Bareta kan mga Parabalangibog kan Kahadean

Mahalagang Marhay ki Jehova an mga Namomoot sa Saiya

AN Libano nagin bantog huli sa natural na kayamanan kaiyan poon pa kan mga panahon kan Biblia. (Salmo 72:16; Isaias 60:13) Espesyalmenteng pinahalagahan an nakagugulat na mga sedro kaiyan, na hinanap na gayo bilang materyales sa pagtogdok huli sa gayon, hamot, asin pagigin matagal kaiyan. Kan enot na siglo, sarong bagay na orog kahalagang marhay an nagluwas sa Libano. An Ebanghelyo ni Marcos nagbabareta na hale sa Tiro asin Sidon, sa suanoy na teritoryo nin Libano, “an sarong dakulang kaburunyogan, kan madangog an kadakol na bagay na ginigibo [ni Jesus], nagduruman sa saiya.”—Marcos 3:8.

Ngonyan man, an Libano padagos na namumunga nin mahalagang marhay sa pagheling ni Jehova. Itinatampok ini kan minasunod na mga eksperyensia.

• An sarong hoben na Saksi na an ngaran Wissam pinapagtaram nin 30 minutos sa saiyang klase sa eskuelahan. Si Wissam nagdesisyon na magigin marahay na oportunidad ini na magpatotoo. Kaya ginamit nia an librong Life—How Did It Get Here? By Evolution or by Creation? asin nag-andam nin pahayag dapit sa tema na paglalang. Minsan siring, kan maheling an materyal, an maestro ni Wissam nagsabi na huling marahayon iyan na tema, puedeng idagos ni Wissam an saiyang pahayag sagkod sa 45 minutos.

Mantang pinoponan ni Wissam an saiyang pahayag, pinapondo nguna sia kan saiyang maestro asin ipinaapod an prinsipal. Dai nahaloy uminabot an prinsipal, asin nagpoon giraray si Wissam. Mantang naghihinanyog sia sa mga ihinapot ni Wissam sa introduksion kan saiyang pahayag, naogmang marhay an prinsipal asin nagsabi na an gabos na estudyante maninigong tawan nin seroks kan pahayag.

Pagtaodtaod an saro pang maestro, na nag-aagi, narisa an kaorogmahan sa klase asin naghapot kun ano an nangyayari. Kan sabihon sa saiya, naghapot sia kun baga paglalang o ebolusyon an hinihingoa ni Wissam na patunayan. “Paglalang,” an simbag. Kan maaraman na si Wissam saro sa Mga Saksi ni Jehova, an maestro nagsabi sa klase: “Maheheling nindo sa saiyang pahayag na an siensia nagsusuportar sa paglalang, bakong sa ebolusyon.”

Kaya palan ta an maestrong ini igwa nin kopya kan librong Creation asin ginagamit nia iyan sa pagtao nin mga lektura sa unibersidad! Bago naghale, naghapot sia kun baga puede siang bumalik sa sunod na aldaw kaiba an saiyang mga estudyante tanganing makapagpahayag sa klase nia si Wissam. Nagbunga iyan nin saro pang marahay na patotoo ki Jehova.

• An 22 anyos na si Nina napapaha sa tubig nin katotoohan. Sarong aldaw an saiyang pinsan tinawan sia nin Biblia asin ipinamidbid sia sa Iglesia Pentecostal. May kaogmahan na binasa ni Nina an Biblia asin nanodan nia sa pagbasa nia na an mga Kristiano maninigo na maghulit, kaya pinonan niang makipag-olay sa saiyang mga kamidbid. An gabos na kinaolay nia hinapot sia: “Saro ka sa Mga Saksi ni Jehova?” Pinapag-isip-isip sia kaiyan.

Pakalihis nin anom na taon, an mga Saksi ni Jehova nagsongko sa harong ni Nina asin sinabi sa saiya an manongod sa Kahadean nin Dios. Kan primero hiningoa niang hanapan nin sala an saindang mga katokdoan. Minsan siring, nanompongan nia na an gabos nindang simbag lohiko asin basado sa Biblia.

An sa katapustapusi nanodan ni Nina—an ngaran nin Dios, Jehova; an mga bendisyon kan Kahadean; asin iba pa—nakakombensir sa saiya na nanompongan na nia an katotoohan. Idinusay nia an saiyang buhay sa Dios asin nagpabautismo. Sa laog kan nakaaging pitong taon, si Nina naglingkod bilang pambilog na panahon na paraebanghelyo. Tunay nanggad, binebendisyonan ni Jehova an mga igwa nin tunay na pagkamoot sa saiya.—1 Corinto 2:9.