An Paglaom na Pagkabuhay Liwat Igwa nin Puersa
An Paglaom na Pagkabuhay Liwat Igwa nin Puersa
“Tinios ko an pagkawara kan gabos na bagay . . . tanganing mamidbid ko [si Jesu-Cristo] asin an kapangyarihan kan saiyang pagkabuhay liwat.”—FILIPOS 3:8-10.
1, 2. (a) Kaidtong dakol nang taon an nakaagi, paano ilinadawan nin sarong klerigo an pagkabuhay liwat? (b) Paano mangyayari an pagkabuhay liwat?
SA KAPINONAN kan mga taon nin 1890, an pampublikong prensa nagbareta dapit sa sarong napapalaen na sermon nin sarong klerigo sa Brooklyn, Nueva York, E.U.A. Sia nagsabi na an pagkabuhay liwat magigin pagtipon giraray asin pagbuhay giraray kan gabos na tolang asin laman na minakompuesto sa hawak nin tawo, baga man iyan nagadan sa solo o sa aksidente, kinakan nin hayop o nagin abono. An parahulit may paniwala na sa sarong 24 oras na aldaw, an aire maitom huli sa mga kamot, takyag, bitis, moro, tolang, ugat, asin kublit kan binilyon na tawong gadan. An mga parteng ini hahanapon an ibang mga kabtang kan iyo man sanang hawak. Dangan may mga kalag na maabot hale sa langit asin impierno tanganing mag-erok sa binuhay liwat na mga hawak na ini.
2 An pagkabuhay liwat paagi sa pag-organisar liwat nin orihinal na mga atomo bakong makatanosan, asin an mga tawo mayo nin inmortal na kalag. (Eclesiastes 9:5, 10; Ezequiel 18:4) Si Jehova, an Dios nin pagkabuhay liwat, dai kaipuhan na bilogon liwat an mga atomo nin materya kan orihinal na hawak nin tawo. Puede siang magporma nin bagong mga hawak para sa mga binuhay liwat. Sa saiyang Aki, si Jesu-Cristo, itinao ni Jehova an kapangyarihan na buhayon liwat an mga gadan, na may posibilidad na mabuhay na daing katapusan. (Juan 5:26) Kaya nagsabi si Jesus: “Ako iyo an pagkabuhay liwat asin an buhay. An naggigibo nin pagtubod sa sako, minsan pa sia magadan, mabubuhay.” (Juan 11:25, 26) Abaa kanakaoogmang panuga! Pinakokosog kita kaiyan na tagalan an mga kasakitan asin atubangon pa ngani an kagadanan bilang fiel na Saksi ni Jehova.
3. Taano ta kinaipuhan ni Pablo na idepensa an pagkabuhay liwat?
3 An pagkabuhay liwat bakong kaoyon sa ideya na an mga tawo igwa nin inmortal na kalag—na nagin punto de vista kan Griegong pilosopo na si Plato. Kaya, ano an nangyari kan si apostol Pablo magpatotoo sa prominenteng mga Griego sa Areopago sa Atenas, manabihan si Jesus, asin magsabi na binuhay na sia liwat nin Dios? “Bueno,” sabi kan pagkasaysay, “kan madangog ninda an mapadapit sa pagkabuhay liwat kan mga gadan, an nagkapira nagpoon na magtuya.” (Gibo 17:29-34) An dakol na nakaheling sa binuhay liwat na Jesu-Cristo buhay pa kaidto asin, sa ibong kan pag-olog-olog, nagpatunay na sia binuhay na liwat hale sa mga gadan. Alagad an falsong mga paratokdo na asosyado sa kongregasyon sa Corinto dineharan an pagkabuhay liwat. Kun siring makosog na idinepensa ni Pablo an Kristianong katokdoan na ini sa 1 Corinto kapitulo 15. An maingat na pag-adal sa mga argumento nia nagpapatunay na daing duda sa pagkasegurado asin puersa kan paglaom na pagkabuhay liwat.
Masarig na Prueba kan Pagkabuhay Liwat ni Jesus
4. Anong prueba nin nakaheling mismo kan pagkabuhay liwat ni Jesus an itinao ni Pablo?
4 Mangnoha kun paano pinonan ni Pablo an saiyang depensa. (1 Corinto 15:1-11) Apuera sana kun an mga taga Corinto nagturubod na mayo nin katuyohan, pangangaptan ninda nin marigon an maogmang bareta nin kaligtasan. Si Cristo nagadan para sa satong mga kasalan, ilinobong, asin binuhay liwat. Sa katunayan, an binuhay liwat na si Jesus nagpaheling ki Cefas (Pedro), “dangan sa kagduwa.” (Juan 20:19-23) Naheling sia nin mga 500, tibaad kan ipagboot nia: ‘Paduman, gumibo kamo nin mga disipulo.’ (Mateo 28:19, 20) Naheling sia ni Santiago, siring man kan gabos na fiel na apostol. (Gibo 1:6-11) Harani sa Damasco, si Jesus nagpaheling ki Saulo “na garo saro na namundag na kulang sa bulan”—na garo baga sia binuhay na liwat sa espiritung buhay. (Gibo 9:1-9) An mga taga Corinto nagturubod huli ta si Pablo naghulit sa sainda, asin inako ninda an maogmang bareta.
5. Ano an paagi nin pangangatanosan ni Pablo na nakasurat sa 1 Corinto 15:12-19?
5 Obserbari nindo an paagi nin pangangatanosan ni Pablo. (1 Corinto 15:12-19) Mantang an mga nakaheling mismo naghuhulit na si Cristo binuhay liwat, paano masasabi na mayo nin pagkabuhay liwat? Kun si Jesus dai binuhay liwat hale sa mga gadan, an satong paghuhulit asin an satong pagtubod sayang sana, asin mga putikon kita na nagpapatotoo tumang sa Dios paagi sa pagsabi na binuhay nia liwat si Cristo. Kun an mga gadan dai binubuhay liwat ‘kita nasa sato pang mga kasalan,’ asin idtong mga gadan na kasaro ni Cristo napara. Dugang pa, “kun sa buhay sanang ini kita naglaom ki Cristo, kita an pinakakaherakherak sa gabos na tawo.”
6. (a) Ano an sinabi ni Pablo bilang patunay sa pagkabuhay liwat ni Jesus? (b) Ano “an ultimong kaiwal,” asin paano iyan paparaon?
6 Pinatutunayan ni Pablo an pagkabuhay liwat ni Jesus. (1 Corinto 15:20-28) Mantang si Cristo “an enot na bunga” kan mga natotorog sa kagadanan, may iba pa man na bubuhayon liwat. Mantang an kagadanan resulta kan pagsuway kan tawong si Adan, an pagkabuhay liwat paagi sa sarong tawo—si Jesus. An mga rogaring nia bubuhayon liwat sa panahon kan saiyang presensia. ‘Paparaon ni Cristo an gabos na gobyerno asin gabos na autoridad asin kapangyarihan’ na kontra sa soberaniya nin Dios asin mamamahala bilang Hade sagkod na ibugtak ni Jehova an gabos na kaiwal sa irarom kan saiyang mga bitis. Pati “an ultimong kaiwal”—an kagadanan na minana ki Adan—paparaon paagi sa merito kan atang ni Jesus. Dangan itatao ni Cristo an Kahadean sa saiyang Dios asin Ama, na ipinasasakop an saiyang sadiri sa “Saro na nagpasakop sa saiya kan gabos na bagay, tanganing an Dios magin gabos na bagay sa gabos na tawo.”
Binautismohan Para sa mga Gadan?
7. Sairisay an “binabautismohan sa katuyohan na magin mga gadan,” asin ano an kahulogan kaini para sa sainda?
7 Hinapot an mga kontra sa pagkabuhay liwat: “Ano an gigibohon ninda na binabautismohan sa katuyohan na magin mga gadan?” (1 Corinto 15:29) Dai boot sabihon ni Pablo na an mga buhay babautismohan para sa mga gadan, ta an mga disipulo ni Jesus dapat na personal na nag-aadal, minatubod, asin nagpapabautismo. (Mateo 28:19, 20; Gibo 2:41) An linahidan na mga Kristiano “binabautismohan sa katuyohan na magin mga gadan” paagi sa pagigin ilinaladop sa pamumuhay na minagiya pasiring sa kagadanan asin pagkabuhay liwat. An klaseng ini nin bautismo minapoon pagpinatalubo sa sainda kan espiritu nin Dios an langitnon na paglaom asin natatapos pagbinuhay sinda liwat hale sa kagadanan pasiring sa inmortal na espiritung buhay sa langit.—Roma 6:3-5; 8:16, 17; 1 Corinto 6:14.
8. Sa ano makaseseguro an mga Kristiano dawa kun gadanon sinda ni Satanas asin kan mga kampon kaini?
8 Siring sa ipinaheheling kan mga tataramon ni Pablo, an paglaom na pagkabuhay liwat pinangyayari an mga Kristiano na atubangon an mga pag-alaman oras-oras asin an kagadanan aroaldaw huli sa paghuhulit kan Kahadean. (1 Corinto 15:30, 31) Aram ninda na puede sindang buhayon liwat ni Jehova kun togotan nia si Satanas asin an mga kampon kaini na gadanon sinda. An Dios sana an makapapara sa saindang kalag, o buhay, sa Gehenna, na nagsisimbolo sa daing sagkod na kalaglagan.—Lucas 12:5.
Kaipuhan na Magin Mapagmaan
9. Tangani na an paglaom na pagkabuhay liwat magkaigwa nin nakasusustenir na puersa sa satong buhay, ano an dapat tang likayan?
9 Nakasustenir ki Pablo an paglaom na pagkabuhay liwat. Kan sia nasa Efeso, an saiyang mga kaiwal puedeng iinapon sia sa laog kan estadio tanganing makilaban sa mababangis na hayop. (1 Corinto 15:32) Kun nangyari iyan, sia ilinigtas, siring kan pagsalbar ki Daniel sa mga leon. (Daniel 6:16-22; Hebreo 11:32, 33) Huling naglaom sia sa pagkabuhay liwat, mayo si Pablo kan aktitud kan mga apostata sa Juda kaidtong kaaldawan ni Isaias. Sinda nagsabi: “Magkarakan asin mag-irinom kita, ta nuodma magagadan kita.” (Isaias 22:13, Septuagint) Tangani na an paglaom na pagkabuhay liwat magkaigwa nin nakasusustenir na puersa sa satong buhay arog ki Pablo, dapat tang likayan an mga igwa kan siring na salang espiritu. “Dai kamo palagalag,” an patanid ni Pablo. “An maraot na pag-iriba nakararaot sa marahay na mga ugale.” (1 Corinto 15:33) Siempre, an prinsipyong ini aplikado sa laen-laen na aspekto nin buhay.
10. Paano mapagdadanay na buhay an satong paglaom na pagkabuhay liwat?
10 Sa mga nagdududa sa pagkabuhay liwat, si Pablo nagsabi: “Magmata kamo sa toltol na isip sa matanos na paagi asin dai kamo magtood sa kasalan, huli ta may nagkapira na daing kaaraman sa Dios. Isinasabi ko ini tanganing mapasopog kamo.” (1 Corinto 15:34) Sa “panahon [na ini] kan katapusan,” kaipuhan kitang humiro kaoyon kan tamang kaaraman sa Dios asin ki Cristo. (Daniel 12:4; Juan 17:3) Papagdadanayon kaini na buhay an satong paglaom na pagkabuhay liwat.
Binubuhay Liwat sa Anong Hawak?
11. Paano iinilustrar ni Pablo an pagkabuhay liwat kan linahidan na mga Kristiano?
11 Sunod trinatar ni Pablo an nagkapirang hapot. (1 Corinto 15:35-41) Tibaad tanganing ibugtak sa pagduda an pagkabuhay liwat, tibaad may maghapot: “Paano bubuhayon liwat an mga gadan? Iyo, sa anong klaseng hawak sinda matunga?” Siring kan ipinaheling ni Pablo, an pisog na itinanom sa daga garo man sana nagagadan mantang iyan nagliliwat na magin sadit na tanom. Kaagid kaiyan, an sarong tawo na pinaniaki nin espiritu dapat na magadan. Kun paanong an tanom minatubo hale sa pisog na magin sarong bagong hawak, an binuhay liwat na hawak kan linahidan na Kristiano laen man sa laman nin tawo. Minsan ngani igwa sia nin iyo man sanang ugale sa buhay bago nagadan, sia binubuhay liwat bilang sarong bagong linalang na may espiritung hawak na makaeerok sa langit. Natural, an mga bubuhayon liwat digdi sa daga bubuhayon sa hawak nin tawo.
12. Ano an boot sabihon kan mga tataramon na “langitnon na mga hawak” asin “daganon na mga hawak”?
12 Siring kan sabi ni Pablo, an laman nin tawo laen kan sa mga hayop. Maski an laman nin hayop magkakalaen depende sa klase. (Genesis 1:20-25) An “langitnon na mga hawak” kan espiritung mga linalang laen sa kamurawayan kisa “daganon na mga hawak” na laman. May mga pagkakalaen man sa kamurawayan kan saldang, bulan, asin mga bitoon. Alagad an binuhay liwat na mga linahidan igwa nin orog kadakulang kamurawayan.
13. Segun sa 1 Corinto 15:42-44, ano an itinatanom asin ano an binubuhay liwat?
13 Pakasabi kan mga pagkakalaen, idinugang ni Pablo: “Siring man an pagkabuhay liwat kan mga gadan.” (1 Corinto 15:42-44) Sinabi nia: “Iyan itinatanom sa pagkalapa, iyan binubuhay sa dai pagkalapa.” Tibaad an boot sabihon digdi ni Pablo iyo an mga linahidan bilang grupo. Itinanom sa kalapaan pagkagadan, iyan binubuhay liwat sa pagkadaing kalapaan, daing kasalan. Minsan ngani sinopog kan kinaban, iyan binubuhay liwat sa langitnon na buhay asin ihinahayag kaibanan ni Cristo sa kamurawayan. (Gibo 5:41; Colosas 3:4) Pagkagadan iyan itinatanom na “pisikal na hawak” asin binubuhay liwat na “espirituwal na hawak.” Huling puede ini sa kamugtakan kan linahidan nin espiritung mga Kristiano, makaseseguro kita na may iba pa na puedeng buhayon liwat digdi sa daga.
14. Paano ipinaheling ni Pablo an kalaenan ni Cristo ki Adan?
14 Sunod ipinaheling ni Pablo an kalaenan ni Cristo ki Adan. (1 Corinto 15:45-49) Si Adan, an enot na tawo, “nagin buhay na kalag.” (Genesis 2:7) “An huring Adan”—si Jesus—“nagin espiritung nagtatao nin buhay.” Itinao nia an saiyang buhay bilang pantubos na atang, enot para sa saiyang linahidan na mga parasunod. (Marcos 10:45) Bilang mga tawo, sinda “kaladawan kan saro na gibo sa kabokabo,” alagad pagbinuhay na liwat sinda nagigin arog kan huring Adan. Siempre, makikinabang sa atang ni Jesus an gabos na makinuyog na tawo, kabale an mga bubuhayon liwat digdi sa daga.—1 Juan 2:1, 2.
15. Taano an linahidan na mga Kristiano ta dai binubuhay liwat sa laman, asin paano sinda binubuhay durante kan presensia ni Jesus?
15 Pagnagadan an linahidan na mga Kristiano, sinda dai binubuhay liwat sa laman. (1 Corinto 15:50-53) An nalalapang hawak na laman asin dugo dai makakapagmana nin pagkadaing kalapaan asin kan langitnon na Kahadean. May mga linahidan na dai na kaipuhan na umagi nin halawig na pagtorog sa kagadanan. Huling tinapos nin fiel an saindang daganon na buhay sa panahon kan presensia ni Jesus, sinda “maliliwat, sa panale, sa sarong pagpirok nin mata.” Sinda bubuhayon liwat sa panale sa espiritung buhay sa pagkadaing kalapaan asin kamurawayan. Sa kahurihurihi, an langitnon na “nobya” ni Cristo magkakaigwa nin kabilangan na 144,000.—Kapahayagan 14:1; 19:7-9; 21:9; 1 Tesalonica 4:15-17.
Napangganahan an Kagadanan!
16. Segun ki Pablo asin sa enot na mga propeta, ano an mangyayari sa kagadanan na minana sa makasalan na si Adan?
16 May kapangganahan na ipinahayag ni Pablo na an kagadanan hahalonon sagkod lamang. (1 Corinto 15:54-57) Kun an nalalapa asin nagagadan magsolog na nin pagkadaing kalapaan asin pagkadaing kagadanan, maootob an mga tataramon na ini: “An kagadanan nahalon na sagkod lamang.” “Kagadanan, haen an saimong kapangganahan? Kagadanan, haen an saimong sogod?” (Isaias 25:8; Oseas 13:14) An sogod na nagbubunga nin kagadanan iyo an kasalan, asin an puersa kan kasalan iyo an Ley, na kinondenar sa kagadanan an mga parakasala. Alagad huli sa atang asin pagkabuhay liwat ni Jesus, an kagadanan na minana sa makasalan na si Adan dai na manggagana.—Roma 5:12; 6:23.
17. Paano aplikado ngonyan an mga tataramon sa 1 Corinto 15:58?
17 “Bilang resulta, namomotan kong mga tugang,” sabi ni Pablo, “magin kamong marigon, dai natatanyog, na danay na dakol an gigibohon sa gibohon kan Kagurangnan, sa pakaaram na an saindong pagpapagal bakong sayang sana dian sa Kagurangnan.” (1 Corinto 15:58) An mga tataramon na iyan aplikado sa linahidan na natatada ngonyan asin sa “ibang karnero” ni Jesus dawa kun sinda magadan sa huring mga aldaw na ini. (Juan 10:16) An saindang pagpapagal bilang mga parabalangibog kan Kahadean bakong sayang sana, ta may pagkabuhay liwat na naghahalat sa sainda. Kun siring, bilang mga lingkod ni Jehova magdanay kitang sibot sa gibohon kan Kagurangnan mantang hinahalat an aldaw na kita magayagayang makakukurahaw: “Kagadanan, haen an saimong kapangganahan?”
Naotob an Paglaom na Pagkabuhay Liwat!
18. Gurano kakosog kan paglaom ni Pablo sa pagkabuhay liwat?
18 Linilinaw kan mga tataramon ni Pablo na nakasurat sa 1 Corinto kapitulo 15 na an paglaom na pagkabuhay liwat igwa nin puersa sa saiyang buhay. Sia lubos na segurado na si Jesus binuhay liwat hale sa mga gadan asin na may iba pa na paluluwason man sa pankagabsan na lolobngan nin katawohan. Igwa daw kamo kan siring kakosog na kombiksion? An paslong mga pakinabang ibinilang ni Pablo na ‘mga tapok’ asin ‘tinios nia an pagkawara kan gabos na bagay’ tanganing ‘mamidbid nia si Cristo asin an kapangyarihan kan saiyang pagkabuhay liwat.’ An apostol andam na magadan nin arog ki Cristo sa paglaom na akoon “an mas amay na pagkabuhay liwat.” Inaapod man na “enot na pagkabuhay liwat,” iyan an naeeksperyensiahan kan 144,000 na linahidan na parasunod ni Jesus. Iyo, sinda binubuhay liwat sa espiritung buhay sa langit, mantang “an iba kan mga gadan” bubuhayon liwat digdi sa daga.—Filipos 3:8-11; Kapahayagan 7:4; 20:5, 6.
19, 20. (a) Sairisay na indibiduwal na nakasurat sa Biblia an bubuhayon liwat digdi sa daga? (b) Pagkabuhay liwat niisay an inaantisipar nindo?
19 An paglaom na pagkabuhay liwat nagin sarong mamuraway na katunayan para sa mga linahidan na nagin fiel sagkod sa kagadanan. (Roma 8:18; 1 Tesalonica 4:15-18; Kapahayagan 2:10) Maheheling kan mga makaliligtas sa “dakulang kahorasaan” na naotob digdi sa daga an paglaom na pagkabuhay liwat mantang ‘itinatao kan dagat an mga gadan na yaon dian, asin itinatao kan kagadanan asin kan Hades an mga gadan na yaon dian.’ (Kapahayagan 7:9, 13, 14; 20:13) Kabilang si Job sa mga bubuhayon liwat digdi sa daga, na nagadanan nin pitong aking lalaki asin tolong aking babae. Imahinara an kagayagayahan nia sa pagsabat sa sainda—asin maoogma nanggad sinda ta sinda igwa nin pito pang tugang na lalaki asin tolo pang magagayon na tugang na babae!—Job 1:1, 2, 18, 19; 42:12-15.
20 Magigin bendisyon nanggad kun si Abraham asin Sara, Isaac asin Rebeca—iyo asin an kadakol pang iba, kabale “an gabos na propeta”—buhayon na liwat digdi sa daga! (Lucas 13:28) Saro sa mga propetang iyan si Daniel, na pinanugaan nin pagkabuhay liwat sa irarom kan Mesiyanikong pamamahala. Sa laog nin mga 2,500 na taon, si Daniel nagpahingalo sa lolobngan, alagad paagi sa kapangyarihan kan pagkabuhay liwat, sa dai na mahahaloy sia ‘matindog para sa saiyang kabtang’ bilang saro sa “mga prinsipe sa bilog na daga.” (Daniel 12:13; Salmo 45:16) Kanigoan na kaogmahan na sabaton bako sana an mga fiel kan suanoy na panahon kundi siring man an saindo mismong ama, ina, aking lalaki, aking babae, o iba pang namomotan na inagaw sa saindo kan kaiwal na kagadanan!
21. Taano ta dai kita maninigong mag-atraso sa paggibo nin marahay sa iba?
21 An nagkapira sa satong mga katood asin namomotan tibaad naglingkod na sa Dios sa laog nin dakol na dekada asin may edad na. An halangkaw nang edad tibaad magpadepisil sa sainda na makaya an mga sakit sa buhay. Kanigoan kamamomoton na itao sa sainda an ano man na tabang na mahihimo ta ngonyan mismo! Kun siring dai kita magbabasol na kita nagkulang sa sainda minsan paano pagkinua na sinda kan kagadanan bilang biktima kaiyan. (Eclesiastes 9:11; 12:1-7; 1 Timoteo 5:3, 8) Makasisierto kita na dai lilingawan ni Jehova an marahay na mga bagay na ginigibo ta sa iba, ano man an saindang edad o kamugtakan. “Mantang igwa kita nin marahayrahay na panahon para kaiyan,” an isinurat ni Pablo, “gumibo kita kan marahay sa gabos, alagad orog na sa mga may relasyon sa sato sa pagtubod.”—Galacia 6:10; Hebreo 6:10.
22. Sagkod sa kaotoban kan paglaom na pagkabuhay liwat, ano an maninigo na determinado niatong gibohon?
22 Si Jehova iyo “an Ama nin maboot na mga pagkaherak asin an Dios nin gabos na karangahan.” (2 Corinto 1:3, 4) An saiyang Tataramon rinaranga kita asin tinatabangan kita na rangahon an iba paagi sa mapuersang paglaom sa pagkabuhay liwat. Sagkod na maheling ta an kaotoban kan paglaom na iyan paagi sa pagbuhay liwat sa mga gadan digdi sa daga, arogon ta si Pablo, na igwa nin pagtubod sa pagkabuhay liwat. Logod na nangorognang arogon ta si Jesus, na naotob an paglaom sa kapangyarihan nin Dios na buhayon sia liwat. Sa dai na mahahaloy an mga nasa lolobngan nin girumdoman madadangog an tingog ni Cristo asin maruluwas. Logod na magtao ini sa sato nin karangahan asin kagayagayahan. Alagad orog sa gabos, logod na pasalamatan ta si Jehova, na pinagin posible an kapangganahan sa kagadanan paagi sa satong Kagurangnan na si Jesu-Cristo!
Ano an Simbag Nindo?
• Anong prueba nin nakaheling mismo kan pagkabuhay liwat ni Jesus an itinao ni Pablo?
• Ano “an ultimong kaiwal,” asin paano iyan paparaon?
• Sa kamugtakan kan linahidan na mga Kristiano, ano an itinatanom asin ano an binubuhay liwat?
• Sairisay na indibiduwal na nakasurat sa Biblia an boot nindong makaolay pagbinuhay na sinda liwat digdi sa daga?
[Mga Hapot Para sa Pag-adal]
[Ritrato sa pahina 16]
Makosog na idinepensa ni apostol Pablo an pagkabuhay liwat
[Mga Ritrato sa pahina 20]
An pagkabuhay liwat ni Job, kan saiyang pamilya, asin kadakol na iba pa magigin dahelan nin daing sagkod na kagayagayahan!