Estorya nin Buhay

Hale sa Paggibo nin mga Armas Pasiring sa Pagliligtas nin Buhay

ISINAYSAY NI ISIDOROS ISMAILIDIS

Nakaluhod ako mantang nagbobolos an mga luha sa mga pisngi ko. “O, Dios, an sakong konsensia nagsasabi sa sako na dai ako puedeng magpadagos na magtrabaho sa paggibo nin mga armas,” an sabi ko sa pamibi. “Pinagmaigotan ko nang marhay na humanap nin ibang trabaho, alagad mayo akong nakua. Nuodma, isusumitir ko na an sakong surat nin pagdimitir. Tabi, Jehova, dai mo pagpabayaan an samong apat na aki na magutom.” Paano ako nakaabot sa kamugtakan na ini?

TONINONG asin simple an buhay sa Drama, amihanan na Grecia, na namundagan ko kan 1932. Parateng sinasabi sa sako kan sakong ama an manongod sa boot niang gibohon ko. Inenkaminar nia ako na magduman sa Estados Unidos tanganing mag-eskuela. Pakatapos na samsaman an Grecia durante kan Guerra Mundial II, an lakop na sarabihon kan mga Griego: “Puede nindong habonon an samong mga rogaring, alagad nungka nindong mahahabon an nasa samong isip.” Desidido akong kumua nin mas halangkaw na edukasyon asin magkaigwa nin sarong bagay na mayo nin makahahabon.

Poon sa pagkaaki, nag-ayon ako sa laen-laen na grupo nin mga hoben na suportado kan Iglesia Griego Ortodokso. Duman sinabihan kami na likayan an peligrosong mga sekta. Espesipikong nagirumdoman ko an sarong grupo—an Mga Saksi ni Jehova—na nasambitan, ta sinda daa an nagrerepresentar sa anticristo.

Pagkagradwar sa sarong teknikal na eskuelahan sa Atenas kan 1953, ako nagpa-Alemania tanganing helingon kun makakukua ako nin trabaho asin makakapag-eskuela nin sabay. Alagad daing nangyari, kaya nagduman ako sa ibang mga nasyon. Pakalihis nin pirang semana, naubosan na ako nin kuarta sa sarong duongan sa Belhika. Nagigirumdoman kong ako naglaog sa sarong simbahan, nagtukaw, asin nagtangis nin grabe kaya nagkaigwa nin mga toro nin luha sa salog sa atubangan ko. Namibi ako na kun tatabangan ako nin Dios na makaduman sa  Estados Unidos, dai ako mahanap nin materyal na mga bagay kundi maeskuela ako asin magmamaigot na magin marahay na Kristiano patin marahay na siudadano. Sa katapustapusi kan 1957, nag-abot ako duman.

Bagong Buhay sa Estados Unidos

An buhay sa Estados Unidos depisil para sa sarong dayo na dai tatao kan lenguahe asin mayo nin kuarta. Duwa an trabaho ko sa banggi asin maigot na naghingoang mag-eskuela sa aldaw. Nagkapirang kolehio an linaogan ko asin nakakua ako nin associate degree. Dangan naglaog ako sa Unibersidad nin California sa Los Angeles asin nakakua nin bachelor of science degree sa applied physics. An mga tataramon kan sakong ama manongod sa pagkaigwa nin edukasyon an nakatabang sa sako na magprosegir durante kan masakit na mga taon na ini.

Kan panahon na ini, nakamidbid ko an sarong magayon na babaeng taga Grecia, si Ekaterini, asin kinasal kami kan 1964. An samong enot na aking lalaki namundag pakaagi nin tolong taon, asin mayo pang apat na taon, nagkaigwa kami nin duwa pang aking lalaki asin sarong aking babae. Talagang masakit an magsustento nin pamilya asin kadungan kaiyan mag-adal sa unibersidad.

Nagtatrabaho ako sa Aviacion Militar kan E.U. sa kompanyang panmisil asin pan-espasyo sa Sunnyvale, California. Imbuelto ako sa laen-laen na proyektong pan-aire asin pan-espasyo, kabale an mga programang Agena asin Apollo. Nakaresibi pa ngani ako nin mga medalya huli sa sakong kontribusyon sa mga misyon na Apollo 8 asin Apollo 11. Pakatapos kaiyan, ipinadagos ko an sakong edukasyon asin naimbuelto akong marhay sa laen-laen na proyektong pan-espasyo kan militar. Sa puntong ini, an paghona ko kompleto na ako—sarong magayon na agom, apat na marahayon na aki, prestihiosong trabaho, asin magayon na harong.

Sarong Prosegidong Kaiba

Sa kapinonan kan 1967, sa trabaho, nakamidbid ko si Jim, sarong mapakumbaba asin maboot na marhay na lalaki. Si Jim garo baga pirmeng nakahuyom, asin nungka siang nagsasayuma kun inaagda ko na magmeryenda kami. Ginagamit nia an mga oportunidad na ini na maghiras sa sako nin impormasyon hale sa Biblia. Sinabi sa sako ni Jim na nakikipag-adal sia sa mga Saksi ni Jehova.

Nabigla akong madangog na si Jim naimbuelto sa sektang ini nin relihion. Paano nangyari na an siring karahay na tawo magigin biktima kan sekta kan anticristo? Minsan siring, dai ko masayumahan an personal na interes ni Jim sa sako asin an saiyang kabootan. Garo baga kada aldaw igwa sia nin ibang ipapabasa sa sako. Halimbawa, sarong aldaw nagduman sia sa opisina ko asin nagsabi: “Isidoros, an artikulong ini sa An Torrengbantayan may sinasabi manongod sa pagparigon sa buhay pampamilya. Ipuli mo iyan, asin basahon nindo iyan kan saimong agom.” Sinabi ko sa saiya na babasahon ko an isyu, alagad pagtaodtaod nagduman ako sa kasilyas asin pinarakit ko an magasin asin iinapon iyan sa basurahan.

Sa laog nin tolong taon, rinaot ko an lambang libro asin magasin na itinao sa sako ni Jim. Huling may salang paghona tumang sa Mga Saksi ni Jehova, pero hinihingoang papagdanayon si Jim bilang sakong katood, inisip ko na an pinakamarahay hinanyogon an saiyang sasabihon dangan lingawan iyan tolos-tolos.

Minsan siring, paagi sa mga pag-oolay na idto nasabotan ko na an kadaklan sa mga tinubod asin ginibo ko bakong  basado sa Biblia. Narealisar ko na an mga katokdoan na Trinidad, kalayo sa impierno, asin inmortalidad kan kalag bakong sono sa Kasuratan. (Eclesiastes 9:10; Ezequiel 18:4; Juan 20:17) Bilang may pag-orgolyong Griego Ortodokso, habo kong hayag na admitiron na tama si Jim. Alagad huling pirme niang ginagamit an Biblia asin nungkang nagtatao kan saiyang personal na opinyon, sa katapustapusi rinekonoser ko na an tawong ini igwa nin mahalagang marhay na mensahe hale sa Biblia para sa sako.

Nakarisa an agom ko, asin naghapot sia kun nakipag-olay ako sa sakong katood na asosyado sa mga Saksi. Kan sumimbag ako nin iyo, sinabi nia: “Dumuman na kita sa arin man na iba pang iglesia bako sanang sa Mga Saksi ni Jehova.” Minsan siring, dai nahaloy kami mag-agom, kaiba an samong mga aki, regular nang nag-aatender sa mga pagtiripon kan mga Saksi.

Sarong Depisil na Desisyon

Mantang pinag-aadalan ko an Biblia, nabasa ko an mga tataramon na ini ni propeta Isaias: “Dadaragopdopon ninda an saindang mga espada na magin tarom nin arado asin an saindang mga budyak na magin mga sanggot. An nasyon dai mabingat nin espada tumang sa nasyon, ni mag-aadal pa man sinda sa pakilaban.” (Isaias 2:4) Ihinapot ko sa sakong sadiri, ‘Paanong an lingkod nin sarong mamomoton sa katoninongan na Dios magtatrabaho sa pagdisenyo asin paggibo nin mapanlaglag na mga armas?’ (Salmo 46:9) Tolos akong nagkonklusyon na kaipuhan kong liwaton an sakong trabaho.

Siempre, dakulang angat ini. Prestihioso an trabaho ko. Nagsakit ako sa dakol na taon nin paghigos, edukasyon, asin mga pagsasakripisyo tanganing maabot ini. Inabot ko an halangkaw na puesto sa trabaho, asin uya nag-iisip ako na butasan an sakong karera. Minsan siring, an sakong hararom na pagkamoot ki Jehova asin makosog na pagmawot na gibohon an saiyang kabotan sa katapustapusi nangibabaw.—Mateo 7:21.

Nagdesisyon ako na magtrabaho sa sarong kompanya sa Seattle, Washington. Minsan siring, sa pagkadesganar ko, dai nahaloy nanompongan ko na ako orog pa nganing imbuelto sa trabaho na bakong kaoyon kan Isaias 2:4. Daing nangyari sa mga paghihingoa ko na magtrabaho sana sa ibang proyekto, asin sa giraray nakonsensia ako. Nasabotan ko nin malinaw na dai ako puedeng magpadagos sa trabaho asin kadungan kaiyan magdanay na malinig an konsensia.—1 Pedro 3:21.

Nagin malinaw na kaipuhan ming gumibo nin importanteng mga pagliliwat. Mayo pang anom na bulan, liniwat mi an samong estilo nin pamumuhay asin ininaan nin kabanga an mga gastos kan samong pamilya. Dangan ipinabakal mi an samong maluhong harong asin nagbakal nin sadit sa Denver, Colorado. Andam na ako ngonyan para sa ultimong lakdang—bayaan an trabaho ko. Minakinilya ko an sakong surat nin pagdimitir, na ipinaliliwanag an sakong paninindogan na sono sa konsensia. Kan bangging idto, kan torog na an mga aki, nagluhod kami kan sakong agom asin namibi kami ki Jehova, siring kan nasambitan sa kapinonan kan artikulong ini.

Mayo pang sambulan, buminalyo kami sa Denver, asin pakalihis nin duwang semana, kan Hulyo 1975, nabautismohan kaming mag-agom. Sa laog nin anom na bulan dai ako nakakua nin trabaho, asin luway-luway na nauubos mi an samong natipon. Kan ikapitong bulan, an balanse kan samong saray sa bangko kulang na sa bulanan na pambayad sa harong. Pinonan kong humanap nin ano man na  bakong regular na trabaho, alagad tolos-tolos pakatapos kaiyan nakakua ako nin trabaho sa inhenyeriya. An sueldo mga kabanga sana kan ginaganar ko kaidto; dawa siring, sobra pang marhay iyan sa hinagad ko ki Jehova. Kanigoan an kaogmahan ko na inenot ko an espirituwal na intereses!—Mateo 6:33.

Pagpadakula sa Samong mga Aki na Kamotan si Jehova

Mientras tanto sibot kami ni Ekaterini sa masakit na trabaho nin pagpadakula sa samong apat na aki kaoyon kan diosnon na mga prinsipyo. Nakaoogma, naheling mi sinda gabos, sa tabang ni Jehova, na nagin maygurang na mga Kristiano, na lubos na idinudusay an saindang buhay sa importanteng gibohon na paghuhulit kan Kahadean. An tolo ming aking lalaki, si Christos, Lakes, asin Gregory gabos naggradwar sa Paadalan sa Ministeryal na Pagsasanay asin ngonyan naglilingkod sa laen-laen na destino, na nagsosongko asin nagpapakosog sa mga kongregasyon. Si Toula, an samong aking babae, nagtatrabaho bilang boluntaryo sa opisina prinsipal kan Mga Saksi ni Jehova sa Nueva York. Napapahiro an samong puso mantang naheheling mi sinda gabos na isinasakripisyo an may posibilidad na umasensong mga karera asin halangkaw na sueldong mga trabaho tanganing makapaglingkod ki Jehova.

Dakol an naghapot kun ano an sekreto sa siring na mapangganang pagpadakula sa mga aki. Siempre, mayo nin depinidong pormula sa pagpadakula sa mga aki, alagad mahigos ming hiningoa na itadom sa saindang puso an pagkamoot ki Jehova asin kataed. (Deuteronomio 6:6, 7; Mateo 22:37-39) Nanodan kan mga aki na dai mi puedeng sabihon ki Jehova na namomotan mi sia kun dai iyan ipinaheheling kan samong mga gibo.

Sarong aldaw kada semana, sa parate Sabado, nakikabtang kami sa ministeryo bilang pamilya. Igwa kami nin regular na pampamilyang pag-adal sa Biblia kun Lunes na banggi pakapamanggi, asin tinokdoan mi man sa Biblia an balang indibiduwal na aki. Kan sadang pa an mga aki, nagkapirang beses kada semana na tinokdoan mi an balang aki sa halipot na mga peryodo, asin mantang nagkakaedad sinda, mas halawig na an mga pag-adal mi sarong beses kada semana. Durante kan mga pag-adal na ini, an mga aki mi nagpapahayag kan nasa boot ninda asin sueltong ipinakikipag-olay sa samo an saindang mga problema.

Nagkaigwa man kami nin nakaparirigon na pag-aling-aling bilang pamilya. Mahilig kaming magtogtog nin mga instrumento sa musika na magkairibanan, asin an balang aki gustong-gustong kantahon an saiyang paboritong mga kanta. Sa nagkapirang katapusan nin semana, iniimbitaran mi an ibang pamilya para sa nakaparirigon na asosasyon. Nagbabakasyon man kami bilang pamilya. Sa saro kan siring na mga biahe, duwang semana kami na naglibot sa kabukidan nin Colorado asin uminiba sa lokal na mga kongregasyon sa ministeryo sa langtad. Maogmang ginigirumdom kan samong mga aki an pagtrabaho sa pandistritong mga kombension sa laen-laen na departamento asin an pagtabang sa  pagtogdok nin mga Kingdom Hall sa laen-laen na lugar. Kan darahon mi an mga aki sa Grecia tanganing maheling an saindang mga paryente, nakamidbid man ninda an dakol na fiel na Saksi na nabilanggo huli sa saindang pagtubod. Hararom an nagin epekto kaini sainda, na tinatabangan sindang magdesisyon na magdanay na marigon asin makosog an boot para sa katotoohan.

Siempre, kun minsan an nagkapira sa mga aki nagpapasaway o nasasala sa pagpili nin mga kairiba. Kun minsan man, tinawan mi sinda nin mga problema huli sa pagigin tibaad sobra kaestrikto sa nagkapirang bagay. Alagad an paggamit kan “pagtatanos nin isip ni Jehova,” na yaon sa Biblia, nakatabang na itanos an mga bagay para sa samo gabos.—Efeso 6:4; 2 Timoteo 3:16, 17.

An Pinakamaogmang Panahon sa Buhay Ko

Pakatapos na lumaog sa bilog na panahon na ministeryo an samong mga aki, pinonan mi ni Ekaterini na pakaisipon nin seryoso kun ano an magigibo mi tanganing mapahiwas an samong kabtang sa gibohon na ini na pagliligtas-buhay. Sa siring, kan 1994, pakatapos kan sakong amay na pagretiro, pinonan ming duwa na maglingkod bilang regular payunir. Kabale sa samong ministeryo an pagdalaw sa lokal na mga kolehio asin unibersidad, kun saen nagpapatotoo kami sa mga estudyante asin namamayo nin mga pag-adal sa Biblia sa nagkapira sa sainda. Huli ta puede akong magsimpatiya sa saindang mga problema—ta inagihan ko man an saindang kamugtakan kaidtong pirang taon pa sana an nakaagi—mapanggana akong marhay sa pagtabang sa sainda na makanood manongod ki Jehova. Abaang kagayagayahan na makapagtokdo sa mga estudyanteng taga Bolivia, Brazil, Chile, Egipto, Etiopia, Mejico, Tailandia, Tsina, asin Turkiya! Nagpapatotoo man ako paagi sa telepono, nangorogna sa mga tawo na kapareho ko an propiong lenguahe.

Minsan ngani dakol an sakong limitasyon dahelan sa sakong matagas na punto sa pagtaram sa Griego asin paggurang, pirme kong hinihingoa na magin andam na gamiton asin magkaigwa kan espiritu ni Isaias, na nagsabi: “Uya ako! Sugoa ako.” (Isaias 6:8) Namatean mi an kagayagayahan sa pagtabang sa labing kabangang dosena na idusay an saindang buhay ki Jehova. Ini nanggad an nagin pinakamaogmang panahon para sa samo.

Kaidto, an bilog kong buhay nakasentro sa paggibo nin darakulaon na armas na pangadan sa mga kapwa tawo. Minsan siring, si Jehova, paagi sa saiyang dai na kutana maninigong kabootan, binuksan an dalan tanganing ako asin an sakong pamilya magin saiyang nagdusay na mga lingkod asin ikadusay an samong buhay sa pagpaabot sa mga tawo kan maogmang bareta dapit sa buhay na daing katapusan sa paraisong daga. Kun hinohorophorop ko an depisil na mga desisyon na kinaipuhan kong gibohon, minasabong an mga tataramon sa Malaquias 3:10: “‘Tabi baloa nindo ako sa bagay na ini,’ sabi ni Jehova nin mga hukbo, ‘kun baga dai ko bukasan sa saindo an mga gaha kan kalangitan asin ulaan ko kamo nin bendisyon sagkod na mayo na nin kulang.’” Talagang ginibo nia iyan—sa pagkakontento kan samong puso!

[Kahon/Ritrato sa pahina 27]

Lakes: Ikinaongis kan sakong ama an pagsaginsagin. Pinagmaigotan niang marhay na dai magin mapagsaginsagin, nangorogna sa pagtao nin tamang halimbawa sa saiyang pamilya. Parate niang sinasabi sa samo: “Kun idusay nindo an saindong buhay ki Jehova, dakulang bagay iyan. Kamo maninigo na magin andam na gumibo nin mga pagsasakripisyo para ki Jehova. Iyan an boot sabihon nin pagigin Kristiano.” Dai ko nalingawan an mga tataramon na iyan asin iyan nagpangyari sa sako na arogon an saiyang halimbawa sa paggibo nin pagsasakripisyo para ki Jehova.

[Kahon/Ritrato sa pahina 27]

Christos: Dakula an pagpahalaga ko sa bilog na kalag na kaimbodan kan sakong mga magurang ki Jehova asin sa saindang marigon na pag-otob kan saindang responsibilidad bilang magurang. Bilang pamilya, magkairibanan kami sa gabos—poon sa samong paglilingkod sagkod sa samong mga bakasyon. Minsan ngani puede kutana sindang nagin imbuelto sa kadakol na iba pang bagay, ginibo kan sakong mga magurang na simple an saindang buhay asin nagkonsentrar sa ministeryo. Ngonyan, aram ko na ako totoong maogmang marhay kun ako biyong sibot sa paglilingkod ki Jehova.

[Kahon/Ritrato sa pahina 28]

Gregory: Apuera sa mga pagparigon sa sako kan sakong mga magurang na pahiwason an sakong ministeryo, an saindang halimbawa asin an ebidensia kan saindang kagayagayahan sa paglilingkod ki Jehova nagpahiro sa sako na pag-adalan giraray an sakong mga kamugtakan, haleon an ano man na mga kahaditan asin kapurisawan manongod sa pagpopoon sa bilog na panahon na paglilingkod, asin orog pang magmaigot nin lubos sa gibohon ni Jehova. Nagpapasalamat ako sa sakong mga magurang sa pagtabang sa ako na manompongan an kagayagayahan na minagikan sa sakong pagmamaigot.

[Kahon/Ritrato sa pahina 28]

Toula: Pirmeng idinoon kan sakong mga magurang na an samong relasyon ki Jehova iyo an pinakamahalagang bagay na puedeng mapasamuya noarin man asin na an solamenteng paagi na puede nanggad kaming magin totoong maogma iyo an pagtao ki Jehova kan samong pinakamakakaya. Ginibo ninda si Jehova na magin tunay na marhay para sa samo. Parateng sinasabi sa samo kan sakong ama na igwa nin dai ikaladawan na pakamate an pakatorog kun banggi na may malinig na konsensia, sa pakaaram na hiningoa mong gibohon an saimong pinakamakakaya na paogmahon si Jehova.

[Ritrato sa pahina 25]

Kan ako soldados sa Grecia, 1951

[Ritrato sa pahina 25]

Kaiba si Ekaterini kan 1966

[Ritrato sa pahina 26]

Kaiba an sakong pamilya kan 1996: (wala patoo, sa likod) si Gregory, Christos, Toula; (sa atubangan) si Lakes, Ekaterini, asin ako