paano ilinaladawan kan Biblia an kinaban na nasa luwas kan Kristianong kongregasyon?
14 An pagmansay kan Mga Saksi ni Jehova sa mga kapwa tawo potensial na mga miembro kan Kristianong kasararoan nin magturugang. Kita dapat na maghulit na may pagkapusoan, pero an satong pagkapusoan bakong agresibo. Sa katunayan, an Biblia talagang naggagamit nin mapuersang mga termino sa pagtaram dapit sa kinaban sa pankagabsan. An terminong “kinaban” mismo ginagamit sa negatibong sentido ni Pablo sa pagtaram nia dapit sa “kadonongan kan kinaban na ini” asin “kinabanon na mga mawot.” (1 Corinto 3:19; Tito 2:12) Pinagirumdom man ni Pablo an mga Kristiano sa Efeso na kan sinda naglalakaw kaidto “segun sa palakaw nin mga bagay kan kinaban na ini,” sinda “gadan” sa espirituwal. (Efeso 2:1-3) An mga tataramon na ini asin an iba pang arog kaiyan kaoyon sa mga tataramon ni apostol Juan: “An bilog na kinaban namumugtak sa kapangyarihan kan maraot.”—1 Juan 5:19.
15. Mapadapit sa mga indibiduwal sa luwas kan Kristianong kongregasyon, ano an dai niato ginigibo, asin taano ta dai?
15 Pero, girumdoma na an siring na mga tataramon nanonongod sa kinaban sa pankagabsan na siblag sa Dios, bakong sa mga indibiduwal. An mga Kristiano dai nangangahas na patienot nang husgaran kun ano an magigin reaksion nin siisay man na indibiduwal sa paghuhulit. Mayo sinda nin basehan na sabihon na mga kanding an siisay man na mga indibiduwal. Bako kita an magsasabi kan magigin resulta pagdatong ni Jesus tanganing ibulag an “mga karnero” sa “mga kanding.” (Mateo 25:31-46) Si Jesus an ninombrahan na hokom; bako kita. Apuera kaiyan, ipinaheheling nin eksperyensia na may nagkapirang napalabot na marhay dawa sa pinakamaraot na gawe-gawe na nag-ako kan mensahe kan Biblia, nagbakle, asin nagin mga Kristianong malinig an pamumuhay. Huli kaini, minsan ngani tibaad habo tang makiasosyar sa nagkapirang indibiduwal, dai kita nag-aalangan na makipag-olay sa sainda manongod sa paglaom sa Kahadean kun igwang oportunidad. An Kasuratan may sinasabing nagkapirang indibiduwal na, minsan ngani dai pa nagtuturubod, “may tamang tendensia sa buhay na daing katapusan.” Pag-abot nin panahon sinda nagturubod. (Gibo 13:48) Huli kaini nungka tang maaaraman kun siisay an may tamang tendensia sagkod na dai pa kita nagtao nin patotoo—tibaad nin dakol na beses. Nasa isip ini, an mga dai pa nag-aako kan mensahe nin kaligtasan tinatratar niato na may “kahoyoan” asin “hararom na paggalang,” na naglalaom na an nagkapira sa sainda tibaad maghimate pa sa mensahe nin buhay.—2 Timoteo 2:25; 1 Pedro 3:15.
16. Ano an sarong rason kun taano ta boot niatong pataluboon an “abilidad sa pagtotokdo”?
16 An pagpatalubo nin mga abilidad bilang mga paratokdo mapaorog kan satong pagkagalaga na ipahayag an maogmang bareta. Bilang ilustrasyon: An sarong nakaoogmang kawat o isport tibaad bakong interesante para sa saro na dai tataong magkawat kaiyan. Alagad para sa saro na matibay magkawat kaiyan, nakaoogma iyan. Kaagid kaiyan, an mga Kristianong nagpapatalubo kan “abilidad sa pagtotokdo” nadadagdagan an saindang kagayagayahan sa ministeryo. (2 Timoteo 4:2; Tito 1:9) Sinadol ni Pablo si Timoteo: “Gibohon mo an bilog mong makakaya tanganing ikaatubang mo an saimong sadiri na inooyonan nin Dios, sarong paragibo na mayo nin maninigong ikasopog, na ginagamit an tataramon kan katotoohan sa tamang paagi.” (2 Timoteo 2:15) Paano ta mapaooswag an satong mga kakayahan sa pagtotokdo?
17. Paano ta mahihimong ‘magkaigwa nin pagmawot’ sa kaaraman sa Biblia, asin paano ta mapakikinabangan an siring na kaaraman sa satong ministeryo?
17 An sarong paagi iyo an pagkua nin dugang pang tamang kaaraman. Dinadagka kita ni apostol Pedro: “Bilang mga omboy na bagong mamundag, magkaigwa kamo nin pagmawot sa daing kasalak na gatas kan tataramon, tanganing paagi kaiyan magtalubo kamo sa kaligtasan.” (1 Pedro 2:2) Naturalesa na sa sarong omboy na marahay an salud na magmawot nin gatas. Minsan siring, an sarong Kristiano tibaad kaipuhan na ‘magkaigwa nin pagmawot’ sa kaaraman sa Biblia. Magigibo ini paagi sa pagpatalubo nin marahay na ugale sa pag-adal asin pagbasa. (Talinhaga 2:1-6) Kaipuhan an paghihingoa asin disiplina sa sadiri tanganing kita magin ekspertong paratokdo kan Tataramon nin Dios, alagad may balos an siring na mga paghihingoa. An dakulang kaogmahan na bunga nin pagsiyasat sa Tataramon nin Dios magpapangyari sa sato na magin malaad sa espiritu nin Dios, na galagang ihiras sa iba an mga bagay na nanonodan ta.
18. Paano kita masasangkapan kan Kristianong mga pagtiripon sa paggamit kan tataramon kan katotoohan sa tamang paagi?
18 An Kristianong mga pagtiripon igwa man nin mahalagang marhay na kabtang sa satong ekspertong paggamit kan Tataramon nin Dios. Kun binabasa an mga teksto sa Biblia durante nin mga pahayag sa publiko asin iba pang pag-orolay sa Kasuratan, marahay na sundan ta iyan sa sato mismong Biblia. Madonong na mag-atento kitang marhay sa mga kabtang sa pagtiripon, kabale an mga partikularmenteng may koneksion sa satong paghuhulit. Nungka niatong pagmenuson an halaga nin mga demonstrasyon, na tibaad pinababayaan tang maparayo an satong atension. Sa giraray, kaipuhan an disiplina sa sadiri asin pagkonsentrar. (1 Timoteo 4:16) Pinaririgon kan Kristianong mga pagtiripon an satong pagtubod, tinatabangan kitang magkaigwa nin pagmawot sa Tataramon nin Dios, asin sinasanay kita na magin galagang parabalangibog kan maogmang bareta.
Makakasarig Kita sa Suporta ni Jehova
19. Taano ta mahalagang marhay an pakikikabtang nin regular sa paghuhulit?
19 An mga Kristiano na “malaad sa espiritu” asin galaga na ipahayag an maogmang bareta naghihingoang makikabtang nin regular sa ministeryo. (Efeso 5:15, 16) Totoo, manlaenlaen an kamugtakan, asin bakong gabos puedeng parareho kadakol na panahon an ginagamit sa nagliligtas-buhay na gibohon na ini. (Galacia 6:4, 5) Pero, an mas mahalaga gayod kisa total nin panahon na ginagamit ta sa paghuhulit iyo an kun gurano kita kaparateng nakikipag-olay sa iba manongod sa satong paglaom. (2 Timoteo 4:1, 2) Mientras na kita orog na naghuhulit, orog man na naaapresyar ta an kahalagahan kan gibohon na ini. (Roma 10:14, 15) Mag-oorog an satong pakikidamay asin pakikipagkapwa kun kita regular na nakikipag-olay sa sinserong mga tawo na nag-aaragagha asin nag-aagrangay patin mayo nin paglaom.—Ezequiel 9:4; Roma 8:22.
20, 21. (a) Anong gibohon an yaon pa sa enotan niato? (b) Paano sinusuportaran ni Jehova an satong mga paghihingoa?
20 Ipinagkatiwala sa sato ni Jehova an maogmang bareta. Ini an enot na sugo na inako ta sa saiya bilang saiyang “mga kapwa trabahador.” (1 Corinto 3:6-9) Galaga kita na otobon nin bilog na kalag an tao nin Dios na paninimbagan na ini, sa abot kan satong pinakamakakaya. (Marcos 12:30; Roma 12:1) Dakol pa an may tamang tendensia na mga tawo sa kinaban na nagugutom sa katotoohan. Kadakol kan gigibohon, alagad makasasarig kita sa suporta ni Jehova mantang lubos niatong inootob an satong ministeryo.—2 Timoteo 4:5.
21 Itinatao sa sato ni Jehova an saiyang espiritu asin sinasangkapan kita kan “espada kan espiritu,” an Tataramon nin Dios. Paagi sa tabang nia makatataram kita “na may katalingkasan na magtaram sa pagpahayag kan sagradong hilom kan maogmang bareta.” (Efeso 6:17-20) Masabi logod manongod sa sato an isinurat ni apostol Pablo sa mga Kristiano sa Tesalonica: “An maogmang bareta na samong ihinuhulit dai nagdatong sa saindo sa tataramon sana kundi siring man sa kapangyarihan asin banal na espiritu patin makosog na kombiksion.” (1 Tesalonica 1:5) Iyo, ipahayag ta an maogmang bareta na may pagkagalaga!
Halipot na Repaso
• Huli sa mga kahaditan sa buhay, ano an puedeng mangyari sa satong kaigotan sa ministeryo?
• Sa anong paagi na an satong pagmawot na ipahayag an maogmang bareta maninigo na magin siring sa “naglalaad na kalayo” sa satong puso?
• Anong negatibong mga aktitud dapit sa ministeryo an maninigo niatong likayan?
• Sa pankagabsan, ano an maninigo na magin pagmansay niato sa mga bako niatong kapagtubod?
• Paano kita tinatabangan ni Jehova na mapagdanay an satong kaigotan sa paghuhulit?
[Mga Hapot Para sa Pag-adal]
[Mga Ritrato sa pahina 9]
Inaarog kan mga Kristiano an kaigotan ni Pablo asin Jeremias
[Mga Ritrato sa pahina 10]
An satong kaigotan sa ministeryo minomotibar kan pagkamoot sa Dios asin kataed