Paggalang sa Autoridad—Taano ta Nawawara?

“An pakisuway sa inestablisar na autoridad, relihioso asin sekular, sosyal asin politikal, bilang pambilog na kinaban na situwasyon, tibaad pag-abot nin aldaw ibibilang na pambihirang pangyayari sa huring dekada.”

DAKOL nang taon an nag-agi poon kan mga taon nin 1960, an dekada na sinambit digdi kan historyador asin pilosopo na si Hannah Arendt. Ngonyan, an paglakop nin dai paggalang sa autoridad mas makosog kisa kasuarin man.

Halimbawa, an sarong dai pa sana nahahaloy na bareta sa The Times nin Londres nagsasabi: “May mga magurang na habong akoon an autoridad kan paratokdo sa saindang aki asin nagrereklamo sinda kun may mga pagprobar na disiplinahon an saindang aki.” Sa parate, kun an saindang mga aki dinidisiplina sa eskuelahan, an mga magurang minaduman bako sanang tanganing takoton an mga paratokdo kundi atakehon sinda.

An sarong representante sa pagtaram para sa Nasyonal na Asosasyon nin Namamayong mga Paratokdo sa Britania kinotar na nagsasabi: “An publiko nagsasabi na ‘May diretso ako,’ imbes na ‘May responsibilidad ako.’” Apuera sa dai pakatadom sa saindang mga aki nin tamang paggalang sa autoridad, may mga magurang na dai itinatanos an saindang mga aki—asin habo na gibohon iyan kan iba. An mga aki na nag-iinsistir kan saindang “diretso” tinotogotan na menuson an autoridad kan mga magurang sagkod kan mga paratokdo, asin masasabi an resulta—“sarong henerasyon na mayo nin paggalang sa autoridad asin mayo nin ideya dapit sa tama asin sala,” an isinurat kan kolumnistang si Margarette Driscoll.

An magasin na Time sa artikulo kaiyan na “Lost Generation” (sa Bicol, “Nalagalag na Henerasyon”) sinambit an pagkadesganar kan dakol na hoben na Ruso paagi sa pagkotar sa sarong sikat na parakanta nin rap na nagsabi: “Paano magkakaigwa nin kompiansa sa sosyedad an siisay man na namundag sa kinaban na ini, kun saen mayo nin naghahaloy asin mayo nin pagkapantaypantay?” An sosyologong si Mikhail Topalov ipinahayag an sentimientong ini: “An mga aki na ini bakong patal. Naheling ninda an saindang mga magurang na dinaya kan estado, naheling ninda sinda na nawaran kan saindang mga natipon asin trabaho. Malalaoman ta daw sinda na igagalang an autoridad?”

Minsan siring, salang ikonklusyon na an pagdiskompiar sa autoridad maheheling sana sa henerasyon nin kaakian. Ngonyan, an mga tawo ano man an edad diskompiado sa ano man na klase nin autoridad, nasusuya pa ngani. Nangangahulogan daw ini na mayo nin autoridad na puedeng pagkompiaran? Kun ginagamit nin tama, an autoridad, na tinatawan nin kahulogan na “kapangyarihan o diretso na magkontrol, maghusgar, o magprohibir sa hiro-hiro nin iba,” puedeng magin puersa para sa ikararahay. Pakikinabangon kaiyan an mga indibiduwal sagkod an komunidad. Ipaliliwanag kan minasunod na artikulo kun paano ini.