Estorya nin Buhay

Sarong Paradara nin Liwanag sa Dakol na Nasyon

AN ESTORYA NI GEORGE YOUNG ISINAYSAY NI RUTH YOUNG NICHOLSON

“Kun siring, taano ta igwa kaining dai paggirong sa satong mga pulpito? . . . Anong klaseng mga tawo kita kun kita dai magirong pakatapos na mapatunayan ta na totoo an mga bagay na ini na isinusurat ko? Dai ta papagdanayon na ignorante an mga tawo, kundi ibalangibog ta an katotoohan sa paaging dai naghahagad nin dispensasyon o natatago.”

AN MGA tataramon na ini kabtang kan 33 pahinas na surat ni Tatay na naghahagad na haleon an saiyang ngaran sa rehistro kan iglesia. An taon 1913. Poon kaidto, linaog nia an buhay na pano nin mga pangyayari na nagbunga kan saiyang paglilingkod bilang sarong paradara nin liwanag sa dakol na nasyon. (Filipos 2:15) Poon kan ako aki pa, tinipon ko an mga estorya manongod sa mga eksperyensia ni Tatay hale sa mga paryente asin sa historikong mga materyal, asin tinabangan ako nin mga katood na mabilog an saiyang nagin buhay. Sa dakol na paagi an buhay ni Tatay nagpapagirumdom sa sako kan nagin buhay ni apostol Pablo. Kapareho kan “apostol sa mga nasyon” na iyan, si Tatay pirmeng andam na magbiahe tangani na ipaabot an mensahe ni Jehova sa mga tawo kan gabos na kadagaan asin isla. (Roma 11:13; Salmo 107:1-3) Togoti nindo akong isaysay sa saindo an manongod sa sakong ama, si George Young.

An Enot na mga Taon

Si Tatay an kangudhan na aking lalaki ni John asin Margaret Young, mga Presbiterianong Eskoses. Namundag sia kaidtong Setyembre 8, 1886, dai nahaloy pakabalyo kan pamilya hale sa Edinburgh, Scotland, pasiring sa British Columbia sa solnopan na Canada. An tolo niang matuang tugang na lalaki—si Alexander, John, asin Malcolm—mas naenot na namundag nin pirang taon sa Scotland. Si Marion, an nguhod na tugang na babae kan mga ini, na inaapod ninda sa gaha na Nellie, mas nguhod nin duwang taon ki Tatay.

 Nagdakula sa sarong oma sa Saanich, harani sa Victoria, British Columbia, an mga aki nagin maogma. Kadungan kaiyan, nakanood sinda na magsaabaga nin paninimbagan. Kaya kun minapuli an saindang mga magurang hale sa Victoria, an mga gibohon sa luwas tapos na asin an harong areglado.

Pag-abot nin panahon, si Tatay asin an saiyang mga tugang na lalaki nagkainteres sa pagmina asin siring man sa negosyo nin tablon. An magturugang na Young nagkaigwa nin marahay na reputasyon bilang mga timber cruiser (mga lalaki na nag-iinspeksion sa daga para sa posibleng aanihon na tablon) asin bilang mga parabakal saka parapabakal nin tablon. Si Tatay an nag-aasikaso kan pinansial na mga transaksion.

Pag-abot nin panahon, an hilig ni Tatay sa espirituwal na mga bagay nagmotibar sa saiya na magdesisyon na magin ministrong Presbiteriano. Minsan siring, kan panahon man na idto, an mga sermon sa peryodiko ni Charles Taze Russell, an enot na presidente kan Zion’s Watch Tower Tract Society, nagkaigwa nin hararom na epekto sa saiyang buhay. An nanodan ni Tatay nagpahiro sa saiya na gibohon asin ipadara an surat sa pagdimitir na nasambitan sa kapinonan.

Ginamit ni Tatay sa maboot alagad malinaw na paagi an mga teksto sa Biblia tanganing pahimutikan an mga katokdoan kan iglesia na an kalag nin tawo inmortal asin na daing sagkod na pasasakitan nin Dios an mga kalag nin tawo sa kalayo sa impierno. Ibinuyagyag nia man an doktrina nin Trinidad, na pinatutunayan na iyan bakong sa Kristiano naggikan asin biyong dai sinusuportaran kan Kasuratan. Poon kaidto pinagmaigotan niang magibo an Kristianong ministeryo bilang pag-arog ki Jesu-Cristo, na mapakumbabang ginagamit an gabos niang abilidad asin kosog sa ikamumuraway ni Jehova.

Kan 1917, sa pagdirehir kan Watch Tower Society, si Tatay nagpoon na maglingkod bilang sarong pilgrim, an apod kaidto sa nagbibiaheng mga representante kan Mga Saksi ni Jehova. Sa mga siudad asin banwaan sa Canada, nagtao sia nin mga diskurso asin nagpadalan kan pelikula asin programa paagi sa mga slide na inapod na “Photo-Drama of Creation.” Napano an mga teatro sa pagdalaw ni Tatay. An iskedyul kan saiyang mga pagdalaw bilang pilgrim nagluwas sa The Watchtower sagkod 1921.

Ibinareta nin sarong peryodiko sa Winnipeg na si Ebanghelista Young nagpahayag sa 2,500 asin na dakol an dai nakalaog huli ta surusuan na sa laog kan tiriponan. Sa Ottawa, sia nagpahayag sa temang “Pakabalik Hale sa Impierno.” An sarong may edad nang lalaki duman nagbareta: “Pagkatapos kaiyan, inimbitaran ni George Young an sarong raya nin mga klerigo na sumakat sa plataporma tanganing pag-olayan ninda an tema, alagad mayong naghiro sa sainda. Kaidto ako nakombensir na nanompongan ko na an katotoohan.”

Nagmaigot si Tatay na magibo an pinakadakol na espirituwal na aktibidad na mapupuede sa saiyang mga pagdalaw bilang pilgrim. Pagkatapos, naghihidale siang makasakay sa tren para sa saro pang nakaiskedyul na dudumanan. Kun nakakotse, parate na minahale sia pasiring sa sunod na destino haloy pa bago mamahaw. Dugang pa sa pagigin maigot, si Tatay may reputasyon nin pagigin makonsiderasyon na tawo asin midbid huli sa saiyang Kristianong mga gibo asin pagigin buka an palad.

Kabilang sa dakol na enot na kombension na inatenderan nia, an sarong espesyalmenteng dai malilingawan iyo an ginibo kaidto sa Edmonton,  Alberta, kan 1918. An enterong pamilya nia yaon duman para sa bautismo ni Nellie. Idto iyo man an huring okasyon na magkairibanan an magturugang na lalaki. Pakalihis nin duwang taon, si Malcolm nagadan huli sa pulmoniya. Kapareho kan tolo niang tugang na lalaki asin kan saiyang ama, si Malcolm may paglaom na langitnon na buhay, asin sinda gabos nagdanay na fiel sa Dios sagkod sa saindang kagadanan.—Filipos 3:14.

Pasiring sa mga Langtad sa Ibang Nasyon

Kan matapos ni Tatay an sarong biahe sa paghuhulit sa Canada kan Setyembre 1921, dinirehiran sia ni Joseph F. Rutherford, an presidente kaidto kan Watch Tower Society, na paduman sa mga isla kan Caribe. Sa gabos na lugar na nagpadalan si Tatay kan “Photo-Drama of Creation,” marahay an pag-ako kaiyan. Hale sa Trinidad, sia nagsurat: “Pano-pano an lugar, asin kadakol kan dai pinalaog. Kan ikaduwang banggi an mga tawo nagsurusuan sa edipisyo.”

Dangan, kan 1923, si Tatay idinestino sa Brazil. Duman sia nagpahayag sa kadakol na nagdadangog, na kun beses nagbabayad nin mga interprete. An The Watchtower na Disyembre 15, 1923, nagbareta: “Poon Hunyo 1 sagkod Setyembre 30 si Tugang na Young pinangenotan an 21 pampublikong pagtiripon, na 3,600 an total na nag-atender; 48 pagtiripon kan kongregasyon, na 1,100 an nag-atender; nagdistribwir nin libreng mga babasahon sa Portugues na 5,000 na kopya gabos-gabos.” An dakol naghimate na may interes kan itao ni Tatay an pahayag na “An Minilyon na Nabubuhay Ngonyan Dai Na Noarin Man Magagadan.”

Kan idusay an bagong mga pasilidad sa Brazil kan Marso 8, 1997, an brosyur dapit sa pagdusay nagbareta: “1923: Si George Young nagdatong sa Brazil. Inorganisar nia an sarong sangang opisina sa sentro kan Rio de Janeiro.” Minsan ngani an mga babasahon sa Biblia makukua sa Kastila, may pangangaipo man para dian sa Portugues, an pangenot na lenguahe sa Brazil. Sa siring, kan Oktubre 1, 1923, an The Watchtower pinonan na ipublikar sa Portugues.

Dakol an dai malilingawan na nakamidbid ni Tatay sa Brazil. An saro iyo an may kayang Portugues na an ngaran Jacintho Pimentel Cabral, na ipinagamit an saiyang harong para sa mga pagtiripon. Dai nahaloy inako ni Jacintho an katotoohan sa Biblia asin kan huri nagin saro sa mga tawohan sa sangang opisina. An saro pa iyo si Manuel da Silva Jordão, sarong hoben na Portugues na hardinero. Nadangog nia an sarong pampublikong pahayag ni Tatay na nagmotibar sa saiya na bumalik sa Portugal tangani na maglingkod bilang colporteur, an apod kaidto sa bilog na panahon na mga ministro kan Mga Saksi ni Jehova.

Si Tatay nagbiahe sa dakol na lugar na sakay nin tren sa bilog na Brazil, asin nahimo niang manompongan an mga tawong interesado. Sa saro kan saiyang mga biahe, nanuparan nia si Bony asin Catarina Green, asin nag-istar sia na kaibahan ninda sa laog nin mga duwang semana, na ipinaliliwanag an Kasuratan sa sainda. Kisuerra pito sa pamilya kaidto an sinimbolisaran an saindang pagdusay ki Jehova paagi sa bautismo sa tubig.

An saro pang nakamidbid nia iyo si Sarah Bellona Ferguson kan 1923. Kan 1867 mantang daragita pa, sia, kaiba kan saiyang tugang na si Erasmus Fulton Smith asin kan ibang miembro kan pamilya, nagbalyo sa Brazil hale sa Estados Unidos. Poon 1899 nareresibi nia nin regular an mga magasin na Watchtower paagi sa koreo. An pagdalaw ni Tatay iyo an haloy nang hinahalat na oportunidad tangani na si Sarah, an apat niang aki, asin an saro na inapod ni Tatay na Tiya Sallie mabautismohan. Iyan kaidtong Marso 11, 1924.

Dai nahaloy, si Tatay naghuhulit na sa ibang mga nasyon sa Amerika del Sur. Kan Nobyembre 8, 1924, nagsurat sia hale sa Peru: “Natatapos ko pa sanang iwaras an 17,000 na pulyeto sa Lima asin Callao.” Sunod nagpasiring sia sa Bolivia tanganing magdistribwir nin mga pulyeto duman. Mapadapit sa pagdalaw na iyan, sia nagsurat: “Binebendisyonan kan satong Ama an paghihingoa. Tinabangan ako nin sarong Indian. An saiyang harong yaon sa burabod kan Amazonas. Dinara nia papuli an 1,000 pulyeto asin nagkapirang libro.”

Paagi sa mga paghihingoa ni Tatay, ikinalakop an mga banhi nin katotoohan sa dakol na nasyon sa Amerika Sentral asin del Sur. An Watchtower na Disyembre 1, 1924 nagbareta: “Si George Young labing duwang taon na ngonyan sa Amerika del Sur. . . . Nagin pribilehio kan mahal na tugang na ini na darahon an mensahe kan katotoohan sa Punta Arenas, na nasa Straits of Magellan.” Si Tatay man an nangenot sa paghuhulit sa mga nasyon na arog kan Costa Rica, Panama, asin Venezuela. Sia nagpadagos dawa sia nagkamalaria asin naapektaran an saiyang salud.

 Sunod sa Europa

Kan Marso 1925, si Tatay naglayag pasiring sa Europa, na duman naglaom sia na ikadistribwir an 300,000 na pulyeto sa Biblia sa España asin Portugal saka ikaareglo an mga lekturang pampubliko ni Tugang na Rutherford. Minsan siring, kan makaabot sa España, si Tatay nagpahayag nin pagkontra manongod sa pagtao nin siring na mga lektura ni Tugang na Rutherford huli sa kamugtakan nin relihiosong pagkapanatiko sa palibot.

Bilang simbag, si Tugang na Rutherford nagsurat, na kinokotar an Isaias 51:16: “Ibinugtak ko an sakong mga tataramon sa saimong ngoso, asin tinahoban taka sa limpoy kan sakong kamot, tanganing ikaestablisar ko an kalangitan, asin ikabugtak an mga pasisikadan kan daga, patin sabihon sa Sion, Ika sakong banwaan.” (King James Version) Huli kaiyan, si Tatay nagkonklusyon: “Daing duwa-duwa na kabotan kan Kagurangnan na ako magpadagos asin ipabaya an mga resulta sa saiya.”

Kan Mayo 10, 1925, Si Tugang na Rutherford nagdiskurso paagi sa sarong interprete sa Teatro de Novedades sa Barcelona. Labing 2,000 an nag-atender, kaiba an sarong opisyal kan gobyerno asin sarong espesyal na badigard na nasa entablado. Sinunod an kaagid na prosedimiento sa Madrid, na 1,200 an nag-atender. An interes na ibinunga kan mga pahayag na ini nagresulta sa pag-establisar nin sarong sangang opisina sa España na ipinagkatiwala, siring sa sinasabi kan 1978 Yearbook of Jehovah’s Witnesses, “sa paggiya ni George Young.”

Kan Mayo 13, 1925, si Tugang na Rutherford nagpahayag sa Lisbon, Portugal. Nagkaigwa man nin dakulang kapangganahan an saiyang pagdalaw duman, sa ibong kan mga pagprobar kan klero na ribokon an pagtiripon paagi sa pagbulyaw asin pagpusak nin mga tukawan. Pakatapos kan mga pagdiskurso ni Tugang na Rutherford sa España asin Portugal, ipinadagos ni Tatay an pagpadalan kan “Photo-Drama,” asin iinareglo man nia na imprentahon asin idistribwir an mga babasahon sa Biblia sa mga lugar na idto. Kan 1927 sia nagbareta na an maogmang bareta “ikinapublikar na sa gabos na siudad asin banwaan sa España.”

Paghuhulit sa Unyon Sobyet

An sunod na destino sa pagmimisyonero ni Tatay iyo an Unyon Sobyet, kun saen sia nagdatong kan Agosto 28, 1928. An sarong surat nia, na may petsang Oktubre 10, 1928, nagsasabi sa sarong kabtang:

“Poon kan magdigdi ako sa Rusya, ikapamimibi ko nanggad na ‘Dumatong  logod an kahadean mo’ sa bilog na kaigotan nin puso. Nanonodan ko na an lenguahe, alagad iyan luway-luway. An sakong interprete pambihira nanggad na lalaki, sarong Judio, alagad nagtutubod sia ki Cristo asin namomoot sa Biblia. Nagkaigwa ako nin nagkapirang interesanteng eksperyensia alagad dai ko aram kun sagkod noarin ako totogotan na magdanay. Kan nakaaging semana nakaresibi ako nin notisya na maghale sa laog nin 24 oras alagad naareglar iyan kaya puede akong magdanay pa nin mas halawig.”

Nakaolay an nagkapirang Estudyante sa Biblia sa Kharkov, sarong mayor na siudad ngonyan sa Ukraine, asin huli sa mainit na pagpakinosogan sinda napaluha sa kagayagayahan. Ginibo an sarong sadit na kombension kada banggi sagkod na matanga. Sa pagsurat kan huri manongod sa pakikipag-olay na ini sa mga tugang, sinabi ni Tatay: “An pobreng mga tugang, dawa an saindang pipirang libro kinompiskar asin an mga autoridad antipatiko, pero sinda maogma.”

An ministeryo ni Tatay sa Unyon Sobyet itinampok sa sarong espesyal na brosyur na itinao sa mga nag-atender sa dedikasyon kan Hunyo 21, 1997 kan bagong mga pasilidad sa sanga sa St. Petersburg, Rusya. Sinasabi kan brosyur na si Tatay isinugo sa Moscu, asin ibinabareta kaiyan na nagkua sia nin permiso “na magprodusir nin 15,000 na kopya kan mga pulyetong Freedom for the Peoples asin Where Are the Dead? tanganing idistribwir sa Rusya.”

Pakapuli haleng Rusya, si Tatay tinawan nin asignasyon bilang pilgrim sa Estados Unidos. Sa South Dakota dinalaw nia an harong ni Nellena asin Verda Pool, magtugang sa laman na pakalihis nin dakol na taon nagin mga misyonera sa Peru. Nagpahayag sinda nin mapagpadangat na pag-apresyar sa daing kapagalan na ministeryo ni Tatay asin nagsabi: “An mga tugang kaidtong mga panahon talagang may espiritu nin pagpapayunir mantang sinda nagduduman sa ibang mga nasyon na ini na kakadikit an darang rogaring sa kinaban na ini alagad may puso na pano nin pagkamoot para ki Jehova. Iyan an nagmotibar sa sainda na gibohon an ginibo ninda.”

Pag-agom Asin Ikaduwang Pagbiahe

Sa nakaaging mga taon si Tatay nakikipagsuratan ki Clara Hubbert na taga Isla nin Manitoulin, Ontario. Yaon sinda pareho sa kombension sa Columbus, Ohio, kan Hulyo 26, 1931, kan akoon kan Mga Estudyante sa Biblia an ngaran na Mga Saksi ni Jehova. (Isaias 43:10-12) Pakalihis nin sarong semana sinda nagpakasal. Dai nahaloy, si Tatay naghale na naman, sa saiyang ikaduwang pagbiahe sa pagmimisyonero sa mga isla kan Caribe. Duman, sia nagtabang na maorganisar an mga pagtiripon asin sanayon an iba sa ministeryo sa harong-harong.

Si Nanay nakaresibi nin mga retrato, kard, asin  surat hale sa Suriname, St. Kitts, asin dakol na iba pang lugar. An mga surat nagbabareta dapit sa pag-oswag kan paghuhulit asin kun minsan may kaibang mga impormasyon manongod sa mga gamgam, hayop, asin tinanom sa partikular na nasyon na namumugtakan nia. Kan Hunyo 1932, natapos ni Tatay an saiyang asignasyon sa Caribe asin, nagbiaheng tersera klase sa barko siring sa dati, sia nagbalik sa Canada. Pakatapos kaiyan, sinda ni Nanay magkaibang nakikabtang sa bilog na panahon na paghuhulit, na nagpalihis nin tiglipot kan 1932/33 sa Ottawa kaiba nin sarong dakulang grupo nin ibang bilog na panahon na mga ministro.

Sarong Halipot na Buhay Bilang Pamilya

Kan 1934 namundag an tugang kong si David. Kan sia aki pa, nagtutungtong sia sa kahon na sarayan nin kupya ni Nanay asin ineensayo an saiyang mga “pahayag.” Sa bilog niang buhay, sia nagpaheling nin kaigotan para ki Jehova kapareho kan saiyang ama. Sindang tolo nagbibiahe sakay nin kotse, na may nakagakod na kasangkapan sa sound sa bubongan, mantang dinadalaw ninda an mga kongregasyon poon sa sirangan na baybayon kan Canada sagkod sa solnopan na baybayon. Namundag ako kan 1938 mantang si Tatay naglilingkod sa British Columbia. Nagigirumdoman ni David na ibinugtak ako ni Tatay sa kama asin si Tatay, Nanay, saka si David luminuhod sa palibot kaiyan mantang si Tatay namimibi sa pagpasalamat para sa sako.

Kaidtong tiglipot nin 1939, nag-erok kami sa Vancouver mantang dinadalaw ni Tatay an mga kongregasyon sa lugar na iyan. Kabilang sa dakol na surat na natipon mi sa nag-aging mga taon an saro na an petsa Enero 14, 1939, na isinurat kan yaon sia sa Vernon, British Columbia. Ipinadara iyan ni Tatay ki Clara, David, asin Ruth, na sinasabi: “Sadit sanang hadok asin kugos.” Sa laog kaiyan may mensahe para sa kada saro sa samo. Sinabi nia an manongod sa pagigin mahiwas kan anihon duman alagad an mga paraani kakadikit.—Mateo 9:37, 38.

Sarong semana pakapuli sa Vancouver hale sa saiyang destino, si Tatay nadismayo sa sarong pagtiripon. Ihinayag nin suminunod na diagnosis na igwa sia nin tumor na may kanser sa hotok. Kan Mayo 1, 1939, natapos nia an saiyang daganon na buhay. Siyam na bulan an edad ko kaidto, asin si David haros singko anyos na. An namomotan ming ina, na igwa man nin langitnon na paglaom, nagdanay na fiel sa Dios sagkod na sia nagadan kan Hunyo 19, 1963.

An saboot ni Tatay manongod sa saiyang pribilehio na pagdara kan maogmang bareta sa dakol na nasyon magayonon na irinerepresentar sa saro sa saiyang mga surat ki Mama. Sinabi nia sa sarong kabtang: “Si Jehova maboot na nagtogot sa sako na dumanan an mga nasyon na ini bilang sarong liwanag na nagdadara kan mensahe kan Kahadean. Omawon logod an saiyang banal na ngaran. Sa kaluyahan asin kadaihan nin kakayahan, an saiyang kamurawayan nagsisirang.”

An mga aki, makoapo, asin makoapo sa tuhod ni George asin Clara Young naglilingkod man ngonyan sa satong mamomoton na Dios, si Jehova. May nagsabi sa sako na parateng kinokotar ni Tatay an Hebreo 6:10, na nagsasabi: “An Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran.” Dai mi man nalingawan an mga ginibo ni Tatay.

[Ritrato sa pahina 23]

An sakong ama, nasa too, kaiba an tolo niang tugang na lalaki

[Mga Ritrato sa pahina 25]

Si Tatay (nakatindog) kaiba si Tugang na Woodworth, Rutherford, asin Macmillan

Sa ibaba: Si Tatay (nasa porong wala) nasa grupo kaiba ni Tugang na Russell

[Mga Ritrato sa pahina 26]

Si Tatay asin si Nanay

Sa ibaba: Aldaw kan saindang kasal

[Ritrato sa pahina 27]

Kaiba si David asin si Nanay pakalihis nin pirang taon pagkagadan ni Tatay