Pagsabwag nin mga Banhi kan Katotoohan kan Kahadean
Pagsabwag nin mga Banhi kan Katotoohan kan Kahadean
“Pagkaaga isabwag mo an saimong banhi asin sagkod sa banggi dai mo pagpahingaloan an saimong kamot.”—ECLESIASTES 11:6.
1. Sa anong sentido na an mga Kristiano nagsasabwag nin banhi ngonyan?
AN AGRIKULTURA nagkaigwa nin mahalagang marhay na kabtang sa suanoy na Hebreong sosyedad. Iyan an dahelan kun taano ta iiniba ni Jesus, na nabuhay bilang tawo sa Dagang Panuga, an mga tema dapit sa agrikultura sa saiyang mga ilustrasyon. Halimbawa, iinagid nia an paghuhulit kan maogmang bareta kan Kahadean nin Dios sa pagsabwag nin banhi. (Mateo 13:1-9, 18-23; Lucas 8:5-15) Sagkod ngonyan, nag-eerok man kita o dai sa sarong agrikultural na sosyedad, an pagsabwag nin espirituwal na banhi sa paaging ini iyo an pinakamahalagang ginigibo kan mga Kristiano.
2. Gurano kahalaga an satong paghuhulit, asin ano an nagkapirang bagay na ginigibo ngonyan tanganing otobon iyan?
2 Sarong dakulang pribilehio an makikabtang sa pagsabwag kan katotoohan sa Biblia sa panahon na ini kan katapusan. Magayon an pagkapahayag kan Roma 10:14, 15 sa kahalagahan kan gibohon na ini: “Paano man sinda makadadangog kun mayo nin parahulit? Paano man sinda maghuhulit kun dai sinda isinugo? Siring sa nasusurat: ‘Abaang gayon kan mga bitis kan mga nagpapahayag kan maogmang bareta nin marahay na mga bagay!’” Dai pa noarin man kaidto nagin orog na mahalaga an magpadagos na may positibong aktitud sa pag-otob kan sugo na ini nin Dios. Sa dahelan na iyan an Mga Saksi ni Jehova biyong sibot sa paggibo asin pagwaras nin mga Biblia asin mga pantabang sa pag-adal sa Biblia sa 340 lenguahe. An pag-andam kan materyal na ini nagkakaipo nin labing 18,000 na boluntaryo sa saindang opisina prinsipal asin sa mga sangang opisina sa laen-laen na kadagaan. Asin haros anom na milyon na Saksi an nakikikabtang sa pagwaras kan mga babasahon na ini sa Biblia sa bilog na kinaban.
3. Ano an nahahaman paagi sa pagsabwag kan katotoohan kan Kahadean?
3 Ano an ibinubunga kan kahigosan na ini? Siring kaidtong enot na mga aldaw nin Kristianismo, dakol ngonyan an nag-aako kan katotoohan. (Gibo 2:41, 46, 47) Minsan siring, an orog na mahalaga kisa dakulang kabilangan nin bagong mabautismohan na mga parahayag kan Kahadean iyo an bagay na an dakulang patotoo na ini nakakokontribwir sa pagsantipikar kan ngaran ni Jehova asin sa pagbindikar sa saiya bilang an iyo sanang tunay na Dios. (Mateo 6:9) Dugang pa, an kaaraman sa Tataramon nin Dios nagpapaoswag sa kualidad nin buhay kan dakol asin puedeng magbunga kan saindang kaligtasan.—Gibo 13:47.
4. Sagkod saen an pagmakolog kan mga apostol sa mga tawo na saindang hinulitan?
4 Aram na aram kan mga apostol an nagtataong-buhay na kahalagahan kan maogmang bareta, asin odok an saindang simpatiya sa mga hinulitan ninda. Malinaw ini sa mga tataramon ni apostol Pablo, kan sia magsurat: “Huli sa pagkaigwa nin mamomoton na kapadangatan sa saindo, kami naogmang gayo na itao sa saindo, bako sanang an maogmang bareta nin Dios, kundi siring man an samong kalag, huli ta kamo nagin mahal sa samo.” (1 Tesalonica 2:8) Sa pagpaheling kan siring na tunay na pagmakolog sa mga tawo, inaarog ni Pablo asin kan iba pang apostol si Jesus asin an langitnon na mga anghel, na imbueltong marhay sa nagliligtas-buhay na gibohon na ini. Repasohon ta an mahalagang mga kabtang kan langitnon na mga lingkod na ini nin Dios sa pagsabwag kan katotoohan kan Kahadean, asin helingon ta kun paano an saindang halimbawa nagpaparigon sa boot niato na otobon an satong kabtang.
Si Jesus—An Parasabwag kan Katotoohan kan Kahadean
5. Sa anong gibohon pangenot na nagmasibot si Jesus kan yaon digdi sa daga?
5 Si Jesus, sarong sangkap na tawo, igwa kan kapangyarihan na magtao nin dakol na marahay na bagay sa materyal na paagi sa mga tawo kaidtong saiyang kapanahonan. Halimbawa, puede kutana niang klinaro an dakol na salang ideya dapit sa medisina kaidtong saiyang kaaldawan, o puede kutana niang pinaoswag an pakasabot nin tawo sa iba pang siensia. Pero, lininaw nia sa kapinonan pa sana kan saiyang ministeryo na an sugo sa saiya iyo an paghuhulit kan maogmang bareta. (Lucas 4:17-21) Asin sa paghinanapos kan saiyang ministeryo, sia nagpaliwanag: “Ako namundag dahel kaini, asin dahel kaini ako napadigdi sa kinaban, na ako magpatotoo sa katotoohan.” (Juan 18:37) Kaya nagmasibot sia sa pagsabwag nin mga banhi kan katotoohan kan Kahadean. An pagtotokdo sa mga katemporanyo nia manongod sa Dios asin sa Saiyang mga katuyohan orog na mahalaga kisa ano man na ibang edukasyon na puede kutanang itinao sa sainda ni Jesus.—Roma 11:33-36.
6, 7. (a) Anong pambihirang kapanugaan an ginibo ni Jesus bago sia nagsakat sa langit, asin paano nia iyan inootob? (b) Ano an personal na epekto sa saindo kan aktitud ni Jesus dapit sa paghuhulit?
6 Inapod ni Jesus an saiyang sadiri na Parasabwag kan katotoohan kan Kahadean. (Juan 4:35-38) Isinasabwag nia an mga banhi nin maogmang bareta sa lambang oportunidad. Dawa kan sia naghihingagdan na sa harigi, sia nagbalangibog nin maogmang bareta manongod sa sarong daganon na paraiso sa ngapit. (Lucas 23:43) Dugang pa, an saiyang odok na interes na ikahulit an maogmang bareta dai natapos kadungan kan saiyang pagkagadan sa hariging pasakitan. Bago sia nagsakat sa langit, pinagbotan nia an mga apostol na ipadagos an pagsabwag nin mga banhi kan katotoohan kan Kahadean asin gumibo nin mga disipulo. Dangan nagtao si Jesus nin pambihirang panuga. Sia nagsabi: “Uya! ako danay na nasa saindo sagkod sa pagtatapos kan palakaw nin mga bagay.”—Mateo 28:19, 20.
7 Paagi sa mga tataramon na ini si Jesus naggibo nin kapanugaan na an gibohon na paghuhulit kan maogmang bareta saiyang susuportaran, gigiyahan, asin poprotehiran nin “danay sagkod sa pagtatapos kan sistema nin mga bagay.” Sagkod sa sato mismong kaaldawan, si Jesus nagpapadagos na igwa nin personal na interes sa pag-ebanghelyo. Sia an satong Namomoon, an namamahala sa pagsabwag kan katotoohan kan Kahadean. (Mateo 23:10) Bilang Payo kan Kristianong kongregasyon, may paninimbagan sia sa atubangan ni Jehova para sa pambilog na kinaban na gibohon na ini.—Efeso 1:22, 23; Colosas 1:18.
An mga Anghel Nagpapahayag nin Nakaoogmang Notisya
8, 9. (a) Paano nagpaheling nin tunay na interes sa mga aktibidad nin tawo an mga anghel? (b) Sa anong sentido masasabi na kita panteatrong dadalanon kan mga anghel?
8 Kan lalangon ni Jehova an daga, an mga anghel “magayagayang nagkururahaw, asin . . . nagkururahaw sa pag-omaw.” (Job 38:4-7) Poon pa kaidto, an langitnon na mga linalang na ini nagpapaheling nin makosog na interes sa mga aktibidad nin tawo. Ginamit sinda ni Jehova na magpaabot kan mga kapahayagan nin Dios sa mga tawo. (Salmo 103:20) Ini nangorognang totoo may koneksion sa pagpalakop kan maogmang bareta sa satong kaaldawan. Sa kapahayagan na itinao sa saiya, si apostol Juan nakaheling nin “anghel na naglalayog sa tahaw kan langit” na igwa nin “daing katapusan na maogmang bareta na ipahahayag bilang nakaoogmang notisya sa mga nag-eerok sa daga, asin sa lambang nasyon asin tribo asin tataramon patin banwaan, na nagsasabi sa makosog na tingog: ‘Matakot kamo sa Dios asin pamurawayon sia, huli ta nag-abot na an oras kan saiyang paghokom.’”—Kapahayagan 14:6, 7.
9 Inaapod kan Biblia an mga anghel na “espiritu para sa paglingkod sa publiko, na isinugo tanganing maglingkod sa mga magmamana kan kaligtasan.” (Hebreo 1:14) Mantang galaga na inootob kan mga anghel an mga katongdan na iinasignar sa sainda, igwa sinda nin oportunidad na masdan kita asin an satong gibohon. Garo baga nasa sarong heling-heling na plataporma sa teatro, ginigibo ta an satong gibohon sa atubangan nin langitnon na mga nagdadalan. (1 Corinto 4:9) Kanigoan kanakapapepensar asin kanakapupukaw sa boot na maaraman na kita dai nagsosolo bilang mga parasabwag kan katotoohan kan Kahadean!
Galaga Niatong Inootob an Satong Kabtang
10. Paano puedeng iaplikar sa satong pag-ebanghelyo an praktikal na sadol sa Eclesiastes 11:6?
10 Taano si Jesus asin an mga anghel ta interesadong marhay sa satong gibohon? Itinao ni Jesus an sarong dahelan kan sia magsabi: “Sinasabi ko sa saindo, nagkakaigwa nin kagayagayahan an mga anghel nin Dios huli sa sarong parakasala na nagsosolsol.” (Lucas 15:10) Kita igwa man kan siring na tunay na interes sa mga tawo. Huli kaini, ginigibo ta an satong pinakamakakaya na isabwag an mga banhi kan katotoohan kan Kahadean sa gabos na lugar. An mga tataramon sa Eclesiastes 11:6 puedeng iaplikar sa satong gibohon. Dian an Biblia nagsasadol sa sato: “Pagkaaga isabwag mo an saimong banhi asin sagkod sa banggi dai mo pagpahingaloan an saimong kamot; huli ta dai mo aram kun saen ini magigin mapanggana, kun baga digdi o duman, o kun baga sindang duwa pareho magigin marahay.” Totoo, sa kada tawo na nag-aako kan satong mensahe tibaad ginatos o rinibo pa ngani an habo kaiyan. Alagad arog kan mga anghel, kita naggagayagaya kun igwa nin minsan “sarong parakasala” na mag-ako kan mensahe nin kaligtasan.
11. Puedeng magin gurano kaepektibo an paggamit kan mga publikasyon na basado sa Biblia?
11 Dakol an kalabot sa paghuhulit kan maogmang bareta. An sarong mahalagang pantabang sa gibohon na ini iyo an inimprentang materyal na basado sa Biblia na ginagamit kan Mga Saksi ni Jehova. Sa nagkapirang bagay, an mga publikasyon na ini kabaing man nin mga banhi na isinasabwag sa gabos na lugar. Dai ta aram kun saen iyan magigin mapanggana. Kun minsan an sarong publikasyon tibaad ipasapasa bago may makabasa kaiyan. Tibaad giyahan pa ngani ni Jesus asin kan mga anghel an mga pangyayari sa nagkapirang kamugtakan tanganing papangyarihon ini para sa kapakinabangan kan mga tama an kamugtakan nin puso. Estudyare an nagkapirang eksperyensia na nagpapaheling kun paano puedeng papangyarihon ni Jehova an dai linalaoman asin marahayon na mga resulta na ginagamit an mga babasahon na iwinalat sa mga tawo.
An Gibo kan Tunay na Dios
12. Paano an sarong daan na magasin nakatabang sa sarong pamilya na mamidbid si Jehova?
12 Kan 1953, si Robert, Lila, asin an saindang mga aki nagbalyo hale sa sarong dakulang siudad pasiring sa sarong rapak na daan nang harong sa oma sa puerang lugar nin Pennsylvania, E.U.A. Dai nahaloy pakabalyo, si Robert nagdesisyon na gumibo nin sarong banyo sa sirong nin nalalanoban na hagyanan. Pakatapos na haleon an nagkapirang tabla, nadiskobre nia na sa likod kan lanob, an mga kino may tinabag na parakit na mga papel, mga ubak nin walnut, asin iba pang basura. Duman, sa tanga kan gabos na iyan, may kopya kan magasin na The Golden Age. Si Robert partikularmenteng interesado sa sarong artikulo dapit sa temang pagpadakula nin mga aki. Naghanga siang marhay sa malinaw, basado sa Biblia na giya na itinao sa magasin kaya sinabi nia ki Lila na sinda maayon sa “relihion kan The Golden Age.” Sa laog sana nin pirang semana, an mga Saksi ni Jehova nagduman sa sainda, alagad sinabihan sinda ni Robert na an pamilya interesado sana sa “relihion kan The Golden Age.” Ipinaliwanag kan mga Saksi na an The Golden Age bago na ngonyan an titulo, an Awake! Si Robert asin Lila nagpoon na makipag-adal nin regular sa Biblia sa mga Saksi, asin pag-abot nin panahon nagpabautismo sinda. Sinda nagsabwag man nin mga banhi nin katotoohan sa saindang mga aki asin nag-ani nin abunda. Ngonyan, an labing 20 miembro kan pamilyang ini, kabale an gabos na pitong aki ni Robert asin Lila, bautisado nang lingkod ni Jehova Dios.
13. Ano an nagpahiro sa sarong mag-agom sa Puerto Rico na magkainteres sa Biblia?
13 Kaidtong mga 40 taon na an nakaagi, si William asin Ada, sarong mag-agom na taga Puerto Rico, daing interes sa pag-adal sa Biblia. Basta nagtotoktok an mga Saksi ni Jehova sa saindang pinto, an mag-agom nagsasagin na mayo sa harong. Sarong aldaw si William nagduman sa may tambakan nin ibinasurang mga gamit tanganing bumakal nin sarong bagay na kaipuhan sa paghirahay kan harong. Kan pahale na sia, nariparo nia an sarong libro na an kolor may pagkaberdeng amarilyo na yaon sa sarong dakulang lalagan nin basura. Idto an Religion, sarong libro na ipinublikar kan Mga Saksi ni Jehova kaidtong 1940. Ipinuli ni William an libro asin naogmang marhay na mabasa an manongod sa kalaenan nin falso asin tunay na relihion. Kan magsongko liwat an mga Saksi ni Jehova, si William asin Ada maogmang naghinanyog sa saindang mensahe asin nagpoon na makipag-adal sa sainda sa Biblia. Pakalihis nin pirang bulan nabautismohan sinda sa Kabotan nin Dios na Internasyonal na Asamblea kan 1958. Poon kaidto, labing 50 indibiduwal an natabangan ninda na magin kabtang kan satong Kristianong kasararoan nin magturugang.
14. Siring sa ipinaheling nin sarong eksperyensia, may anong potensial an satong mga babasahon na basado sa Biblia?
14 Si Karl 11 anyos pa sana asin medyo makaraw. Garo baga sia pirmeng nagkakaproblema. Tinokdoan sia kan saiyang ama, sarong Aleman na Metodistang parahulit, na an maraot na mga tawo nasosolo sa impierno pagkagadan. Kaya takot na marhay si Karl sa impierno. Sarong aldaw kan 1917, si Karl may nariparong inimprentang papel sa tinampo asin pinurot nia iyan. Kan binabasa nia iyan, an saiyang mga mata tolos na napatorohok sa hapot na: “Ano an impierno?” An papel imbitasyon sa sarong diskurso sa publiko dapit sa temang impierno, na inisponsor kan Mga Estudyante sa Biblia, na midbid ngonyan na Mga Saksi ni Jehova. Pakalihis nin mga sangtaon, pakatapos nin nagkapirang sesyon nin pag-adal sa Biblia, si Karl nabautismohan, na sa siring nagin saro sa Mga Estudyante sa Biblia. Kan 1925 inimbitaran siang magtrabaho sa pankinaban na opisina prinsipal kan Mga Saksi ni Jehova—kun saen naglilingkod sia sagkod ngonyan. An Kristianong karera na naglawig nin labing walong dekada nagpoon paagi sa sarong pidaso nin papel sa tinampo.
15. Ano an puedeng gibohon ni Jehova, kun sa pagheling nia angay?
15 Totoo, dai kaya nin tawo na aramon kun baga asin kun sagkod saen direktang imbuelto an mga anghel sa mga eksperyensiang ini. Sa ibong kaiyan, maninigo na nungka niatong pagdudahan na si Jesus asin an mga anghel igwa nin aktibong kabtang sa paghuhulit asin na puedeng giyahan ni Jehova an mga pangyayari kun sa pagheling nia angay. An mga ini asin an dakol pang kaagid na eksperyensia nagpapaheling kan marahay na potensial kan satong mga babasahon pakatapos na ikapasakamot niato iyan.
Ipinagkatiwala sa Sato an Sarong Kayamanan
16. Ano an manonodan ta sa mga tataramon sa 2 Corinto 4:7?
16 Si apostol Pablo may nasambitan na sarong ‘kayamanan sa mga lalagan na gibo sa dalipay.’ An kayamanan na iyan iyo an sugo nin Dios na maghulit, asin an mga lalagan na gibo sa dalipay iyo an mga tawo na pinagkatiwalaan ni Jehova kan kayamanan na ini. Huling an mga tawo na iyan bakong sangkap asin may limitasyon, nagpadagos si Pablo sa pagsabi na an resulta kan saindang pagigin tinawan kan sugo na iyan iyo na tanganing ‘an kosog na lihis sa ordinaryo magin sa Dios asin bakong gikan mismo sa sato.’ (2 Corinto 4:7) Iyo, makasasarig kita ki Jehova na itatao an kinakaipuhan na kosog na matabang sa sato na mahaman an gibohon na yaon sa sato.
17. Ano an maaatubang niato mantang kita nagsasabwag nin mga banhi kan katotoohan kan Kahadean, asin taano ta maninigo pa man giraray kitang magpadanay nin positibong aktitud?
17 Sa parate kaipuhan kitang magsakripisyo. Tibaad depisil o bakong kombenyente na maghulit sa nagkapirang teritoryo. Igwa nin mga lugar na an kadaklan na tawo garo baga grabe kaindiperente, kontra pa ngani. Dakulang paghihingoa an tibaad ginigibo sa siring na mga lugar na mayo nin malinaw na kapangganahan. Alagad bawi man an paghihingoa kun dakulaon an nakataya. Girumdomon, an mga banhi na isinasabwag nindo puedeng magtao sa mga tawo nin kaogmahan ngonyan siring man nin buhay na daing katapusan sa ngapit. An mga tataramon sa Salmo 126:6 dakol na beses nang napatunayan na totoo: “Sia na daing saltong minalakaw, na nagtatangis pa ngani, dara an supot nin banhi, daing salto na mabalik na may magayagayang kurahaw, dara an saiyang mga goygoy.”
18. Paano niato pirmeng maaatenderan an satong ministeryo, asin taano ta maninigo niatong gibohon iyan?
18 Aprobetsaran ta an lambang angay na oportunidad na abundang magsabwag nin mga banhi kan katotoohan kan Kahadean. Dai logod niato noarin man paglingawan na, minsan ngani kita an nagtatanom asin nagbabaribi kan mga banhi, si Jehova an nagpapatubo kaiyan. (1 Corinto 3:6, 7) Pero, kun paanong inootob ni Jesus asin kan mga anghel an saindang kabtang sa gibohon, inaasahan ni Jehova na lubos niatong ootobon an satong ministeryo. (2 Timoteo 4:5) Pirme logod niatong atenderan an satong pagtotokdo, an satong aktitud, asin an satong pagkagalaga sa ministeryo. Taano? Si Pablo minasimbag: “Sa paggibo mo kaini ililigtas mo an saimo man sana sagkod idtong naghihinanyog sa saimo.”—1 Timoteo 4:16.
Ano an Nanodan Niato?
• Sa anong mga paagi nagbubunga nin marahay an satong pagsabwag?
• Paano imbuelto si Jesu-Cristo asin an mga anghel sa pag-ebanghelyo ngonyan?
• Taano ta maninigo kitang magin abundang mga parasabwag nin katotoohan kan Kahadean?
• Kun may naaatubang kitang pagkaindiperente o pagkontra sa satong ministeryo, ano an maninigong magmotibar sa sato na magpadagos?
[Mga Hapot Para sa Pag-adal]
[Ritrato sa pahina 15]
Siring kan mga paraoma sa suanoy na Israel, an mga Kristiano ngonyan abundang nagsasabwag nin mga banhi kan katotoohan kan Kahadean
[Ritrato sa pahina 16, 17]
An Mga Saksi ni Jehova naggigibo asin nagwawaras nin laen-laen na klase nin publikasyon na basado sa Biblia sa 340 lenguahe