Marahay na mga Halimbawa—Nakikinabang daw Kamo sa Sainda?

“KAMO nagin halimbawa sa gabos na nagtutubod sa Macedonia asin sa Acaya.” Isinurat ni apostol Pablo an mga tataramon na ini sa fiel na mga Kristiano na nag-eerok sa Tesalonica. An halimbawang itinao ninda sa mga kapagtubod totoong kaomaw-omaw. Sa ibong kaiyan, an mga taga Tesalonica mismo nagsusunod man sa halimbawa na itinao ni Pablo asin kan saiyang kairiba. Si Pablo nagsabi: “An maogmang bareta na samong ihinuhulit dai nagdatong sa saindo sa tataramon sana kundi siring man sa kapangyarihan asin banal na espiritu patin makosog na kombiksion, siring na aram nindo kun nagin ano kaming klaseng mga tawo sa saindo para sa saindong karahayan; asin kamo nagin mga paraarog sa samo.”—1 Tesalonica 1:5-7.

Iyo, dai sana naghulit nin mga sermon si Pablo. An saiya mismong buhay saro nang sermon—sarong halimbawa nin pagtubod, pakatagal, asin pagsasakripisyo. Huli kaini, si Pablo asin an saiyang kairiba nagin mapuersang impluwensia sa buhay kan mga taga Tesalonica, na nagpahiro sa sainda na akoon an katotoohan “sa irarom nin dakulang kahorasaan.” Pero, bako sana nanggad si Pablo asin an saiyang kairiba an solamenteng positibong impluwensia sa mga nagtutubod na idto. An halimbawa kan iba na nagtios nin kahorasaan saro man na pamparigon sa boot. Si Pablo nagsurat sa mga taga Tesalonica: “Kamo, mga tugang, nagin mga paraarog sa mga kongregasyon nin Dios na nasa Judea na kasaro ni Cristo Jesus, huli ta kamo man nagpoon na magtios sa kamot kan saindong sadiring mga kahimanwa kan iyo man sanang mga bagay na tinitios man ninda sa kamot kan mga Judio.”—1 Tesalonica 2:14.

Si Cristo Jesus—An Pangenot na Arogan

Minsan ngani si Pablo mismo nagtao nin halimbawa na angay na arogon, dai nia liningawan na itokdo si Jesu-Cristo bilang an pangenot na halimbawa na maninigong sunodon kan mga Kristiano. (1 Tesalonica 1:6) Si Cristo an satong pangenot na Arogan kaidto asin ngonyan. Si apostol Pedro nagsurat: “Sa dalan na ini kamo inapod, huli ta minsan si Cristo nagtios para sa saindo, na winalatan kamo nin modelo tanganing sunodon nindo nin estrikto an saiyang mga lakad.”—1 Pedro 2:21.

Minsan siring, natapos ni Jesus an saiyang buhay bilang tawo kaidtong haros 2,000 na taon na an nakaagi. Ngonyan sia “nag-eerok sa dai maranihan na liwanag” bilang inmortal na espiritung linalang. Bilang siring, “mayo ni saro sa mga tawo an nakaheling o makaheheling” sa saiya. (1 Timoteo 6:16) Kun siring, paano niato sia maaarog? An sarong paagi iyo an pag-adal sa apat na pagkasaysay sa Biblia kan buhay ni Jesus. An mga Ebanghelyo nagtatao nin pakarorop sa saiyang personalidad, dalan nin buhay, asin “nasa isip na aktitud.” (Filipos 2:5-8) An dugang na pakarorop makukua paagi sa maingat na pag-adal sa librong The Greatest Man Who Ever Lived, na nagpapaliwanag kan mga pangyayari sa buhay ni Jesus sa detalyadong marhay asin kronolohikong paagi. *

An halimbawa ni Jesus na pagigin mapagsakripisyo makosog an nagin epekto ki apostol Pablo. Sinabihan nia an mga Kristiano sa Corinto: “Sa sakong kabtang ako maogmang gayo na maggagamit kan sakong sadiri asin lubos na mapagamit manongod sa saindong kalag.” (2 Corinto 12:15) Arog-Cristong aktitud nanggad! Mantang hinohorophorop ta an sangkap na halimbawa ni Cristo, kita maninigo man na mapahirong arogon sia sa sato mismong dalan nin buhay.

Halimbawa, tinokdoan kita ni Jesus na maninigo kitang manarig sa panuga nin Dios na magtatao nin  probisyon sa materyal. Alagad orog pa dian an ginibo nia. Ipinaheling nia an siring na pagtubod asin kompiansa ki Jehova sa aroaldaw. Sia nagsabi: “An mga amid igwa nin mga lungib asin an mga gamgam nin langit igwa nin mga hapunan, alagad an Aki nin tawo mayo man lamang nin mahihigdaan.” (Mateo 6:25; 8:20) Materyal na mga bagay daw an nagkokontrol sa saindong kaisipan asin gawe-gawe? O an buhay daw nindo nagtatao nin ebidensia na ineenot nindo an Kahadean? Asin kumusta man an saindong aktitud dapit sa paglilingkod ki Jehova? Arog daw iyan kan satong Arogan, si Jesus? Ipinaheheling kan Biblia na si Jesus dai sana naghulit nin kaigotan kundi dakol na beses na nagpaheling nin malaad na kaigotan. (Juan 2:14-17) Dugang pa, kanigoan karahay na halimbawa an itinao ni Jesus pag-abot sa pagkamoot! Tara, isinakripisyo nia an saiya mismong buhay para sa saiyang mga disipulo! (Juan 15:13) Inaarog daw nindo si Jesus paagi sa pagpaheling nin pagkamoot sa saindong Kristianong mga tugang? O tinotogotan daw nindo an mga pagkabakong sangkap nin nagkapira na olangon an saindong pagkamoot sa sainda?

Sa satuyang pagmamaigot na sunodon an halimbawa ni Cristo, parate kitang magkukulang. Alagad seguradong naoogma si Jehova sa satong mga paghihingoa na ‘isolog an Kagurangnan na si Jesu-Cristo.’—Roma 13:14.

“Mga Halimbawa sa Aripompon”

Igwa daw nin mga indibiduwal sa kongregasyon ngonyan na puedeng magserbing mga halimbawa sa sato? Igwa nanggad! An mga tugang na lalaki na nasa nombradong katongdan nin paninimbagan dapat na nangorognang magtao nin halimbawa. Sinabihan ni Pablo si Tito, na naglingkod sa mga kongregasyon sa Creta asin na nagnombra nin mga paraataman, na an lambang nombradong magurang sa kongregasyon dapat na sarong “lalaki na dai nin kanawayan.” (Tito 1:5, 6) Sinadol man ni apostol Pedro an “kamagurangan na lalaki” na magin “mga halimbawa sa aripompon.” (1 Pedro 5:1-3) Asin kumusta man an mga naglilingkod bilang ministeryal na mga lingkod? Sinda dapat man na “mga lalaki na naglilingkod sa marahay na paagi.”—1 Timoteo 3:13.

Siempre, bakong realistiko na laoman na an lambang magurang sa kongregasyon o ministeryal na lingkod magigin pambihira kaeksperto sa lambang aspekto kan Kristianong ministeryo. Sinabihan ni Pablo an mga Kristiano sa Roma: “Manlaenlaen an satong balaog sono sa dai na kutana maninigong kabootan na itinao sa sato.” (Roma 12:6) An magkakalaen na mga tugang na lalaki may nakalalabing abilidad sa laen-laen na kabtang. Bakong rasonable na laoman na perpekto an gabos na paghiro asin pagtaram kan kamagurangan. “Kita gabos nasisingkog nin dakol na beses,” an sabi kan Biblia sa Santiago 3:2. “Kun an siisay man dai nasisingkog sa pagtaram, an sarong ini sangkap na tawo, na nakakabusal man kan bilog niang hawak.” Minsan siring, sa ibong kan saindang mga pagkabakong sangkap, an kamagurangan puede pa man giraray, arog ki Timoteo, na ‘magin arogan kan mga fiel sa pagtaram, sa gawe-gawe, sa pagkamoot, sa pagtubod, sa kalinigan.’ (1 Timoteo 4:12) Kun ginigibo iyan kan kamagurangan, magian sa boot na iaaplikar kan mga kabilang sa aripompon an sadol sa Hebreo 13:7: “Girumdoma nindo idtong mga nangengenot sa saindo, . . . asin mantang pinaghohorophorop nindo an resulta kan saindang gawe-gawe aroga nindo an saindang pagtubod.”

Iba Pang Halimbawa sa Presenteng Aldaw

Sa nag-aging pirang dekada, dai mabilang na iba pa an nagpaheling na sinda marahay na halimbawa. Kumusta man an rinibong mapagsakripisyong misyonero na “nagbaya nin mga harong o mga tugang na lalaki o mga tugang na babae o ama o ina o mga aki o mga daga” tanganing otobon an Kristianong sugo sa mga langtad sa ibang nasyon? (Mateo 19:29) Horophoropa man an nagbibiaheng mga paraataman asin an saindang agom, an mga lalaki asin babae na nagboboluntaryo sa mga opisina kan Watch Tower Society, asin an mga payunir na naglilingkod sa mga kongregasyon. Makamomotibar daw sa iba an siring na mga halimbawa? Nagigirumdoman nin sarong Kristianong ebanghelisador sa Asia an sarong misyonero hale sa ikawalong klase kan Paadalan sa Biblia kan Watchtower sa Gilead. Sia nagsabi na an fiel na tugang na lalaking ini “andam na atubangon an gulping namok asin an grabeng harasahas. . . . Pero an mas kahangahanga pa iyo an saiyang kakayahan na makipag-olay sa lenguaheng Intsik sagkod Malay minsan ngani taga Inglaterra sia.” An epekto kan  magayon na halimbawang ini? An tugang nagsabi: “An saiyang pagkakalmado asin kompiansa nag-inspirar sa sako na magmawot na magin misyonero pagdakula ko.” Bakong makangangalas, an tugang na ini talagang nagin misyonero.

An Watch Tower Publications Index igwa nin lista nin kadakol na estorya nin buhay na nagluwas sa mga magasin na Torrengbantayan asin Awake! Mga estorya ini dapit sa mga indibiduwal na binayaan an kinabanon na mga karera asin pasohan, pinangganahan an mga kaluyahan, naggibo nin pambihirang mga pagbabago sa personalidad, nagpadanay nin positibong disposisyon sa atubangan nin kasakitan, asin nagpaheling nin kahigosan, pakatagal, kaimbodan, kapakumbabaan, asin espiritu nin pagsasakripisyo sa sadiri. An sarong parabasa nagsurat mapadapit sa mga estoryang ini: “Ginigibo ako kaiyan na magin mas mapakumbaba asin mapagpasalamat na Kristiano kun binabasa ko an mga inagihan nin iba, asin tinabangan ako kaiyan na dai magin sobra an pagheling ko sa sakong sadiri o magin maimot.”

Dugang pa, dai paglingawan an marahay na mga halimbawa sa saindo mismong kongregasyon: mga payo nin pamilya na danay na inaasikaso an materyal sagkod espirituwal na mga pangangaipo kan saindang pamilya; mga tugang na babae—kabale an nagsosolong mga ina—na inaatubang an sakit nin pagpadakula sa aki mantang aktibo pa man giraray na nakikikabtang sa ministeryo; mga gurang asin maluya an hawak na nagpapadagos na fiel sa ibong kan nag-oorog na pagluya kan hawak asin salud. Dai daw kamo napahihiro kan siring na mga halimbawa?

Totoo, an kinaban pano nin mararaot na halimbawa. (2 Timoteo 3:13) Minsan siring, horophoropa an sadol ni Pablo sa mga Kristianong nag-eerok sa Judea. Pakatapos na isaysay an arogan na paggawe nin dakol na lalaki asin babaeng may pagtubod kan suanoy, si apostol Pablo nagsadol sa sainda: “Kaya, kun siring, huli ta napalilibotan kita nin dakulang panganoron nin mga saksi, . . . dumalagan [man] kita na may pakatagal sa paorumbasan na nasa atubangan ta, mantang kita nagheheling nin maingat sa Pangenot na Ahente asin Parasangkap kan satong pagtubod, si Jesus.” (Hebreo 12:1, 2) An mga Kristiano ngonyan napalilibotan man nin “dakulang panganoron” nin mararahay na halimbawa—kan suanoy sagkod sa presenteng aldaw. Kamo daw totoong nakikinabang sa sainda? Puede kun kamo determinado na magin “paraarog, bakong sa maraot, kundi sa marahay.”—3 Juan 11.

[Nota sa Ibaba]

[Blurb sa pahina 20]

Bakong realistiko na laoman na an lambang magurang sa kongregasyon o ministeryal na lingkod magigin pambihira kaeksperto sa lambang aspekto kan Kristianong ministeryo

[Mga Ritrato sa pahina 21]

An kamagurangan dapat na magin “mga halimbawa sa aripompon”