Paggalang sa Autoridad—Taano ta Mahalagang Marhay?

SIISAY an dai magpapasalamat na an mga pulis igwang autoridad na arestaron an mga kriminal na naghahabon kan satong mga rogaring o nagsasapeligro sa satong pamilya? Asin dai daw niato inaapresyar na an mga korte igwang autoridad na padusahan an mga kriminal tanganing protehiran an komunidad?

An iba pang nakatatabang na mga serbisyo publiko, arog kan mantension sa tinampo, sanitasyon, asin edukasyon—na sa parate binabayadan kan mga buhis na ipinapataw kan autoridad nin gobyerno—tibaad sumabong man sa isip. An tunay na mga Kristiano nangengenot sa pagrekonoser na mahalagang marhay an paggalang sa nombradong autoridad. Alagad sagkod saen an paggalang na iyan? Asin sa anong mga kabtang nin buhay kinakaipuhan an paggalang sa autoridad?

Autoridad sa Komunidad

An Biblia nagsasabi sa gabos na tawo, may pagtubod man o dai, na igalang an autoridad sibil, na nagtatrabaho para sa ikararahay kan komunidad. An Kristianong apostol na si Pablo nagsurat sa saiyang mga kapagtubod sa Roma manongod kaini, asin makatatabang na estudyaran an sinasabi nia, na nakasurat sa Roma 13:1-7.

Si Pablo siudadano nin Roma, asin an Roma iyo an pankinaban na kapangyarihan kan panahon na idto. An surat ni Pablo, na isinurat kan mga taon 56 C.E., nagkonseho sa mga Kristiano na magin arogan na siudadano. Isinurat nia: “An lambang kalag magpasakop sa superyor na mga autoridad, huli ta mayo nin autoridad na dai itinogot nin Dios; an nagdadanay na mga autoridad nagtitirindog sa saindang relatibong mga kamugtakan na itinogot nin Dios.”

Ipinaliliwanag digdi ni Pablo na dai magkakaigwa nin ano man na autoridad nin tawo kun dai iyan tinogotan nin Dios. Sa sentido na iyan, an superyor na mga autoridad igwa nin relatibong kamugtakan oyon sa itinotogot kan katuyohan nin Dios. Tama sana kun siring na “an minatumang sa autoridad minatumang sa areglo nin Dios.”

Mantang an mga siudadano na marahay an gibo tibaad omawon kan superyor na mga autoridad, an mga autoridad na ini tinawan man nin kapangyarihan na magpadusa tumang sa mga nagkakasala. An mga maraot an gibo igwa nin bastanteng dahelan na matakot sa diretso kan mga autoridad na humiro bilang “sarong parabalos,” huling ginigibo iyan kan mga gobyerno bilang “ministro nin Dios.”

 Tinapos ni Pablo an saiyang pangangatanosan paagi sa pagsabi: “Kun siring igwa nin mapuersang dahelan na kamo magpasakop, bako sanang huli sa grabeng kaanggotan na iyan kundi huli man sa saindong konsensia. Huli ta iyan an dahelan na kamo man nagbabayad nin buhis; huli ta sinda mga lingkod nin Dios sa publiko na danay na naglilingkod sa katuyohan mismong ini.”

An responsibilidad kaidto sa paggamit kan mga buhis yaon sa superyor na mga autoridad, bakong sa mga nagbabayad nin buhis. Bilang onestong siudadano, an Kristiano nagpapadanay nin marahay na konsensia. Aram nia na paagi sa pagpasakop nia sa superyor na mga autoridad asin pagbayad nin talaan na buhis, bako sanang sinusuportaran nia an pamantayan kan komunidad na ineerokan nia kundi namumuhay man sia kaoyon kan mga kahagadan nin Dios.

An Pamilya Asin Autoridad

Kumusta man an autoridad sa pamilya? Sa enot na mga aldaw nin buhay kaiyan, an sarong omboy sa parate mahagad nin atension paagi sa paghibi o pagkagrit pa ngani. Alagad an madonong na magurang mamansayon an totoong mga pangangaipo kan omboy asin dai totogotan na an pag-alboroto an magdikta. May mga aki na mantang nagdadakula, tinatawan nin libertad asin tinotogotan na gumibo kan sadiri nindang mga pamantayan. Huling kulang sa eksperyensia, sinda tibaad maimbuelto sa krimen o iba pang salang gibo, na riniribok an pamilya sagkod an komunidad sa kabilogan, na aram na aram kan dakol na lokal na autoridad.

“Huri nang marhay an pagdisiplina nin mga magurang sa mga aki,” an sabi ni Rosalind Miles, autor kan Children We Deserve. “An panahon na pumoon iyo an panahon na mamundag an aki.” Kun sa kapinonan pa sana an pagtaram kan mga magurang sa tingog na maboot, may pagmakolog na autoridad asin sinda daing liwat-liwat sa saindang ginigibo, dai mahaloy manonodan kan saindang mga aki na akoon an autoridad na iyan asin an mamomoton na disiplina na naggigikan dian.

An Biblia kadakol nin impormasyon mapadapit sa autoridad sa pamilya. Sa librong Talinhaga, dinadara kan madonong na tawong si Salomon an atension sa pagkakasaro kan may takot sa Dios na mga magurang sa atubangan kan saindang mga aki, na nagsasabi: “Paghinanyog, aki ko, sa disiplina kan saimong ama, asin dai mo pagpabayaan an ley kan saimong ina.” (Talinhaga 1:8) Kun pinapagdadanay kan mga magurang an klaseng iyan nin rasonableng pagkakasaro sa atubangan kan saindang mga aki, aram kan mga aki kun saen sinda mamumugtak. Tibaad probaran ninda na pag-iwalon an mga magurang sa paghingoang makua an gusto ninda, alagad an nagkakasarong autoridad nin mga magurang sarong proteksion sa mga aki.

An Biblia nagpapaliwanag na an agom na lalaki an may pangenot na paninimbagan sa espirituwal na ikararahay bako sanang kan saiyang mga aki kundi siring man kan saiyang agom na babae. Inaapod ini na pagkapayo. Paano dapat gamiton an pagkapayo na ini? Sinabi ni Pablo na kun paanong si Cristo iyo an Payo kan kongregasyon an lalaki iyo man an payo kan saiyang agom na babae. Dangan idinugang ni Pablo: “Mga agom na lalaki, padagos nindong mamotan an saindong agom na babae, kun paanong an Cristo namoot man sa kongregasyon [an saiyang espirituwal na nobya] asin iinatang an saiya man sana dahel kaiyan.” (Efeso 5:25) Kun sinusunod nin lalaki an halimbawa ni Jesus asin ginagamit an pagkapayo sa mamomoton na paagi, kakamtan nia an “hararom na paggalang” kan saiyang agom. (Efeso 5:33) Masasabotan man kan mga aki sa siring na pamilya an halaga kan tao nin Dios na autoridad asin madadagka sinda na akoon iyan.—Efeso 6:1-3.

Paano maaatubang kan nagsosolong mga magurang, kabale an mga nagadanan nin agom, an isyung ini? Ama man o ina, puede nindang arangon nin direkta an autoridad ni Jehova Dios asin ni Jesu-Cristo. Si Jesus pirmeng nagtataram na may autoridad—autoridad kan saiyang Ama asin  kan ipinasabong na Kasuratan.—Mateo 4:1-10; 7:29; Juan 5:19, 30; 8:28.

An Biblia nagtatao nin kadakol na mapakikinabangan na marhay na prinsipyo na konektado sa mga problema na inaatubang nin mga aki. Paagi sa paghanap sa mga prinsipyong ini asin pagsunod dian, an sarong magurang makatatao nin mamomoton asin nakatatabang na hatol sa mga aki. (Genesis 6:22; Talinhaga 13:20; Mateo 6:33; 1 Corinto 15:33; Filipos 4:8, 9) An mga magurang puede man na kumonsulta sa materyal na basado sa Biblia na espesipikong dinisenyo sa pagtabang sa sainda na sanayon an saindang mga aki na apresyaron an mga pakinabang sa paggalang sa autoridad kan Kasuratan. *

An Kristianong Kongregasyon Asin Autoridad

“Ini an sakong Aki, an namomotan, na sakong inoyonan; maghinanyog kamo sa saiya.” (Mateo 17:5) An mga tataramon na ini, na itinaram mismo ni Jehova Dios, nag-aprobar ki Jesus bilang saro na nagtataram na may autoridad nin Dios. An saiyang sinabi nakasurat sa pagkasaysay kan apat na Ebanghelyo na madali niatong konsultahon.

Kan madali na siang sumakat sa langit, inimpormaran ni Jesus an saiyang mga disipulo: “An gabos na autoridad sa langit asin sa daga itinao na sa sako.” (Mateo 28:18) Bilang Payo kan saiyang kongregasyon, bako sanang binantayan ni Jesus an saiyang linahidan na mga parasunod digdi sa daga kundi, poon kan ibubo an banal na espiritu kan Pentecostes 33 C.E., ginamit man nia sinda bilang pinakapaagihan kan katotoohan, bilang sarong “fiel asin madonong na oripon.” (Mateo 24:45-47; Gibo 2:1-36) Ano an ginibo nia sa paghaman kaini gabos tanganing pakosogon an Kristianong kongregasyon? “Kan sia magsakat sa kaitaasan . . . , nagtao sia nin balaog na mga lalaki.” (Efeso 4:8) An “balaog na mga lalaki” na ini iyo an Kristianong kamagurangan, na ninombrahan kan banal na espiritu asin tinawan kan autoridad sa pag-asikaso kan espirituwal na intereses kan mga kapagtubod.—Gibo 20:28.

Sa dahelan na ini si Pablo naghahatol: “Girumdoma nindo idtong mga nangengenot sa saindo, na nagtaram kan tataramon nin Dios sa saindo, asin mantang pinaghohorophorop nindo an resulta kan saindang gawe-gawe aroga nindo an saindang pagtubod.” Mantang estriktong sinusundan kan fiel na mga lalaking ini an mga lakad ni Jesus, madonong nanggad na arogon an saindang pagtubod. Dangan idinugang ni Pablo: “Magin kamong makinuyog duman sa mga nangengenot dian sa tahaw nindo asin magin mapagpasakop, [“padagos na rekonoseron an saindang autoridad sa saindo,” The Amplified Bible] huli ta sinda nagbabantay sa saindong kalag bilang an mga maninimbag; tanganing ini magibo nindang may kagayagayahan asin bakong may pag-agagha, huli ta ini makararaot sa saindo.”—Hebreo 13:7, 17.

Ano an nangyayari kun binabasangbasang an instruksion na iyan? Iyan nanggad an ginibo kan nagkapirang miembro kan enot na Kristianong kongregasyon asin sinda nagin apostata. Si Himeneo asin Fileto nasambitan bilang mga lalaki na linaglag an pagtubod nin nagkapira asin na an daing datang mga tataramon ‘naglapas sa banal.’ An saro sa mga deklarasyon ninda iyo na an pagkabuhay liwat nangyari na, na minalataw na magsalang espirituwal o simboliko, asin kun siring mayo nang pagkabuhay liwat sa ngapit sa pagsakop kan Kahadean nin Dios.—2 Timoteo 2:16-18.

Suminukoro an nombradong autoridad. Napatunayan kan Kristianong kamagurangan na falso an siring na mga argumento huli ta bilang mga  representante ni Jesu-Cristo, ginamit ninda an autoridad kan Kasuratan. (2 Timoteo 3:16, 17) Totoo man iyan ngonyan sa Kristianong kongregasyon, na ilinaladawan bilang “sarong harigi asin sulay kan katotoohan.” (1 Timoteo 3:15) Nungkang totogotan an falsong mga katokdoan na raoton “an arogan nin ikararahay na mga tataramon,” na iningatan para sa sato bilang sarong marahayon na ipinaniwala sa laog kan mga pahina kan Biblia.—2 Timoteo 1:13, 14.

Mantang an paggalang sa autoridad marikas na nawawara sa kinaban, bilang mga Kristiano rinerekonoser niato na an tamang mga autoridad sa komunidad, sa pamilya, asin sa Kristianong kongregasyon inestablisar para sa satong pakinabang. An paggalang sa autoridad mahalagang marhay para sa satong ikararahay sa pisikal, emosyonal, asin espirituwal. Paagi sa pag-ako asin paggalang sa siring na tao nin Dios na mga autoridad, kita poprotehiran kan nakalalabi sa gabos na autoridad—si Jehova Dios asin si Jesu-Cristo—para sa satong daing sagkod na ikararahay.—Salmo 119:165; Hebreo 12:9.

[Nota sa Ibaba]

[Blurb sa pahina 5]

An Biblia igwa nin dakol na impormasyon mapadapit sa autoridad sa pamilya

[Ritrato sa pahina 6]

Puedeng arangon nin direkta kan nagsosolong mga magurang an autoridad ni Jehova Dios asin ni Jesu-Cristo

[Mga Ritrato sa pahina 7]

Rinerekonoser kan mga Kristiano na an tamang mga autoridad sa pamilya, sa Kristianong kongregasyon, asin sa komunidad inestablisar para sa saindang pakinabang

[Picture Credit Line sa pahina 4]

Rinetrato ni Josh Mathes, Koleksion kan Korte Suprema kan Estados Unidos