Segurado an Paglaom na Pagkabuhay Liwat!
Segurado an Paglaom na Pagkabuhay Liwat!
“May paglaom ako sa Dios . . . na magkakaigwa nin pagkabuhay liwat.”—GIBO 24:15.
1. Taano ta makalalaom kita sa pagkabuhay liwat?
TINAWAN kita ni Jehova nin tamang mga dahelan na maglaom sa pagkabuhay liwat. Sinabi nia sa sato na an mga gadan mabangon, matindog liwat pasiring sa buhay. Asin an saiyang katuyohan mapadapit sa mga natotorog sa kagadanan seguradong maootob. (Isaias 55:11; Lucas 18:27) Sa katunayan, an Dios nagpaheling na kan saiyang kapangyarihan na buhayon liwat an mga gadan.
2. Paano kita makikinabang sa paglaom na pagkabuhay liwat?
2 An pagtubod sa probisyon nin Dios na pagbuhay liwat sa mga gadan paagi sa saiyang Aki, si Jesu-Cristo, puedeng magsustenir sa sato sa mga panahon nin kasakitan. An pagkasegurado kan paglaom na pagkabuhay liwat puede man na makatabang sa sato na mapagdanay an integridad sa satong langitnon na Ama dawa sagkod sa kagadanan. Posibleng marhay na mapakokosog an satong paglaom na pagkabuhay liwat mantang ineestudyaran ta an mga pagbuhay liwat na nakasurat sa Biblia. An gabos na milagrong ini ginibo paagi sa kapangyarihan gikan sa Soberanong Kagurangnan na si Jehova.
Inako Ninda an Saindang mga Gadan Paagi sa Pagkabuhay Liwat
3. Tinawan nin kapangyarihan si Elias na gibohon an ano kan magadan an aki nin sarong balo sa Sarepta?
3 Sa sarong nakapupukaw sa boot na pagrepaso kan pagtubod na ipinaheling kan mga saksi ni Jehova bago kan mga Kristiano, si apostol Pablo nagsurat: “An mga babae nag-ako kan saindang mga gadan paagi sa pagkabuhay liwat.” (Hebreo 11:35; 12:1) An saro sa mga babaeng idto iyo an dukhang balo sa banwaan nin Sarepta sa Fenicia. Huling inistimar nia an propeta nin Dios na si Elias, an saiyang harina asin lana milagrosong dai naubos durante nin gutom na puede kutanang ikinagadan nia asin kan saiyang aking lalaki. Kan sa huri magadan an aki, ihinulid sia ni Elias sa sarong higdaan, namibi, huminigda sa ibabaw kan aki nin tolong beses, asin nag-arang: “O Jehova na sakuyang Dios, nakikimaherak ako sa saimo, pabalika tabi an kalag kan aking ini sa saiya.” Talagang pinabalik nin Dios an kalag, o buhay, sa aki. (1 Hade 17:8-24) Imahinara an kagayagayahan kan balong iyan kan an saiyang pagtubod binalosan kan enot na nakasurat na pagkabuhay liwat—kan saiya mismong namomotan na aki!
4. Anong milagro an ginibo ni Eliseo sa Sunem?
4 An saro pang babae na nag-ako kan saiyang gadan paagi sa pagkabuhay liwat taga banwaan nin Sunem. Agom na babae nin sarong may edad nang lalaki, sia nagpaheling nin kabootan ki propeta Eliseo asin sa saiyang katabang. Binalosan sia nin sarong aking lalaki. Minsan siring, pakalihis nin nagkapirang taon, ipinaapod nia an propeta, na naabotan na gadan na an aki sa harong nia. Pakatapos na si Eliseo mamibi asin may mga paagi na ginibo, “luway-luway na umininit an laman kan aki.” Sia “buminahon nin makapito, na pakatapos kaiyan iminuklat kan aki an saiyang mga mata.” An pagkabuhay liwat na ini daing duda na nagtao nin dakulang kagayagayahan sa ina sagkod sa saiyang aki. (2 Hade 4:8-37; 8:1-6) Alagad sinda orog pa nanggad na maoogma pagbinuhay na liwat digdi sa daga sa “mas marahay na pagkabuhay liwat”—pagkabuhay liwat na nag-aatubang sa sainda kan posibilidad na nungka nang magagadan pa liwat! Kanigoan na dahelan na magpasalamat sa mamomoton na Dios nin pagkabuhay liwat, si Jehova!—Hebreo 11:35.
5. Paano naimbuelto si Eliseo sa sarong milagro dawa pagkagadan nia?
5 Dawa pagkagadan asin pagkalobong ki Eliseo, ginibo nin Dios na makapangyarihan an saiyang mga tolang paagi sa banal na espiritu. Satong mababasa: “Mantang may ilinolobong [an nagkapirang Israelita], tara, uya naheling ninda an grupo nin mga parasalakat [na Moabita]. Tolos na iinapon ninda an lalaki sa linobngan ki Eliseo asin nagharale. Kan an [gadan na] lalaki makaduta sa mga tolang ni Eliseo, sia tolos-tolos na nabuhay asin nagtindog.” (2 Hade 13:20, 21) Siertong kanigoan an pagngalas asin kaogmahan kan lalaking idto! Imahinara an kagayagayahan na mamamatean pagbinuhay na liwat an satong mga namomotan kaoyon kan dai nasusudyang katuyohan ni Jehova Dios!
Binuhay Liwat kan Aki nin Dios an mga Gadan
6. Anong milagro an ginibo ni Jesus harani sa siudad nin Nain, asin ano an puedeng magin epekto sa sato kan insidenteng ini?
6 An Aki nin Dios, si Jesu-Cristo, tinawan kita nin tamang mga dahelan na maniwala na an mga gadan puedeng buhayon liwat, na may paglaom na mabuhay na daing katapusan. An sarong insidente na nangyari harani sa siudad nin Nain puedeng makatabang sa sato na marealisar na posible an siring na milagro paagi sa kapangyarihan na tao nin Dios. Sarong beses, nasabatan ni Jesus an mga nagmomondo na dara an bangkay nin sarong hoben na lalaki paluwas sa siudad tanganing ilobong. Sia an bugtong na aki nin sarong balo. Sinabihan ni Jesus an balo: “Ontok na sa pagtangis.” Dangan dinootan nia an andas asin nagsabi: “Hoben na lalaki, ako nagsasabi sa saimo, Bangon!” Sa puntong iyan sia buminuhat asin nagtaram. (Lucas 7:11-15) Siertong pinasasarig kan milagrong ini an satong kombiksion na segurado an paglaom na pagkabuhay liwat.
7. Ano an nangyari may koneksion sa aking babae ni Jairo?
7 Estudyare man an sarong pangyayari may labot ki Jairo, sarong poon na opisyal sa sinagoga sa Capernaum. Pinakiolayan nia si Jesus na magduman asin tabangan an saiyang namomotan na 12 anyos na aking babae, na naghihingagdan na. Dai nahaloy ibinareta na an aki nagadan na. Sinasadol na gumibo nin pagtubod an nagmomondong si Jairo, inibanan sia ni Jesus sa saiyang harong, kun saen nagtatarangis an kadaklan. Nagngisi sinda kan sabihon sa sainda ni Jesus: “An aki dai nagadan, kundi natotorog.” Sia totoong gadan na, alagad ipaheheling kaidto ni Jesus na an mga tawo puedeng buhayon liwat kun paanong sinda puedeng pukawon sa nanok na pagtorog. Kinakapotan sa kamot an aki, sia nagsabi: “Daragita, bumangon ka!” Tolos-tolos siang nagbuhat, asin “an saiyang mga magurang haros nawara sa saindang sadiri” sa labi-labing kaogmahan. (Marcos 5:35-43; Lucas 8:49-56) Daing duwa-duwa, an mga miembro nin pamilya ‘haros mawawara sa saindang sadiri’ pagbinuhay na liwat an saindang gadan nang mga namomotan sa sarong paraisong daga.
8. Ano an ginibo ni Jesus sa may pinaglobngan ki Lazaro?
8 Si Lazaro apat na aldaw nang gadan kan dumanan ni Jesus an pinaglobngan sa saiya asin ipahale an gapo sa entrada kaiyan. Pakatapos na mamibi sa publiko tanganing maaraman kan mga nagmamasid na sia nagtitiwala sa kapangyarihan na tao nin Dios, si Jesus nagsabi nin makosog: “Lazaro, lumuwas ka!” Asin luminuwas sia! An saiyang mga kamot asin bitis nagagapos pa nin mga henerong sa gadan, asin an saiyang lalauogon napapatos nin podong. “Hubadi sia nindo asin palakawa,” sabi ni Jesus. Kan maheling an milagrong ini, an dakol na yaon duman tanganing rangahon an mga tugang na babae ni Lazaro, si Maria asin Marta, nagturubod ki Jesus. (Juan 11:1-45) Bako daw na pinapano kamo nin paglaom kan pagkasaysay na ini na an mga namomotan nindo puedeng buhayon liwat sa bagong kinaban nin Dios?
9. Taano ta makaseseguro kita na puede na ngonyan na buhayon liwat ni Jesus an mga gadan?
9 Kan nabibilanggo si Juan na Bautisador, ipinaabot sa saiya ni Jesus an nakapakokosog sa boot na mensaheng ini: “An mga buta nakaheheling na liwat, . . . asin an mga gadan binubuhay liwat.” (Mateo 11:4-6) Huling si Jesus kan yaon digdi sa daga nagbuhay liwat nin mga gadan, seguradong magigibo nia iyan bilang makapangyarihan na espiritung linalang na tinawan nin Dios nin kapangyarihan. Si Jesus “iyo an pagkabuhay liwat asin an buhay,” asin nakararanga nanggad na maaraman na sa harani nang ngapit “an gabos na nasa mga lolobngan na girumdoman makadadangog kan saiyang tingog asin maruluwas”!—Juan 5:28, 29; 11:25.
An Iba Pang mga Pagkabuhay Liwat Pinakokosog an Satong Paglaom
10. Paano mo ilaladawan an enot na ibinaretang pagbuhay liwat nin sarong apostol?
10 Kan sugoon ni Jesus an saiyang mga apostol bilang mga parahulit kan Kahadean, sia nagsabi: “Buhayon nindo an mga gadan.” (Mateo 10:5-8) Siempre, tanganing magibo ini kaipuhan nindang manarig sa kapangyarihan nin Dios. Sa Jope kan 36 C.E., an diosnon na babaeng si Dorcas (Tabita) natorog sa kagadanan. Kabale sa marahay na mga gibo nia an paggibo nin mga gubing para sa nangangaipong mga balo, na nagtarangis nin grabe kan sia magadan. An mga disipulo inandam sia para sa lobong asin ipinaapod si apostol Pedro, tibaad para sa pagranga. (Gibo 9:32-38) Pinahale nia an gabos na nasa kuarto sa itaas, namibi sia, asin nagsabi: “Tabita, buhat!” Nagmuklat sia, nagbuhat, ginawgaw an kamot ni Pedro, asin pinatindog sia ni Pedro. An enot na ibinaretang pagbuhay liwat na ini nin sarong apostol nagin dahelan na dakol an nagturubod. (Gibo 9:39-42) Iyan nagtatao man sa sato nin dugang na dahelan na maglaom sa pagkabuhay liwat.
11. Ano an ultimong pagkabuhay liwat na nakasurat sa Biblia?
11 An ultimong pagkabuhay liwat na nakasurat sa Biblia nangyari sa Troas. Kan maghapit duman si Pablo sa saiyang ikatolong biahe sa pagmimisyonero, pinalawig nia an saiyang diskurso sagkod sa matanga. Dinaog nin pagkakapoy asin tibaad kan init kan dakol na lampara patin kan pagigin matawo sa pinagtitiriponan, an sarong hoben na lalaki na an ngaran Eutico napatorog asin nahulog hale sa bintana kan ikatolong eskalon. Sia “pinurot na gadan na,” bakong desmayado sana. Dinapaan ni Pablo si Eutico, kinugos sia, asin sinabihan an mga nagmamasid: “Ontok kamo sa pagkariribok, huli ta an saiyang kalag yaon sa saiya.” Boot sabihon ni Pablo na an buhay kan hoben na lalaki nakabalik na. An mga presente “dai masokol an pagkaranga.” (Gibo 20:7-12) Ngonyan, an mga lingkod nin Dios nararangang marhay sa pakaaram na an saindang dating kairiba sa paglilingkod sa Dios makaeeksperyensia kan kaotoban kan pagkabuhay liwat.
Pagkabuhay Liwat—Haloy Nang Paglaom
12. Anong kombiksion an ipinahayag ni Pablo kan nasa atubangan ni Gobernador Felix nin Roma?
12 Kan binibista sa atubangan ni Gobernador Felix nin Roma, si Pablo nagpatotoo: “Nagtutubod ako sa gabos na bagay na nasa Ley asin nasusurat sa Mga Propeta; asin may paglaom ako sa Dios . . . na magkakaigwa nin pagkabuhay liwat an mga matanos sagkod an mga bakong matanos.” (Gibo 24:14, 15) Ano an sinasabi kan mga kabtang kan Tataramon nin Dios, arog baga kan “Ley,” dapit sa pagkabuhay kan mga gadan?
13. Taano ta masasabi na ipinasentido nin Dios an pagkabuhay liwat kan itao nia an enot na hula?
13 Ipinasentido mismo nin Dios an sarong pagkabuhay liwat kan itao nia an enot na hula sa Eden. Kan sinesentensiahan “an enot na halas,” si Satanas na Diablo, an Dios nagsabi: “Bubugtakan ko nin pakikienemigo sa pag-oltanan mo asin kan babae saka sa pag-oltanan kan saimong banhi asin kan saiyang banhi. Lulugadon ka nia sa payo asin lulugadon mo sia sa bool.” (Kapahayagan 12:9; Genesis 3:14, 15) An paglugad sa bool kan banhi kan babae nangahulogan kan paggadan ki Jesu-Cristo. Tanganing malugad kan Banhi na iyan an payo kan halas pakatapos kaiyan, si Cristo kaipuhan na buhayon liwat hale sa mga gadan.
14. Paanong si Jehova iyo an “Dios, bakong kan mga gadan, kundi kan mga buhay”?
14 Si Jesus nagsabi: “Na an mga gadan bubuhayon liwat minsan si Moises nagpahayag, sa kasaysayan dapit sa kilitis, kan apodon nia si Jehova na ‘an Dios ni Abraham asin Dios ni Isaac patin Dios ni Jacob.’ Sia Dios, bakong kan mga gadan, kundi kan mga buhay, huli ta sinda gabos buhay para sa saiya.” (Lucas 20:27, 37, 38; Exodo 3:6) Si Abraham, Isaac, asin Jacob garadan na, alagad an katuyohan nin Dios na buhayon liwat sinda seguradong maootob kaya para sa saiya sinda garo man sana buhay.
15. Taano ta may dahelan si Abraham na magtubod sa pagkabuhay liwat?
15 Si Abraham igwa kaidto nin dahelan na maglaom sa pagkabuhay liwat, ta kan sia asin an saiyang agom, si Sara, gurang nang marhay, asin sinda gadan na kun mapadapit sa kakayahan na mangaki, milagrosong ibinalik nin Dios an saindang kakayahan sa pangangaki. Ini garo man sana pagkabuhay liwat. (Genesis 18:9-11; 21:1-3; Hebreo 11:11, 12) Kan mga 25 anyos na an saindang aki, si Isaac, sinabihan nin Dios si Abraham na iatang sia. Minsan siring, kan gagadanon na ni Abraham si Isaac, pinogolan kan anghel ni Jehova an saiyang kamot. Si Abraham “naglaom na mahihimo nin Dios na buhayon [si Isaac] minsan hale sa mga gadan; asin hale dian talagang inako man nia sia sa makaladawan na paagi.”—Hebreo 11:17-19; Genesis 22:1-18.
16. Si Abraham ngonyan natotorog sa kagadanan, na naghahalat nin ano?
16 Si Abraham naglaom sa sarong pagkabuhay liwat sa irarom kan pamamahala kan Mesiyas, an ipinanugang Banhi. Hale sa saiyang marahay na kamugtakan bago nagin tawo, namasdan kan Aki nin Dios an pagtubod ni Abraham. Bilang an tawong si Jesu-Cristo, sinabihan nia kun siring an mga Judio: “Si Abraham na saindong ama nag-ogmang gayo sa paglaom na maheling an sakong aldaw.” (Juan 8:56-58; Talinhaga 8:30, 31) Si Abraham ngonyan natotorog sa kagadanan, naghahalat nin pagkabuhay liwat digdi sa daga sa irarom kan Mesiyanikong Kahadean nin Dios.—Hebreo 11:8-10, 13.
Patotoo Hale sa Ley Asin sa Salmo
17. Paano nauunabihan kan mga “bagay na nasa Ley” an pagkabuhay liwat ni Jesu-Cristo?
17 An paglaom ni Pablo na pagkabuhay liwat kaoyon kan mga “bagay na nasa Ley.” Sinabihan nin Dios an mga Israelita: “Kamo magdara . . . sa saserdote nin sarong goygoy kan enot na mga bunga kan saindong ani. Asin [sa Nisan 16] itatabyon nia an goygoy sa atubangan ni Jehova tanganing kamtan an pag-oyon para sa saindo.” (Levitico 23:9-14) Tibaad an ley na ini an nasa isip, si Pablo nagsurat: “Si Cristo binuhay na liwat hale sa mga gadan, an enot na bunga kan mga natorog sa kagadanan.” Bilang “an enot na bunga,” si Jesus binuhay liwat kan Nisan 16, 33 C.E. Sa huri, sa panahon kan saiyang presensia, magkakaigwa nin pagkabuhay liwat an ‘sunod na mga bunga’—an saiyang linahidan nin espiritung mga parasunod.—1 Corinto 15:20-23; 2 Corinto 1:21; 1 Juan 2:20, 27.
18. Paano ipinaheling ni Pedro na an pagkabuhay liwat ni Jesus ihinula sa Salmo?
18 An Salmo nagsusuportar man sa pagkabuhay liwat. Kan aldaw nin Pentecostes 33 C.E., nagkotar si apostol Pedro sa Salmo 16:8-11, na sinasabi: “Si David nagtataram mapadapit [ki Cristo], ‘Si Jehova danay na nasa atubangan kan sakong mga mata; huli ta sia yaon sa sakong too tanganing ako dai noarin man matanyog. Dahel kaini naogma an sakong puso asin an sakong dila naggayagayang marhay. Apuera dian, minsan an sakong laman mag-eerok sa paglaom; huli ta dai mo pababayaan an sakong kalag sa Hades, ni na totogotan mo man an saimong maimbod na saro na makaheling nin kalapaan.’” Idinugang ni Pedro: “[Si David] patienot na natanaw an asin nagtaram may labot sa pagkabuhay liwat kan Cristo, na sia dai pinabayaan sa Hades ni nakaheling man nin kalapaan an saiyang laman. An Jesus na ini binuhay liwat nin Dios.”—Gibo 2:25-32.
19, 20. Kasuarin nagkotar si Pedro sa Salmo 118:22, asin paano ini konektado sa pagkagadan asin pagkabuhay liwat ni Jesus?
19 Nagkapirang aldaw an nakaagi, si Pedro uminatubang sa Sanhedrin asin sa giraray nagkotar sa Salmo. Hinapot kun paano nia pinaomayan an sarong pilay na parapakilimos, an apostol nagsabi: “Maaraman logod nindo gabos asin kan bilog na banwaan nin Israel, na sa ngaran ni Jesu-Cristo na Nazareno, na saindong ipinako alagad ta binuhay liwat nin Dios hale sa mga gadan, paagi sa sarong ini na an tawong ini nagtitindog na marahay na sa atubangan nindo. Iyo ini [si Jesus] ‘an gapo na ibinilang nindong mga paratogdok na daing halaga na nagin an pamayohan kan anggulo.’ Dugang pa, mayo nin kaligtasan sa siisay pa man na iba, huli ta mayo na nin ibang ngaran sa sirong nin langit na itinao sa mga tawo na sukat makaligtas sa sato.”—Gibo 4:10-12.
20 Nagkotar digdi si Pedro sa Salmo 118:22, na iinaplikar an sinasabi kaiyan sa pagkagadan asin pagkabuhay liwat ni Jesus. Sinutsutan kan saindang mga namomoon sa relihion, isinikwal kan mga Judio si Jesus. (Juan 19:14-18; Gibo 3:14, 15) ‘An pagsikwal kan mga paratogdok sa gapo’ nagresulta sa kagadanan ni Cristo, alagad ‘an pagigin pamayohan kan anggulo kan gapo’ nangahulogan kan pagbuhay liwat sa saiya sa espiritung kamurawayan sa langit. Siring sa ihinula kan salmista, “ini hale ki Jehova.” (Salmo 118:23) Kaiba sa paggibo sa “gapo” na magin Pamayohan kan anggulo an pagpamuraway sa saiya bilang Designadong Hade.—Efeso 1:19, 20.
Sinususteniran kan Paglaom na Pagkabuhay Liwat
21, 22. Anong paglaom an ipinahayag ni Job, na nakasurat sa Job 14:13-15, asin paano ini makararanga sa mga nagadanan ngonyan?
21 Minsan ngani dai pa kita noarin man personal na nakaheling nin binuhay liwat hale sa mga gadan, pinag-olayan ta an nagkapirang pagkasaysay sa Kasuratan na nag-aasegurar sa sato kan pagkabuhay liwat. Kun siring, puedeng mapasato an paglaom na ipinahayag kan matanos na tawong si Job. Kan sia nagsasakit, sia nakimaherak: “O marahay pang ako tagoon mo [Jehova] sa Sheol, . . . na tawan mo ako nin talaan na panahon asin girumdomon mo ako! Kun an pusog na lalaki magadan puede pa daw siang mabuhay giraray? . . . Ika maapod, asin ako mismo masimbag sa saimo. Para sa ginibo kan saimong mga kamot ika magkakaigwa nin paghimuyawot.” (Job 14:13-15) An Dios ‘mahimuyawot sa mga ginibo kan saiyang mga kamot,’ na makosog an pagmawot na buhayon liwat si Job. Kanigoan na paglaom an itinatao kaiyan sa sato!
22 An sarong may takot sa Dios na miembro nin pamilya tibaad maghelang nin grabe, siring ki Job, asin tibaad daogon pa ngani kan kaiwal na kagadanan. An nagadanan tibaad magluha sa kamondoan, kun paanong nagtangis si Jesus sa pagkagadan ni Lazaro. (Juan 11:35) Alagad nakararanga nanggad na maaraman na an Dios maapod asin an mga nasa saiyang memorya masimbag! Iyan garo man sana pagbalik ninda hale sa biahe—bakong may helang o maluya, kundi marahay an salud.
23. Paano ipinahayag nin nagkapira an saindang kompiansa sa paglaom na pagkabuhay liwat?
23 An pagkagadan nin sarong fiel na gurang nang Kristiano nagpahiro sa mga kapagtubod na sumurat: “Akoa tabi nindo an samong odok na marhay na pakikidumamay sa pagkagadan kan saindong ina. Dai na man mahahaloy asin sasabaton ta sia—magayon asin mabagsik!” An mga magurang na nagadanan nin aking lalaki nagsabi: “Kanigoan an paghalat mi sa aldaw na si Jason talagang mamata! Sia mangangalagkalag asin maheheling nia an Paraiso na hinidaw niang marhay. . . . Sarong dahelan nanggad para sa samo na namomoot sa saiya na makaduman man.” Iyo, asin makapagpapasalamat nanggad kita ta segurado an paglaom na pagkabuhay liwat!
Ano an Saindong Simbag?
• Paano kita makikinabang sa pagtubod sa probisyon nin Dios na pagbuhay liwat sa mga gadan?
• Anong mga insidente na nakasurat sa Kasuratan an nagtatao sa sato nin dahelan na maglaom sa pagkabuhay liwat?
• Taano ta masasabi na an pagkabuhay liwat haloy nang paglaom?
• Anong nakasusustenir na paglaom an puedeng mapasato mapadapit sa mga gadan?
[Mga Hapot Para sa Pag-adal]
[Ritrato sa pahina 10]
Paagi sa kapangyarihan hale ki Jehova, ibinalik ni Elias an buhay kan aking lalaki nin sarong balo
[Ritrato sa pahina 12]
Kan buhayon liwat ni Jesus an aking babae ni Jairo, an mga magurang kaini haros mawara sa sadiri sa labi-labing kaogmahan
[Ritrato sa pahina 15]
Kan aldaw nin Pentecostes 33 C.E.,si apostol Pedro pusoan na nagpatotoo na si Jesus binuhay liwat hale sa mga gadan